ꓬꓥ-ꓖꓳꓥ ꓡꓳ ꓒꓱ ꓗꓪ ꓟꓬꓱꓽ ꓬꓰ ꓔꓬ ꓟ “ꓞꓳ ꓫꓵꓻ ꓪꓽ ꓫꓵꓻ ꓗꓪ ꓬꓰ ꓙ ꓔ ꓙ ꓜꓴ” ꓐꓴ ꓡꓰ ꓬꓥ-ꓖꓳꓥ ꓡꓳ ꓒꓱ ꓗꓪ ꓕꓲ ꓠꓬꓲ ꓠꓯꓸꓼ ꓗꓪ ꓚꓳꓦꓲꓓ-19 ꓑꓶꓸ ꓓꓴ ꓫꓵꓻ ꓢꓴ 1000 ꓟꓳ ꓟꓽ ꓞꓲ ꓙꓳ ꓡꓳ꓾ ꓫꓵꓻ ꓟꓳꓻ ꓫꓺ ꓔꓴꓸ ꓖꓴ ꓟꓲ ꓠꓯ ꓘꓴ ꓓꓽ ꓟ ꓚꓴꓸ ꓛꓲ ꓥꓳ ꓐꓯ ꓩꓴ ꓡ ꓡꓳ=
“ꓬꓰ ꓙ ꓜꓴ ꓐꓴ ꓳꓽ ꓧꓶ ꓠꓬꓲ ꓟꓽ ꓓꓻꓪ= ꓞꓳ ꓤ ꓖꓶ ꓟꓽ ꓡꓳꓼ= ꓠꓴ ꓓꓵ ꓙ ꓠꓬꓲ= ꓕꓲ ꓠꓬꓲ ꓟ ꓠꓯꓼ ꓗꓪ ꓐꓰ ꓟꓶ ꓘꓶꓼ ꓗꓪ ꓛꓲ ꓠꓽ ꓙꓵꓹ ꓟꓽ ꓙꓳ ꓙꓳ ꓞꓳ ꓫꓵꓻ ꓟꓳ ꓫꓺ ꓔꓬ ꓠ ꓗꓷ ꓡꓰꓳ= ꓮ ꓟꓶ ꓡꓱ ꓜꓳ ꓐꓱ ꓶ ꓟꓲ ꓠꓯ ꓓꓴꓽ ꓘꓴꓽ ꓓꓽ ꓟ ꓚꓴꓸ ꓢꓲꓸ ꓬꓲꓸ ꓒꓵꓹ ꓔꓵꓸ ꓠꓹ ꓟ ꓬꓰ ꓕꓽ ꓢꓲꓸ ꓜꓳ ꓥꓳ” ꓐꓰ ꓬꓰ ꓙ ꓜꓴ ꓗꓪ ꓟꓬꓱꓽ ꓬꓰ ꓢꓴ ꓕꓲ ꓣꓳ ꓡꓰ ꓐꓯ ꓡꓳ=ꓬꓥ-ꓖꓳꓥ ꓡꓳ ꓒꓱ ꓗꓪ ꓙꓳ ꓟ ꓕꓲ-ꓑꓲꓠ ꓡꓱ ꓜꓳ ꓗꓪ꓾ ꓕꓲ ꓠꓬꓲ 300-400 ꓟꓳꓻ꓾ ꓬꓯ-ꓪꓰꓸ ꓡꓱ ꓜꓳ ꓗꓪ 200-300 ꓟꓳꓻ꓾ ꓚꓰꓺ-ꓢꓴꓼ ꓡꓱ ꓜꓳ ꓗꓪ 200 ꓣꓳ ꓛꓲ ꓕꓱ ꓡꓱ ꓫꓺ ꓩꓴ ꓔꓬ ꓡꓳ ꓐꓯ ꓡꓳ= ꓕꓱ ꓟ ꓠꓬ ꓬꓥ-ꓖꓳꓥ ꓘꓴꓽ ꓗꓪ ꓡꓱ ꓜꓳ ꓓꓽ ꓟ 3 ꓟ ꓥ ꓢꓲ꓾ ꓮ ꓙꓵꓽ ꓔꓺ ꓗꓷ ꓠꓬ ꓕꓲ ꓠꓬꓲ ꓟ ꓠꓯꓸꓼ ꓗꓪ ꓫꓵꓻ ꓟꓳ 1000 ꓟꓽ ꓞꓲ ꓙꓳ ꓡꓳ=
ꓑ ꓫꓬꓼ ꓐꓴ ꓠꓬ ꓟꓲ ꓦꓲ ꓟꓲ ꓗꓪ ꓠꓻ ꓫꓵ ꓢꓴ ꓟꓬꓽ ꓟ ꓑꓶꓸ ꓓꓴ꓾ ꓑ ꓫꓬ ꓙꓵꓽ ꓪ ꓦꓴ ꓢꓴ ꓟꓯꓼ ꓐꓴ ꓡꓰ ꓐꓯ ꓟ ꓚꓳꓦꓲꓓ-19 ꓠꓻ ꓜꓳ ꓡꓰ ꓢꓴ꓾ ꓫꓵꓻ ꓢꓴ ꓵꓺ ꓟꓬꓱꓺ ꓐꓳ ꓓꓳ ꓩꓴ ꓡ ꓟ ꓠꓬ ꓬꓲꓸ ꓐꓽ ꓗꓪ ꓚꓵ ꓚꓵ ꓒꓬꓱꓼ ꓔꓬ ꓟ ꓕꓯ ꓢꓲ ꓮ ꓘꓶꓸ ꓠꓲꓸ ꓡꓳ ꓐꓰ ꓢꓷꓸ ꓡꓰ ꓐꓴ ꓡꓰ ꓢꓪꓼ ꓓꓳ ꓡ ꓔꓬ ꓡꓳ=
ꓟꓬ-ꓟ ꓕꓲ ꓗꓴꓷꓼ ꓡꓱꓸꓼ ꓗꓪ ꓠꓬ꓾ 7 ꓦ 15 ꓠꓬꓲ ꓟꓶ ꓘꓶꓼ 8 ꓙꓵꓹ ꓗꓪ ꓐꓰ 16 ꓠꓬꓲ ꓟꓶ ꓘꓶꓼ 8 ꓙꓵꓹ – 24 ꓙꓵꓹ ꓕꓲ ꓦꓬꓼ ꓕꓲ ꓠꓬꓲ ꓟ ꓘꓴ ꓠꓯꓸꓼ ꓗꓪ ꓚꓳꓦꓲꓓ-19 ꓠꓻ ꓚꓹ ꓟꓶ ꓡꓰ ꓢꓴ꓾ (6194) ꓣꓳ꓾ ꓫꓵꓻ ꓢꓴ (190) ꓣꓳ ꓙꓳ ꓡꓳ ꓐꓰ ꓐꓯ ꓒꓬꓱꓺ ꓔꓸ ꓡꓳ=