ꓣ-ꓫꓸ ꓠꓬ ꓬꓲꓸ ꓢꓯꓼ ꓮ ꓘꓶꓸ ꓩꓴ ꓢꓲꓸ ꓬꓴ-ꓗ-ꓣꓲꓸ ꓗꓴꓷꓼ ꓔꓯ ꓦꓴ ꓔꓬ ꓟ (60) ꓠꓬꓲ ꓐꓲ ꓡ ꓔꓳꓼ ꓪ꓿
ꓣ-ꓫꓸ ꓡꓰ ꓬꓴ-ꓗ-ꓣꓲꓸ ꓗꓴꓷꓼ ꓔꓯ ꓟꓵꓽ ꓦꓴ ꓓꓶꓽ ꓪꓴꓸ ꓔꓴ ꓩꓴ ꓡ ꓟ ꓠꓬ 2022 ꓘꓳꓼ 2 ꓦ 24 ꓠꓬꓲ ꓗꓪ ꓥ ꓡꓳ꓿
ꓓꓶꓽ ꓪꓴꓸ ꓔꓴ ꓡ ꓕꓯꓽ 2-3 ꓠꓬꓲ ꓗꓪ ꓬꓴ-ꓗ-ꓣꓲꓸ ꓠꓬ ꓣ-ꓫꓸ ꓡꓯ ꓒꓯꓹ ꓗꓪ ꓓꓵꓽ ꓙꓰˍ ꓥꓳ ꓐꓰ ꓣ-ꓫꓸ ꓐꓰ ꓟꓲ ꓠꓯ ꓗꓴꓷꓼ ꓗꓪ ꓟ ꓧꓳꓽ ꓪꓴꓸ ꓟꓴ ꓢꓴ ꓐꓴ ꓓꓵꓽ ꓙ ꓔꓸ ꓗꓷꓳ꓿
ꓴꓢꓮ ꓚꓲꓸ ꓛꓬ ꓥ ꓟꓲ ꓖꓳ ꓡꓱ ꓢꓪꓼ ꓢꓲꓸ ꓬꓴ-ꓗ-ꓣꓲꓸ ꓗꓴꓷꓼ ꓙꓵꓽ ꓓꓴ ꓐꓴ ꓔꓯ ꓬꓲꓸ ꓗꓴꓷꓼ ꓗꓪ ꓘꓰꓹ ꓑꓬ ꓡ ꓠꓹ ꓟ ꓙꓱ ꓦꓲ ꓙꓽ ꓖꓶ ꓖꓴꓼ ꓗꓷꓳ꓿
ꓖꓳ ꓡꓱ ꓥ ꓟꓲ ꓬꓴ-ꓗ-ꓣꓲꓸ ꓗꓴꓷꓼ ꓙꓵꓽ ꓒꓽ ꓜ-ꓡꓯ-ꓢꓲ-ꓗꓲ ꓠꓬ ꓟꓽ ꓔꓷꓹ ꓘꓰꓹ ꓘꓰꓹ ꓬꓴ-ꓗ-ꓣꓲꓸ ꓟꓯꓼ ꓐꓰ ꓑ ꓫꓬ ꓐꓰ ꓕꓲ ꓛꓳ ꓢꓯꓼ ꓟ ꓑꓵꓺ ꓢꓲꓸ ꓣ-ꓫꓸ ꓔꓯ ꓔꓳꓹ ꓡꓯ ꓘꓳ ꓡ ꓡꓳ꓿ ꓕꓱ ꓟ ꓑꓶꓸ ꓓꓴ ꓗꓴꓷꓼ ꓮ ꓟꓬꓹ ꓓꓵꓽ ꓙ ꓮ’ ꓡꓰꓳ꓿ ꓝꓮꓲ ꓬꓲꓸ ꓔꓯ ꓫꓱꓸ ꓖꓶꓽ ꓢꓲꓸ ꓔꓳꓹ ꓙ ꓔꓴ ꓡ ꓡꓳ꓿
ꓮ ꓟꓶ ꓦꓬꓼ ꓠꓬꓲ ꓗꓪ ꓗꓴꓷꓼ ꓕꓲ ꓗꓴꓷꓼ ꓔꓯ ꓠꓱꓸ ꓐꓯꓼ ꓗꓴꓷꓼ ꓕꓲ ꓟ ꓡꓰ ꓦꓴ ꓡ ꓟ ꓗꓪ꓾ ꓗꓴꓷꓼ ꓜꓴ ꓙꓵꓽ ꓪ ꓟꓽ ꓙꓳˍ ꓟ꓾ ꓢꓯꓼ ꓐꓽ ꓡꓳꓹ ꓬꓰˍ ꓟ ꓡꓳꓸ ꓓꓳ ꓡ ꓡꓳ꓿
ꓬꓴ-ꓗ-ꓣꓲꓸ ꓗꓴꓷꓼ ꓙꓵꓽ ꓒꓽ ꓜ-ꓡꓯ-ꓢꓲ-ꓗꓲ ꓠꓬ ꓗꓴꓷꓼ ꓜꓴ Security Council ꓔꓯ ꓫꓬꓹ ꓑꓱ ꓫꓬꓹ ꓡꓶꓸ ꓠꓹ ꓟ꓾ ꓥꓹ ꓠꓬ ꓠꓽ ꓩꓴ ꓠꓹ ꓟ ꓗꓪ ꓛꓲ ꓑꓶꓸ ꓑꓶꓸ ꓕꓱ ꓓꓳ ꓡ ꓡꓳ꓿
ꓗꓴꓷꓼ ꓮ ꓟꓬꓹ ꓥ ꓟꓲ ꓬꓲꓸ ꓔꓯ ꓔꓺ ꓙ ꓡ ꓡꓳ꓿ ꓮ ꓟꓶ ꓬꓴ-ꓗ-ꓣꓲꓸ ꓗꓴꓷꓼ ꓠꓬ ꓰꓴ ꓜꓴ ꓗꓪ ꓔꓺ ꓠꓹ ꓟ ꓚꓱꓹ ꓖꓪ ꓙꓱ ꓔꓬꓳ꓿ ꓕꓱ ꓡꓱ ꓟꓽ ꓔꓺ ꓙꓰ ꓠꓹ ꓟ ꓣ-ꓫꓸ ꓠꓬ ꓢꓯꓼ ꓕꓵꓼˍ ꓡꓳ꓾ ꓐꓯ ꓥ ꓟꓲ ꓮ ꓟꓶ ꓠꓽ ꓰꓴ ꓗꓴꓷꓼ ꓤꓹ ꓤꓼ ꓮ ꓟꓬꓹ ꓠꓬ ꓰꓴ ꓜꓴ ꓗꓪ ꓓꓵꓽ ꓠꓹ ꓟ ꓡꓯꓽ ꓧꓪꓸ ꓢꓯꓼ ꓕꓵꓼ ꓔꓴ ꓡ ꓡꓳ꓿ ꓕꓱ ꓟ ꓠꓬ ꓰꓡꓣ-ꓫꓸ ꓞꓳꓸ ꓡꓰˍ ꓟ ꓥ ꓡꓳ꓿
ꓣ-ꓫꓸ ꓕꓲ ꓒꓳꓹ ꓗꓪ ꓐꓯˍ ꓠꓬ꓾ ꓟꓯꓼ ꓜꓲꓽ ꓮ ꓟꓬꓹ ꓫꓵꓻ ꓖꓴ ꓢꓲꓸ ꓐꓬꓱ ꓦꓲ꓾ ꓔꓲꓼ ꓟꓳ-ꓓꓳ ꓮ ꓟꓬꓹ ꓐꓬ ꓡꓰ ꓖꓴꓳ꓿ ꓬꓲꓸ ꓗꓴꓷꓼ ꓠꓯꓸꓼ ꓗꓪ ꓶ ꓡꓯꓼ ꓬꓰ ꓜꓴ 750 ꓟꓽ ꓞꓲ ꓓꓳ ꓡꓽ ꓙꓰ ꓖꓴꓳ꓿
ꓖꓳ ꓡꓱ ꓥ ꓟꓲ ꓣ-ꓫꓸ ꓗꓴꓷꓼ ꓙꓵꓽ ꓢꓴ ꓑꓴ-ꓔꓲ ꓔꓯ ꓢꓯꓼ ꓖꓶꓽ ꓢꓴ ꓮ ꓟꓬꓹ ꓙꓳ ꓔꓬ ꓢꓰꓽ ꓡꓳ꓿ ꓧꓶꓸ ꓕꓯꓽ ꓙ-ꓟꓶ-ꓠꓰ ꓗꓴꓷꓼ ꓐꓰ꓾ ꓙ-ꓑ ꓗꓴꓷꓼ ꓗꓪ ꓟ ꓝꓯꓼ-ꓢꓰꓼ (fascist) ꓐꓴ ꓠꓬ ꓕꓱ ꓡꓱ ꓔꓸ ꓚꓰꓼ ꓟ ꓡꓰ ꓐꓰ ꓥ ꓡꓳ꓿
ꓬꓴ-ꓗ-ꓣꓲꓸ ꓗꓴꓷꓼ ꓐꓶꓽ ꓓꓳ ꓟꓵꓽ꓾ ꓟꓯ-ꓣꓲ-ꓬꓳ-ꓑꓳ ꓘꓹ ꓗꓪ ꓡ ꓞꓳ 9000 ꓣꓳ ꓟꓽ ꓞꓲ ꓔꓵꓸ ꓔꓸ ꓟ ꓧꓪ ꓟꓶˍ ꓡꓳ꓾ ꓐꓯ ꓡꓳ꓿
ꓕꓱ ꓟ ꓚꓽ ꓐꓷˍ ꓠꓬ꓾ ꓣ-ꓫꓸ ꓠꓬ 21 ꓦ ꓜꓴ ꓘꓳꓼ ꓗꓪ ꓢꓴ ꓟꓵꓽ ꓦꓴ ꓢꓲꓸ ꓡ ꓞꓳ ꓶꓽ ꓒꓬꓹ ꓢꓴ꓾ ꓚꓲꓸ ꓛꓬ ꓫꓵꓽ꓾ ꓗꓴꓷꓼ ꓐꓰ ꓦ ꓡꓱ ꓚꓱꓹ ꓠꓬ ꓢꓴ ꓕꓯꓽ ꓢꓲ ꓙꓲˍ ꓡꓳ ꓐꓯ ꓢꓲꓸ ꓢꓴ ꓔꓯ ꓢꓰꓼ ꓢꓴ ꓝꓯꓼ-ꓢꓰꓼ (fascist)꓾ 21 ꓦ ꓜꓴ ꓘꓳꓼ ꓗꓪ ꓟ ꓠ-ꓜꓰ ꓒꓬꓱꓼ ꓡ ꓥꓳ꓿
ꓟꓯꓼ ꓢꓰꓼ ꓟ ꓔꓯˍ ꓡꓰꓽ ꓦ ꓡꓱ ꓐꓳˍ ꓟ ꓜꓲꓽ ꓜꓲ ꓑꓰꓹ ꓑꓰꓹ ꓬꓰ ꓢꓴ ꓐꓴ ꓠꓬ ꓙꓵꓽ ꓪ ꓦꓬꓼ ꓠꓬꓲ ꓠꓲꓸ ꓡꓰ ꓔꓬ ꓡꓳ꓿