ꓬꓲ-ꓢꓷ-ꓡꓰ ꓡꓰ ꓲ-ꓣ ꓗꓴꓷꓼ ꓔꓯ ꓟꓯꓼ ꓢꓰꓼ ꓪꓴꓸ ꓔꓴ ꓗꓷꓳ

ꓴꓢꓮ ꓗꓴꓷꓼ ꓪꓴꓸ ꓓꓵ ꓕ-ꓣꓼ ꓡꓰ ꓲ-ꓣ ꓢꓯꓼ ꓕꓵꓼ ꓔꓬ ꓟ ꓮ ꓔꓳꓸ ꓟꓲꓸ ꓐꓳꓽ (ꓠꓴ-ꓗ-ꓡꓲ-ꓬ ꓐꓳꓽ) ꓚꓰꓼ ꓔꓬ ꓟ ꓟꓬꓱꓽ ꓔꓯ ꓠꓽ ꓗꓷ ꓐꓰ ꓬꓲꓼ ꓠꓬꓲꓸ ꓖꓪ ꓙꓱ ꓔꓬ ꓟ ꓥ ꓡꓳ꓿  ꓲ-ꓣ ꓗꓴꓷꓼ ꓦ ꓡꓱ ꓚꓱꓹ ꓐꓰ ꓗꓴꓷꓼ ꓚꓱꓹ ꓧꓳꓽ ꓢꓴ ꓘ-ꓟꓯ-ꓠꓰ ꓡꓰ ꓠꓽ ꓓꓴ ꓟꓽ ꓥ ꓐꓰ ꓡꓯꓽ ꓔꓯꓽˍ ꓡꓳ꓿ ꓖꓳ ꓡꓱ ꓖꓪ ꓙꓱ ꓡꓯ ꓘꓳ ꓟ ꓬꓰ ꓫꓸ ꓡꓰ ꓔꓬ ꓟ ꓠꓬꓲꓽ ꓗꓴꓸ ꓚꓸ ꓗꓪ ꓬꓲ-ꓢꓷ-ꓡꓰ ꓡꓰ ꓟꓲꓸ ꓟꓲ 2025 ꓘꓳꓼ 6 ꓦ 13 ꓠꓬꓲ ꓠꓯꓼ ꓝꓲꓸ ꓗꓪ ꓲ-ꓣ ꓗꓴꓷꓼ ꓔꓯ ꓟꓯꓼ ꓢꓰꓼ ꓪꓴꓸ ꓔꓴ ꓩꓴ ꓡ ꓡꓳ꓿

ꓲ-ꓣ ꓗꓴꓷꓼ ꓘꓴꓽ ꓗꓪ ꓙꓳ ꓟ ꓮ ꓔꓳꓸ ꓟꓲꓸ ꓐꓳꓽ ꓫꓬꓹ ꓚꓰꓼ ꓜꓯ ꓔꓶꓸ꓾ ꓖꓳ ꓡꓱꓳ ꓫꓵꓽ ꓢꓷꓸ ꓠꓲꓹ ꓗꓴꓸ ꓢꓴ ꓐꓴ ꓐꓰ ꓟꓯꓼ ꓜꓲꓽ ꓓꓽ ꓟ ꓐꓴ ꓔꓬ ꓖꓴ ꓗꓪ ꓬꓲ-ꓢꓷ-ꓡꓰ ꓡꓰ ꓐꓳꓽ ꓐꓶ ꓩꓴ ꓡ ꓢꓲ꓾ ꓙꓲ ꓣꓴ ꓓꓴ ꓙꓳˍ ꓟ ꓗꓴꓷꓼ 2 ꓗꓴꓷꓼ ꓟꓯꓼ ꓘꓶꓽ ꓔꓯ ꓪꓴꓸ ꓔꓴ ꓩꓴ ꓡ ꓡꓳ꓿ 

ꓬꓲ-ꓢꓷ-ꓡꓰ ꓡꓰ ꓐꓯ ꓟ ꓠꓬ꓾ ꓲ-ꓣ ꓡꓰ 10 ꓓꓽ ꓡꓲꓽˍ ꓟ ꓐꓳꓽ ꓐꓶ ꓓꓴ ꓓꓳꓹ 10,000 ꓟ ꓕꓵꓼ ꓡꓵꓸꓼ ꓚꓰꓼ ꓜꓯ ꓓꓳ ꓡꓰ ꓢꓲ꓾ ꓖꓳ ꓟ ꓗꓪ ꓮ ꓔꓳꓸ ꓟꓲꓸ ꓐꓳꓽ ꓜꓯꓻ ꓔꓼ ꓠꓹ ꓟ ꓡꓳꓸ ꓔꓬ ꓡꓳ꓿ ꓮ ꓧꓪꓹ ꓲ-ꓣ ꓐꓴ ꓮ ꓔꓳꓸ ꓟꓲꓸ ꓐꓳꓽ ꓚꓰꓼ ꓪ ꓡꓰ ꓠꓬ ꓬꓲ-ꓢꓷ-ꓡꓰ ꓗꓴꓷꓼ ꓟꓶꓽ ꓬꓰ ꓡ ꓔꓳꓼ ꓟ ꓑꓶꓸ ꓓꓴ ꓡꓯ ꓞꓽ ꓣꓴ ꓢꓲꓸ ꓢꓰꓼ ꓟ ꓥ ꓡꓳ꓾ ꓐꓯ ꓒꓬꓱ ꓩꓴ ꓡ ꓡꓳ꓿

ꓲ-ꓣ ꓗꓴꓷꓼ ꓗꓪ ꓦ ꓡꓱ ꓚꓱꓹ ꓐꓰ ꓗꓴꓷꓼ ꓙꓵꓽ ꓚꓱꓹ ꓧꓳꓽ ꓢꓴ ꓘ-ꓟꓯ-ꓠꓰ ꓠꓬ ꓐꓳꓽ ꓗꓪ ꓐꓰ ꓟꓽ ꓫꓵꓻ ꓫꓵꓻ ꓡꓲꓹ ꓙꓰꓳ꓾ ꓐꓯ ꓡꓳ꓿ ꓖꓳ ꓡꓱ ꓢꓲ꓾ ꓬꓲ-ꓢꓷ-ꓡꓰ ꓔꓯ ꓜꓶꓸ ꓜꓶꓸ ꓪꓽ ꓛꓴ ꓝꓱꓹ ꓓꓴ ꓥꓳ ꓐꓯ ꓒꓬꓱ ꓩꓴ ꓡ ꓡꓳ꓿

ꓕ-ꓣꓼ ꓡꓰ ꓕꓱ ꓟ ꓠꓬ ꓬꓲ-ꓢꓷ-ꓡꓰ ꓕꓲ ꓟ ꓔꓵꓸꓼ ꓬꓲꓸ ꓓ ꓬꓲ ꓟꓯꓼ ꓢꓰꓼ ꓟ ꓥ ꓡꓳ꓾ ꓥꓪ ꓠꓴ ꓴꓢꓮ ꓡꓯ ꓒꓯꓹ ꓟꓽ ꓚꓬꓼ ꓔꓸ ꓐꓰ ꓐꓯ ꓒꓬꓱ ꓡꓳ꓿

ꓟꓲ ꓠꓯ ꓓꓰ ꓗꓪ ꓬꓴ-ꓣꓳ ꓟꓵꓽ ꓗꓪ ꓠꓬ ꓣ-ꓫ ꓐꓰ ꓬꓴ-ꓗ-ꓣ ꓢꓰꓼ ꓡꓯ ꓘꓳ ꓔꓬ꓾ ꓡꓳ ꓟꓶꓸ ꓮ-ꓢꓲ-ꓬ ꓟꓵꓽ ꓗꓪ ꓠꓬ ꓴꓢꓮ ꓐꓰ ꓬꓲ-ꓢꓷ-ꓡꓰ ꓪꓽ ꓡꓯ ꓘꓳ ꓢꓲ꓾ ꓲ-ꓣ꓾ ꓧꓴ-ꓔꓲ꓾ ꓧ-ꓟ꓾ ꓧꓲ-ꓜꓲ-ꓐꓴ-ꓡ ꓐꓴ ꓔꓯ ꓟꓯꓼ ꓢꓰꓼ ꓡꓯ ꓘꓳ ꓔꓬ꓾ ꓝꓮꓲ ꓴꓢꓮ ꓐꓰ ꓧꓶꓽ ꓗꓴꓷꓼ꓾ ꓗ-ꓐꓳ-ꓓꓲ-ꓬ ꓐꓰ ꓕꓮꓲꓹ ꓗꓴꓷꓼ ꓠꓲꓹ ꓜꓳ ꓡꓯ ꓘꓳ ꓔꓬ ꓦꓬꓼ ꓠꓬꓲ ꓥ ꓡꓳ꓿