ꓮ ꓔꓳꓸ ꓐꓰ꓾ ꓙꓼ ꓧꓪ ꓞꓶ ꓐꓱ ꓶ ꓟꓬ-ꓟ ꓗꓴꓷꓼ ꓒꓴ ꓣꓱꓽ ꓚꓱꓹ ꓮ ꓘꓶꓸ ꓞꓰ ꓩꓴꓳ

ꓡ ꓠꓹ ꓟ ꓦ ꓐ 6 ꓦ ꓐꓱ ꓶ ꓟꓬ-ꓟ ꓗꓴꓷꓼ ꓒꓴ ꓣꓱꓽ ꓚꓱꓹ ꓢꓪꓼ ꓔꓸ ꓟ ꓗꓪ (half a year budget) ꓮ ꓔꓳꓸ ꓐꓰ꓾ ꓙꓼ ꓧꓪꓽ ꓞꓶ (electricity and fuel) ꓐꓱ ꓶ ꓧꓶꓸ ꓕꓯ ꓠꓡꓓ ꓗꓴꓷꓼ ꓙꓵꓽ ꓜꓴ ꓡꓰ ꓕꓲ ꓦ ꓩꓴꓸ 25 ꓩꓴꓸ ꓕꓯ ꓢꓲ ꓣꓱꓽ ꓔꓬ ꓟ ꓗꓪ ꓐꓰ ꓮ ꓟꓶ ꓙꓵꓽ ꓪ ꓣꓴ ꓔꓸ ꓟ ꓟꓯꓼ ꓡꓰ ꓕꓲ ꓦ ꓩꓴꓸ 4 ꓩꓴꓸ ꓗꓪ ꓛꓲ ꓣꓴ ꓞꓰ ꓩꓴ ꓗꓷꓳ=ꓙꓵꓽ ꓪ ꓣꓴ ꓔꓸ ꓟ ꓟꓯꓼ ꓡꓰ ꓡ ꓠꓹ ꓟ ꓦ ꓐ ꓛꓳꓼ ꓟ ꓘꓴꓽ ꓟ ꓗꓪ ꓗꓴꓷꓼ ꓒꓴ ꓣꓱꓽ ꓚꓱꓹ ꓢꓷ ꓙ ꓟꓴ ꓙ ꓩꓴ ꓡ ꓟ ꓗꓪ ꓮ ꓔꓳꓸ ꓐꓰ꓾ ꓙꓼ ꓧꓪꓽ ꓞꓶ ꓐꓱ ꓶ 393234376 ꓪꓹ ꓒꓯꓼ ꓣꓱꓽ ꓠꓹ ꓟ ꓢꓪꓼ ꓔꓸ ꓡꓳ= ꓕꓱ ꓟ ꓠꓬ ꓗꓴꓷꓼ ꓒꓴ ꓣꓱꓽ ꓚꓱꓹ ꓮ ꓙꓵꓽ ꓟ ꓗꓪ 4ꓸ20 ꓩꓴꓸ ꓙꓳ ꓡꓳ (100 ꓩꓴꓸ ꓗꓪ ꓐꓰ 4ꓸ2 ꓩꓴꓸ)=

“ꓕꓱ ꓡꓱ ꓥꓳ ꓐꓯ ꓠꓽ ꓟꓵꓽ ꓫꓱ ꓦꓬꓼ ꓠꓬꓲ ꓗꓪ ꓮ ꓔꓳꓸ ꓟꓽ ꓪ ꓢꓴ ꓐꓯ ꓖꓴ ꓟꓽ ꓓ ꓙꓳ ꓡ ꓥꓳ= ꓝꓮꓲ ꓶ ꓡꓯꓼ ꓚꓱꓹ ꓮ ꓙꓵꓽ ꓮ ꓖꓪꓯꓽ ꓓꓽ ꓗꓷ ꓡꓰ ꓡ ꓥꓳ= ꓙꓼ ꓟꓳ ꓓꓳ ꓮ ꓙꓵꓽ ꓟꓬꓱꓽ ꓟꓽ ꓬꓰ ꓙꓰ ꓡ ꓓꓴ ꓚꓱꓹ ꓗꓪ꓾ ꓠꓯ ꓞꓲꓹ ꓠꓯ ꓕꓳꓽ ꓟ ꓚꓱꓹ ꓗꓪ ꓧꓳꓽ ꓡꓱꓸꓼ ꓙꓰ ꓡ ꓓꓴ ꓬꓰ ꓔꓬꓳ” ꓐꓰ ꓗꓴꓷꓼ ꓫꓵꓽ ꓪꓴ ꓢꓷꓸ ꓢꓴ ꓕꓲ ꓣꓳ ꓡꓰ ꓐꓯ ꓡꓳ= ꓠꓡꓓ ꓗꓴꓷꓼ ꓙꓵꓽ ꓜꓴ ꓡꓰ ꓟꓬꓱꓽ ꓬꓰ ꓟ ꓦꓬꓼ ꓠꓬꓲ ꓗꓪ꓾ ꓮ ꓔꓳꓸ ꓐꓰ ꓙꓼ ꓧꓪꓽ ꓞꓶ ꓐꓱ ꓶ ꓣꓱꓽ ꓠꓹ ꓟ 2020-21 ꓘꓳꓼ ꓟ ꓐꓱ ꓶ ꓟꓳꓸ ꓙ ꓔꓸ ꓟ ꓠꓬ ꓗꓴꓷꓼ ꓒꓴ ꓣꓱꓽ ꓚꓱꓹ ꓮ ꓙꓵꓽ ꓟ ꓗꓪ ꓐꓰ ꓕꓲ ꓦ ꓩꓴꓸ 22ꓸ73 ꓩꓴꓸ ꓙꓳ ꓡꓳ= ꓝꓮꓲ 2019-20 ꓘꓳꓼ ꓗꓪ ꓠꓬ ꓕꓲ ꓦ ꓩꓴꓸ 25ꓸ35 ꓩꓴꓸ꓾ 2018-19 ꓘꓳꓼ ꓗꓪ ꓠꓬ ꓕꓲ ꓦ ꓩꓴꓸ 22ꓸ24 ꓩꓴꓸ ꓣꓱꓽ ꓗꓷ ꓟ ꓑꓶꓸ ꓓꓴ ꓧꓶꓸ ꓕꓯ ꓮ ꓔꓳꓸ ꓟꓽ ꓪ ꓠꓬꓲ ꓟ ꓞꓳ ꓘꓹ ꓮ ꓟꓬꓹ ꓗꓪ ꓮ ꓔꓳꓸ ꓔꓶꓸ ꓛꓲ ꓬꓰ ꓟ ꓥ ꓡꓳ=