ꓣ-ꓫꓸ ꓡꓰ ꓬꓴ-ꓗ-ꓣꓲꓸ ꓟꓵꓽ ꓔꓯ ꓦꓴꓻ ꓔꓬꓳ

ꓬꓴ-ꓗ-ꓣꓲꓸ ꓗꓴꓷꓼ ꓗꓪ ꓟ ꓓꓳꓹ-ꓠꓬꓼ ꓟꓵꓽ ꓐꓰ꓾ ꓡꓴ-ꓧ-ꓢꓲ ꓟꓵꓽ (Donetsk and Luhansk) ꓕꓱ ꓠꓬꓲꓽ ꓟꓵꓽ ꓠꓬ ꓡꓲꓹ ꓗꓷ ꓟꓶˍ ꓟ ꓟꓵꓽ (independent states) ꓥ ꓡꓳ ꓐꓰ ꓢꓷꓸ ꓙ ꓟꓴ ꓙ ꓟ ꓕꓳ ꓶ ꓔꓯ ꓣ-ꓫꓸ ꓗꓴꓷꓼ ꓙꓵꓽ ꓢꓴ ꓑꓴ-ꓔꓲ (Vladimir Putin) ꓡꓰ ꓡꓯ; ꓓꓴ ꓢꓽ ꓗꓷꓳ꓿

ꓕꓱ ꓟ ꓠꓬ ꓬꓴ-ꓗ-ꓣꓲꓸ ꓗꓴꓷꓼ ꓗꓪ ꓣ-ꓫꓸ ꓟꓯꓼ ꓐꓴ ꓓꓵꓽ ꓗꓪꓼ ꓙꓰ ꓠꓹ ꓟ ꓕꓵꓼ ꓪ ꓝꓲꓺ ꓘꓶꓽ ꓥ ꓢꓲ꓾ ꓣ-ꓫꓸ ꓟꓯꓼ ꓐꓴ ꓔꓯ ꓘꓶ ꓡꓶꓽ ꓡ꓾ ꓔꓳꓹ ꓡ ꓠꓬ ꓫꓵꓽ ꓓꓳ ꓓꓴ ꓗꓷ ꓡ ꓠꓬ꓾ ꓬꓴ-ꓗ-ꓣꓲꓸ ꓙꓵꓽ ꓢꓴ ꓐꓴ ꓶꓻ ꓥ ꓡꓳ꓾ ꓐꓯˍ ꓡꓳ꓿

ꓕꓱ ꓟ ꓑꓶꓸ ꓓꓴ ꓬꓴ-ꓗ-ꓣꓲꓸ ꓗꓪ ꓐꓰ ꓧꓹ ꓙꓰ ꓟ ꓟꓵꓽ ꓕꓱ ꓠꓬꓲꓽ ꓟꓵꓽ ꓠꓬ ꓚꓲ ꓛꓬ ꓔꓱꓹ ꓚꓲ ꓛꓬ ꓙꓵꓽˍ ꓟ ꓟꓵꓽ꓾ Donetsk People’s Republic- ꓓꓑꓣ ꓐꓰ꓾ Luhansk People’s Republic-ꓡꓑꓣ ꓒꓬꓱꓼ ꓡ ꓓꓴ ꓚꓱꓹ ꓝꓰꓸ ꓙꓰˍ ꓟ ꓥ ꓡꓳ꓿

ꓬꓴ-ꓗ-ꓣꓲꓸ ꓗꓴꓷꓼ ꓗꓪ ꓣ-ꓫꓸ ꓓꓵꓽ ꓡ ꓟ ꓔꓯ (ꓣ-ꓫꓸ ꓗꓴꓷꓼ ꓙꓵꓽ ꓢꓴ ꓑꓴ-ꓔꓲ ꓫꓸ ꓪ ꓡꓳ ꓚ ꓐꓯˍ ꓠꓬ꓾) “ꓢꓲ ꓡꓲꓹ ꓟ ꓟꓬꓱꓽ ꓬꓰˍ ꓟ (peace keeping process)” ꓐꓯ ꓔꓸ ꓡꓳ꓿

“ꓕꓱ ꓟ ꓠꓬ ꓢꓲ ꓡꓲꓹ ꓟ ꓟꓬꓱꓽ ꓬꓰˍ ꓟ ꓥꓳ꓿ ꓓꓳꓹ-ꓠꓬꓼ ꓟꓵꓽ ꓐꓰ꓾ ꓡꓴ-ꓧ-ꓢꓲ ꓟꓵꓽ ꓠꓬ ꓧꓶꓸ ꓕꓯꓽ ꓮ ꓠꓱ ꓠꓱ ꓕꓯˍ ꓡꓰ ꓣ-ꓫꓸ ꓗꓴꓷꓼ ꓕꓲ ꓫꓴ ꓥ ꓡꓳ꓿ ꓬꓲꓸ ꓪ ꓔꓯ ꓣꓴ-ꓗ-ꓣꓲꓸ ꓡꓰ ꓙꓵꓽ ꓕꓲꓺ ꓔꓸ ꓟ ꓗꓪ ꓐꓰ ꓡꓲꓹ ꓩꓴ ꓠ ꓗ ꓡꓳ꓿ ꓥꓪ ꓠꓴ ꓢꓲ ꓡꓲꓹ ꓟ ꓟꓬꓱꓽ ꓬꓰ ꓢꓴ ꓟꓯꓼ ꓐꓴ ꓓꓵꓽ ꓡ ꓟ ꓔꓯ ꓗꓽ ꓔꓸ ꓡ ꓠꓬ ꓫꓵꓽ ꓓꓳ ꓓꓴ꓾ ꓐꓬ ꓡꓰ ꓓꓴ ꓙꓳ ꓡ ꓚꓰꓼ ꓠꓬ꓾ ꓮ ꓟꓶ ꓣꓴ-ꓗ-ꓣꓲꓸ ꓗꓴꓷꓼ ꓧꓳꓽ ꓪꓴꓸ ꓟꓴ ꓢꓴ ꓐꓴ ꓶꓻ ꓟꓯꓻ ꓠ ꓗ ꓥꓳ꓿” ꓐꓰ ꓣ-ꓫꓸ ꓗꓴꓷꓼ ꓙꓵꓽ ꓢꓴ ꓑꓴ-ꓔꓲ ꓡꓰꓽ ꓔꓦ ꓗꓪ ꓐꓰ ꓠꓲꓹ ꓢꓲꓼ ꓠꓲꓹ ꓠ ꓗꓹ ꓫꓵꓸ ꓩꓴ ꓡ ꓡꓳ꓿

ꓟꓲ ꓠꓯ ꓗꓴꓷꓼ ꓜꓴ ꓟꓬꓱꓽ ꓢꓲꓺ ꓖꓴ-ꓔ-ꓬꓯꓼ ꓡꓰ “ꓣꓴ-ꓗ-ꓣꓲꓸ ꓟꓵꓽ ꓔꓯ ꓣ-ꓫꓸ ꓡꓰ ꓕꓱ ꓡꓱ ꓦꓴꓻ ꓡ ꓟ ꓠꓬ ꓗꓴꓷꓼ ꓜꓴ ꓙꓵꓽ ꓗ ꓔꓯ ꓟꓽ ꓧꓳꓹ” ꓐꓯ ꓡꓳ꓿

ꓣ-ꓫꓸ ꓠꓬ ꓣꓴ-ꓗ-ꓣꓲꓸ ꓟꓵꓽ ꓦꓴꓻꓐꓓꓴ ꓬꓰ ꓔꓬꓳ ꓐꓰ ꓴꓢꓮ ꓟꓯꓼ ꓛꓽ ꓒꓽ ꓐꓴ ꓡꓰ ꓧꓶꓸ ꓕꓯꓽˍ ꓡꓰ ꓙꓳꓺ ꓗꓽ ꓖꓶ ꓔꓬ ꓟ ꓥ ꓡꓳ꓿

ꓖꓳ ꓡꓱ ꓥ ꓟꓲ꓾ ꓣ-ꓫꓸ ꓠꓬ ꓖꓳ ꓡꓱ ꓟꓻꓽ ꓟꓽ ꓦꓴ꓾ ꓟꓯꓼꓽ ꓢꓰꓼ ꓐꓰ ꓗꓶꓸ ꓘꓶꓽ ꓕꓱ ꓔꓬ ꓜꓽ ꓟꓶ ꓥꓰꓽ ꓗꓪ ꓮ ꓟꓶ ꓠꓬ ꓒꓴ ꓒꓴ ꓡꓯꓽ ꓡꓯꓽ ꓟꓵꓽ ꓦꓴꓻ ꓩꓴ ꓡ ꓟ ꓥ ꓡꓳ꓿