ꓮꓳ-ꓢ-ꓢꓴ-ꓚꓰꓽ ꓔꓯ ꓠꓯ-ꓑꓲ-ꓓꓳ ꓐꓱ ꓓꓴꓽ ꓗꓪ ꓡꓴꓽ ꓩꓴꓳ

ꓮꓳ-ꓢ-ꓢꓴ-ꓚꓰꓽ ꓔꓯ ꓠꓯ-ꓑꓲ-ꓓꓳ ꓜꓲꓸꓼꓐꓴ-ꓔꓲ-ꓣꓲꓼ ꓗꓪ ꓙꓳˍ ꓟ ꓐꓱ ꓓꓴꓽ ꓗꓪ ꓠꓬꓲꓸ ꓠꓬꓲ 2022 ꓘꓳꓼ 6 ꓦ 22 ꓠꓬꓲ ꓗꓪ ꓚꓲꓸ ꓡꓴꓽ ꓩꓴꓳ ꓐꓰ ꓬꓲꓸ ꓔꓯ ꓡꓯꓼ ꓠꓶꓽ ꓢꓴ ꓐꓴ ꓗꓪ ꓐꓰ ꓓꓳꓽ ꓓꓳ ꓡ ꓡꓳ꓿

ꓠꓯ-ꓑꓲ-ꓓꓳ ꓐꓱ ꓓꓴꓽ ꓗꓪ ꓦꓲ ꓫꓵꓼ ꓫꓬꓹ ꓔꓬ ꓟ ꓫꓬꓹ ꓓꓳ ꓡꓰ ꓠꓬꓲ ꓖꓳ ꓗꓪ ꓡꓴꓽ ꓔꓸ ꓓꓴ ꓥ ꓐꓷˍ ꓥꓳ꓾ ꓐꓰ ꓢꓷꓸ ꓢꓴ ꓐꓴ ꓠꓰ ꓢꓪꓼ ꓔꓬ ꓡꓳ꓿

ꓟꓯꓼ ꓗꓳ-ꓢꓰ ꓗꓪ ꓐꓰ ꓮ ꓫꓵꓽ ꓓꓳꓽ ꓐꓯ ꓒꓬꓱ ꓟ ꓟꓽ ꓙꓳ ꓢꓰꓽ ꓥ ꓟꓲ꓾ ꓫꓹ ꓠꓯꓼ ꓗꓪ ꓚꓳꓸ ꓫꓵꓽ ꓪꓴ ꓔꓯ ꓐꓱ ꓓꓴꓽ ꓘꓴꓽ ꓗꓪ ꓚꓲꓸ ꓚ ꓓꓴ ꓥꓳ꓾ ꓐꓯˍ ꓟ ꓠꓬ ꓐꓯ ꓟꓴ ꓒꓽ ꓐꓴ ꓗꓪ ꓐꓰ ꓢꓷꓸ ꓡ ꓡꓳ꓿

ꓟꓯꓼ ꓗꓳ-ꓢꓰ ꓡꓰ 2022 ꓘꓳꓼ 2 ꓦ 1 ꓠꓬꓲ ꓗꓪ ꓐꓰ ꓮꓳ-ꓢ-ꓢꓴ-ꓚꓰꓽ ꓔꓯ ꓣꓴ ꓡꓴꓽ ꓔꓸ ꓥ ꓟꓲ꓾ ꓮ ꓡꓲ ꓗꓪ ꓔꓬ ꓝꓲˍ ꓟ ꓟꓽ ꓢꓷꓸ꓿ ꓬꓲꓸ ꓔ ꓔꓲꓺ ꓡ ꓞꓳ 8 ꓣꓳ ꓔꓬ ꓟ ꓥ ꓢꓲ꓾ ꓬꓲꓸ ꓮꓸ ꓠꓽ ꓕꓲ ꓘꓹ ꓥ ꓟꓲ ꓐˍ ꓡꓳ꓿

ꓬꓲꓸ ꓔꓯ ꓟꓯꓼ ꓗꓳ-ꓢꓰ ꓠꓰ ꓐꓯ ꓟꓴ 10 ꓚꓱꓹ ꓟꓽ ꓞꓲ ꓩꓴ ꓔꓸ ꓟ ꓥ ꓢꓲ꓾ ꓮ ꓟꓶ ꓗꓪ ꓛꓲ ꓚꓲꓸ ꓚ ꓐꓯ ꓟꓴ ꓘꓶꓽ ꓓꓳ ꓡꓰˍ ꓟ ꓠꓬ ꓐꓱ ꓓꓴꓽ ꓗꓪ 11 ꓘꓳꓼ ꓡꓴꓽ ꓠꓹ ꓟ ꓐꓯ ꓞꓷꓹ ꓔꓸ ꓡꓳ꓿ ꓬꓲꓸ ꓦ ꓘꓳꓼ ꓟꓽ ꓞꓲ ꓡꓴꓽ ꓠ ꓗ ꓟ ꓙꓵꓽ ꓗꓪ ꓗꓪ ꓐꓰ ꓬꓲꓸ ꓬꓯ ꓐꓯ ꓟꓴ ꓩꓴ ꓔ ꓡꓳ꓿

ꓜ-ꓐꓴ-ꓔꓲ-ꓣꓲꓼ ꓐꓱ ꓓꓴꓽ ꓗꓪ ꓬꓲꓸ ꓚꓲꓸ ꓛꓲꓳ ꓐꓰ ꓬꓲ ꓔꓯ ꓢꓷꓸ ꓢꓴ ꓐꓴ ꓡꓰ ꓓꓳꓽ ꓜꓳ ꓡ ꓟ ꓥ ꓡꓳ꓿