ꓲꓚꓙ ꓗꓪ ꓫꓵꓽ ꓪꓴ ꓠ ꓟꓹ ꓓꓴ ꓟꓬ-ꓟ ꓝꓲ ꓓꓴ ꓐꓴ ꓠꓯ-ꓔ-ꓡ ꓗꓪ ꓛꓲ ꓔꓬꓳ

ꓐꓶꓽ ꓗꓴꓷꓼ ꓙ ꓡꓯ ꓘꓳ ꓜꓴ ꓳ-ꓗꓳ-ꓗꓳ-ꓡꓮꓲꓽ ꓧꓳꓽ ꓪꓴꓸ ꓟꓴˍ ꓟ ꓟꓬ-ꓟ ꓗꓴꓷꓼ ꓐꓱ ꓶ ꓐꓯ ꓟꓴ ꓔꓳꓹ ꓡꓯ ꓘꓳ ꓜꓴ ꓠꓬ ꓲꓚꓙ ꓗꓪ ꓫꓵꓽ ꓘꓶꓽˍ ꓟ ꓔꓯ ꓠ ꓠꓹ ꓓꓴ ꓠꓯ-ꓔ-ꓡ ꓗꓴꓷꓼ꓾ ꓓꓰ-ꓦꓰꓼ ꓡꓳ ꓒꓱ 2022 ꓘꓳꓼ 7 ꓦ 21 ꓠꓬꓲ ꓠꓯꓼ ꓝꓲꓸ ꓗꓪ ꓛꓲ ꓬꓰꓳ꓿

ꓲꓚꓙ ꓗꓪ ꓟꓬ-ꓟ ꓔꓯ ꓖ-ꓐꓲ-ꓬ ꓗꓴꓷꓼ ꓠꓰ ꓫꓵꓽ ꓪꓴ ꓩꓴ ꓡ ꓟꓽ ꓚꓰꓼ꓾ ꓲꓚꓙ ꓡꓰ ꓟꓬ-ꓟ ꓔꓯ ꓫꓵꓽ ꓘꓶꓽ ꓟꓽ ꓙꓲ ꓐꓰ ꓐꓯ ꓔꓳꓹ ꓘꓶꓽ ꓔꓯ ꓔꓯ ꓟꓳꓸ ꓠꓬꓲꓸ ꓠꓬꓲ ꓐꓯ ꓞꓷꓹ ꓓꓴ ꓥ ꓡꓳ꓿ ꓫꓵꓽ ꓘꓶꓽ ꓙꓵꓹ ꓠꓬ ꓟꓬ-ꓟ ꓙꓵꓹ ꓔꓯ ꓐꓯˍ ꓠꓬ꓾ 2022 ꓘꓳꓼ 7 ꓦ 22 ꓠꓬꓲ ꓟꓶ ꓘꓶꓼ ꓗꓪ ꓥ ꓡꓳ꓿

ꓬꓲꓸ ꓪꓴꓸ ꓐꓯ ꓟꓴ ꓔꓳꓹ ꓡꓯ ꓘꓳ ꓟ ꓗꓪ ꓟꓬ-ꓟ ꓞꓳꓸ ꓔꓬ ꓟ ꓥ ꓡꓳ꓿ ꓟꓬ-ꓟ ꓗꓴꓷꓼ ꓗꓪ ꓞꓳ ꓛꓴ ꓞꓰꓹ ꓡꓰ ꓗꓪ ꓛꓲ ꓞꓳ ꓢꓰꓼ ꓪ ꓢꓰꓼ ꓙꓳ ꓔꓬ ꓡꓳ꓾ ꓖꓳ ꓟ ꓑꓶꓸ ꓓꓴ ꓗꓽ ꓙ ꓡꓯ ꓐꓰ ꓖ-ꓐꓲ-ꓬ ꓡꓰꓽ ꓓꓰꓽ ꓘꓶꓽ ꓔꓯ ꓛꓳ Provisional Measure ꓐꓯ ꓞꓷꓹ ꓩꓴ ꓡ ꓟ ꓑꓶꓸ ꓓꓴ ꓥꓳ꓿ ꓟꓬ-ꓟ ꓠꓬ ꓖꓳ ꓕꓲ ꓠꓬꓲ ꓕꓯꓽˍ ꓡꓰ ꓟꓬ-ꓟ ꓔꓯ ꓟꓽ ꓚꓬꓼ ꓢꓴ ꓖ-ꓐꓲ-ꓬ ꓗꓴꓷꓼ ꓠꓰ ꓫꓵꓽ ꓕꓱ ꓡ ꓟꓽ ꓚꓰꓼ ꓐꓯ ꓔꓬ ꓟ ꓥ ꓡꓳ꓿

ꓕꓱ ꓕꓲ ꓧꓪꓹ ꓟꓬ-ꓟ ꓡꓰ ꓐꓯ ꓔꓳꓹ ꓔꓸ ꓟ ꓡꓳ ꓚꓺ ꓧꓪꓸ ꓡꓰ ꓠꓬ ꓐꓯ ꓟꓴ ꓫꓬ ꓡꓰ ꓢꓲ꓾ ꓟꓽ ꓧꓪꓸ ꓡꓰˍ ꓠꓬ ꓲꓚꓙ ꓗꓪ ꓞꓳ ꓛꓴ ꓒ ꓞꓰꓹ ꓢꓰꓼ ꓝꓴꓲꓸ ꓔꓯ ꓬꓲꓸ ꓘꓳꓼ ꓬꓲꓸ ꓠꓲꓹ ꓕꓱ ꓔꓳꓹ ꓡꓯ ꓘꓳ ꓠ ꓗꓷ ꓡꓰˍ ꓥꓳ꓿