ꓲ-ꓓꓲ-ꓬ ꓗꓴꓷꓼ ꓟꓳꓹ-ꓡꓯꓸ ꓡꓳ ꓒꓱ ꓡ ꓞꓳ 2 ꓣꓳ ꓠꓬ꓾ ꓟꓬ-ꓟ ꓗꓴꓷꓼ ꓔ-ꓟꓴꓹ ꓡꓳ ꓒꓱ ꓗꓪ ꓐꓶ ꓢꓰꓼ ꓗꓸ ꓠꓯꓸ ꓫꓵꓻ ꓟꓳ ꓟꓽ ꓡꓲꓸ ꓖꓶꓽ ꓡ ꓠꓬꓲ ꓟꓳꓹ-ꓡꓯꓸ ꓡꓳ ꓒꓱ ꓢꓴ ꓠꓲꓹ ꓦꓶ ꓡ ꓢꓲꓸ ꓟꓬ-ꓟ ꓑꓳ-ꓡꓲ ꓟꓯꓼ ꓦꓲ ꓔꓯ 2022 ꓘꓳꓼ 7 ꓦ 6 ꓠꓬꓲ ꓕꓯꓽ ꓮ ꓔꓳꓸ ꓛꓴ ꓗꓷꓳ꓿
ꓐꓶ ꓢꓰꓼ ꓡ ꓟ ꓔꓯ ꓟꓳꓸ ꓠꓬ꓾ 2022 ꓘꓳꓼ 7 ꓦ 5 ꓠꓬꓲ ꓕꓯꓽ ꓲ-ꓓꓲ-ꓬ ꓗꓴꓷꓼ ꓡ ꓞꓳ 2 ꓣꓳ ꓟꓬ-ꓟ ꓗꓴꓷꓼ ꓔ-ꓟꓴꓹ ꓡꓳ ꓒꓱ ꓗꓪ ꓶ ꓤ ꓶ ꓟꓲ ꓔꓯ ꓟꓳ ꓓꓳ ꓗꓪ ꓐꓰ ꓚꓰꓹ ꓦ ꓡ ꓕꓯꓽ ꓑꓬꓴ-ꓜꓳꓹ-ꓕꓲꓸ ꓟꓬꓱꓺ ꓔꓸ ꓟ ꓟꓬ-ꓟ ꓟꓯꓼ ꓔꓯ ꓔꓺ ꓢꓴ ꓟꓯꓼ ꓐꓴ ꓡꓰ ꓡꓳ ꓒꓱ ꓔꓱꓹ ꓫꓵꓺ ꓗꓪ ꓟꓳꓼ ꓡꓳ ꓟꓶꓼ ꓫꓵꓺ ꓐꓶ ꓢꓰꓼ ꓗꓷ ꓟ ꓥ ꓡꓳ꓿
ꓟꓳꓹ-ꓡꓯꓸ ꓡꓳ ꓒꓱ ꓢꓴ ꓐꓴ ꓡꓰ ꓟꓬ-ꓟ ꓑꓳ-ꓡꓲ ꓟꓯꓼ ꓦꓲ ꓔꓯ ꓮ ꓔꓳꓸ ꓛꓴ ꓗꓷ ꓡ ꓠꓬꓲ꓾ ꓲ-ꓓꓲ-ꓬ ꓟꓯꓼ ꓐꓴ ꓡ ꓢꓲ꓾ ꓟꓳꓹ-ꓡꓯ ꓡꓳ ꓒꓱ ꓡ ꓞꓳ ꓐꓴ ꓔꓯ ꓡ ꓛꓴꓸ 15 ꓕꓶꓹ ꓛꓲ ꓐꓶ ꓚꓳꓹ ꓢꓲꓸ ꓗꓽ ꓡ ꓡꓳ꓾ ꓐꓯ ꓡꓳ꓿
ꓟꓳꓸ-ꓡꓯꓹ ꓡꓳ ꓒꓱ ꓐꓰ ꓔ-ꓟꓴꓹ ꓡꓳ ꓒꓱ ꓠꓬ ꓲꓸꓼꓓꓲ-ꓬ ꓗꓴꓷꓼ ꓐꓰ ꓟꓬ-ꓟ ꓗꓴꓷꓼ ꓟꓵꓽ ꓫꓸ ꓗ ꓘꓶꓽ ꓗꓪ ꓒꓻ ꓕꓲ ꓜꓲꓽ ꓔꓸ ꓟ ꓡꓳ ꓒꓱ ꓠꓬꓲꓽ ꓟ ꓥ ꓡꓳ꓿
ꓝꓮꓲ ꓠꓬꓲꓸ ꓠꓬꓲ ꓠꓬ ꓟꓳꓹ-ꓡꓯꓸ ꓡꓳ ꓒꓱ ꓑ ꓫꓬꓽ ꓐꓴ ꓘꓴ ꓔꓴ ꓔꓬ ꓡꓳ꓿
ꓟꓬ-ꓟ ꓟꓯꓼ ꓐꓳꓽ ꓞꓰ ꓙꓱ ꓦꓲ ꓕꓮꓲꓹ ꓟꓵꓽ ꓗꓪ ꓫꓵꓸ ꓙ ꓙꓰˍ ꓡ ꓢꓲꓸ ꓦꓲ ꓔꓯ ꓐꓶ ꓜꓯꓼ ꓡ ꓟ ꓐꓰ꓾ ꓮ ꓟꓶ ꓲ-ꓓꓲ-ꓬ ꓡ ꓞꓳ ꓠꓬꓲꓽ ꓣꓳ ꓟꓬ-ꓟ ꓘꓴꓽ ꓗꓪ ꓐꓶ ꓢꓰꓼ ꓡ ꓟ꓾ ꓝꓮꓲ ꓟꓬ-ꓟ ꓟꓯꓼ ꓛꓰꓹ ꓢꓴ ꓑ ꓫꓬ ꓔꓴ ꓔꓴ ꓟꓶꓽ ꓟꓶꓽ ꓐꓴ ꓗꓴꓷꓼ ꓠꓬꓲꓽ ꓟ ꓕꓲ ꓡꓲ ꓗꓪ ꓓꓵꓽ ꓡ ꓔꓬ ꓠꓬ ꓟꓬ-ꓟ ꓗꓴꓷꓼ ꓗꓪ ꓢꓴꓺ ꓔꓴˍ ꓟ ꓬꓲ ꓡꓯꓼ ꓟꓰꓼ ꓲ-ꓓꓲ-ꓬ ꓐꓰ ꓕꓮꓲꓹ ꓗꓴꓷꓼ ꓗꓪ ꓓꓶꓽ ꓜꓯꓼ ꓡ ꓟ ꓥ ꓡꓳ꓿
ꓟꓬ-ꓟ ꓑ ꓫꓬ ꓐꓴ ꓠꓲꓹ ꓟ ꓗꓪ ꓕꓮꓲꓹ ꓐꓰ ꓲ-ꓓꓲ-ꓬ ꓗꓴꓷꓼ ꓙꓵꓽ ꓢꓴ ꓐꓴ ꓠꓬ ꓟꓬ-ꓟ ꓟꓯꓼ ꓜꓲꓽ ꓐꓴ ꓔꓯ ꓔꓺ ꓙ ꓔꓬ ꓡꓳ꓾ ꓐꓰ ꓢꓪꓼ ꓔꓬ ꓡꓳ꓿
ꓓꓳꓽ ꓬꓲꓸ ꓚꓰ꓾ ꓜꓮꓡꓰꓠ