ꓮꓳ-ꓢꓸ-ꓢꓴꓸ-ꓚꓰꓽ ꓔꓯ ꓜꓲ ꓝꓲ ꓠꓹ ꓟ ꓮ ꓟꓶ ꓓꓵꓽ ꓙ ꓓꓴ ꓥꓳ

ꓮꓳ-ꓢꓸ-ꓢꓴꓸ-ꓚꓰꓽ ꓔꓯ ꓜꓲ ꓝꓲ ꓠꓹ ꓟ ꓮ ꓟꓶ ꓕꓯꓼ ꓓꓵꓽ ꓙ ꓓꓴ ꓥꓳ ꓐꓰ ꓟꓬ-ꓟ ꓟꓯꓼ ꓜꓲꓽ ꓟꓰꓹ-ꓮꓳ-ꓡꓮꓲꓽ ꓡꓰ ꓮ-ꓢꓰ-ꓬ ꓗꓴꓷꓼ ꓜꓴ ꓝꓲ ꓓꓴ ꓑ-ꓬꓼ ꓢꓳꓼ-ꓧꓳ Prak Sokhonn ꓔꓯ ꓐꓯ ꓩꓴ ꓡ ꓡꓳ꓿

“ꓗꓴꓷꓼ ꓙꓲ ꓡ ꓠꓹ ꓟ ꓓꓵꓽ ꓙ ꓚꓰꓼ ꓠꓬ꓾ ꓠꓲꓹ ꓞ ꓜꓲ ꓡꓯ ꓘꓳ ꓝꓲ ꓠ ꓔꓸ꓿ ꓖꓪ ꓙꓱ ꓠ ꓔꓸ꓿ ꓮ ꓟꓶ ꓕꓯꓼ ꓐꓯꓸꓳ ꓫꓵꓽ ꓠꓽ ꓮ ꓔꓳ ꓔꓲꓸ ꓥꓳ꓿ ꓬꓲ ꓙꓵꓹ ꓪꓽ ꓐꓶ ꓠ ꓬꓰ ꓔꓬꓳ ꓫꓵꓽ ꓥꓳ꓿ ꓗꓴꓷꓼ ꓔꓯ ꓠꓲꓹ ꓠꓵˍ ꓟ ꓟꓽ ꓥ” ꓐꓰ ꓗꓴꓷꓼ ꓟꓸ ꓟꓲꓽ ꓧꓪ ꓟꓰꓹ ꓢꓴ ꓕꓲ ꓣꓳ ꓡꓰ ꓐꓯˍ ꓡꓳ꓿

ꓟꓬ-ꓟ ꓐꓱ ꓶ ꓮ-ꓢꓰ-ꓬ ꓗꓴꓷꓼ ꓜꓴ ꓝꓲ ꓓꓴ ꓢꓳ-ꓧꓳ (Prak Sokhonn) ꓟꓬ-ꓟ ꓗꓴꓷꓼ ꓗꓪ 3 ꓠꓬꓲ ꓡ ꓗꓷ ꓢꓲꓸ ꓠꓬꓲꓸ ꓠꓬꓲ ꓬꓲꓸ ꓪ ꓗꓴꓷꓼ ꓗ-ꓐꓳ-ꓓꓲ-ꓬ ꓗꓪ ꓡꓽ ꓛꓲ ꓕꓯꓽ ꓓꓳꓽ ꓐꓳ ꓢꓴ ꓐꓴ ꓡꓰ ꓠꓺ ꓠꓬꓲˍ ꓟ ꓗꓪ ꓖꓳ ꓡꓱ ꓐꓯ ꓟꓸ ꓩꓴ ꓡ ꓟ ꓥ ꓡꓳ꓿

ꓬꓲꓸ ꓠꓬ ꓟꓬ-ꓟ ꓗꓴꓷꓼ ꓗꓪ ꓟ ꓑ-ꓔꓲ ꓧꓳꓽ ꓪꓴꓸ ꓟꓴ ꓢꓴ ꓐꓴ ꓕꓲ ꓐꓱ ꓔꓯ ꓜꓲ ꓡꓯ ꓘꓳ ꓡꓳ꓿

ꓢꓳ-ꓧꓳ ꓡ ꓕꓯꓽ ꓠꓡꓓ ꓗꓴꓷꓼ ꓙꓵꓽ ꓜꓴ ꓚꓴ ꓬꓲꓹ ꓖꓶꓽ ꓒꓽ ꓫꓮꓳ-ꓔ-ꓠꓯ ꓔꓯ ꓡꓲꓹ ꓩꓴ ꓠꓹ ꓟ꓾ ꓟꓯꓼ ꓢꓰꓼ ꓗꓪ ꓑ ꓫꓬ ꓐꓴ ꓔꓯ ꓟꓽ ꓘꓶ ꓡꓶꓽ ꓡꓰ ꓠꓹ ꓟ ꓮ ꓘꓶꓸ ꓤ ꓟꓳ ꓙ ꓐꓰ ꓐꓯ ꓗꓷꓳ ꓐꓰ ꓐꓯˍ ꓡꓳ꓿

ꓖꓳ ꓡꓱ ꓥ ꓟꓲ꓾ “ꓟꓬ-ꓟ ꓗꓴꓷꓼ ꓫꓵꓽ ꓪꓴ ꓠꓽ ꓙꓲ ꓙꓲ ꓘꓶꓻˍ ꓥ꓿ ꓞꓲ ꓠꓲꓹ ꓫꓬ ꓡꓰ ꓟꓽ ꓓ” ꓐꓰ ꓐꓯ ꓩꓴ ꓡ ꓢꓰꓽ ꓡꓳ꓿

ꓬꓲꓸ ꓡˍ ꓟ ꓔꓯ ꓟꓽ ꓠꓲꓹ ꓫꓵ ꓢꓴ ꓥ ꓟꓲ ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓟꓬ-ꓟ ꓫꓵꓽ ꓪꓴ ꓔꓯ ꓮ-ꓢꓰ-ꓬ ꓡꓰ ꓮ ꓫꓵꓽ ꓬꓰ ꓙ ꓟꓽ ꓐ ꓡ ꓐꓰ ꓓꓵꓽ ꓙ ꓟ ꓑꓶꓸ ꓓꓴ꓾ ꓕꓱ ꓟ ꓠꓬ ꓑ ꓫꓬ ꓐꓴ ꓟꓬꓽ ꓠꓬꓲ ꓫꓸ ꓡꓰ ꓠꓹ ꓟ ꓟꓯꓼ ꓔꓯ ꓔꓺ ꓢꓲꓸ ꓬꓲꓸ ꓙꓵꓹꓟꓶ ꓫꓵ ꓡꓰ ꓝꓲ ꓔꓬ ꓟ ꓥ ꓡꓳ꓾ ꓐꓰ ꓢꓪꓼ ꓔꓬ ꓟ ꓑꓶꓸ ꓓꓴ ꓥꓳ꓿