ꓴꓢ ꓐꓳꓽ ꓞꓰ ꓙꓱ ꓦꓲ ꓲ-ꓣ ꓗꓴꓷꓼ ꓔꓯ ꓙꓱ ꓟꓸ ꓔꓬ

ꓮ ꓔꓳꓸ ꓟꓲꓸ ꓐꓳꓽ ꓚꓰꓼ ꓔꓬ ꓟ ꓲ-ꓣ ꓗꓴꓷꓼ ꓔꓯ ꓟꓲ ꓠꓯ ꓗꓴꓷꓼ ꓓꓽ ꓐꓴˍ ꓐꓰ ꓖꓪ ꓙꓱ ꓖꓪ ꓟꓴ ꓚꓱꓹ ꓗꓪ ꓪꓴꓸ ꓔꓴ ꓡ ꓠꓹ ꓟ ꓟꓲ ꓠꓯ ꓔꓱꓹ ꓫꓵ ꓬꓲ ꓡꓴꓽ ꓐꓱ ꓕꓲ ꓟꓵꓽ ꓗꓪ꓾ 2021 ꓘꓳꓼ 10 ꓦ 29-30 ꓠꓬꓲ ꓕꓯꓽ꓾ ꓴꓢ ꓐꓳꓽ ꓞꓰ ꓙꓱ ꓦꓲ the Rockwell B-1 Lancer ꓐꓰ ꓟꓯꓼ ꓢꓰꓼ ꓙꓱ ꓦꓲ ꓜꓴ ꓕꓲ ꓜꓴ ꓙꓱ ꓚꓳ ꓟꓸ ꓖꓶ ꓗꓷꓳ꓿

ꓴꓢ ꓗ ꓛꓳꓽ ꓗꓴꓷꓼ ꓐꓴ ꓥ ꓟ ꓬꓲ-ꓢꓷ-ꓡꓰ꓾ ꓢꓳ-ꓓꓰ꓾ ꓐ-ꓬꓲꓹ- ꓬꓲ-ꓙꓲꓽ ꓗꓴꓷꓼ ꓐꓴ ꓥ ꓟꓲ ꓴꓢ ꓐꓳꓽ ꓞꓰ ꓙꓱ ꓦꓲ ꓜꓴ ꓔꓯ ꓔꓺ ꓛꓳ ꓢꓲꓸ ꓬꓲ ꓪ ꓗꓴꓷꓼ ꓗꓪ ꓛꓲ ꓡ ꓕꓯꓽ ꓗꓽ ꓙ ꓡꓳꓸ ꓙ ꓢꓯꓼ ꓖꓶ ꓙꓱ ꓔꓴ ꓡ ꓡꓳ꓿

ꓮ ꓔꓳꓸ ꓟꓲꓸ ꓐꓳꓽ ꓟꓯꓼ ꓢꓰꓼ ꓶ ꓤ (nuclear weapons) ꓔꓯ ꓟꓳꓸ ꓖꓪ ꓙꓱ ꓡ ꓠꓹ ꓟ ꓠꓶ ꓛꓳꓽ ꓕꓲ ꓛꓳ ꓗꓴꓷꓼ ꓐꓴ ꓡꓰ ꓮ ꓘꓶꓸ ꓓꓰꓽ ꓔꓬ ꓟꓲ ꓲ-ꓣ ꓗꓴꓷꓼ ꓡꓰꓽ ꓟꓽ ꓓꓽ ꓔꓳꓹ ꓡ ꓠꓬꓲ꓾ ꓕꓱ ꓡꓱ ꓟꓯꓼ ꓙꓱ ꓦꓲ ꓙꓱ ꓟꓸ ꓢꓴꓸ ꓚꓳꓹ ꓖꓶ ꓠ ꓗꓷ ꓡꓰ ꓟ ꓥ ꓡꓳ꓿

“ꓖꓪ ꓙꓱ ꓚꓱꓹ ꓠꓽ ꓮ ꓡꓻ ꓖꓴ ꓡꓰ ꓐꓰ ꓗꓹ ꓡꓳ” ꓐꓰ ꓴꓢ ꓐꓶꓽ ꓗꓴꓷꓼ ꓙ ꓡꓯ ꓘꓳ ꓢꓲꓽ ꓒ ꓐꓶ-ꓡꓲ-ꓗꓲ (Antony Blinken) ꓡꓰ ꓐꓯ ꓡ ꓟ ꓟꓶ ꓤ ꓟꓽ ꓥ ꓢꓰꓽ ꓕꓯ ꓕꓱ ꓡꓱ ꓴꓢ ꓟꓯꓼ ꓢꓯꓼ ꓪꓽ ꓟꓸ ꓖꓶ ꓩꓴ ꓡ ꓟ ꓥ ꓡꓳ꓿

ꓢꓳꓴꓣꓚꓰ- ꓚꓠꓮ