2021 ꓘꓳꓼ 10 ꓦ 20 ꓠꓬꓲ ꓗꓪ ꓟꓬ-ꓟ ꓐꓱ ꓶ ꓖꓪ ꓙꓱ ꓙ ꓢꓴ ꓴꓢꓮ ꓝꓲ ꓓꓴ Derek Chollet ꓠꓬ ꓢꓰ-ꓖ-ꓑꓳ ꓗꓴꓷꓼ ꓙꓵꓽ ꓪ ꓙꓳ ꓢꓴ ꓐꓴ ꓔꓯ ꓜꓲ ꓡꓯ ꓘꓳ ꓢꓲ꓾ ꓟꓬ-ꓟ ꓟꓯꓼ ꓐꓴ ꓒꓴ ꓓꓵꓽ/ꓓꓳ ꓚꓱꓹ ꓔꓯ ꓑꓲꓸ ꓞꓲꓽ ꓠꓹ ꓟ ꓖꓪ ꓙꓱ ꓡꓯ ꓘꓳ ꓗꓷꓳ ꓐꓰ ꓬꓲꓸ ꓓꓳꓽ ꓓꓳ ꓡ ꓡꓳ꓿
ꓟꓬ-ꓟ ꓐꓱ ꓶ ꓖꓪ ꓙꓱ ꓙ ꓢꓴ ꓴꓢꓮ ꓝꓲ ꓓꓴ ꓠꓬ ꓕꓮꓲ꓾ ꓢꓰ-ꓖ-ꓑꓳ꓾ ꓲ-ꓓꓲ-ꓠꓲ-ꓫ ꓗꓪ 10 ꓦ 17 ꓠꓬꓲ ꓗꓪ ꓐꓰ ꓰꓴꓸ ꓔꓴ ꓢꓲ꓾ ꓚꓳ ꓔꓬ ꓟ ꓥ ꓡꓳ꓿
ꓴꓢꓮ ꓗꓪ ꓥ ꓟꓲ ꓴꓢꓮ ꓐꓶꓽ ꓗꓴꓷꓼ ꓙ ꓡꓯ ꓘꓳ ꓢꓲꓽ ꓒꓽ ꓓꓽ ꓟ ꓠꓬꓲ ꓣꓳ ꓕꓲ ꓣꓳ ꓔꓯ ꓟꓬ-ꓟ ꓗꓴꓷꓼ ꓝꓲ ꓓꓴ ꓓꓽ ꓟ ꓚꓳ-ꓟꓳꓹ-ꓕꓴꓸ ꓜꓲ ꓡꓯ ꓘꓳ ꓔꓬ ꓡꓳ꓿
ꓮ-ꓢꓲ-ꓬ ꓡꓰ ꓬꓲꓸ ꓪ ꓜꓲꓼ ꓓꓴ ꓗꓪ ꓟꓬ-ꓟ ꓟꓯꓼ ꓐꓴ ꓔꓯ ꓟꓽ ꓜꓲꓼ ꓝꓲ ꓐꓰ ꓐꓯ ꓩꓴ ꓡ ꓢꓲ꓾ ꓟꓬ-ꓟ ꓟꓯꓼ ꓕꓲ ꓛꓱꓽ ꓗꓪ ꓐꓰ ꓠꓲꓹ ꓢꓲꓼ ꓗ ꓫꓵꓸ ꓘꓶꓽ ꓕꓱ ꓡꓽ ꓩꓴ ꓡ ꓡꓳ꓿
ꓝꓮꓲ ꓐꓱ ꓓꓴꓽ ꓗꓪ ꓣꓴ ꓡꓴꓽ ꓔꓸ ꓢꓴ ꓐꓴ ꓐꓰ ꓫꓵꓽ ꓩꓴ ꓔꓸ ꓢꓴ ꓮ ꓡꓻ 5000 ꓛꓲ ꓡꓲꓹ ꓖꓶ ꓓꓳ ꓡ ꓡꓳ꓿
ꓟꓬ-ꓟ ꓟꓵꓽ ꓗꓪ ꓐꓶꓽ ꓗꓴꓷꓼ ꓗꓪ ꓐꓰ ꓡ ꓟ ꓶ ꓡꓯꓼ ꓬꓰ ꓜꓴ ꓐꓴ ꓗꓪ ꓐꓰ 50% ꓠꓬ ꓡꓽ ꓙꓰ ꓖꓴꓳ꓿ ꓖꓳ ꓟ ꓑꓶꓸ ꓓꓴ ꓶ ꓡꓯꓼ ꓚ3, ꓗꓪ ꓟꓬ-ꓟ ꓖꓓꓑ ꓠꓬ ꓞꓰ ꓡꓰ ꓡ ꓥꓳ ꓐꓰ ꓢꓪꓼ ꓔ ꓡꓳ꓿
ꓟꓬ-ꓟ ꓒꓴ ꓒꓵꓽ ꓠꓬ ꓮ ꓕꓯ ꓕꓲ ꓧꓪꓹ ꓟꓽ ꓚꓰꓼ ꓬꓲꓸ ꓒꓵꓽ ꓞꓰ ꓡꓰ ꓟ ꓐꓰ꓾ ꓶ ꓤ ꓒꓵꓽ ꓥ ꓟꓲ ꓠꓯꓸ ꓡ ꓖꓴ꓾ ꓮ ꓔꓳꓸ ꓧꓪ ꓞꓶ ꓒꓵꓽ ꓥ ꓟꓲ ꓠꓯꓸ ꓡ ꓔꓬ ꓡꓳ꓿ ꓟꓯꓼ ꓘꓶꓽ ꓗꓪ ꓑ ꓫꓬ ꓐꓴ ꓫꓸ ꓙꓵ ꓔꓬ ꓟ ꓐꓯ ꓖꓴ ꓟꓽ ꓓ ꓟꓬꓽ ꓡ ꓔꓬ ꓡꓳ꓿
ꓒꓴ ꓞꓳꓽ ꓦꓲ ꓐꓴ ꓗꓪ ꓐꓰ ꓒꓴ ꓕꓵꓼ ꓪ ꓟꓽ ꓓ꓿ ꓖꓳ ꓡꓱ ꓥ ꓟꓲ ꓫꓵꓺ ꓡꓳ ꓑ ꓜꓴ ꓐꓴ ꓠꓬ ꓒꓴ ꓞꓳꓽ ꓦꓲ ꓗꓪ ꓐꓰ ꓕꓲ ꓝꓸ ꓫꓵꓺ ꓪꓴꓽ ꓖꓶ ꓓꓴ ꓥꓳ ꓐꓯ ꓡꓳ꓿
ꓝꓮꓲ ꓮ-ꓢꓲ-ꓬ ꓜꓲꓼ ꓓꓴ ꓗꓪ ꓡꓰ ꓟꓽ ꓞꓲ꓾ 12 ꓦ ꓕꓯ ꓣꓱꓽ ꓬꓰ ꓓꓴ ꓙꓳ ꓟ ꓖ7 ꓜꓲꓼ ꓓꓴ ꓗꓪ ꓥ ꓟꓲ ꓟꓬ-ꓟ ꓟꓯꓼ ꓜꓲꓽ ꓐꓴ ꓔꓯ ꓟꓽ ꓓꓯ ꓝꓲ ꓐꓰ ꓐꓯ ꓩꓴ ꓡ ꓡꓳ꓿
ꓟꓬ-ꓟ ꓟꓯꓼ ꓜꓲꓽ ꓜꓳ-ꓟꓰꓹ-ꓕꓴꓸ ꓡꓰ꓾ ꓟꓯꓼ ꓠꓬ ꓕꓱ ꓡꓱꓳ ꓫꓵꓽ ꓐꓶꓽ ꓗꓴꓷꓼ ꓗꓪ ꓚꓳꓸ ꓑꓲꓸ ꓓꓴ ꓬꓲ ꓫꓵ ꓬꓲ ꓙꓰ ꓔꓯ ꓮ ꓟꓬꓹ ꓔꓳꓹ ꓜꓳꓽ ꓠꓬꓲꓳ꓿ ꓮ ꓫꓵ ꓙ ꓫꓸ ꓟꓽ ꓛꓲ ꓐꓰ ꓐꓯ ꓡꓳ꓿
ꓬꓥ-ꓖꓳꓥ ꓗꓪ ꓠꓬ ꓙ ꓖꓴ ꓗꓪ ꓒꓳꓹ ꓔꓳꓹ ꓟ ꓡꓯ ꓫꓵ ꓙꓳ ꓔꓬ ꓢꓰꓽ ꓡꓳ꓿
ꓟꓶ-ꓡꓯ-ꓫ ꓐꓶꓽ ꓗꓴꓷꓼ ꓙ ꓡꓯ ꓘꓳ ꓢꓲꓽ ꓒꓽ ꓓ ꓟ Dato’ Saifuddin Abdullah ꓡꓰ꓾ ꓮ-ꓢꓲ-ꓬ ꓠꓬ ꓢꓴ ꓗꓴꓷꓼ ꓘꓴ ꓗꓪ ꓟ ꓫꓵꓽ ꓪꓴ ꓔꓯ ꓟꓽ ꓚꓬꓼ ꓠꓹ ꓟ ꓬꓲꓸ ꓡꓲꓽ ꓔꓯ ꓞꓲ ꓘꓳꓼ ꓛꓳ ꓡ ꓥ ꓟꓲ꓾ ꓮ ꓟꓶ ꓠꓬ ꓕꓱ ꓟ ꓔꓯ ꓫꓬꓹ ꓔꓱꓹ ꓙꓵꓹ ꓛꓲꓳ ꓐꓰ ꓐꓯ ꓩꓴ ꓡ ꓡꓳ꓿
ꓕꓲ ꓗꓴꓷꓼ ꓗꓪ ꓫꓸ ꓟꓷꓼ ꓓꓴ꓾ ꓟꓯꓼ ꓢꓰꓼ ꓡꓯ ꓘꓳ ꓓꓴ ꓙꓳ ꓠꓬ ꓠꓶ ꓛꓳ ꓕꓲ ꓛꓳ 9 ꓗꓴꓷꓼ ꓗꓪ ꓘꓶ ꓡꓶꓽ ꓓꓴ ꓙꓳ ꓡ ꓟ ꓥ ꓡꓳ꓿ ꓖꓳ ꓟ ꓑꓶꓸ ꓓꓴ ꓬꓲꓸ ꓦꓲ ꓘꓴ ꓗꓪ ꓟ ꓫꓵꓽ ꓪꓴ ꓠꓬ ꓕꓲ ꓘꓹ ꓡꓱꓸꓼ ꓔꓯ ꓘꓶ ꓡꓶꓽ ꓐ ꓡ ꓟ ꓡꓰ ꓐꓰ꓾ ꓟꓬ-ꓟ ꓫꓵꓽ ꓪꓴ ꓠꓬ ꓮ-ꓢꓲ-ꓬ ꓫꓵꓽ ꓪꓴ꓾ ꓟꓲ ꓠꓯ ꓗꓴꓷꓼ ꓜꓴ ꓫꓵꓽ ꓪꓴ ꓒꓬꓱꓼ ꓡ ꓔꓬ ꓡꓳ꓿
ꓒꓬꓱꓼ ꓔꓬ ꓟ ꓕꓲ ꓫꓵ ꓕꓲ ꓫꓵ ꓮ ꓙꓵꓽ ꓟ ꓔꓯ ꓜꓯꓻ ꓠꓬꓲ ꓠꓬ꓾ ꓟꓲ ꓕꓯꓽ ꓡꓬ ꓡ ꓔꓳꓼ ꓕꓯ ꓮ ꓘꓶꓸ ꓠꓯ ꓞꓲꓹ ꓡꓰ ꓟ ꓡꓰ ꓐꓰ ꓟꓯꓼ ꓘꓶꓽ ꓠꓬ ꓡꓲꓽ ꓡ ꓥꓳ꓿ ꓖꓳ ꓡꓱ ꓥ ꓟꓲ ꓧꓶꓸ ꓕꓯ ꓟ ꓕꓯ ꓢꓲ ꓠꓬ꓾ ꓥꓳ ꓡꓳꓸ ꓓꓴ ꓟꓲ ꓟꓬꓽ ꓠꓬ ꓕꓶꓻ ꓡ ꓔꓬ ꓡꓳ꓿
ꓮ ꓡꓲ ꓐꓯ ꓡꓲꓸ ꓐꓯ ꓮ ꓟꓶ ꓠꓬ ꓒꓴ ꓚꓱꓹ ꓬꓲꓸ ꓒꓰꓼ ꓞꓲꓽ ꓡ ꓓꓴ ꓙ ꓖꓶ ꓔꓬ ꓟ ꓗꓪ ꓐꓰ … ꓮ ꓫꓵ ꓥ ꓟꓲ ꓒꓴ ꓗꓪ ꓐꓰ ꓢꓯꓼ ꓩꓴꓽ ꓔꓬ ꓟ ꓑꓶꓸ ꓓꓴ ꓓꓵꓽ ꓙ ꓓꓴ ꓮ ꓟꓬꓹ ꓙꓳ ꓡ ꓔꓬ ꓪ꓿
ꓮ ꓤ ꓕꓲ ꓕꓳꓼ … ꓮ ꓤ ꓕꓲ ꓕꓳꓼ