ꓧꓳꓑꓰ ꓡꓠꓖꓳ ꓗꓪ ꓟ ꓡꓯꓼ ꓗꓸ ꓕꓲ ꓗꓯꓺ ꓥ ꓟ “ꓧꓳꓑꓰ ꓠꓯ ꓞꓲꓼ ꓬꓰ ꓙ ꓜꓴ- Hope Community Healthcare- Putao” ꓠꓬ ꓠꓬꓲꓸ ꓠꓬꓲ 2021 ꓘꓳꓼ 11 ꓦ 16 ꓠꓬꓲ ꓕꓯꓽ ꓠꓟ-ꓕꓶ-ꓘꓴꓸ ꓘꓹ ꓗꓪ ꓚꓳ ꓛꓲ ꓬꓰ ꓢꓲꓸ ꓣꓱꓽ ꓬꓯꓼ ꓔꓬ ꓢꓴ ꓐꓴ ꓔꓯ ꓗꓳ-ꓪꓰꓼ ꓔꓯ ꓟꓳꓸ ꓗꓳꓸ ꓙꓲꓽ ꓙꓳ ꓟ ꓠꓯ ꓞꓲꓼ ꓠꓯ ꓟꓲ ꓬꓰ ꓙ ꓪ ꓡꓰꓳ ꓐꓰ the Lisu Times ꓗꓪ ꓓꓳꓽ ꓜꓳ ꓛꓲ ꓡ ꓡꓳ꓿
“ꓟꓲꓸ ꓟꓲ ꓥꓪ ꓠꓴ ꓕꓲ ꓜꓴ ꓠꓟ-ꓕꓶ-ꓘꓴꓸ ꓗꓪ ꓛꓲ ꓪ꓿ ꓞꓳ ꓘꓹ ꓢꓴ ꓠꓽ ꓗꓳ-ꓪꓰꓼ ꓠꓻ ꓓꓱꓽ ꓤ ꓟꓳ ꓚꓱꓹ ꓛꓳ ꓟꓽ ꓡꓳꓼ ꓠꓰ ꓮ ꓟꓬꓹ ꓠꓻ ꓠꓬꓹ ꓐꓶ꓿ ꓞꓳ ꓪꓴꓽ ꓙꓬ-ꓢ ꓖꓶ ꓮ ꓚꓲ ꓛꓵꓽ ꓠꓻ ꓠꓬꓹ ꓐꓶ꓿ ꓕꓲ ꓐꓱ ꓠꓽ ꓓꓻ ꓬꓰ ꓢꓴ ꓙꓳˍ ꓖꓶ ꓢꓯꓼ ꓟꓽ ꓙꓳ꓾ ꓔꓴ ꓟꓽ ꓘꓴ ꓢꓰꓽ ꓐꓶ” ꓐꓰ ꓮ-ꓘꓰ-ꓢꓯꓸ ꓡꓰ ꓐꓯ ꓡꓳ꓿
ꓕꓱ ꓕꓲ ꓝꓲꓸ ꓫꓵꓻ ꓢꓴ 9 ꓣꓳ ꓙꓳ ꓢꓲ꓾ ꓕꓲ ꓐꓱ ꓠꓬ ꓠꓯ ꓞꓲꓼ ꓦꓲ ꓗꓪ ꓐꓰ ꓗꓳ-ꓪꓰꓼ ꓚꓹ ꓟꓶ ꓡꓰ ꓢꓴ꓾ ꓕꓲ ꓐꓱ ꓠꓬ ꓟꓽ ꓚꓹ ꓪ ꓪ ꓞꓳ ꓘꓹ ꓗꓪ ꓠꓻ ꓢꓲꓸ ꓫꓵꓻ ꓢꓴ ꓙꓳ ꓡꓳ꓿ ꓠꓟ-ꓕꓶ-ꓘꓴꓸ ꓗꓪ ꓐꓰ 2 ꓣꓳ ꓠꓬ ꓑꓴ-ꓔ-ꓳ ꓠꓯ ꓞꓲꓼ ꓦꓲ ꓗꓪ ꓳ-ꓢꓲ-ꓙꓲ ꓢꓯꓼ ꓦ ꓔꓬ ꓢꓴ ꓙꓳ ꓡꓳ꓿
“ꓗꓼ ꓚꓹ ꓪ ꓓꓴ ꓟ 3 ꓣꓳ꓿ ꓠꓱꓸ ꓐꓯꓼ ꓠꓽ ꓟꓽ ꓚꓹ ꓪ ꓪ ꓫꓵꓻ ꓢꓴ ꓮ ꓙꓵꓽ 9 ꓣꓳ ꓥꓳ ꓙꓳꓽ꓿ ꓳꓸ ꓐꓯ ꓖꓶ ꓮ ꓟꓶ ꓠꓻ ꓔꓬ ꓢꓴ꓾ ꓓꓻꓡꓰ ꓢꓴ ꓐꓴ ꓖꓶ ꓮ ꓫꓵꓽ ꓡꓲꓸ ꓟꓽ ꓞꓴ ꓠꓴ ꓬꓰ ꓢꓴ꓾ ꓠꓻ ꓘꓴ ꓢꓯꓼ ꓟꓽ ꓙꓲ ꓡꓰ ꓢꓴ ꓙꓳꓸ ꓙꓳꓽ ꓥ ꓐꓶ꓿ ꓗꓳ-ꓪꓰꓼ ꓠꓻ ꓢꓯꓼ ꓠꓻ ꓒꓬꓱꓽ ꓟ ꓔꓲꓸ ꓥꓳ꓿ ꓖ-ꓟꓶ-ꓓꓰ ꓠꓯ ꓞꓲꓼ ꓦꓲ ꓗꓪ ꓮ ꓟꓶ ꓳ-ꓢꓲ-ꓙꓲ ꓢꓯꓼ ꓦ ꓠꓬꓹ ꓢꓴ ꓟ ꓠꓟ-ꓕꓶ-ꓘꓴ ꓢꓴ 2 ꓣꓳ ꓙꓳ ꓐꓶ” ꓐꓰ ꓮ-ꓘꓰ-ꓢꓯꓸ ꓡꓰ ꓠꓬꓲꓸ ꓠꓬꓲ ꓬꓲꓸ ꓚꓲꓸ ꓚ ꓔꓯꓹ ꓡ ꓟ ꓓꓳꓽ ꓐꓯ ꓟꓸ ꓖꓶ ꓡ ꓡꓳ꓿
ꓠꓟ-ꓕꓶ-ꓘꓴꓸ ꓗꓪ ꓞꓳ ꓡꓯꓸ ꓐꓴ ꓔꓯ ꓥ ꓟꓲ ꓗꓳ-ꓪꓰꓼ ꓠꓻ ꓗꓽ ꓚꓱꓹ꓾ ꓠꓻ ꓔꓬ ꓢꓴ ꓔꓯ ꓜꓽ ꓓꓴ ꓓꓳ ꓓꓴ ꓖꓶꓽ ꓜꓽ ꓚꓱꓹ꓾ ꓠꓯ ꓞꓲꓼ ꓮ ꓡꓲ ꓡꓲ ꓚꓸ ꓚꓱꓹ ꓮ ꓡꓲ ꓐ ꓡ ꓖꓳ ꓡꓱ ꓟꓸ ꓖꓶ ꓡꓳ꓿
“ꓗꓳ-ꓪꓰꓼ ꓟꓸ ꓟꓲꓽ ꓐꓯ ꓟꓸ ꓖꓶ ꓪ ꓡꓰꓳ꓿ ꓠꓯ ꓞꓲꓽ ꓖꓶ ꓖꓴ ꓪ ꓡꓰꓳ꓿ ꓠꓻ ꓢꓴ ꓔꓯ ꓮ ꓡꓲ ꓬꓰ ꓙ ꓚꓱꓹ꓾ ꓤ ꓟꓳ ꓚꓱꓹ ꓟ ꓥ ꓠꓯꓸ꓿” ꓐꓰ ꓟꓸ ꓒ ꓣ-ꓠꓰ ꓡꓰ ꓐꓯˍ ꓡꓳ꓿
ꓕꓱ ꓕꓲ ꓝꓲꓸ ꓠꓬ꓾ ꓟꓬ-ꓟ ꓗꓴꓷꓼ ꓡꓳ ꓟꓶꓸ ꓕꓲ ꓛꓱꓽ ꓬꓥ-ꓖꓳꓥ꓾ ꓟ-ꓓꓲ-ꓡꓲ ꓟꓵꓽ ꓗꓪ ꓗꓳ-ꓪꓰꓼ ꓠꓻ ꓢꓴ ꓐꓽ ꓬꓰ ꓔꓬ ꓟ ꓕꓲ ꓝꓲꓸ ꓗꓪ꓾ ꓡꓳ ꓪꓴꓸ ꓕꓲ ꓛꓱꓽ ꓑꓴ-ꓔ-ꓳ ꓟꓵꓽ ꓗꓪ ꓮ ꓘꓶꓸ ꓠꓻ ꓔꓬ ꓟ ꓕꓲ ꓝꓲꓸ ꓥ ꓡꓳ꓿
ꓧꓳꓑꓰ ꓡꓠꓖꓳ ꓠꓬ ꓟꓶ-ꓡ-ꓫꓵ-ꓓꓰ ꓗꓪ ꓙꓵꓽ ꓦꓲ ꓬꓲ ꓚꓰ ꓔꓶ ꓔꓸ ꓢꓲ꓾ ꓑꓴ-ꓔ-ꓳ ꓟꓵꓽ ꓗꓪ ꓠꓻ ꓢꓴ ꓒꓬꓽ ꓢꓴ ꓔꓯ ꓬꓰ ꓙ ꓟ ꓟꓬꓱꓽ꓾ ꓬꓯꓺ ꓜꓱꓽ ꓢꓴ ꓐꓴ ꓔꓯ ꓬꓯꓺ ꓠꓽ ꓚꓱꓹ ꓬꓰ ꓙ ꓟ ꓟꓬꓱꓽ ꓐꓰ꓾ ꓮ ꓟꓶ ꓗꓳ-ꓪꓰꓼ ꓦꓬꓼ ꓠꓬꓲ ꓗꓪ ꓥ ꓟꓲ ꓠꓬꓹ ꓟꓽ ꓙ ꓕꓱ ꓡꓱ ꓮ ꓡꓲ ꓐ ꓡ ꓖꓳ ꓡꓱ ꓬꓰ ꓙ ꓔꓬ ꓟ ꓜꓴ ꓕꓲ ꓜꓴ ꓥ ꓡꓳ꓿