ꓡꓠꓓꓑ ꓑ-ꓔꓲ ꓢꓽ ꓡ ꓙꓵꓽ ꓐꓰ꓾ 2020 ꓢꓲꓻ ꓑꓮꓲ (2020 ꓰꓡꓰꓚꓔꓲꓳꓠ) ꓗꓪ ꓢꓲꓻ ꓣꓴ ꓟꓶ ꓔꓸ ꓟ ꓢꓲꓽ ꓒꓽ ꓫꓱ-ꓟꓷ ꓡꓰ꓾ “ꓥꓪ ꓠꓬ ꓗ-ꓛꓲ ꓟꓵꓽ ꓡꓲ-ꓢꓴ ꓐꓴ ꓐꓱ ꓶ ꓔꓱꓹ ꓜꓳ ꓜꓳ ꓢꓲꓻ ꓣꓴ ꓙꓵꓽ ꓪ ꓖꓶ ꓔꓸ ꓟꓶ ꓢꓴ ꓥꓳ= ꓡꓲ-ꓢꓴ ꓫꓵꓽ ꓐꓴ ꓐꓱ ꓶ ꓗꓴꓷꓼ ꓟꓬꓱꓽ ꓚꓱꓹ ꓗꓪ ꓥꓪ ꓦꓰꓼ ꓔꓶ ꓔꓬ ꓥꓳ” ꓐꓰ ꓠꓬꓲꓸ ꓠꓬꓲ 2021 ꓘꓳꓼ 7 ꓦ 27 ꓠꓬꓲ ꓕꓯ ꓝꓮꓚꓰꓐꓳꓳꓗ ꓗꓪ ꓐꓳ ꓢꓲꓸ ꓢꓷꓸ ꓙ ꓟꓴ ꓙ ꓩꓴ ꓡ ꓡꓳ=
ꓮ ꓟꓲ 2021 ꓘꓳꓼ 7 ꓦ 26 ꓠꓬꓲ ꓗꓪ ꓠꓬ꓾ ꓬꓲꓸ ꓫꓵꓼ ꓒꓴ ꓔꓸ ꓟ ꓟꓯꓹ ꓢꓲꓻ ꓣꓴ ꓜꓴ ꓗꓳ-ꓟꓲ-ꓫꓲ (Union Election Commission) ꓡꓰ 2020 ꓘꓳꓼ ꓟꓯꓹ ꓢꓲꓻ ꓣꓴ ꓚꓱꓹ ꓮ ꓙꓵꓽ ꓠꓬ ꓟꓽ ꓜꓳꓽ ꓟꓽ ꓔꓱꓹ ꓟ ꓬꓰ ꓔꓸ ꓠꓬꓲ꓾ ꓮ ꓙꓵꓽ ꓬꓲꓸ ꓖꓳꓽ ꓗꓷ ꓡꓰꓳ꓾ ꓐꓰ ꓢꓷꓸ ꓙ ꓟꓴ ꓙ ꓩꓴ ꓡ ꓡꓳ=
2020 ꓘꓳꓼ ꓕꓲ ꓗꓴꓷꓼ ꓡꓱꓸꓼ ꓟꓯꓹ ꓢꓲꓻ ꓣꓴ ꓑꓮꓲ ꓔꓯ ꓟꓳꓸ ꓔꓳꓹ ꓡꓯ ꓘꓳ ꓟ ꓬꓲꓸ ꓜꓴ 2 ꓜꓴ ꓓꓳ ꓡ ꓡꓳ= ꓕꓲ ꓜꓴ ꓠꓬ ꓘꓳ ꓣꓴ ꓢꓲ꓾ ꓝꓮꓲ ꓕꓲ ꓜꓴ ꓠꓬ ꓪꓴꓸ ꓓꓵ ꓶꓹ ꓢꓲꓸ ꓬꓲꓸ ꓖꓳꓽ ꓗꓷ ꓡꓰ ꓝꓲꓳ ꓐꓰ ꓐꓯ ꓔꓬ ꓟ ꓦꓬꓼ ꓠꓬꓲ ꓥ ꓡꓳ=
ꓘꓴ ꓣꓴ ꓟ ꓕꓲ ꓜꓴ ꓠꓬ꓾ 2020 ꓘꓳꓼ 11 ꓦ 8 ꓠꓬꓲ ꓕꓯ ꓕꓲ ꓗꓴꓷꓼ ꓡꓱꓸꓼ ꓟꓯꓹ ꓢꓲꓻ ꓡꓯ ꓘꓳ ꓗꓷ ꓟ ꓔꓯ ꓡꓯꓼ ꓕꓲꓺ ꓣꓴ ꓢꓲꓸ (ꓖꓳ ꓗꓪ ꓐꓰ ꓖꓶꓽ ꓡ ꓟ ꓙꓵꓽ ꓪ ꓔꓯ ꓡꓯꓼ ꓕꓲ ꓣꓴ ꓢꓲ) ꓬꓲꓸ ꓪꓴꓸ ꓒꓴ ꓪꓴꓸ ꓔꓴ ꓟ ꓠꓬ ꓚꓣꓑꓧ ꓥ ꓡꓳ= ꓝꓮꓲ ꓚꓣꓑꓧ ꓗꓪ ꓐꓰ ꓕꓲ ꓝꓸ ꓗꓴꓷꓼ ꓙꓵꓽ ꓜꓴ ꓠꓴꓖ ꓔꓯ ꓒꓴ ꓗꓷ ꓢꓲꓸ ꓮ ꓟꓶ ꓗꓪ ꓛꓲ ꓑ ꓫꓬꓼ ꓙꓵꓽ ꓪ ꓡꓲꓸ ꓟꓶ ꓠꓹ ꓟ ꓢꓯꓼ ꓩꓴ ꓔꓬ ꓟ ꓦꓬꓼ ꓠꓬꓲ ꓥ ꓡꓳ=
ꓝꓮꓲ ꓕꓲ ꓒꓳꓹ ꓗꓪ ꓠ-ꓢꓼ-ꓗꓼ ꓐꓴ ꓠꓬ 2020 ꓘꓳꓼ 11 ꓦ 8 ꓠꓬꓲ ꓟꓯꓹ ꓒꓬꓽ ꓢꓲꓻ ꓑꓮꓲ ꓗꓪ ꓟꓽ ꓔꓱꓹ ꓜꓳ ꓟ ꓟꓬꓱꓽ ꓮ ꓟꓬꓹ ꓬꓰ ꓗꓷ ꓟ ꓗꓸ ꓚꓵ ꓡꓳꓸ ꓟꓳ ꓠꓬꓲ꓾ ꓖꓳ ꓢꓲꓻ ꓣꓴ ꓑꓮꓲ ꓗꓪ ꓐꓰ ꓓꓳ ꓡ ꓟ ꓙꓵꓽ ꓪ ꓮ ꓙꓵꓽ꓾ ꓢꓲꓻ ꓣꓴ ꓔꓸ ꓟ ꓙ ꓖꓴ ꓚꓱꓹ ꓮ ꓙꓵꓽ ꓬꓲꓸ ꓖꓳꓽ ꓗꓷ ꓡꓰ ꓝꓲꓳ ꓐꓰ ꓐꓯ ꓩꓴ ꓡ ꓡꓳ=
ꓮ ꓟꓶ ꓢꓲꓽ ꓒ ꓫꓱ-ꓟꓷ ꓠꓬ 2020 ꓘꓳꓼ ꓟꓯꓹ ꓢꓲꓻ ꓚꓱꓹ ꓔꓯ ꓗꓴꓸ ꓙꓲꓽ ꓙꓳ ꓢꓲ꓾ ꓮ ꓡꓲ ꓦꓰꓼ ꓔꓬ ꓟ ꓐꓰ꓾ ꓡꓲ-ꓢꓴ ꓐꓴ ꓔꓯ ꓧꓳꓽ ꓣꓱꓽ ꓙꓰ ꓔꓬ ꓟ ꓜꓲ ꓜꓲ ꓟꓴ ꓟꓴ ꓚꓬꓹ ꓟꓽ ꓪ ꓢꓰ= ꓠꓻ ꓠꓬꓲ ꓟꓽ ꓪ ꓢꓰ=