ꓮ-ꓢꓰ-ꓬ ꓔꓯ ꓠ ꓠꓹ ꓓꓴ ꓥꓳ꓾ ꓚꓣꓑꓧ/ꓠꓴꓖ/ꓑꓓꓝ ꓔꓯ ꓟꓽ ꓖꓪ ꓙꓱ

ꓙꓵꓽ ꓪ ꓣꓴ ꓔꓸ ꓟ ꓟꓬ-ꓟ ꓟꓯꓼ ꓐꓴ ꓠꓬ ꓮ-ꓢꓲ-ꓬ ꓔꓯ ꓔꓳꓹ ꓘꓶ (2) ꓧꓪꓹ ꓐꓳ ꓓꓳ ꓡ ꓗꓸ ꓠꓯꓸ 10 ꓦ 23 ꓠꓬꓲ ꓗꓪ 3 ꓧꓪꓸ ꓕꓲ ꓧꓪꓸ ꓐꓳ ꓩꓴ ꓡ ꓟ ꓕꓳ ꓶ ꓗꓪ ꓠꓬ ꓮ-ꓢꓰ-ꓬ ꓐꓯ ꓘꓶꓽ (5) ꓘꓶ ꓔꓯ ꓛꓳ ꓓꓴ ꓥꓳ ꓐꓰ ꓐꓯ ꓡ ꓡꓳ꓿

ꓟꓬ-ꓟ ꓐꓱ ꓶ ꓮ-ꓢꓰ-ꓬ ꓜꓴ 2021 ꓘꓳꓼ 4 ꓦ 24 ꓠꓬꓲ ꓕꓯꓽ ꓪꓽ ꓔꓸ ꓟ ꓪꓽ ꓔꓸ ꓟ (5) ꓘꓶꓽ ꓠꓬ꓾

• ꓜꓲ ꓜꓲ ꓑꓰꓹ ꓑꓰꓹ ꓞꓳ ꓢꓰꓼ ꓪ ꓢꓰꓼ ꓟ ꓠꓽ ꓗꓷ꓿
• ꓑ ꓫꓬ ꓐꓴ ꓐꓱ ꓶ ꓬꓲ ꓜꓴ ꓮ ꓙꓵꓽ ꓖꓪ ꓙꓱ ꓡꓯ ꓘꓳ꓿
• ꓕꓱ ꓡꓱ ꓖꓪ ꓙꓱ ꓐ ꓡ ꓠꓹ ꓟ ꓟꓬꓱꓽ ꓑꓶꓸ ꓐꓱ ꓶ ꓮ-ꓢꓲ-ꓬ ꓜꓴ ꓗꓪ ꓐꓰ ꓝꓲ ꓓꓴ ꓝꓲ ꓖꓶꓽ ꓓꓴ ꓥꓳ꓿
• ꓮ-ꓢꓲ-ꓬ ꓠꓬ ꓞꓳ ꓤ ꓔꓯ ꓫꓱꓸ ꓤꓼ ꓢꓲ ꓬꓰ ꓙ ꓟ ꓟꓬꓱꓽ ꓔꓯ ꓮꓧꓮ ꓗꓪ ꓐꓰ ꓕꓲ ꓝꓸ ꓣꓱꓽ ꓬꓰ ꓩꓴ ꓡ ꓓꓴ ꓥꓳ꓿
• ꓮ-ꓢꓲ-ꓬ ꓝꓲ ꓓꓴ ꓠꓬ ꓬꓲꓸ ꓣꓳ ꓬꓲꓸ ꓜꓴ ꓥ ꓕ ꓑꓳꓸ ꓔꓯ ꓜꓲ ꓡꓯ ꓘꓳ ꓓꓴ ꓥꓳ꓿

ꓟꓬ-ꓟ ꓟꓯꓼ ꓐꓴ ꓔꓯ ꓮ-ꓢꓰ-ꓬ ꓜꓲꓼ ꓓꓴ ꓗꓪ ꓟꓽ ꓔ ꓝꓲ ꓐꓰ 2021 ꓘꓳꓼ 10 ꓦ 15 ꓠꓬꓲ ꓕꓯꓽ ꓗꓽ ꓩꓴ ꓡ ꓟ ꓗꓪ ꓐꓰ ꓟꓬ-ꓟ ꓟꓯꓼ ꓐꓴ ꓡꓰꓽ 2021 ꓘꓳꓼ 10 ꓦ 16 ꓠꓬꓲ ꓕꓯ ꓕꓲ ꓚꓴ꓾ 22 ꓠꓬꓲ ꓕꓯꓽ ꓕꓲ ꓚꓴꓸ ꓚꓳꓹ ꓘꓶꓽ ꓐꓰ꓾ ꓗꓹ ꓫꓵꓸ ꓘꓶꓽ ꓐꓳ ꓩꓴ ꓡ ꓗꓸ ꓠꓯꓸ 23 ꓠꓬꓲ ꓗꓪ ꓠꓬ ꓥꓸ ꓟꓶꓼ ꓥꓸ ꓮ-ꓢꓰ-ꓬ ꓐꓯ ꓘꓶꓽ (5) ꓘꓶ ꓔꓯ ꓛꓳ ꓓꓴ ꓥꓳ ꓐꓰ ꓐꓯ ꓓꓳ ꓡ ꓟ ꓥ ꓡꓳ꓿

ꓠꓚꓮ ꓙ ꓟꓳ ꓘꓶꓽ ꓕꓳ ꓶ ꓗꓪ ꓟꓽ ꓓꓯˍ ꓟ ꓑꓳꓺ ꓔꓯꓹ ꓟꓯꓼ ꓐꓴ ꓥ ꓟ ꓮꓮ꓾ ꓔꓠꓡꓮ꓾ ꓟꓠꓓꓮꓮ ꓐꓴ ꓔꓯ ꓟꓲ ꓙ ꓡꓯ ꓘꓳ ꓓꓴ ꓥꓳ꓿ ꓖꓳ ꓡꓱ ꓥ ꓟꓲ ꓠꓴꓖ/ꓚꓣꓑꓧ/ꓑꓓꓝ ꓔꓯ ꓠꓬ ꓟꓽ ꓫꓸ ꓕꓱ꓾ ꓟꓽ ꓖꓪ ꓙꓱ ꓐꓰ ꓐꓯ ꓔ ꓢꓰꓽ ꓡꓳ꓿

ꓮ-ꓢꓰ-ꓬ ꓐꓯ ꓘꓶ (5) ꓘꓶꓽ ꓠꓬ 2021 ꓘꓳꓼ 4 ꓦ 24 ꓠꓬꓲ ꓕꓯ ꓠꓲꓹ ꓧꓳꓹ ꓔꓸ ꓟ ꓥ ꓡꓳ꓿ ꓜꓲꓼ ꓓꓴ ꓖꓳ ꓟ ꓗꓪ ꓟꓰꓹ-ꓮꓳ-ꓡꓮꓲꓽ ꓥ ꓟꓲ ꓜꓲꓼ ꓔ ꓗꓷ ꓡꓳ꓿ ꓖꓳ ꓡꓱ ꓥ ꓟꓲ ꓮ ꓟꓶ ꓦ ꓐ (6) ꓟ ꓡꓳꓼ ꓡ ꓗꓪ ꓛꓲ ꓮ ꓫꓵꓽ ꓕꓲ ꓫꓵ ꓡꓲꓸ ꓬꓰ ꓟꓽ ꓫꓳ ꓟ ꓕꓯ ꓢꓲ꓾ ꓚꓲ ꓛꓬ ꓑ ꓫꓬ ꓔꓯ ꓡꓽ ꓛꓴꓸ ꓗꓪ ꓐꓰ ꓢꓰꓼ꓾ ꓐꓱ ꓓꓴꓽ ꓗꓪ ꓡꓴꓽ ꓔꓬ ꓟ ꓥ ꓡꓳ꓿