ꓬꓲꓸ ꓟꓶꓽ ꓗꓪ ꓠꓽ ꓑ ꓫꓬ ꓔꓲꓸ ꓧꓪꓸ ꓡꓰ ꓓꓴ ꓥꓳ꓾ ꓓꓴ-ꓪ ꓡ-ꓫꓲꓸ-ꓡꓼ

ꓮ ꓡꓲ ꓐꓯ ꓡꓲꓸ ꓐꓯ ꓟꓯꓼ ꓘꓶꓽ ꓬꓲꓸ ꓟꓶꓽ ꓗꓪ ꓠꓽ ꓑ ꓫꓬ ꓔꓲꓸ ꓧꓪꓸ ꓡꓰ ꓓꓴ ꓥꓳ꓾ ꓠꓴꓖ ꓗꓴꓷꓼ ꓙꓵꓽ ꓜꓴ ꓧꓳꓽ ꓢꓴ ꓓꓴ-ꓪ ꓡ-ꓫꓲꓸ-ꓡꓼ ꓡꓰ ꓠꓬꓲꓸ ꓠꓬꓲ 2022 ꓘꓳꓼ 4 ꓦ 16 ꓠꓬꓲ ꓠꓯꓼ ꓝꓲꓸ ꓕꓯꓽ ꓑ ꓫꓬ ꓐꓴ ꓔꓯ ꓫꓸ ꓕꓱ ꓩꓴ ꓡ ꓡꓳ꓿

ꓝꓮꓲ ꓞꓳ ꓘꓹ ꓮ ꓟꓬꓹ ꓗꓪ ꓠꓬ ꓑ ꓫꓬ ꓡꓳꓸ ꓙ ꓗꓽ ꓙ ꓟꓯꓼ (ꓑꓓꓝ) ꓐꓴ ꓡꓰ ꓙꓵꓽ ꓪ ꓔꓬ ꓠꓬꓲ꓾ ꓟꓬ-ꓟ ꓟꓯꓼ ꓡꓯ ꓒꓯꓹ ꓗꓪ ꓐꓰ ꓡꓲꓹ ꓗꓷ ꓟꓶˍ ꓟ ꓟꓵꓽ ꓙꓳ ꓡ ꓔꓬ ꓡꓳ꓾ ꓐꓯ ꓡꓳ꓿

ꓠꓴꓖ ꓠꓬ ꓓꓰ-ꓟꓳ-ꓗꓯ-ꓢꓰ ꓚꓱꓹ ꓟꓽ ꓜꓯꓼ ꓟ 2008 ꓗꓴꓷꓼ ꓙꓵꓽ ꓚꓱꓹ ꓗꓪ ꓟꓽ ꓡꓱꓸꓼ ꓡ ꓙꓰ꓿ ꓟꓯꓼ ꓔꓯ ꓒꓳꓹ ꓔꓳꓹ ꓟ ꓐꓰ ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓔꓶ ꓪ ꓡꓰ ꓠꓹ ꓟ ꓠꓬꓲꓽ ꓗꓴꓸ ꓚꓸ ꓦꓬꓼ ꓠꓬꓲ ꓗꓪ ꓙꓵꓽ ꓚꓱꓹ ꓡꓳ ꓚ ꓙꓰ ꓔꓬ ꓡꓳ꓾ ꓐꓯ ꓡꓳ꓿

ꓠꓴꓖ ꓔꓯ ꓐꓶꓽ ꓗꓴꓷꓼ ꓗꓪ ꓐꓰ ꓖꓪ ꓙꓱ ꓡ ꓟ ꓟꓬꓽ ꓡ ꓔꓬ ꓟ ꓡꓰ ꓐꓰ꓾ ꓟꓯꓼ ꓔꓯ ꓜꓲ ꓢꓴ ꓠꓲꓸ ꓡꓰ ꓔꓬ ꓟ ꓥꓳ꓾ ꓐꓯ ꓡꓳ꓿

ꓠꓶꓽ ꓛꓳ ꓕꓲ ꓛꓳ ꓗꓴꓷꓼ ꓐꓴ ꓥ ꓟꓲ꓾ ꓟꓵꓽ ꓘꓶꓽ ꓗꓪ ꓫꓵꓽ ꓪꓴꓻ ꓓꓳ ꓡ ꓝꓲ ꓔꓬ ꓟ ꓟꓬ-ꓟ ꓟꓯꓼ ꓔꓯ ꓟꓽ ꓔ ꓔ꓾ ꓠꓴꓖ ꓔꓯ ꓬꓰ ꓙ ꓠ ꓗ ꓡꓳ꓾ ꓐꓰ ꓐꓯ ꓡꓳ꓿

ꓬꓴ-ꓗ-ꓣꓲꓸ ꓔꓯ ꓟꓯꓼ ꓢꓰꓼ ꓔꓬ ꓟ ꓣ-ꓫꓸ ꓔꓯ ꓕꓼ ꓢꓲ꓾ ꓬꓴ-ꓗ-ꓣꓲꓸ ꓔꓯ ꓔꓳꓹ ꓙ ꓟ ꓟꓲ ꓠꓯ ꓗꓴꓷꓼ ꓜꓴ ꓖꓪ ꓙꓱ ꓞꓷꓹ ꓘꓶꓽ ꓔꓯ ꓠꓲꓹ ꓧꓳꓹ ꓔꓳꓹ ꓙ ꓡꓳ꓿ ꓗꓴꓷꓼ ꓜꓴ ꓗꓪ ꓐꓰ ꓟꓬ-ꓟ ꓟꓯꓼ ꓬꓲꓸ ꓜꓲ ꓬꓲ ꓟꓴ ꓙꓵꓽ ꓢꓴ ꓐꓴ ꓔꓯ ꓢꓰꓼ ꓧꓪꓸ ꓡꓰ ꓠꓹ ꓟ ꓣꓱꓽ ꓬꓯꓼ ꓟ ꓬꓰ ꓙ ꓡꓯ ꓐꓰ ꓓꓰꓽ ꓩꓴ ꓡ ꓡꓳ꓿