ꓡꓲꓽ ꓖꓴꓽ ꓕꓱ ꓕꓲ ꓫꓵꓽ ꓔꓯ ꓦꓲ-ꓡꓲ-ꓠꓲ ꓥꓳꓽ ꓗꓪ ꓐꓰ Sarco ꓟꓬꓱꓺ ꓔꓸ ꓡꓳ= ꓬꓲꓸ ꓟꓸ ꓟꓲꓽ ꓠꓬ “ꓧꓪꓽ ꓖꓳ ꓓꓱꓽ” ꓥ ꓡꓳ= ꓕꓱ ꓟ ꓠꓬ ꓫꓵꓻ ꓠꓲꓹ ꓫꓵ ꓢꓴ ꓐꓴ ꓐꓱ ꓶ ꓮ ꓘꓶꓸ ꓟꓽ ꓫꓸ ꓙꓲ ꓙꓲ ꓫꓵꓻ ꓐ ꓡ ꓠꓹ ꓟ ꓚꓰꓼ ꓓꓳ ꓡ ꓟ ꓡꓲꓽ ꓖꓴꓽ ꓙꓼ ꓕꓲ ꓫꓵꓽ ꓥ ꓡꓳ=
ꓙꓼ ꓕꓱ ꓟ ꓔꓯ 2012 ꓘꓳꓼ ꓕꓯ ꓴꓗ ꓗꓪ ꓰꓫꓲꓔ ꓐꓯ ꓟ ꓜꓴ ꓡꓰ ꓟꓳꓸ ꓖꓶ ꓔꓴ ꓡ ꓡꓳ=ꓡ ꓠꓹ ꓟ 2022 ꓘꓳꓼ ꓗꓪ ꓐꓰ ꓠꓰ-ꓬꓴ-ꓜꓲ-ꓡ ꓗꓪ ꓣꓱꓽ ꓠꓹ ꓟ ꓙ ꓖꓶ ꓔꓬ ꓡꓳ=
ꓳ-ꓢꓰ-ꓙꓲ ꓢꓯꓼ (Oxygen) ꓟꓽ ꓙꓳ ꓡꓰ ꓝꓲ ꓢꓲ꓾ ꓠꓮꓲ-ꓕꓳ-ꓙꓲ ꓢꓯꓼ (nitrogen) ꓗꓶ ꓡꓴꓽ ꓩꓴ ꓡ ꓟ ꓗꓪ ꓐꓰ ꓡꓲꓽ ꓖꓴꓽ ꓖꓳ ꓟ ꓗꓪ ꓡꓴꓽ ꓔꓬ ꓢꓴ ꓠꓬ ꓧꓪꓸ ꓟꓽ ꓛꓲꓽ ꓡꓰ ꓢꓲꓸ ꓫꓵꓻ ꓓꓴ ꓥꓳ ꓐꓯ ꓡꓳ=
“ꓮ ꓫꓵꓽ ꓡꓲꓸ ꓠꓻ ꓜꓲꓽ ꓫꓸ ꓓꓴ ꓟꓽ ꓙꓳ꓾ ꓢ ꓢꓹ ꓫꓵꓻ ꓓꓴ ꓚꓱꓹ ꓙꓽ ꓖꓶ ꓔꓸ ꓥ= ꓢꓯꓸ ꓠꓬꓹ ꓖꓶ ꓮ ꓫꓵꓽ ꓙꓲ ꓖꓴ ꓟꓽ ꓙꓳ ꓐꓰ ꓓꓵꓽ ꓙ ꓢꓴ ꓛꓲ ꓫꓵꓻ ꓡꓯ ꓫꓵꓻ꓾ ꓠꓻ ꓓꓴ ꓓꓽ ꓟ ꓔꓳꓹ ꓜꓳ ꓢꓴ ꓐꓴ ꓐꓱ ꓶ ꓬꓲꓸ ꓪ ꓠꓲꓹ ꓡꓶꓽ ꓙꓳ ꓠꓬ ꓫꓵꓻ ꓠꓹ ꓟ ꓐꓱ ꓶ ꓬꓰ ꓙ ꓓꓴ ꓙꓼ ꓥꓳ” ꓐꓰ ꓙꓼ ꓫꓬꓹ ꓢꓴ ꓐꓴ ꓡꓰ ꓐꓯ ꓔ ꓡꓳ=
ꓡ ꓞꓳ ꓫꓵꓻ ꓠꓹ ꓟ ꓓꓳꓼ ꓓꓳ ꓝꓲ_ ꓟ ꓐꓰ꓾ ꓝꓮꓲ ꓡꓳ ꓓꓲ ꓡꓳ ꓢꓰꓼ ꓟ꓾ ꓮ ꓔꓳꓸ ꓗꓪ ꓛꓴ ꓢꓰꓼ ꓟ꓾ ꓝꓮꓲ lethal ꓠꓯ ꓞꓲꓼ ꓗꓸ ꓢꓰꓼ ꓟ ꓙꓳ ꓡꓳ= ꓟꓬꓽ ꓠꓬꓲ ꓠꓬ ꓠꓻ ꓢꓴ ꓐꓴ ꓔꓯ ꓡꓰꓔꓧꓮꓡ ꓠꓯ ꓞꓲꓼ ꓗꓸ ꓖꓶ ꓢꓲꓸ ꓫꓵꓻ ꓝꓲ ꓟ ꓙꓳ ꓡꓳ=
2020 ꓘꓳꓼ ꓕꓲ ꓘꓳꓼ ꓟ ꓗꓪ ꓠꓰ-ꓬꓴ-ꓜꓰ-ꓡ ꓗꓴꓷꓼ ꓗꓪ ꓕꓱ ꓡꓱ ꓫꓵꓻ ꓠꓲꓹ ꓫꓵ ꓢꓴ ꓐꓴ 1300 ꓣꓳ ꓙꓳ ꓢꓲ꓾ ꓬꓲꓸ ꓪ ꓔꓯ ꓡꓰꓔꓧꓮꓡ ꓠꓯ ꓞꓲꓼ ꓖꓶ ꓗꓷꓳ ꓐꓯ ꓡꓳ=
ꓮ ꓟꓶ ꓢ-ꓗꓳ ꓡꓲꓽ ꓖꓴꓽ ꓘꓴꓽ ꓗꓪ ꓓꓵꓽ ꓙꓰ ꓢꓲꓸ ꓚꓲ ꓛꓬ ꓔꓱꓹ ꓚꓲꓸ ꓛꓬ ꓥꓰꓸ ꓢꓲꓸ ꓫꓵꓻ ꓐ ꓡ ꓟ ꓙꓼ ꓠꓬ ꓠꓰ-ꓬꓴ-ꓜꓰ-ꓡ ꓗꓪ ꓣꓱꓽ ꓠꓹ ꓟ ꓔꓯꓹ ꓓꓵꓽ ꓡ ꓟ ꓥ ꓡꓳ= ꓖꓳ ꓗꓪ ꓗꓴꓷꓼ ꓙꓵꓽ ꓗ ꓔꓯ ꓟꓽ ꓛꓬ ꓡꓰ ꓠꓹ ꓟ ꓖꓪ ꓙꓱ ꓬꓲꓸ ꓚꓱꓹ ꓫꓬꓹ ꓪ ꓡꓰ ꓟ ꓥ ꓡꓳ ꓐꓯ ꓡꓳ=
ꓖꓳ ꓡꓱ ꓥ ꓟꓲ ꓡꓲꓽ ꓖꓴꓽ ꓘꓴꓽ ꓗꓪ ꓓꓵꓽ ꓙꓰ ꓓꓳ ꓡꓰ ꓗꓸ ꓠꓯꓸ꓾ ꓠꓲꓹ ꓟ ꓡꓶꓸ ꓬꓰ ꓠꓬ (ꓫꓵꓻ ꓠꓲꓹ ꓟꓽ ꓫꓵ ꓢꓰꓽ ꓗꓷ ꓡꓰ ꓠꓬ) ꓡꓽ ꓡ ꓠꓹ ꓟ ꓥ ꓟꓲ ꓚꓲ ꓛꓬ ꓔꓱꓹ ꓚꓲ ꓛꓬ ꓥꓰꓸ ꓡꓽ ꓙꓲ ꓠ ꓚꓰꓼ ꓔꓸ ꓡꓳ ꓐꓯ ꓡꓳ=
ꓢ-ꓗꓳ ꓡꓲꓽ ꓖꓴꓽ ꓕꓲ ꓟ ꓒꓵꓽ ꓠꓬ ꓡꓲꓽ ꓖꓴꓽ ꓕꓯ ꓢꓲ ꓗꓪ 3ꓓ ꓬꓲꓸ ꓐꓬꓱꓽ ꓮ ꓡꓲ ꓐꓳ ꓠꓲꓹ ꓫꓵ ꓟ ꓔꓯ ꓛꓳ ꓢꓲꓸ ꓕꓯꓽ ꓡꓰ ꓟ ꓐꓰ꓾ ꓠꓯꓸ ꓡꓰ ꓟ ꓙꓳ ꓚꓰꓼ ꓡꓳ ꓐꓯ ꓡꓳ= 2018 ꓘꓳꓼ ꓟ ꓗꓪ ꓚNBC ꓓꓳꓽ ꓐꓯ ꓒꓬꓱꓻ ꓔꓶꓸ ꓗꓪ ꓐꓰ ꓚꓲꓸ ꓚ ꓟꓶ ꓟ ꓠꓬ ꓢ-ꓗꓳ ꓡꓲꓽ ꓖꓴꓽ ꓔꓲ ꓟ US$7500 ꓒꓵꓽ_ ꓡꓳ ꓐꓯ ꓡꓳ= ꓬꓲꓸ ꓐꓬꓱꓽ ꓙꓲ ꓙꓲ ꓟꓽ ꓐꓳ ꓠꓬ ꓕꓱ ꓟ ꓠꓯꓸ ꓘꓪ ꓬꓲꓸ ꓒꓵꓽ ꓕꓯꓽ ꓡ ꓥꓳ ꓐꓯ ꓔ ꓡꓳ=
ꓫꓵꓻ ꓚꓱꓹ ꓬꓰ ꓙ ꓓꓴ ꓡꓲꓽ ꓖꓴꓽ ꓕꓱ ꓡꓱꓳ ꓫꓵꓽ ꓔꓯ ꓔꓳꓹ ꓢꓴ ꓥ ꓟꓲ ꓙꓳ ꓟ ꓡꓰ ꓐꓰ꓾ ꓢꓯꓼ ꓖꓶ ꓢꓴ_ ꓟꓲ ꓙꓳ ꓡꓳ=
ꓬꓲꓸ ꓚꓰ꓾ ꓔꓧꓰ ꓰꓫꓲꓔ ꓲꓠꓔꓰꓣꓠꓮꓔꓲꓳꓠꓮꓡ