ꓬꓲ-ꓢꓷ-ꓡꓰ ꓡꓰꓽ ꓬꓴ-ꓗ-ꓣꓲꓸ ꓔꓯ ꓬꓰ ꓙ ꓪꓴꓸ ꓬꓴ

ꓬꓲ-ꓢꓷ-ꓡꓰ ꓗꓴꓷꓼ ꓡꓰ ꓬꓴ-ꓗ-ꓣꓲꓸ ꓑ ꓫꓬ ꓐꓴ ꓐꓱ ꓶ ꓠꓯ ꓞꓲꓼ ꓐꓰ ꓜꓽ ꓓꓴ ꓓꓳ ꓓꓴ ꓬꓰ ꓙ ꓠꓹ ꓟ ꓬꓴ-ꓗ-ꓣꓲꓸ ꓗꓴꓷꓼ ꓘꓴ ꓗꓪ ꓙꓵꓽ ꓦꓲ ꓒꓴ ꓪꓴꓸ ꓔꓴ ꓢꓲꓸ ꓬꓰ ꓙ ꓔꓬꓳ꓾ ꓐꓰ ꓬꓲ-ꓢꓷ-ꓡꓰ ꓗꓴꓷꓼ ꓙꓵꓽ ꓜꓴ ꓡꓰ 2022 ꓘꓳꓼ 3 ꓦ 22 ꓠꓬꓲ ꓕꓯꓽ ꓢꓷ ꓙ ꓟꓴ ꓙ ꓩꓴ ꓡ ꓡꓳ꓿

ꓬꓲ-ꓢꓷ-ꓡꓰ ꓗꓴꓷꓼ ꓗꓪ ꓐꓰ ꓝꓲ ꓩꓴ ꓡ ꓟ ꓫꓱꓸ ꓤꓼ ꓟꓬꓱꓽ ꓬꓰ ꓙ ꓜꓴ ꓠꓬ ꓑꓳ-ꓡ ꓗꓴꓷꓼ ꓗꓪ ꓐꓰ ꓕꓲ ꓝꓸ ꓬꓴ-ꓗ-ꓣꓲꓸ ꓗꓴꓷꓼ ꓗꓪ ꓓꓵꓽ ꓡ ꓟ ꓥ ꓡꓳ꓿

ꓑꓳ-ꓡ ꓐꓰ ꓣꓴ-ꓗ-ꓣꓲꓸ ꓟꓵꓽ ꓫꓸ ꓗ ꓒ ꓕꓲ ꓗꓪ ꓠꓯ ꓞꓲꓼ ꓦꓲ ꓫꓬꓹ ꓢꓲꓸ ꓠꓯ ꓞꓲꓼ ꓫꓬꓹ ꓖꓶ ꓓꓴ ꓥꓳ ꓐꓰ ꓬꓲ-ꓢꓷ-ꓡꓰ ꓗꓴꓷꓼ ꓙꓵꓽ ꓜꓴ ꓡꓰ ꓐꓯˍ ꓡꓳ꓿

ꓕꓱ ꓟ ꓠꓬ ꓬꓲ-ꓢꓷ-ꓡꓰ ꓞꓳ ꓫꓵꓽ ꓕꓲ ꓣꓳ ꓥˍ ꓟ ꓬꓴ-ꓗ-ꓣꓲꓸ ꓗꓴꓷꓼ ꓙꓵꓽ ꓜꓴ ꓧꓳꓽ ꓢꓴ ꓜ-ꓡꓯ ꓢꓲ-ꓗꓲ ꓡꓰ ꓬꓲ-ꓢꓷ-ꓡꓲ ꓑ ꓫꓬ ꓝꓲ ꓓꓴ ꓜꓲꓼ ꓓꓴ ꓗꓪ꓾ “ꓣ-ꓫꓸ ꓠꓰ ꓬꓲ-ꓢꓷ-ꓡꓰ ꓔꓯ ꓢꓰꓼ ꓔꓬ ꓟ ꓔꓯ ꓬꓲ-ꓢꓷ-ꓡꓰ ꓗꓴꓷꓼ ꓙꓵꓽ ꓢꓴ ꓐꓴ ꓡꓯꓽ ꓓꓴꓽ ꓫꓸ ꓢꓲꓸ ꓛꓳꓽ ꓠꓬꓹ ꓥ” ꓐꓰ ꓐꓯ ꓩꓴ ꓡ ꓟ ꓗꓪ ꓐꓰ ꓕꓱ ꓡꓱ ꓬꓰ ꓙ ꓓꓴ ꓪꓴꓸ ꓔꓴ ꓡ ꓟ ꓥ ꓡꓳ꓿

ꓖꓳ ꓡꓱ ꓥ ꓟꓲ ꓬꓲ-ꓢꓷ-ꓡꓰ ꓡꓰꓽ ꓬꓰ ꓙ ꓓꓴ ꓕꓱ ꓟ ꓠꓬ ꓟꓯꓼ ꓶ ꓤ ꓟꓽ ꓥ꓿ ꓠꓯ ꓞꓲꓼ ꓐꓰ ꓜꓽ ꓓꓴ ꓥ ꓡꓳ꓿

ꓖꓳ ꓟ ꓑꓶꓸ ꓓꓴ ꓟꓯꓼ ꓘꓶꓽ ꓢꓷꓸ ꓠꓲꓹ ꓙꓳ ꓢꓴ ꓐꓴ ꓡꓰ ꓐꓯˍ ꓟ ꓠꓬ꓾ ꓮ ꓡꓲ ꓜꓳꓽ ꓮ ꓡꓲ ꓐꓳꓽ ꓐꓰ ꓡ ꓛꓴꓸ ꓐꓶ ꓔꓬ ꓟ ꓣ-ꓫꓸ ꓟꓯꓼ ꓐꓴ ꓐꓱ ꓶ ꓬꓰ ꓫꓸ ꓓꓴ ꓡ ꓔꓬꓳ ꓐꓯ ꓡꓳ꓿ ꓬꓲ-ꓢꓷ-ꓡꓰ ꓔꓯ ꓛꓲꓸ ꓤꓼ ꓟ ꓡꓰ ꓐꓰ ꓗꓷ ꓬꓰ ꓡ ꓟ ꓔꓯ ꓗꓳꓺ ꓚꓱ ꓢꓲꓸ ꓮ ꓘꓶꓸ ꓤ ꓟꓳ ꓠ ꓗꓷ ꓡ ꓥꓳ꓾ ꓐꓯ ꓔꓬ ꓡꓳ꓿

ꓬꓲꓸ ꓚꓰ꓾ ꓐꓠꓠ