ꓠꓬꓲꓸ ꓠꓬꓲ 2021 ꓘꓳꓼ 11 ꓦ 15 ꓠꓬꓲ ꓕꓯꓽ ꓠꓡꓓ ꓢꓽ ꓡ ꓙꓵꓽ꓾ ꓗꓴꓷꓼ ꓚꓴ ꓬꓲꓹ ꓖꓶ ꓧꓳꓽ ꓟꓳꓸ ꓢꓴ ꓮꓳ-ꓢꓸ-ꓢꓴꓸ-ꓚꓰ ꓔꓺ ꓔꓲ 16 ꓣꓳ ꓔꓯ 2020 ꓢꓲꓻ ꓣꓴ ꓑꓮꓲ ꓗꓪ ꓟꓯꓹ ꓟꓽ ꓜꓳ ꓟꓽ ꓔꓱꓹ ꓬꓰ ꓥ ꓐꓯ ꓢꓲ ꓟꓬ-ꓟ ꓟꓯꓼ ꓡꓰ ꓒꓴ ꓔꓸ ꓟ ꓴꓰꓚ ꓡꓰ ꓐꓯ ꓟꓴ ꓩꓴ ꓔ ꓡꓳ꓿
ꓮꓳ-ꓢꓸ-ꓢꓴꓸ-ꓚꓰ ꓔꓺ ꓔꓲ ꓞꓳ ꓪꓴꓽ ꓞꓳ ꓟ 16 ꓣꓳ ꓠꓬ 2020 ꓢꓲꓻ ꓣꓴ ꓑꓮꓲ ꓐꓱ ꓶ ꓗꓳ-ꓟꓲ-ꓫꓲ ꓡꓯꓼ ꓗꓸ ꓒꓴ ꓟ ꓗꓪ ꓙꓵꓽ ꓗ ꓔꓯ ꓟꓽ ꓪꓽ ꓓꓴ ꓙꓳ ꓡꓳ꓾ ꓟꓬꓱꓽ ꓬꓰ ꓢꓴ ꓔꓯ ꓘꓶ ꓡꓶꓽ ꓟ ꓐꓰ ꓚꓳꓹ ꓘꓶꓽ ꓕꓱ ꓟ ꓙꓳ ꓡꓳ꓾ ꓙꓵꓽ ꓢꓴ ꓡꓳꓸ ꓢꓴ ꓐꓴ ꓔꓯ ꓟꓽ ꓬꓰ ꓟꓽ ꓓ ꓶꓻ ꓡꓲꓽ ꓑꓵꓸˍ ꓡꓳ꓾ ꓟꓯꓹ ꓛꓬꓽ ꓟꓽ ꓜꓳ ꓟꓽ ꓔꓱꓹ ꓬꓰ ꓡꓳ꓾ ꓠꓡꓓ ꓧꓪꓸ ꓡꓰ ꓠꓹ ꓟ ꓟꓽ ꓔꓱꓹ ꓟꓽ ꓜꓳ ꓙꓵꓽ ꓪ ꓐꓰ꓾ ꓟꓬꓱ ꓓꓳꓽ ꓣꓱꓽ ꓡꓳ ꓐꓯ ꓢꓲ ꓫꓵꓽ ꓪꓴ ꓐꓯ ꓟꓴ ꓚꓱꓹ ꓩꓴ ꓔ ꓟ ꓥ ꓡꓳ꓿
2020 ꓘꓳꓼ 11 ꓦ 8 ꓠꓬꓲ ꓢꓲꓻ ꓑꓮꓲ ꓗꓪ ꓟꓬ-ꓟ ꓕꓲ ꓗꓴꓷꓼ ꓡꓱꓸꓼ ꓗꓪ ꓠꓡꓓ ꓟꓬꓽ ꓠꓬꓲ ꓧꓪꓸ ꓡꓰ ꓢꓲ꓾ ꓖꓳ ꓕꓯꓽ ꓟꓯꓹ ꓖꓶ ꓚꓱꓹ ꓔꓯ ꓠꓬ ꓐꓶꓽ ꓔꓶꓸ ꓡꓳꓸ ꓠꓬꓲ ꓜꓴ ꓐꓴ ꓡꓰꓽ ꓢꓲꓽ ꓫꓬ ꓟ ꓐꓰ ꓔꓱꓹ ꓜꓳ ꓟ ꓢꓲꓻ ꓣꓴ ꓑꓮꓲ ꓥꓳ ꓐꓰ ꓢꓷ ꓙ ꓟꓴ ꓙ ꓗꓷ ꓟ ꓥ ꓡꓳ꓿
ꓟꓯꓼ ꓡꓰ ꓗꓴꓷꓼ ꓙꓵꓽ ꓪ ꓣꓴ ꓙꓰ ꓕꓯꓽ 2020 ꓢꓲꓻ ꓣꓴ ꓑꓮꓲꓽ ꓟꓽ ꓜꓳ ꓟꓽ ꓔꓱꓹ ꓠꓬꓲ ꓥ ꓡꓳ ꓐꓰ ꓬꓲꓸ ꓪꓴꓸ ꓓꓵ ꓔꓶ ꓔꓸ ꓥ ꓟꓲ꓾ ꓠꓡꓓ ꓗꓴꓷꓼ ꓙꓵꓽ ꓜꓴ ꓗꓪ ꓟ ꓞꓳ ꓪꓴꓽ ꓞꓳ ꓟ ꓮ ꓟꓬꓹ ꓔꓯ ꓠꓱꓸ ꓐꓯꓼ ꓫꓵꓽ ꓪꓴ ꓩꓴ ꓢꓲꓸ 20 ꓘꓳꓼ 75 ꓘꓳꓼ꓾ ꓕꓱ ꓡꓱ ꓮ ꓕꓽ ꓟꓽ ꓚꓰꓼꓳ ꓫꓵꓽ ꓡꓴꓽ ꓝꓴꓲꓸ ꓐꓯ ꓟꓴ ꓘꓶꓽ ꓔꓬ ꓟ ꓥ ꓡꓳ꓿
ꓙꓵꓽ ꓪ ꓣꓴ ꓙꓰ ꓢꓲꓸ 10 ꓦ ꓘꓴꓽ ꓗꓪ ꓛꓲ ꓡ ꓕꓯꓽ ꓢꓲꓸ ꓬꓲꓸ ꓪ ꓡꓰ ꓪꓴꓸ ꓓꓵ ꓔꓶ ꓔꓸ ꓟ ꓚꓱꓹ ꓗꓪ ꓐꓰ 16 ꓣꓳ ꓔꓯ ꓐꓯ ꓟꓴ ꓩꓴ ꓡ ꓟ ꓥ ꓡꓳ꓿
ꓠꓡꓓ ꓠꓬ 2020 ꓢꓲꓻ ꓣꓴ ꓑꓮꓲ ꓗꓪ 83% ꓧꓪꓸ ꓡꓰ ꓡꓳ꓿ ꓕꓱ ꓡꓱ ꓧꓪꓸ ꓡꓰꓽ ꓟ ꓠꓬ ꓕꓱ ꓕꓲ ꓧꓪꓹ ꓢꓲꓸ ꓦ ꓟꓳ ꓦ ꓘꓪꓽ ꓧꓪꓸ ꓡꓰ ꓠꓬꓲ ꓟ ꓑ-ꓔꓲ ꓟꓽ ꓥ꓿ 1990 ꓘꓳ; ꓕ ꓑꓳꓸ ꓢꓲꓻ ꓣꓴ ꓑꓮꓲ ꓗꓪ ꓓꓵꓽ ꓡ ꓢꓲꓸ ꓔꓯꓺ ꓡꓯ ꓘꓳ ꓕ ꓑꓳꓸ ꓧꓪꓸ ꓡꓰ ꓟ ꓑ-ꓔꓲ ꓥ ꓡꓳ꓿