1989 ꓘꓳꓼ ꓕꓯ ꓓ-ꓠꓴꓼ-ꓒꓬꓴ (Danu Pyu) ꓙꓲꓺ ꓔꓲ ꓙ ꓗꓪ ꓮꓳ-ꓢꓸ-ꓢꓴꓸ-ꓚꓰꓽ ꓔꓯ ꓐꓶ ꓢꓰꓼ ꓓꓴ ꓡ ꓛꓴꓸ ꓟꓳꓸ ꓢꓴ ꓟꓯꓼ ꓜꓲ ꓒꓽ ꓟꓲꓼ-ꓳꓸ (Myint Oo) ꓚꓳꓦꓲꓓ-19 ꓠꓻ ꓡ ꓠꓬ ꓟꓯꓼ ꓠꓯ ꓞꓲꓼ ꓦꓲ ꓓ ꓟ ꓗꓪ ꓠꓻ ꓫꓬꓹ ꓟꓽ ꓪ ꓢꓲꓸ 7 ꓦ 24 ꓠꓬꓲ ꓕꓯ ꓫꓵꓻꓳ꓿
“ꓕꓲ ꓞꓲꓼ ꓡꓱꓸꓼ ꓠꓲꓹ ꓛꓲꓼ (ꓟꓯꓼ ꓔꓯ ꓢꓯꓼ ꓖꓶ ꓡ ꓢꓴ) ꓡ ꓢꓲ꓾ ꓫꓵꓻ ꓘꓶꓽ ꓗꓪ ꓢꓲꓸ ꓗꓪꓽ ꓢꓲꓽ (ꓠꓡꓓ ꓔꓯ ꓢꓯꓼ ꓖꓶ ꓓꓴ) ꓬꓰ ꓠꓲꓹ ꓟꓽ ꓫꓵꓻꓳ꓿ 7 ꓦ 18 ꓠꓬꓲ ꓗꓪ ꓬꓲꓼ ꓔꓸ ꓖꓴ 1000 ꓙꓳ ꓟ ꓟꓯꓼ ꓠꓯ ꓞꓲꓼ ꓦꓲ ꓓꓽ ꓟ ꓗꓪ ꓙꓰ ꓗꓷꓳ꓿ ꓟꓶ ꓦ ꓜꓯꓼ ꓟꓲ ꓦꓲ ꓙꓶꓼ ꓟꓽ ꓘꓪ ꓙꓰ ꓥ ꓟꓲ ꓙꓲ ꓙꓲ ꓟꓽ ꓘꓳ ꓣꓴ ꓡ꓿ ꓟꓶ ꓢꓯ ꓟꓶꓸ ꓢꓯ ꓬꓲꓸ ꓛꓴꓽ ꓬꓲ ꓗꓸ ꓫꓸ ꓕꓱ ꓖꓶ ꓡ ꓥ꓿ 19 ꓠꓬꓲ ꓗꓪ ꓠꓻ ꓘꓵ ꓗꓪ ꓗꓯꓸ ꓢꓲ ꓚꓳꓦꓲꓓ-19 ꓚꓹ ꓪ ꓥ꓿ ꓳ ꓕꓲ ꓠꓬꓲ ꓖꓶ ꓢꓯ ꓛꓲ ꓢꓯ ꓥꓰ ꓐꓯ ꓕꓼ ꓡ ꓥ꓿ 20 ꓠꓬꓲ ꓗꓪ ꓠꓽ ꓠꓻ ꓙꓳ ꓟ ꓚꓹ ꓪ ꓡꓰ ꓢꓲ ꓠꓯ ꓞꓲꓼ ꓦꓲ ꓗꓪ ꓬꓲꓼ ꓔꓸ ꓢꓲ ꓠꓻ ꓫꓬꓹ ꓓꓴ ꓐꓯ ꓕꓯꓽ ꓳꓫꓬꓖꓰꓠ ꓮ ꓘꓶꓸ ꓞꓰ ꓔꓬ ꓠꓬ ꓟꓽ ꓘꓴ ꓣꓴ ꓐꓯ ꓖꓶ ꓡ ꓥ꓿ ꓒꓳꓹ ꓔꓳꓹ ꓢꓴ ꓞꓳ ꓡꓯꓸ ꓐꓴ ꓢꓲꓸ ꓟꓬꓽ ꓠꓬꓲ ꓜꓳ ꓠ ꓔꓸ ꓥ꓿” ꓐꓰ ꓬꓲꓸ Facebook ꓗꓪ ꓐꓳ ꓓꓳ ꓡ ꓡꓳ꓿
ꓬꓲꓸ ꓦꓲ ꓢꓲꓺ ꓟ ꓥ ꓟꓲ ꓚꓳꓦꓲꓓ-19 ꓠꓻ ꓔꓬ ꓢꓲ ꓠꓯ ꓞꓲꓼ ꓦꓲ ꓗꓪ ꓟꓽ ꓘꓴ ꓣꓴ ꓡ꓾ ꓠꓻ ꓫꓬꓹ ꓟꓽ ꓪ ꓠꓬꓲ 7 ꓦ 21 ꓠꓬꓲ ꓕꓯ ꓫꓵꓻꓳ꓿ ꓟꓯꓼ ꓜꓲꓽ ꓟꓲꓼ-ꓳꓸ ꓠꓬ 7 ꓦ 24 ꓠꓬꓲ ꓕꓯ ꓫꓵꓻꓳ꓿
ꓑ ꓫꓬ ꓡꓰ ꓢꓲꓻ ꓢꓲꓸ ꓙꓵ ꓪ ꓖꓶ ꓔꓸ ꓟ ꓗꓴꓷꓼ ꓙꓵ ꓜꓴ ꓡꓰ ꓧꓳꓽ ꓪꓴꓸ ꓟꓴ ꓟ ꓦꓬꓼ ꓠꓬꓲ ꓗꓪ ꓠꓽ ꓫꓸ ꓢꓴ ꓐꓳ ꓢꓴ꓾ ꓠꓡꓓ ꓔꓯ ꓔꓺ ꓢꓴ ꓔꓳꓹ ꓢꓴ ꓮ ꓫꓵ ꓔꓯ ꓟꓲ ꓟꓽ ꓒꓯꓽ ꓒꓯꓽ ꓜꓲ ꓜꓲ ꓟꓴ ꓟꓴ ꓠꓻ ꓫꓬꓹ ꓖꓶ ꓗꓷ ꓡꓳ꓿ ꓮ ꓟꓶ ꓠꓽ ꓟꓯꓼ ꓜꓲꓽ ꓡꓲꓸ ꓠꓻ ꓫꓬꓹ ꓪ ꓟꓽ ꓓ ꓟ ꓦꓬꓼ ꓠꓬꓲ ꓗꓪ ꓑ ꓫꓬꓼ ꓐꓴ ꓐꓱ ꓶ ꓥꓳ ꓡꓳꓸ ꓓꓴ ꓠꓯ ꓞꓲꓹ ꓡꓰꓳ꓿
ꓑ ꓫꓬ ꓐꓴ ꓚꓲ ꓛꓬ ꓔꓱꓹ ꓚꓲ ꓛꓬ ꓳꓫꓬꓖꓰꓠ ꓧꓪ ꓔꓸ ꓟ ꓔꓯ ꓥ ꓟꓲ ꓟꓯꓼ ꓐꓴ ꓡꓰ ꓘꓶ ꓡꓶꓽ ꓟ꓾ ꓦꓴ ꓜꓽ ꓙꓰ ꓟ ꓐꓯ ꓖꓴ ꓟꓽ ꓓ꓿ ꓠꓯ ꓞꓲꓼ ꓟꓸ ꓒ ꓐꓴ ꓔꓯ ꓟꓲ ꓓꓶꓽ ꓠꓬꓲ ꓔꓲꓸ ꓠꓬꓲ ꓢꓰꓼ ꓠꓬꓲ ꓬꓰ ꓡꓳ꓿ ꓬꓥ-ꓖꓳꓥ ꓗꓪ ꓕꓲ ꓠꓬꓲ ꓟ ꓠꓯꓸꓼ ꓚꓳꓦꓲꓓ-19 ꓑꓶꓸ ꓓꓴ ꓫꓵꓻ ꓢꓴ 1200 ꓣꓳ ꓗꓪ ꓥꓲ ꓔꓬ ꓡꓳ꓿