ꓮ ꓟꓶ ꓮ ꓫꓵꓽ ꓒꓬꓱꓼ ꓔꓬ ꓡ? ꓮ-ꓩ-ꓖ-ꓠꓯ-ꓢꓲ-ꓔ ꓗꓴꓷꓼ ꓔꓯ ꓔ-ꓡꓲ-ꓐ ꓡꓰ ꓓꓶꓽ ꓧꓪꓸ ꓡꓰꓳ ꓐꓰ ꓢꓷꓸ ꓙ ꓟꓴ ꓙ ꓩꓴ ꓡ ꓡꓳ= ꓡꓳ ꓒꓱ ꓓꓽ ꓟ ꓗ-ꓐꓴꓸ ꓗꓪ ꓙꓳ ꓟ ꓗꓴꓷꓼ ꓙꓵꓽ ꓦꓲ ꓗꓪ ꓥ ꓟꓲ ꓔ-ꓡꓲ-ꓐ ꓟꓯꓼ ꓐꓴ ꓓꓵꓽ ꓙꓰ ꓔꓬ ꓟ ꓐꓬꓱꓽ ꓓꓳ ꓡ ꓡꓳ= ꓝꓮꓲ ꓴꓢꓮ ꓟꓯꓼ ꓐꓬꓱ ꓦꓲ ꓗꓪ ꓖꓼ ꓙꓰ ꓠꓲꓹ ꓫꓵ ꓢꓴ ꓔꓴ ꓔꓴ ꓟꓶꓽ ꓟꓶꓽ ꓥ ꓟꓲ ꓐꓬꓱ ꓦꓲ ꓠꓽ ꓔꓶꓸ ꓗꓪ ꓡꓳꓸ ꓔꓬ ꓡꓳ= ꓔ-ꓡꓲ-ꓐ ꓡꓰ ꓢꓰꓼ ꓡ ꓟ ꓔꓯ ꓙꓳꓺ ꓢꓴ ꓐꓯ ꓖꓴ ꓟꓽ ꓓ= ꓗꓳꓸ ꓗꓷ ꓟ 50 ꓘꓳꓼ ꓕꓯ ꓢꓮꓲ-ꓖꓳ ꓐꓯ ꓟ ꓐꓲ-ꓬꓯ-ꓠ ꓗꓴꓷꓼ ꓗꓪ ꓒꓬꓱꓼ ꓗꓷ ꓟ ꓡꓰ ꓐꓰ ꓒꓬꓱꓼ ꓔꓬ ꓡꓳ ꓐꓰ ꓐꓯ ꓡꓯ ꓘꓳ ꓔꓬ ꓡꓳ=
ꓕꓱ ꓟ ꓮ ꓫꓵꓽ ꓑꓶꓸ ꓓꓴ ꓒꓬꓱꓼ ꓡ ꓡ?ꓴꓢꓮ ꓐꓰ ꓛꓳ ꓒꓯꓹ ꓟꓯꓼ ꓐꓴ ꓮ-ꓩ-ꓖ-ꓠꓯ-ꓢꓲ-ꓔ ꓗꓪ ꓐꓰ ꓓꓳ ꓡ ꓟ ꓑꓶꓸ ꓓꓴ ꓥ ꓡꓳ ꓐꓰ ꓫꓬꓽ ꓫꓬꓽ ꓡꓰ ꓟꓳ ꓓˍ ꓟ ꓕꓲ ꓒꓳꓹ ꓗꓪ ꓐꓯ ꓙꓲ ꓡꓳ= ꓖꓳ ꓡꓱ ꓥ ꓟꓲ ꓚ ꓟꓲꓽ ꓠꓬ ꓖꓳ ꓟ ꓕꓯ ꓢꓲ ꓠꓯꓸ ꓠꓯꓸ ꓙꓳ ꓢꓰ ꓡꓳ= ꓮ ꓕꓯ ꓥ ꓟꓲ ꓬꓲ ꓙꓬ ꓕꓯ ꓢꓲ ꓟꓳˍ ꓟ ꓪꓽ ꓘꓴꓸ ꓠꓬ꓾ ꓬꓲ ꓙꓬ ꓠꓯꓸ ꓘꓪ ꓗꓪ ꓟ ꓪꓽ ꓘꓴꓸ ꓕꓲ ꓘꓰꓸ ꓤꓼ (ꓕꓲ ꓗꓴ ꓕꓲ ꓡꓯꓼ ꓤꓼ) ꓡꓰ ꓥ ꓡꓳ ꓐꓰ ꓐꓯ ꓟ ꓡꓰ ꓐꓰ ꓥꓳ=
ꓗꓳꓸ ꓗꓷ ꓟ 20 ꓘꓳꓼ꓾ 2001 ꓘꓳꓼ 9 ꓦ 11 ꓠꓬꓲ ꓗꓪ ꓐꓲ-ꓡ-ꓓꓲ ꓡꓰ ꓧꓳꓽ ꓪꓴꓸ ꓟꓴ ꓔꓬ ꓟ ꓮ-ꓡꓲ-ꓗ-ꓓ ꓜꓴ ꓡꓰ ꓴꓢꓮ ꓠꓲ-ꓬꓴ-ꓬꓳꓼ ꓗꓪ ꓟ ꓟꓲ ꓠꓯ ꓶ ꓡꓯꓼ ꓬꓰ ꓔꓶꓸ ꓦꓲ ꓓꓽ ꓟ ꓕꓲ ꓜꓱ ꓔꓯ ꓐꓬꓱ ꓦꓲ ꓗꓪ ꓐꓰ ꓑꓳ ꓢꓰꓸ ꓩꓴ ꓡ ꓡꓳ= ꓖꓳ ꓟ ꓠꓬ ꓲ-ꓣꓼ ꓐꓰ ꓮ-ꓩ-ꓖ-ꓠꓯ-ꓢꓲ-ꓔ ꓗꓪ ꓴꓢꓮ ꓟꓯꓼ ꓐꓴ ꓓꓵꓽ ꓙꓰ ꓠꓹ ꓟ ꓬꓲꓸ ꓚꓱꓹ ꓝꓰꓸ ꓡ ꓟ ꓥ ꓡꓳ= ꓜꓲ ꓜꓲ ꓑꓰꓹ ꓑꓰꓹ ꓞꓳ ꓢꓰꓼ ꓪ ꓢꓰꓼ ꓜꓴ (terrorrist groups) ꓐꓴ ꓔꓯ ꓪꓽ ꓛꓴ ꓝꓱꓹ ꓠꓹ ꓟ ꓴꓢꓮ ꓐꓰ ꓬꓲꓸ ꓪ ꓛꓳ ꓒꓯꓹ ꓗꓴꓷꓼ ꓐꓴ ꓢꓯꓼ ꓕꓵꓼ ꓡ ꓡꓳ= ꓲ-ꓣꓼ ꓗꓪ ꓥ ꓟꓲ ꓢ-ꓓ-ꓧꓴ-ꓢꓰ ꓔꓯ ꓓꓶꓽ ꓧꓪꓸ ꓡꓰ ꓡꓳ= ꓝꓮꓲ ꓮ-ꓡꓲ-ꓗ-ꓓ ꓜꓴ ꓧꓳꓽ ꓢꓴ ꓐꓲ-ꓡ-ꓓꓲ ꓔꓯ ꓥ ꓟꓲ ꓢꓰꓼ ꓩꓴ ꓡꓳ= ꓝꓮꓲ ꓮ-ꓩ-ꓖ-ꓠꓯ-ꓢꓲ-ꓔ ꓗꓪ ꓥ ꓟꓲ ꓟꓯꓼ ꓢꓰꓼ ꓡꓯ ꓘꓳ ꓢꓲ꓾ ꓖꓳ ꓗꓪ ꓔꓬ ꓟ ꓮ-ꓡꓲ-ꓗ-ꓓ꓾ ꓲꓢꓲꓢ꓾ ꓐꓰ ꓔ-ꓡꓲ-ꓐ ꓟꓯꓼ ꓐꓴ ꓔꓯ ꓔꓳꓹ ꓡꓯ ꓘꓳ ꓔꓬ ꓟ ꓮ ꓟꓶ ꓗꓪ ꓛꓲ 20 ꓘꓳꓼ ꓙꓳ ꓡ ꓡꓳ=
ꓬꓲꓸ ꓪ ꓮ ꓡꓲ ꓟ ꓥ ꓡ?ꓮ-ꓡꓲ-ꓗ-ꓓ (Al-Quaeda) ꓜꓴ ꓔꓯ ꓐꓲ-ꓡ-ꓓꓲ ꓡꓰ 1986 ꓘꓳꓼ ꓕꓯ ꓔꓶ ꓪꓴꓸ ꓔꓴ ꓡꓳ= ꓮ-ꓡꓲ-ꓗ-ꓓ ꓬꓲꓸ ꓟꓸ ꓟꓲꓽ ꓠꓬ꓾ “ꓬꓲꓸ ꓚꓰꓺ (the base, the foundation) ꓥ ꓡꓳ= ꓬꓲꓸ ꓪ ꓗꓴꓷꓼ ꓗꓪ ꓓꓵꓽ ꓡ ꓟ ꓣ-ꓫꓸ ꓟꓯꓼ ꓐꓴ ꓠꓬ ꓲ-ꓢꓲ-ꓡ ꓦ ꓡꓱ ꓚꓱꓹ ꓐꓰ ꓬꓲꓸ ꓪ ꓡ ꓞꓳ ꓔꓯ ꓠꓬꓲꓸ ꓤꓲ ꓡ ꓟ ꓥ ꓡꓳ ꓐꓰ꓾ ꓙꓵꓻ ꓢꓲꓸ ꓔꓳꓹ ꓡꓯ ꓘꓳ ꓠꓹ ꓟ ꓬꓲꓸ ꓜꓴ ꓓꓳ ꓡ ꓡꓳ= ꓬꓲꓸ ꓪ ꓠꓬ ꓣ-ꓫꓸ ꓟꓯꓼ ꓐꓴ ꓔꓯ ꓔꓳꓹ ꓡꓯ ꓘꓳ ꓢꓲ꓾ 1989 ꓘꓳꓼ ꓕꓯ ꓣ-ꓫꓸ ꓥ ꓟꓲ ꓘꓰꓹ ꓡꓽ ꓙꓰꓳ= ꓖꓳ ꓗꓪ ꓐꓰ ꓕꓲ ꓝꓸ ꓐꓶꓽ ꓗꓴꓷꓼ ꓗꓪ ꓐꓰ ꓲ-ꓢꓲ-ꓡ ꓦ ꓡꓱ ꓚꓱꓹ ꓔꓯ ꓘꓶ ꓡꓶꓽ ꓢꓴ꓾ ꓝꓮꓲ ꓬꓲꓸ ꓪ ꓗꓴꓷꓼ ꓗꓪ ꓙꓵꓽ ꓢꓴ ꓐꓴ ꓟꓽ ꓔꓱꓹ ꓟꓽ ꓜꓳ ꓬꓰ ꓡ ꓟ ꓔꓯ ꓡꓳꓸ ꓢꓲꓸ ꓟꓯꓼ ꓩꓴ ꓡꓯ ꓘꓳ ꓢꓴ ꓥ ꓡꓳ= ꓬꓲꓸ ꓪ ꓠꓬ 1990 ꓘꓳꓼ ꓖꓼ ꓡꓯ ꓖꓼ ꓙꓲ ꓗꓪ ꓠꓬ ꓟꓯꓼ ꓒꓱ ꓔꓯ ꓢꓴ-ꓓ ꓗꓴꓷꓼ ꓗꓪ ꓔꓶ ꓔꓸ ꓡꓳ= ꓗꓸ ꓠꓯꓸ 1996 ꓘꓳꓼ ꓗꓪ ꓠꓬ ꓮ-ꓩ-ꓖ-ꓠꓯ-ꓢꓲ-ꓔ ꓗꓪ ꓬꓲꓸ ꓪ ꓟꓯꓼ ꓒꓱ ꓬꓲꓸ ꓚꓰꓺ ꓔꓶ ꓡ ꓡꓳ= ꓔ-ꓡꓲ-ꓐ (Taliban) ꓜꓴ ꓠꓬ 1994 ꓘꓳꓼ ꓗꓪ ꓐꓰ ꓪꓴꓸ ꓔꓴ ꓡꓳ= ꓔ-ꓡꓲ-ꓐ ꓐꓯ ꓟ ꓠꓬ “ꓢꓳ ꓢꓴ (student)” ꓐꓯ ꓡꓳ= ꓬꓲꓸ ꓪ ꓔꓯ ꓧꓳꓽ ꓢꓴ ꓐꓴ ꓠꓬ꓾ 1980 ꓘꓳꓼ ꓖꓼ ꓡꓯꓼ ꓖꓼ ꓙꓲ ꓗꓪ ꓣ-ꓫꓸ ꓟꓯꓼ ꓔꓯ ꓔꓳꓹ ꓡꓯ ꓘꓳ ꓗꓷ ꓢꓴ ꓟꓴ-ꓙ-ꓦꓲ-ꓓꓰ ꓟꓯꓼ ꓐꓴ ꓥ ꓡꓳ= ꓬꓲꓸ ꓪ ꓠꓬ ꓲ-ꓢꓲ-ꓡ ꓦ ꓡꓱ ꓚꓱꓹ ꓡꓲ ꓒꓰꓼ ꓔꓯ ꓗꓴꓷꓼ ꓙꓵꓽ ꓚꓱꓹ ꓗꓪ ꓣꓱꓽ ꓠꓹ ꓟ ꓢꓯꓼ ꓕꓵꓼ ꓩꓴ ꓡ ꓟ ꓕꓲ ꓜꓴ ꓥ ꓡꓳ= ꓮ ꓟꓶ ꓮ-ꓩ-ꓖ-ꓠꓯ-ꓢꓲ-ꓔ ꓗꓴꓷꓼ ꓔꓯ ꓙꓵꓽ ꓧꓪꓸ ꓡꓰ ꓔꓬ ꓟ ꓕꓲ ꓜꓴ ꓠꓬ ꓔ-ꓡꓲ-ꓐ ꓕꓱ ꓕꓲ ꓜꓴ ꓥ ꓡꓳ=
ꓲꓢ-ꓲꓢ (ꓲꓢꓲꓢ) ꓟꓯꓼ ꓠꓬ ꓲ-ꓣꓼ ꓐꓰ ꓢꓲ-ꓣꓲ-ꓬꓸ ꓟꓵꓽ ꓕꓲ ꓚꓳ ꓡꓳ ꓗꓪ ꓲ-ꓢꓲ-ꓡ ꓦ ꓡꓱ ꓚꓱꓹ ꓡꓰ ꓙꓵꓽ ꓟ ꓗꓴꓷꓼ ꓔꓶ ꓠꓲꓹ ꓫꓵ ꓢꓴ ꓐꓴ ꓕꓲ ꓜꓴ ꓥ ꓡꓳ= ꓬꓲꓸ ꓪ ꓠꓬ 2006 ꓘꓳꓼ ꓗꓪ ꓐꓰ ꓒꓴ ꓒꓴ ꓡꓯ ꓡꓯꓽ ꓮ ꓟꓬꓹ ꓓꓳ ꓡ ꓢꓲ꓾ ꓡ ꓞꓳ ꓜꓲ ꓜꓲ ꓑꓰꓹ ꓑꓰꓹ ꓢꓰꓼ ꓟꓸ ꓖꓶ ꓡ ꓢꓴ ꓕꓲ ꓜꓴ ꓥ ꓡꓳ= ꓴꓢꓮ ꓐꓰ ꓬꓲꓸ ꓪ ꓛꓳ ꓒꓯꓹ ꓗꓴꓷꓼ ꓜꓴ ꓟꓯꓼ ꓐꓴ ꓔꓯ ꓔꓳꓹ ꓡꓯ ꓘꓳ ꓢꓴ꓾ ꓬꓲꓸ ꓜꓴ ꓓꓽ ꓟ (3) ꓜꓴ ꓠꓬ ꓕꓱ ꓮ-ꓡꓲ-ꓗ-ꓓ꓾ ꓔ-ꓡꓲ-ꓐ ꓐꓰ꓾ ꓲꓢ-ꓲꓢ ꓥ ꓡꓳ= ꓬꓲꓸ ꓪ (3) ꓜꓴ ꓥ ꓟꓲ ꓕꓲ ꓧꓪꓸ ꓧꓪꓸ ꓠꓬ ꓪꓽ ꓡꓯ ꓘꓳ ꓟ ꓙꓳ ꓢꓲ꓾ ꓕꓲ ꓫꓵꓽ ꓫꓵꓽ ꓗꓪ ꓠꓬ ꓓꓵꓽ ꓙ ꓚꓱꓹ ꓟꓽ ꓪꓽ ꓟ ꓙꓳ ꓡꓳ= ꓮ ꓟꓶ ꓗꓪ ꓛꓲ ꓢꓯꓼ ꓙꓳ ꓔꓬ ꓡꓳ= ꓖꓳ ꓡꓱ ꓥ ꓟꓲ ꓗꓴꓷꓼ ꓔꓯ ꓓꓶꓽ ꓧꓪꓸ ꓡꓰ ꓗꓪ ꓛꓲ ꓢꓯꓼ ꓙꓳ ꓟ ꓠꓬ ꓔ-ꓡꓲ-ꓐ (ꓢꓳ ꓢꓴ) ꓜꓴ ꓕꓱ ꓕꓲ ꓟꓯꓼ ꓒꓬꓱꓼ ꓡ ꓔꓬ ꓟ ꓥ ꓡꓳ= ꓔ-ꓡꓲ-ꓐ ꓠꓬ ꓧꓶꓸ 1996 ꓘꓳꓼ ꓗꓪ ꓐꓰ 2001 ꓘꓳꓼ ꓗꓪ ꓛꓲ ꓮ-ꓩ-ꓖ-ꓠꓯ-ꓢꓲ-ꓔ ꓔꓯ ꓙꓵꓽ ꓗꓷ ꓢꓲꓸ ꓮ ꓟꓶ ꓴꓢꓮ ꓡꓰ ꓔꓳꓹ ꓙ ꓟ ꓗꓴꓷꓼ ꓙꓵꓽ ꓜꓴ ꓡꓯ ꓒꓯꓹ ꓗꓪ ꓐꓰ ꓙꓵꓽ ꓪ ꓡꓲꓸ ꓟꓶ ꓡꓰ ꓔꓬ ꓟ ꓥ ꓡꓳ=
ꓮ ꓫꓵꓽ ꓑꓶꓸ ꓓꓴ ꓓꓰ-ꓟꓳ-ꓗꓯ-ꓢꓰ ꓬꓲꓸ ꓚꓰꓺ ꓟꓽ ꓔꓶ ꓡꓰ ꓡ?ꓬꓲꓸ ꓪꓴꓸ ꓕꓲ ꓕꓳꓼ ꓠꓬ ꓦ ꓡꓱ ꓚꓱꓹ ꓐꓰ ꓡꓲ ꓒꓰꓼ ꓑꓶꓸ ꓓꓴ ꓥ ꓡꓳ= ꓲ-ꓢꓲ-ꓡ ꓦ ꓡꓱ ꓚꓱꓹ ꓕꓶ ꓕꓶ ꓙꓳ ꓞꓹ ꓟ ꓗꓴꓷꓼ ꓗꓪ ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓔꓯ ꓮ ꓘꓶꓸ ꓠꓵ ꓟꓽ ꓗꓴꓸ= ꓕꓱ ꓟ ꓠꓬ ꓡꓲ ꓒꓰꓼ ꓡꓳ ꓚ ꓓꓰ-ꓟꓳ-ꓗꓯ-ꓢꓰ ꓔꓯ ꓟꓽ ꓠꓵ ꓗꓴꓸ ꓟ ꓡꓲ ꓒꓰꓼ ꓐꓰ ꓦ ꓡꓱ ꓚꓱꓹ ꓥ ꓟ ꓑꓶꓸ ꓓꓴ ꓥꓳ ꓐꓰ꓾ ꓢꓪꓼ ꓓ ꓡꓳ= ꓦ ꓡꓱ ꓚꓱꓹ ꓡꓳ ꓚ ꓐꓯ ꓠꓬ꓾ ꓠꓱꓸ ꓐꓯꓼ ꓦ ꓡꓱ ꓚꓱꓹ ꓔꓯ ꓬꓲꓸ ꓪ ꓘꓳ ꓣꓴ ꓟꓽ ꓐ ꓡ= ꓠꓲꓹ ꓟ ꓫꓵꓺ ꓟꓽ ꓐ ꓡ= ꓖꓽ ꓖꓶ ꓟꓽ ꓐ ꓡ= ꓬꓲꓸ ꓪ ꓡꓰ ꓐꓯˍ ꓟ ꓡꓰꓽ ꓟꓽ ꓥ ꓠꓬ꓾ ꓠꓱꓸ ꓐꓯꓼ ꓕꓲ ꓚꓱꓹ ꓕꓲ ꓚꓱꓹ (alternative ways) ꓙꓳ ꓙꓲˍ ꓡꓳ ꓐꓰ ꓬꓲꓸ ꓪ ꓟꓽ ꓓꓵꓽ ꓙ ꓗꓴꓸ= ꓬꓲꓸ ꓪ ꓚꓱꓹ ꓬꓲꓸ ꓪ ꓡꓲꓽ꓾ ꓬꓲꓸ ꓪ ꓦ ꓡꓱ ꓚꓱꓹ ꓟꓽ ꓥ ꓠꓬ ꓠꓱꓸ ꓐꓯꓼ ꓢꓴ ꓡꓲ ꓒꓰꓼ ꓐꓰ꓾ ꓦ ꓡꓱ ꓚꓱꓹ ꓔꓯ ꓒꓵꓽ ꓟꓽ ꓗꓴꓸ= ꓕꓱ ꓟ ꓑꓶꓸ ꓓꓴ ꓲ-ꓢꓲ-ꓡ ꓦ ꓡꓱ ꓚꓱꓹ ꓕꓶ ꓞꓹ ꓟ ꓟꓵꓽ ꓗꓪ ꓓꓰ-ꓟꓳ-ꓗꓯ-ꓢꓰ ꓬꓲꓸ ꓚꓰꓺ ꓕꓶ ꓡꓰ ꓟꓽ ꓓ ꓟ ꓥ ꓡꓳ= ꓠꓬꓲꓽ ꓕꓳꓼ ꓕꓲ ꓕꓳꓼ ꓠꓬ꓾ ꓚꓲ ꓛꓬ ꓐꓱ ꓶˍ ꓡꓰ ꓓꓵꓽ ꓙ ꓢꓲꓸ ꓜꓴ ꓒꓴ ꓘꓴꓽ ꓢꓴ (corruptions) ꓟꓬꓽ ꓟ ꓑꓶꓸ ꓓꓴ ꓥꓳ= ꓴꓢꓮ ꓐꓰ ꓠꓱꓸ ꓐꓯꓼ ꓗꓴꓷꓼ ꓗꓪ ꓐꓰ ꓬꓰ ꓙ ꓔꓳꓹ ꓙ ꓡ ꓟ ꓒꓴ ꓮ ꓟꓬꓹ ꓔꓯ ꓮ ꓕꓯ ꓕꓯ ꓕꓱ ꓡꓱ ꓬꓰ ꓙ ꓡ ꓥꓳ ꓐꓰ ꓥꓳ ꓡꓳꓸ ꓗꓷ ꓡꓳ= ꓬꓰ ꓙ ꓡ ꓟ ꓒꓴ ꓔꓯ ꓗꓴꓷꓼ ꓡ ꓞꓳ ꓐꓴ ꓔꓯ ꓢꓷꓸ ꓠꓲꓹ ꓖꓶ ꓟ꓾ ꓓꓰ-ꓟꓳ-ꓗꓯ-ꓢꓰ ꓚꓱꓹ ꓗꓪ ꓓꓵꓽ ꓙ ꓗꓴꓸ ꓡ ꓠꓹ ꓟ ꓟꓸ ꓖꓶ ꓟ ꓐꓰ꓾ ꓗꓴꓷꓼ ꓪꓴꓽ ꓟꓴ ꓡ ꓚꓱꓹ ꓗꓪ ꓣꓱꓽ ꓠꓹ ꓟ ꓬꓰ ꓟꓽ ꓪ= ꓧꓳꓽ ꓪꓴꓸ ꓟꓴ ꓢꓴ ꓐꓴ ꓟꓲ ꓔꓯꓸ ꓟꓲ ꓒꓴ ꓘꓴꓽ ꓜꓽ ꓟ ꓟꓬꓽ ꓡꓰ ꓡꓳ= ꓕꓱ ꓟ ꓔꓯ ꓢꓷꓸ ꓟ ꓴꓢꓮ ꓐꓰ ꓠꓱꓸ ꓐꓯꓼ ꓗꓴꓷꓼ ꓐꓴ ꓥ ꓟꓲ ꓠꓲꓹ ꓐꓶ ꓠꓲꓹ ꓶꓻ ꓡ ꓡꓳ= ꓠꓲꓹ ꓢꓲꓼ ꓡ ꓡꓳ= ꓠꓴ ꓪ ꓔꓯ ꓓꓰ-ꓟꓳ-ꓗꓯ-ꓢꓰ ꓚꓱꓹ ꓗꓪ ꓫꓱꓽ ꓝꓲ ꓠꓲꓹ ꓫꓵ ꓥ ꓟꓲ꓾ ꓠꓴ ꓪ ꓚꓲ ꓛꓬ ꓟꓽ ꓔꓱꓹ ꓟꓽ ꓜꓳ ꓟ ꓬꓰ ꓠꓲꓹ ꓫꓵ꓾ ꓝꓮꓲ ꓓꓰ-ꓟꓳ-ꓗꓯ-ꓢꓰ ꓔꓯ ꓠꓵ ꓟꓽ ꓗꓴꓸ ꓠꓬ꓾ ꓥꓪ ꓠꓴ ꓠꓽ ꓮ ꓕꓯ ꓟꓶ ꓕꓯ ꓬꓰ ꓙ ꓟꓽ ꓐ ꓡ ꓐꓰ ꓓꓵꓽ ꓙ ꓓꓳ ꓡ ꓡꓳ= ꓮ ꓟꓶ ꓴꓢꓮ ꓙꓵꓽ ꓢꓴ ꓐꓴ ꓕꓱ ꓡꓱ ꓕꓱ ꓓꓳ ꓡ꓾ ꓐꓳ ꓓꓳ ꓡ ꓟ ꓥ ꓡꓳ= ꓕꓱ ꓟ ꓗꓪ ꓐꓰ ꓐꓳ ꓢꓴ ꓠꓬ ꓐꓳ ꓟꓽ ꓗꓴ꓾ ꓢꓴ ꓗꓴꓷꓼ ꓗꓪ ꓦꓲ ꓪꓴ ꓟꓵꓽ ꓪꓴ ꓢꓴ ꓐꓯ ꓖꓴ ꓟꓽ ꓓ ꓒꓬꓱꓼ ꓡ ꓡꓳ= ꓗꓴꓷꓼ ꓘꓴꓽ ꓗꓪ ꓠꓬ ꓟꓯꓼ ꓢꓰꓼ ꓡꓯ ꓘꓳ ꓟ ꓕꓲ ꓠꓬꓲ ꓡꓲꓸ ꓕꓲ ꓠꓬꓲ ꓙꓳ ꓡꓳ= ꓮ ꓢꓳ (3) ꓜꓴ ꓡꓰ ꓥ ꓟꓲ ꓲ-ꓢꓲ-ꓡ ꓦ ꓡꓱ ꓚꓱꓹ ꓗꓪ ꓐꓰ ꓑ ꓫꓬ ꓐꓴ ꓔꓯ ꓧꓳꓽ ꓪꓴꓸ ꓟꓴ ꓢꓲ꓾ ꓫꓸ ꓔꓬ ꓟ ꓑ ꓫꓬ ꓐꓴ ꓐꓰ꓾ ꓟꓯꓼ ꓢꓰꓼ ꓡꓯ ꓘꓳ ꓗꓪ ꓠꓲꓹ ꓟ ꓠꓻ ꓡꓰ ꓢꓴ ꓐꓴ꓾ ꓝꓮꓲ ꓟꓽ ꓔꓱꓹ ꓟꓽ ꓜꓳ ꓬꓰ ꓔꓬ ꓟ ꓗꓴꓷꓼ ꓧꓳꓽ ꓪꓴꓸ ꓟꓴ ꓢꓴ ꓞꓳ ꓐꓳ ꓞꓳ ꓬꓲꓼ ꓐꓴ ꓔꓯ ꓠꓲꓹ ꓘꓪ ꓟꓽ ꓫꓵ ꓢꓴ ꓐꓴ ꓔꓯ ꓘꓴ ꓜꓲꓼ ꓢꓲꓸ ꓔꓳꓹ ꓒꓽ ꓮ ꓟꓬꓹ ꓟꓬꓽ ꓡ ꓝꓲ ꓡꓳ= ꓖꓳ ꓟ ꓑꓶꓸ ꓓꓴ ꓧꓪ ꓒꓴ ꓡꓰ ꓧꓳꓽ ꓣꓱꓽ ꓢꓲꓸ ꓔꓶꓺ ꓗꓷ ꓟ ꓓꓰ-ꓟꓳ-ꓗꓯ-ꓢꓰ ꓠꓬ ꓬꓲꓸ ꓒꓬꓽ ꓟꓽ ꓠꓵ ꓡ꓾ ꓬꓲꓸ ꓢꓶꓸ ꓟꓽ ꓐꓵꓸ ꓡꓻꓳ= 2021 ꓘꓳꓼ 8 ꓦ 15 ꓠꓬꓲ ꓗꓪ ꓠꓽ ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓬꓲꓸ ꓟꓶꓽ ꓢꓰꓼ ꓡꓰꓳ= ꓮ ꓟꓶ ꓠꓬ ꓲ-ꓢꓲ-ꓡ ꓦ ꓡꓱ ꓚꓱꓹ ꓡꓳ ꓚ ꓫ-ꓣꓲ-ꓬ ꓙꓵꓽ ꓗꓪ ꓗꓪ ꓐꓰ ꓗꓷꓷꓼ ꓔꓯ ꓙꓵꓽ ꓙꓰ ꓠꓹ ꓟ ꓔ-ꓡꓲ-ꓐ ꓐꓴ ꓢꓯꓼ ꓩꓴ ꓡ ꓔꓬ ꓟ ꓥ ꓡꓳ=
ꓮ ꓫꓵꓽ ꓢꓳ ꓣꓴ ꓓꓴ ꓙꓳ ꓡ? ꓔ-ꓡꓲ-ꓐ ꓐꓴ ꓠꓬ ꓗꓴꓷꓼ ꓓꓽ ꓟ ꓴꓢꓮ ꓐꓰ ꓬꓲꓸ ꓛꓳ ꓒꓯꓹ ꓐꓴ ꓐꓴ ꓔꓯ 20 ꓘꓳꓼ ꓛꓲ ꓔꓳꓹ ꓡꓯ ꓘꓳ ꓐ ꓡ ꓗꓷ ꓡꓳ= ꓕꓱ ꓟ ꓠꓬ ꓬꓲꓸ ꓪ ꓙꓵꓻ ꓟ ꓔꓯ ꓡꓯꓼ ꓕꓲ ꓟꓬꓱꓽ ꓬꓰ ꓐ ꓡ ꓟ ꓑꓶꓸ ꓓꓴ ꓥ ꓡꓳ= ꓥꓪ ꓠꓬ ꓕꓱ ꓡꓱ ꓙꓵꓻ ꓡꓳ꓾ ꓖꓳ ꓡꓱ ꓓꓵꓽ ꓙ ꓡꓳ꓾ ꓐꓯ ꓢꓲꓸ ꓡꓯꓼ ꓕꓲ ꓟꓬꓱꓽ ꓟꓽ ꓬꓰ꓾ ꓚꓲ ꓛꓬ ꓢꓯꓼ ꓟꓬ ꓔꓯ ꓖꓶ ꓗꓷ ꓗꓪ ꓛꓲ ꓢꓯꓼ ꓟꓽ ꓩꓴ ꓓꓳ ꓡ ꓠꓬ ꓮ ꓫꓵꓽ ꓟꓲ ꓒꓬꓱꓼ ꓡ ꓟꓽ ꓓ ꓐꓰ ꓢꓳ ꓣꓴ ꓓꓴ ꓙꓳ ꓡꓳ= ꓝꓮꓲ ꓕꓲ ꓒꓳꓹ ꓗꓪ ꓮ-ꓩ-ꓖ-ꓠꓯ-ꓢꓲ-ꓔ ꓑ ꓫꓬ ꓐꓴ ꓗꓪ ꓐꓰ ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓔꓯ ꓠꓲꓹ ꓠꓵ ꓢꓴ ꓔꓬ ꓥꓳ ꓐꓰ ꓥꓳ ꓡꓳꓸ ꓓ ꓡꓳ= ꓮ ꓡꓲꓳ ꓐꓯ ꓠꓬ ꓔ-ꓡꓲ-ꓐ ꓐꓴ ꓡꓰ ꓗꓴꓷꓼ ꓔꓯ ꓙꓵꓽ ꓧꓪꓸ ꓡꓰ ꓡ ꓕꓯ ꓖꓳ ꓗꓪ ꓔꓬ ꓠꓲꓹ ꓟꓽ ꓫꓵ ꓢꓲꓸ ꓴꓢꓮ ꓟꓯꓼ ꓐꓬꓱ ꓦꓲ ꓗꓪ ꓟꓽ ꓓ ꓟꓽ ꓢ ꓔꓶ ꓑꓵ ꓢꓲꓸ ꓔꓳꓹ ꓛꓵꓽ ꓡ ꓢꓴ ꓔꓬ ꓟ ꓔꓯ ꓡꓳꓸ ꓠꓬꓲ= ꓬꓲꓸ ꓪ ꓠꓬ ꓗꓴꓷꓼ ꓗꓪ ꓐꓰ ꓓꓳ ꓙꓰ ꓠꓲꓹ ꓫꓵ ꓔꓬ ꓡꓳ= ꓬꓲꓸ ꓪ ꓠꓬ ꓓꓰ-ꓟꓳ-ꓗꓯ-ꓢꓰ ꓔꓯ ꓠꓵ ꓗꓴꓸ ꓢꓴ ꓥ ꓐꓭˍ ꓥꓳ= ꓖꓳ ꓡꓱ ꓥ ꓟꓲ꓾ ꓬꓲꓸ ꓪ ꓠꓵ ꓟ ꓓꓰ-ꓟꓳ-ꓗꓯ-ꓢꓰ ꓐꓱ ꓶ ꓦꓬꓼ ꓙꓳ ꓠꓬꓲ ꓙꓳ ꓕꓯ ꓡꓰ꓾ ꓟꓯꓼ ꓶ ꓤꓼ ꓮ ꓫꓵꓽ ꓟꓲ ꓮ ꓡꓲ ꓠꓲꓹ ꓫꓵ ꓖꓳ ꓡꓱ ꓔꓳꓹ ꓙ ꓔꓬ ꓕꓯ ꓡꓰ꓾ ꓢꓯꓼ ꓟ ꓑ ꓢꓲꓸ ꓬꓲꓸ ꓪ ꓟꓽ ꓢꓯꓼ ꓕꓵꓼ ꓗꓷꓳ= ꓚꓲ ꓛꓬ ꓡꓲꓹ ꓙꓰ ꓟꓶ ꓠꓹ ꓟ ꓚꓱꓹ ꓐꓰ꓾ ꓓꓰ-ꓟꓳ-ꓗꓯ-ꓢꓰ ꓚꓱꓹ ꓐꓱ ꓶ ꓢꓯꓼ ꓟꓬ ꓑ ꓢꓲꓸ ꓢꓯꓼ ꓩꓴ ꓢꓴ ꓟꓽ ꓙꓳ ꓟ ꓑꓶꓸ ꓓꓴ ꓬꓲꓸ ꓟꓶꓽ ꓗꓪ ꓠꓬ ꓗꓴꓷꓼ ꓗꓪ ꓐꓰ ꓓꓳ ꓙꓰ ꓠꓹ ꓟ ꓢꓯꓼ ꓕꓵꓼ ꓠ ꓗꓷ ꓡꓰꓳ= ꓥꓪ ꓦꓲ꓾ ꓥꓪ ꓘꓹ꓾ ꓥꓪ ꓡꓳ ꓒꓱ ꓗꓪ ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓔꓯ ꓠꓲꓹ ꓠꓵ ꓠꓬꓲ꓾ ꓩꓴ ꓗꓷ ꓟ ꓚꓳ ꓪꓴꓸ ꓙꓵꓽ ꓪ ꓔꓯ ꓠꓲꓹ ꓫꓵ ꓠꓬꓲ꓾ ꓥꓪ ꓢꓯꓼ ꓟꓬ ꓖꓶꓽ ꓢꓲꓸ ꓔꓳꓹ ꓡꓯ ꓘꓳ ꓓꓴ ꓥꓳ ꓐꓰ ꓧꓶꓸ ꓕꓯ 10 ꓖꓼ ꓡꓯꓼ ꓖꓼ ꓙꓲ ꓗꓪˍ ꓡꓰ ꓮ ꓙꓵꓽ ꓢꓴ ꓢꓯꓼ ꓕꓵꓼ ꓐꓷˍ ꓠꓬ꓾ ꓠꓬꓲꓸ ꓠꓬꓲ ꓮ-ꓩ-ꓖ-ꓠꓯ-ꓢꓲ-ꓔ ꓗꓪ ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓕꓶꓻ ꓞ ꓥꓳ= ꓘꓶ ꓡꓶꓽ ꓢꓴ ꓔꓯ ꓢꓰꓼ ꓧꓪꓸ ꓡꓰ ꓓ ꓥꓳ= ꓖꓳ ꓡꓱ ꓟꓽ ꓢꓯꓼ ꓕꓵꓼ ꓗꓷ ꓟ ꓑꓶꓸ ꓓꓴ꓾ ꓖꓳ ꓟꓬ ꓛꓲ ꓓꓰ-ꓟꓳ-ꓗꓯ-ꓢꓰ ꓔꓯ ꓟꓽ ꓒꓵꓽ꓾ ꓟꓽ ꓠꓵ ꓗꓴꓸ ꓟ ꓑꓶꓸ ꓓꓴ ꓮ ꓟꓶ ꓠꓽ ꓢꓯꓼ ꓟꓬ ꓐꓱ ꓶ ꓛꓰꓹ ꓙꓰ ꓖꓴ ꓟꓽ ꓙꓳ ꓗꓷ ꓡꓰꓳ= ꓬꓰ ꓙ ꓢꓴ ꓥ ꓟꓲ꓾ ꓮ ꓕꓯ ꓟꓲ ꓕꓯ ꓬꓰ ꓙ ꓟꓽ ꓐ ꓡ= ꓮ ꓟꓬ ꓛꓲ ꓢꓯꓼ ꓙꓳ ꓟ ꓗꓴꓷꓼ ꓥ ꓟꓲ ꓚꓲ ꓛꓬ ꓑ ꓫꓬ ꓐꓴ ꓔꓯ ꓡꓳꓸ ꓙ ꓔ ꓙ ꓠ ꓗꓹ ꓠꓬꓲ꓾ ꓠꓱꓸ ꓐꓯꓼ ꓢꓴ ꓐꓱ ꓶ ꓠꓽ ꓠꓲꓹ ꓟ ꓗꓪ ꓓꓵꓽ ꓙ ꓡꓲꓸ ꓡꓯꓼ ꓟꓽ ꓛꓲ= ꓖꓳ ꓟ ꓑꓶꓸ ꓓꓴ ꓚꓲ ꓛꓬ ꓔꓱꓹ ꓚꓲ ꓛꓬ꓾ ꓚꓲ ꓛꓬ ꓦ ꓡꓱ ꓐꓳˍ ꓟ ꓙꓵꓽ ꓚꓱꓹ꓾ ꓦ ꓡꓱ ꓚꓱꓹ꓾ ꓓꓵꓽ ꓙ ꓚꓱꓹ ꓐꓱ ꓶ ꓚꓲ ꓛꓬ ꓢꓯꓼ ꓟꓬ ꓖꓶꓽ ꓗꓷ ꓗꓪ ꓛꓲ ꓢꓯꓼ ꓕꓵꓼ ꓠꓹ ꓟ ꓢꓳ ꓣꓴ ꓓꓴ ꓙꓳ ꓡ ꓡꓳ= ꓚꓲ ꓛꓬ ꓞꓳ ꓫꓵꓽ꓾ ꓔꓬ ꓟꓵ ꓐꓱ ꓶ ꓮ ꓫꓵꓽ ꓟꓲ ꓢꓯꓼ ꓕꓵꓼ ꓠꓲꓹ ꓟꓽ ꓫꓵ ꓢꓴ꓾ ꓢꓯꓼ ꓟꓬ ꓖꓶꓽ ꓗꓪ ꓛꓲ ꓟꓬꓱꓽ ꓬꓰ ꓠꓲꓹ ꓟꓽ ꓫꓵ ꓠꓬ꓾ ꓢꓴ ꓡꓰ ꓮ ꓡꓲ ꓓ ꓖꓳ ꓡꓱ ꓠꓬꓲꓸ ꓤꓲ ꓡ ꓟ ꓔꓯ ꓔꓳꓹ ꓜꓳꓽ ꓡ ꓥꓳ= ꓖꓳ ꓕꓯ ꓢꓲꓸ ꓠꓽ ꓬꓲꓸ ꓙꓵꓹ ꓡꓳꓹ ꓬꓰꓳ= ꓢꓯꓼ ꓕꓵꓼ ꓐ ꓡ ꓟ ꓝꓲꓸ ꓗꓪ ꓦ ꓦ ꓟꓳꓽ ꓟꓳꓽ ꓔꓬ ꓗꓷ ꓠꓬ ꓫꓸ ꓟ ꓦꓬꓼ ꓠꓬꓲ꓾ ꓮ ꓡꓲ ꓟꓲ ꓬꓰ ꓟꓽ ꓐ ꓡ ꓟ ꓦꓬꓼ ꓠꓬꓲ ꓛꓲ ꓡ ꓥꓳ= ꓚꓲ ꓛꓬ ꓡꓲꓹ ꓙꓰ ꓚꓱꓹ꓾ ꓚꓳ ꓪꓴꓸ ꓙꓵꓽ ꓪ ꓚꓱꓹ ꓐꓱ ꓶ ꓚꓲꓸ ꓛꓬ ꓢꓯꓼ ꓩꓴ ꓠꓹ ꓟ ꓟꓸ ꓖꓶ ꓔꓬ ꓡꓳ= ꓢꓴ ꓔꓯ ꓪꓽ ꓪꓴ ꓘꓳꓹ ꓟꓽ ꓓ ꓟ ꓢꓳ ꓪ ꓡꓰ ꓝꓲ ꓡꓳ= ꓢꓯꓼ ꓕꓵꓼ ꓢꓴ ꓠꓬ ꓧꓪꓸ ꓡꓰ ꓟ ꓢꓳ ꓟꓶ ꓝꓲ ꓡꓳ= ꓟꓽ ꓢꓯꓼ ꓕꓵꓼ ꓕꓵꓼ ꓢꓴ ꓡꓰ ꓬꓰ ꓙ ꓡ ꓥꓳ ꓐꓰ ꓥꓳ ꓡꓳꓸ ꓢꓲ ꓦ ꓦ ꓟꓳ ꓟꓳ ꓔꓬ ꓢꓴ ꓠꓬ ꓫꓸ ꓓꓴ ꓔꓳꓹ ꓜꓳ ꓡ ꓥꓳ꓿ ꓕꓱ ꓟ ꓠꓬ ꓮ-ꓩ-ꓖ-ꓠꓯ-ꓢꓲ-ꓔ ꓗꓪ ꓐꓰ ꓢꓳ ꓣꓴ ꓟꓶ ꓟ ꓥ ꓡꓳ=