ꓣꓴ-ꓣꓳ ꓜꓴ ꓡꓰ ꓚꓣꓑꓧ/ꓠꓴꓖ ꓔꓯ ꓘꓳ ꓣꓴ ꓗꓷꓳ

2021 ꓘꓳꓼ 10 ꓦ 7 ꓠꓬꓲ ꓕꓯ ꓣꓱꓽ ꓬꓰ ꓗꓷ ꓟ 27 ꓗꓴꓷꓼ ꓟ ꓣꓴ-ꓣꓳ ꓜꓴ ꓑ ꓫꓬ ꓝꓲ ꓓꓴ ꓐꓴ ꓖꓪ ꓙꓱ ꓜꓲꓼ ꓓꓴ ꓗꓪ ꓚꓣꓑꓧ ꓠꓬ ꓟꓬ-ꓟ ꓑ ꓫꓬ ꓐꓴ ꓡꓰ ꓢꓲꓻ ꓣꓴ ꓔꓸ ꓟ ꓑ ꓫꓬ ꓝꓲ ꓓꓴ ꓜꓴ ꓥ ꓢꓲ꓾ ꓠꓴꓖ ꓠꓬ ꓟꓬ-ꓟ ꓗꓴꓷꓼ ꓙꓵꓽ ꓜꓴ ꓥ ꓡꓲ ꓐꓰ ꓘꓳ ꓣꓴ ꓗꓷꓳ꓿

ꓕꓱ ꓕꓲ ꓑꓶꓸ ꓖꓪ ꓙꓱ ꓢꓲꓸ ꓠꓲꓹ ꓡꓶꓽ ꓟꓯꓹ ꓗꓶꓺ ꓡꓯ ꓘꓳ ꓟ ꓗꓪ ꓔꓳꓹ ꓙ ꓟꓯꓹ 647꓾ ꓟꓽ ꓔꓳꓹ ꓙ ꓟꓯꓹ 2꓾ ꓔꓱꓹ ꓫꓵꓺ ꓔꓬ ꓟ ꓟꓯꓹ 31 ꓒꓬꓽ ꓙꓳ ꓡꓳ꓿ ꓝꓲ ꓓꓴ ꓟꓬꓽ ꓠꓬꓲ ꓠꓬ ꓚꓣꓑꓧ/ꓠꓴꓖ ꓔꓯ ꓔꓳꓹ ꓙ ꓢꓲ꓾ ꓣꓴ-ꓣꓳ ꓜꓴ ꓬꓲꓸ ꓛꓲ ꓬꓲꓸ ꓓꓽ ꓟ (5) ꓘꓶ ꓢꓷ ꓙ ꓟꓴ ꓙ ꓩꓴ ꓡ ꓡꓳ꓿ ꓖꓳ (5) ꓘꓶꓽ ꓠꓬ꓾

• 2 ꓦ 1 ꓠꓬꓲ ꓟꓬ-ꓟ ꓗꓴꓷꓼ ꓙꓵꓽ ꓪ ꓦꓴ ꓡ ꓟ ꓔꓯ ꓔꓷꓼ ꓟꓽ ꓔꓳꓹ ꓙ꓿ 2020 ꓘꓳꓼ ꓢꓲꓻ ꓣꓴ ꓑꓮꓲ ꓔꓯ ꓒꓵꓽ ꓢꓲ꓾ ꓙꓵꓽ ꓪ ꓠꓬ ꓑ ꓫꓬ ꓝꓲ ꓓꓴ ꓐꓴ ꓔꓯ ꓡꓲꓸ ꓖꓶ ꓠꓹ ꓟ꓾ ꓑ ꓫꓬ ꓐꓴ ꓠꓲꓹ ꓡꓶꓽ ꓟꓳꓸ ꓖꓶ ꓔꓬ ꓟ ꓔꓯ ꓜꓲ ꓜꓲ ꓑꓰꓹ ꓑꓰꓹ ꓢꓰꓼ ꓔꓬ ꓟ ꓠꓽ ꓩꓴ ꓗꓷ ꓢꓲ꓾ ꓠꓲꓹ ꓡꓶꓽ ꓟꓳꓸ ꓖꓶ ꓫꓸ ꓕꓱ ꓙꓵꓽ ꓪ ꓖꓶ ꓠꓹ ꓟ꓾ ꓣꓴ ꓡꓴꓽ ꓔꓸ ꓢꓴ ꓐꓴ ꓔꓯ ꓡꓲꓹ ꓖꓶ ꓠꓹ ꓟ ꓐꓰ꓾ ꓦ ꓡꓱ ꓚꓱꓹ ꓔꓯ ꓒꓵꓽ ꓠꓹ ꓟ꓿
• ꓫꓵꓽ ꓪꓴ ꓫꓬꓹ ꓠꓹ ꓟ ꓬꓲꓸ ꓪꓴꓸ ꓕꓲ ꓕꓳꓼ ꓠꓬ꓾ ꓪ ꓔꓲꓸ ꓪꓰꓹ-ꓟꓲꓼ ꓐꓰ꓾ ꓗꓴꓷꓼ ꓚꓴ ꓬꓲꓹ ꓖꓶ ꓢꓴ ꓮꓳ-ꓢ-ꓢꓴ-ꓚꓰꓽ ꓔꓯ ꓕꓱ ꓕꓲ ꓑꓹ ꓠꓲꓹ ꓞ ꓡꓲꓹ ꓖꓶ ꓠꓹ ꓟ꓿
• ꓟꓬ-ꓟ ꓑ ꓫꓬ ꓐꓴ ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ꓾ ꓡꓲꓹ ꓗꓷ ꓟꓶ ꓟ ꓙꓵꓽ ꓪ꓾ ꓡ ꓞꓳ ꓪ ꓙꓲꓽ ꓙꓳˍ ꓟ ꓪ ꓠꓹ ꓟ ꓢꓯꓼ ꓕꓵꓼ ꓔꓬ ꓟ ꓔꓯ ꓔꓳꓹ ꓙ ꓔꓬ ꓡꓳ꓿
• ꓟꓬ-ꓟ ꓟꓯꓼ ꓐꓴ ꓡꓰ ꓬꓰ ꓗꓷ ꓟ ꓝꓴꓲ ꓔꓯ ꓟꓽ ꓔꓳꓹ ꓙ꓿ ꓪ ꓘꓴ ꓦꓲ꓾ ꓐ-ꓡꓲ ꓜꓲꓼ ꓦꓲ꓾ ꓠꓯ ꓞꓲꓼ ꓫꓬꓹ ꓔꓶ ꓐꓴ ꓔꓯ ꓒꓬꓹ ꓩꓴ ꓔꓬ ꓟ ꓐꓰ꓾ ꓦ ꓡꓱ ꓚꓱꓹ ꓧꓳꓽ ꓢꓴ ꓐꓴ ꓔꓯ ꓣꓴ ꓡꓴꓽ ꓔꓬ ꓟ ꓑꓶꓸ ꓓꓴ ꓮ ꓘꓶꓸ ꓙꓽ ꓫꓸ ꓔꓬ ꓡꓳ꓿
• ꓚꓣꓑꓧ/ꓠꓴꓖ ꓠꓬ ꓟꓬ-ꓟ ꓑ ꓫꓬ ꓬꓲ ꓛꓲ ꓦꓰꓼ ꓔꓬ ꓟ ꓜꓴ ꓐꓰ ꓗꓴꓷꓼ ꓙꓵꓽ ꓜꓴ ꓥ ꓟ ꓘꓳ ꓣꓴ ꓡꓳ꓿ ꓬꓲꓸ ꓡꓲꓽ ꓡꓳ ꓚ꓾ ꓢꓲ ꓡꓲꓹ ꓟ ꓚꓱꓹ ꓗꓪ ꓐꓰ ꓖꓪ ꓙꓱ ꓖꓪ ꓟꓴ ꓟ ꓔꓯ ꓔꓳꓹ ꓙ ꓔꓬ ꓢꓲ꓾ ꓮ-ꓢꓲ-ꓬ ꓗꓴꓷꓼ ꓜꓴ ꓡꓰ ꓖꓪ ꓙꓱ ꓖꓪ ꓟꓴ ꓕꓯꓽ ꓚꓣꓑꓧ/ꓠꓴꓖ ꓔꓯ ꓐ ꓝꓲ ꓠꓹ ꓟ ꓢꓯꓼ ꓖꓶ ꓩꓴ ꓡ ꓥꓳ꓿

ꓣꓴ-ꓣꓳ ꓑ ꓫꓬ ꓝꓲ ꓓꓴ ꓐꓴ ꓜꓲꓼ ꓓꓴ ꓗꓪ ꓠꓲꓹ ꓧꓳꓹ ꓡꓰ ꓟ ꓕꓱ ꓟꓬ ꓟ ꓔꓯ ꓮ-ꓢꓲ-ꓬ ꓗꓴꓷꓼ ꓜꓴ ꓐꓰ꓾ ꓟꓲ ꓠꓯ ꓗꓴꓷꓼ ꓓꓽ ꓟ ꓧꓳꓽ ꓪꓴꓸ ꓟꓴ ꓢꓴ ꓐꓴ ꓔꓯ ꓕꓳ ꓶ ꓦ ꓢꓲꓸ ꓢꓷ ꓙ ꓟꓴ ꓙ ꓩꓴ ꓓꓴ ꓥꓳ ꓐꓯ ꓡꓳ꓿

ꓣꓴ-ꓣꓴ ꓜꓴ 27 ꓗꓴꓷꓼ ꓠꓬ꓾ ꓲ-ꓔ-ꓡꓲ꓾ ꓩꓽ꓾ ꓔꓴ-ꓣ-ꓗꓲ꓾ ꓠꓯ-ꓔ-ꓡ꓾ ꓐꓯ-ꓙꓰ-ꓬ꓾ ꓐꓴ-ꓖꓯ-ꓣꓲ-ꓬ꓾ ꓳ-ꓢꓲ-ꓔꓲꓸ-ꓬ꓾ ꓡꓯ-ꓐꓲ-ꓬ꓾ ꓡꓲ-ꓔꓴ-ꓯ-ꓠꓰ-ꓬ꓾ ꓡꓴ-ꓜꓰ-ꓐꓼ꓾ ꓢ-ꓑ-ꓣꓼ꓾ ꓘ-ꓣꓴ-ꓯ-ꓫ꓾ ꓟꓳ-ꓔꓼ꓾ ꓑꓳ-ꓡ꓾ ꓓꓰꓹ-ꓟꓼ꓾ ꓛꓯꓼ-ꓛꓰꓸ-ꓬ꓾ ꓯꓼ-ꓢꓲ-ꓔꓳ-ꓠꓰ-ꓬ꓾ ꓣꓳ-ꓟꓯ-ꓠꓰ-ꓬ꓾ ꓢ-ꓡꓳ-ꓐꓯꓼ-ꓗꓲ-ꓬ꓾ ꓢ-ꓡꓳ-ꓐꓯ-ꓠꓰ-ꓬ꓾ ꓒꓲ-ꓡ꓾ ꓖ-ꓣꓲꓼ꓾ ꓢ-ꓑꓰ꓾ ꓢꓱ-ꓓꓰ꓾ ꓧ-ꓖꓯ-ꓣꓲ꓾ ꓮ-ꓬ-ꓡ ꓗꓴꓷꓼ ꓕꓱ ꓟꓬ ꓥ ꓡꓳ꓿