ꓬꓴ-ꓗ-ꓬꓲꓸ ꓗꓴꓷꓼ ꓠꓬ ꓠꓮꓔꓳ ꓗꓴꓷꓼ ꓜꓴ ꓗꓪ ꓓꓵꓽ ꓠꓲꓹ ꓫꓵˍ ꓟ ꓑꓶꓸ ꓓꓴ ꓣ-ꓫꓸ ꓠꓬ ꓠꓲꓹ ꓦꓶ ꓔꓴ ꓡ ꓢꓲꓸ ꓟꓯꓼ ꓓꓶꓽ ꓠꓹ ꓟ ꓟꓯꓼ ꓬꓲꓸ ꓢꓯꓹ ꓣꓳ ꓟꓵꓽ ꓘꓶꓽ ꓗꓪ ꓕꓵꓼ ꓡꓵꓸ ꓔꓬ ꓝꓲ ꓡꓳ꓿
ꓮ ꓫꓵꓽ ꓑꓶꓸ ꓓꓴ ꓐꓯˍ ꓠꓬ꓾ ꓧꓶꓸ ꓕꓯ ꓣ-ꓫ ꓗꓴꓷꓼ ꓓꓽ ꓟ ꓗꓪ ꓐꓰ ꓧꓹ ꓐꓶꓽ ꓙꓰˍ ꓟ ꓬꓴ-ꓗ-ꓣꓲꓸ ꓗꓴꓷꓼ ꓥ ꓢꓲ꓾ ꓗ-ꓣ-ꓟꓲ-ꓬ ꓗꓴꓷꓼ ꓔꓯ ꓣ-ꓫꓸ ꓡꓰ ꓓꓶꓽ ꓧꓪꓸ ꓡꓰ ꓕ ꓑꓳꓸ ꓬꓴ-ꓗ-ꓬꓲꓹ ꓠꓬ ꓬꓲꓸ ꓚꓲ ꓛꓬ ꓦꓰꓼ ꓕꓶ ꓠꓹ ꓟ ꓙꓽ ꓫꓸ ꓔꓴ ꓡ ꓡꓳ꓿ ꓖꓳ ꓟ ꓗꓪ ꓐꓰ ꓠꓮꓔꓳ ꓟꓯꓼ ꓗꓪ ꓓꓵꓽ ꓠꓲꓹ ꓫꓵˍ ꓡꓳ꓿ “ꓟꓲꓸ ꓟꓲ ꓓꓵꓽ ꓥꓳ ꓐꓯ ꓟꓲꓸ ꓟꓲ ꓓꓶꓽ ꓓꓴ ꓥꓳ” ꓐꓰ ꓣ-ꓫꓸ ꓡꓰ ꓐꓯ ꓔꓬ ꓡꓳ꓿ ꓮ ꓡꓲꓳ ꓐꓯ ꓠꓬ ꓫ-ꓣꓸ ꓗꓴꓷꓼ ꓘꓶꓽ ꓗꓪ ꓠꓮꓔꓳ ꓟꓯꓼ ꓜꓴ ꓗꓪꓼ ꓡ ꓟ ꓔꓯ ꓣ-ꓫ ꓟꓽ ꓠꓲꓹ ꓒꓴ꓿
1962 ꓘꓳꓼ ꓕꓯꓽ ꓚꓴꓹ-ꓐꓸ ꓗꓴꓷꓼ ꓗꓪ ꓣ-ꓫꓸ ꓟꓯꓼ ꓐꓴ ꓐꓳꓽ ꓐꓶ ꓦꓲ ꓔꓶꓺ ꓓꓵꓽ ꓡ ꓟ ꓔꓯ ꓮ-ꓟꓯ-ꓣꓲ-ꓗ ꓐꓴ ꓟꓽ ꓠꓲꓹ ꓫꓵ ꓠꓬꓲ ꓮ ꓡꓻ ꓟꓯꓼ ꓓꓶꓽ ꓡꓯ ꓘꓳ ꓠ ꓗꓷ ꓡꓰꓳ꓿ ꓮ ꓔꓳꓸ ꓟꓲꓸ ꓐꓳꓽ ꓙꓳˍ ꓟ ꓗꓴꓷꓼ ꓓꓽ ꓟ ꓠꓬꓲꓽ ꓗꓴꓷꓼ ꓓꓶꓽ ꓡꓯ ꓘꓳ ꓡ ꓔꓳꓼ ꓟ ꓗꓪ꓾ ꓖꓳ ꓕꓲ ꓦꓬꓼ ꓠꓬꓲ꓾ ꓟꓲ ꓠꓯ ꓗꓴꓷꓼ ꓜꓴ ꓟꓬꓱꓽ ꓢꓲꓺ ꓓꓽ ꓟ ꓴꓸ-ꓔꓼ ꓡꓰ ꓖꓪ ꓙꓱ ꓙ ꓢꓲꓸ ꓗꓽ ꓓ ꓬꓰˍ ꓟ ꓥꓳ꓿ ꓣ-ꓫ ꓥ ꓟꓲ ꓮ-ꓟꓯ-ꓣꓲ-ꓗ ꓗꓴꓷꓼ ꓘꓶꓽ ꓗꓪ ꓙꓳˍ ꓟ ꓚꓴꓹ-ꓐꓸ ꓗꓴꓷꓼ ꓗꓪ ꓐꓳꓽ ꓐꓶ ꓙꓼ ꓟꓽ ꓔꓶꓺ ꓠꓹ ꓟ ꓪꓽ ꓡꓰꓳ꓿ ꓕꓱ ꓟ ꓔꓯ ꓖꓴ ꓢꓲ꓾ ꓮ ꓟꓶ ꓣ-ꓫꓸ ꓡꓰ ꓫꓸ ꓕꓱ ꓔꓬ ꓟ ꓥ ꓡꓳ꓿ ꓣ-ꓫꓸ ꓗꓴꓷꓼ ꓘꓶꓽ ꓗꓪ ꓙꓳˍ ꓟ ꓬꓴ-ꓗ-ꓬꓲꓹ ꓗꓴꓷꓼ ꓗꓪ ꓠꓮꓔꓳ ꓟꓯꓼ ꓓꓵꓽ ꓡ ꓠꓬ ꓬꓴ-ꓗ-ꓬꓲꓹ ꓔꓯ ꓓꓶꓽ ꓓꓴ ꓥꓳ ꓐꓯ ꓢꓲꓸ ꓕꓵꓼ ꓡꓵꓸ ꓡꓳꓸ ꓔꓬ ꓡꓳ꓿
ꓮ-ꓟꓯ-ꓣꓲ-ꓗ ꓗꓴꓷꓼ ꓙꓵꓽ ꓢꓴ ꓐꓴ ꓡꓰ ꓬꓲꓸ ꓪ ꓗꓴꓷꓼ ꓡ ꓞꓳ ꓐꓴ ꓔꓯ ꓬꓴ-ꓗ-ꓬꓲꓹ ꓗꓪ ꓐꓰ ꓠꓲꓹ ꓞ ꓠꓲꓹ ꓧꓳꓽ ꓘꓴ ꓡꓽ ꓔꓬ ꓡꓳ꓿ ꓣ-ꓫꓸ ꓡꓰ ꓓꓶꓽ ꓡ ꓥꓳ ꓐꓯˍ ꓟ ꓔꓯ ꓛꓽ ꓒꓽ ꓓꓳꓽ ꓪ ꓔꓬ ꓠꓬꓲ ꓕꓱ ꓡꓱ ꓕꓵꓼ ꓪ ꓓꓳ ꓡ ꓟ ꓥꓳ꓿ ꓠꓱꓸ ꓐꓯꓼ ꓗꓴꓷꓼ ꓐꓴ ꓥ ꓟꓲ ꓬꓲꓸ ꓪ ꓗꓴꓷꓼ ꓡ ꓞꓳ ꓐꓴ ꓔꓯ ꓕꓱ ꓡꓱ ꓘꓴ ꓡꓽ ꓔꓬ ꓡꓳ꓿
ꓕꓱ ꓕꓲ ꓧꓪꓹ ꓗꓴꓷꓼ ꓓꓽ ꓟ ꓓꓶꓽ ꓡꓯ ꓘꓳ ꓡ ꓠꓬ꓾ ꓮ ꓔꓳꓸ ꓟꓲꓸ ꓐꓳꓽ ꓣꓱꓽ ꓡ ꓢꓲꓸ ꓟꓲ ꓠꓯ ꓐꓬ ꓗꓰ ꓡ ꓟꓽ ꓢꓷꓸ ꓐꓰ ꓢꓪꓼ ꓢꓴ ꓐꓴ ꓢꓪꓼ ꓔꓬ ꓡꓳ꓿
ꓧꓶꓽ ꓗꓴꓷꓼ ꓗꓪ ꓬꓰ ꓔꓬ ꓟ ꓟꓶꓽ ꓞꓴ ꓳ-ꓡ-ꓑꓲꓼ ꓡꓳ ꓖꓪ ꓑꓮꓲ (Winter Olympic Games) ꓟꓽ ꓬꓰ ꓓꓳ ꓡꓰ ꓢꓰꓽ ꓕꓯꓽ ꓣ-ꓫꓸ ꓠꓬ ꓬꓴ-ꓗ-ꓬꓲꓹ ꓔꓯ ꓓꓶꓽ ꓡ ꓥꓳ ꓐꓰ ꓢꓪꓼ ꓔꓬ ꓡꓳ꓿
ꓬꓴ-ꓗ-ꓬꓲꓹ ꓗꓴꓷꓼ ꓠꓬ 6 ꓢꓯꓹ ꓗꓟ2 ꓟꓽ ꓞꓲ ꓪꓴꓽˍ ꓟ ꓟꓵꓽ ꓥ ꓢꓲ꓾ ꓡ ꓞꓳ ꓠꓬ 41 ꓪꓹ ꓣꓳ ꓔꓬ ꓡꓳ꓿