ꓡꓲ-ꓢꓴ ꓐꓴ ꓠꓬ ꓬꓲꓸ ꓪ ꓟꓳꓻ ꓝꓳ꓾ ꓬꓰ ꓝꓳ ꓡꓰ ꓟ ꓕꓲ ꓫꓵꓽ ꓫꓵꓽ ꓔꓯ ꓖꓴ ꓢꓲꓸ ꓔꓯ ꓥꓳꓽ ꓐꓯ ꓘꓶꓽ ꓕꓱ ꓚꓰꓼ ꓡꓳ= ( ꓸꓸꓸꓸꓸ ) ꓘꓴꓽ ꓗꓪ ꓟ ꓫꓸ ꓪ ꓝꓳꓹ ꓠꓬ ꓡꓲ-ꓢꓴ ꓐꓴ ꓕꓱ ꓚꓽ ꓟ ꓐꓯ ꓘꓶꓽ ꓝꓳꓹ ꓥ ꓡꓳ= ꓖꓳ ꓡꓱꓳ ꓫꓵꓽ ꓗꓪ ꓐꓰ ꓫꓸ ꓕꓱ ꓙ ꓡꓯ ꓘꓳ ꓠꓬ ꓙ ꓜꓲꓼ ꓢ_ ꓡꓳ= ꓟꓶ ꓫꓵ ꓫꓵ ꓒꓶꓻ ꓟꓸ ꓖꓶ ꓠ ꓔꓸ ꓟ ꓕꓲ ꓫꓵꓽ ꓫꓵꓽ ꓔꓯ ꓓꓴꓸ ꓓꓴꓸ ꓤꓼ ꓕꓲ ꓚꓱꓹ ꓗꓪ ꓐꓰ ꓐꓯ ꓟꓳꓸ ꓖꓶ ꓐ ꓡ ꓟ ꓥ ꓡꓳ= ꓢꓳ ꓗꓹ ꓓꓴ ꓬꓰ ꓡꓯ=
ꓕꓱ ꓕꓲ ꓤꓶ ꓟ ꓡꓲ-ꓢꓴ ꓤ ꓠꓱ ꓐꓴ ꓔꓯ ꓥ ꓟꓲ ꓒꓵꓽ ꓒ ꓐꓴ ꓕꓱ ꓡꓲꓽ ꓕꓱ ꓚꓱꓹ ꓵꓺ ꓟꓸ ꓖꓶꓽ ꓢꓲꓸ ꓣꓳ ꓚꓲꓸ ꓛꓬ ꓢꓷ_ ꓟ ꓐꓰ ꓕꓱ ꓝꓳ_ ꓟ ꓫ ꓪ ꓘꓶꓽ ꓥ ꓟꓲ ꓡꓯꓽ ꓫꓵ ꓟꓸ ꓖꓶ ꓗꓹ ꓓꓴ ꓬꓰ ꓡꓯ= ꓡꓲ-ꓢꓴ ꓐꓴ ꓔꓯ ꓜꓲ ꓡꓯ ꓘꓳ ꓗꓪ ꓕꓱ ꓗꓹ ꓓꓴ꓾ ꓟꓵꓽ ꓚꓳ ꓙꓰ ꓟ ꓗꓪ ꓕꓱ ꓗꓹ ꓓꓴ ꓙꓲ ꓖꓴ ꓒꓬꓱꓼ ꓡ ꓝꓲ= ꓕꓱ ꓟ ꓠꓬ ꓚꓲ ꓛꓬ ꓥꓳꓽ ꓐꓰ ꓡꓲꓽ ꓒꓰꓼ ꓔꓯ ꓫꓺ ꓒꓵꓽ ꓟ ꓕꓲ ꓚꓱꓹ ꓥ ꓡꓳ= (ꓧꓪ ꓜꓲꓼ ꓟ ꓗꓪ ꓬꓰ ꓙ ꓡ ꓢꓴ꓾ Ngwa Zet Ahkhi, Gualisar, Ah Phu Dwet ꓐꓴ ꓔꓯ ꓥ ꓟꓲ ꓮ ꓘꓶꓸ ꓫꓸ ꓟꓳ)
1. ꓳꓸ ꓫꓵꓽ ꓟ ꓠꓽ ꓙꓲꓺ ꓔꓲ ꓗꓪ (ꓗꓲꓸ ꓗꓳˍ ꓡꓰꓽ) ꓖꓽ ꓓꓳꓹ ꓟꓽ꓿2. ꓠꓴ ꓤ ꓟꓶꓼ ꓟ ꓔꓯ (ꓮ ꓭꓸ ꓩꓴ ꓡꓰ) ꓫꓳ ꓦꓹ ꓟꓽ꓿ 3. ꓠ ꓠꓬꓲꓽ ꓣꓳ ꓫꓴ ꓟ ꓠꓽ (ꓶꓹ ꓠꓶꓼ ꓜꓳꓼ ꓡꓰ ꓜꓳꓼ) ꓮ ꓡꓲ ꓔꓲꓸ ꓪꓽ ꓡꓯ ꓘꓳ ꓡ ꓥ ꓢꓶ꓿ 4. ꓬꓲꓸ ꓒꓴꓼ ꓠꓬ ꓟ ꓠꓽ (ꓥꓪꓸ ꓡꓽ ꓢꓸ_ ꓡꓰ) ꓒꓴ ꓫꓵˍ ꓟꓽ꓿5. ꓠꓴ ꓖꓶ (ꓐꓶꓼ ꓠꓷꓼ ꓡꓰ) ꓕꓽ ꓔꓸ ꓐꓳ꓿6ꓸ ꓤ ꓠꓱ ꓔꓶ (ꓚꓬꓹ ꓟꓰꓼ ꓜꓴ ꓡꓰ ) ꓕꓽ ꓢꓴ ꓥ꓿7ꓸ ꓚꓱꓻ ꓗꓹ ꓓꓴ ꓟ ꓠꓽ (ꓮꓽ ꓖꓶꓽˍꓡꓰ)ꓗ ꓡꓰ ꓐꓶꓺ꓿ (ꓮ ꓖꓶꓽ = ꓮ ꓖꓶ ꓟ ꓢ)8ꓸ ꓮ ꓠꓯꓺ ꓮ-ꓔꓲꓽ ꓕꓲ ꓣꓳ ꓟ ꓟꓴꓻ ꓗꓹ ꓓꓴ ꓟ ꓠꓽ (ꓢꓲꓹ ꓜꓲꓻ ꓖꓳˍ ꓡꓰ) ꓔˍ ꓟ=9ꓸ ꓢꓴ ꓟꓵꓽ ꓢꓴ ꓡꓳ ꓗꓪ ꓫꓹ ꓔ ꓟ ꓦꓲꓻ ꓠꓽ (ꓟꓲꓼ ꓪꓳꓼ ꓢꓯꓼ ꓡꓯꓼ )ꓟꓴ_ ꓟꓽ=10ꓸ ꓣꓳꓽꓠꓬˍ ꓟꓵꓽ ꓟ ꓠꓽ (ꓮꓽ ꓖꓻ ꓟꓶꓽ ꓙꓴꓸ ꓡꓰ) ꓗꓹ ꓟꓽ=11ꓸ ꓬꓲ ꓖꓳ ꓓꓱꓽ ꓟ ꓖꓶ ꓣꓳꓻ ꓗꓹ ꓓꓴ ꓟ ꓠꓽ (ꓡꓽ ꓔꓲꓼ ꓤꓹ ꓤꓼˍ ꓡꓰ )ꓔꓲꓸ ꓥꓳ꓿ (ꓡꓽ ꓔꓲꓸ ꓠꓬ ꓮ ꓘꓶꓸ ꓣꓳ_ ꓟ ꓠꓬꓹ ꓕꓲ ꓫꓵꓽ)12ꓸ ꓡꓳ ꓑꓻ ꓒꓽ/ ꓞꓳ ꓐꓳ ꓒꓽ ꓐꓯˍ ꓓꓴ ꓟ ꓖꓳ ꓫꓵꓽ ꓔꓯ ꓐꓯˍ ꓥꓳ ꓟꓽ (ꓒꓴꓻ ꓠꓽ ꓢꓲꓹ ꓛꓬꓽˍ ꓡꓰ ) ꓢꓲꓸˍꓟꓽ=13ꓸ ꓠꓴ ꓫ ꓪꓻ ꓟ ꓠꓽ ꓥˍꓳ (ꓔꓶ ꓡꓲꓸ ꓣꓳ ꓡ ꓠ ꓔꓸꓳ ꓫꓵꓽ) ꓙꓳꓸ ꓙꓳꓽ ꓥꓳ=14ꓸ ꓟꓶ-ꓡ-ꓫꓵ-ꓓꓰ ꓓ ꓖꓴꓽ ꓒꓰꓼ ꓟ ꓗꓪ ꓡꓸ ꓛꓲꓸ ꓙꓱꓻ ꓗꓹ ꓓꓴ ꓟ(ꓚꓻꓒꓶꓽˍꓡꓰ) ꓥꓳ ꓟꓽ꓿15ꓸ ꓬꓲꓸ ꓖꓶ ꓠꓰ ꓪꓽ ꓡ ꓡꓲꓸ ꓟꓽ ꓢꓷꓸ ꓠꓰ ꓠꓴ ꓙꓰ ꓢꓲ꓾(ꓮ ꓔꓲꓸꓞꓲꓼ) ꓤꓹ ꓠꓬꓲ ꓟꓴ ꓖꓯꓽ=16ꓸ ꓠꓴ ꓠꓬꓲ ꓤꓽ ꓟ ꓠꓽ (ꓡꓽ ꓐꓴ ꓘꓰꓸ ꓕꓲꓽ ꓘˍ ꓡꓰ) ꓢꓯꓼ ꓙꓳˍ ꓐꓭ ꓟ=17ꓸ ꓮ ꓟꓶ ꓕꓲꓽ ꓞꓲꓼ ꓗꓪ ꓩꓴꓸ ꓠꓽ (ꓗꓶꓽ ꓛꓲ ꓧꓶꓽˍ ꓡꓰ) ꓙꓳ ꓡˍꓳ ꓟ=18ꓸ ꓕꓲꓺ ꓑꓹ ꓔꓲꓸ ꓠꓬꓹ ꓓꓴ ꓟ (ꓟꓬ-ꓢꓶꓽ ꓕꓲꓽꓟꓰꓸꓼ) ꓗꓪ ꓟꓶꓽ ꓬꓰꓳ ꓙꓳꓽ ꓐꓳ꓿19ꓸ ꓞꓳ ꓪꓴꓽ ꓟ ꓫ ꓪꓻ ꓕꓱ ꓗꓴꓸ ꓗꓹ ꓓꓴ ꓟ ꓠꓽ (ꓐꓲꓼ ꓛꓬꓽ ꓮ ꓙꓬꓻ ꓟꓽ ꓠꓴꓽ)ꓔꓲꓸˍ ꓟ=20ꓸ ꓢꓴꓻ ꓟꓵꓽ ꓢꓴ ꓡꓳ ꓗꓪ ꓙ-ꓖꓴ ꓙꓱꓸ ꓗꓹ ꓓꓴ ꓟ ꓠꓽ (ꓛꓬꓹꓚꓶˍꓡꓰ) ꓙꓱꓸ ꓡꓲꓹ ꓔˍꓟ=21ꓸ ꓟꓶ-ꓡ-ꓫꓵ-ꓓꓰ ꓢꓴ ꓠꓽ ꓮ-ꓙꓯꓻ ꓢꓸ ꓗꓴꓸ ꓓꓴ ꓗꓹ ꓓꓴ ꓟ (ꓥꓪꓸ ꓡꓽˍꓡꓰ) ꓔꓸ_ ꓚꓰꓼ=22ꓸ ꓙꓬ ꓝꓲ ꓟ ꓔꓯ ꓬꓲꓹ ꓐꓵ ꓟꓽ ꓙꓳ ꓢꓴ ꓖꓳ ꓓꓱꓽ ꓠꓽ (ꓥꓰ ꓘꓴꓸ ꓡꓰ) ꓥꓳ ꓟꓽ꓿ ꓫꓸ ꓠꓬꓲ ꓤꓼ ꓠꓰ= 23ꓸ ꓖ-ꓟꓶ-ꓓꓰ ꓗꓪ ꓙꓬ ꓗꓹ ꓓꓴ ꓟ (ꓪꓴꓽ ꓔꓳꓻ ꓫꓲꓼ ꓫꓲꓼ) ꓔꓲꓸˍ ꓟ=24ꓸ ꓐꓳ ꓠꓽ ꓟꓽ ꓐꓳ ꓡ ꓖꓶ ꓟꓬꓱꓽ ꓠꓯꓸ ꓗꓹ ꓓꓴ ꓟ ꓠꓽ (ꓐꓶ-ꓶ) ꓡꓰ ꓥꓳ ꓟ꓿25ꓸ ꓒꓽ-ꓗꓸ ꓟꓵꓽ ꓗꓪ ꓟꓶ ꓞ ꓞꓻ ꓗꓹ ꓓꓴ ꓟ ꓠꓽ (ꓮꓸ-ꓒꓴꓽˍ ꓡꓰ) ꓔꓲꓸˍ ꓟ ꓗ ꓛꓳꓽ ꓒꓽ ꓕꓲꓽ ꓜꓴ ꓟꓻꓰ꓿26ꓸ ꓮꓻ ꓠꓺ ꓥꓪ ꓠꓴꓽ ꓮ-ꓘꓰ ꓤꓽ ꓘ ꓗꓹ ꓓꓴ ꓟ (ꓡꓽ-ꓢꓯꓹ) ꓡꓰˍꓟ=27ꓸ ꓛꓳꓽ ꓒꓯꓹ ꓐꓴ ꓔꓯ ꓖꓶ (ꓓꓲꓽ ꓙꓽ ꓙˍ) ꓗꓷ ꓬꓰꓳ ꓟ꓿28ꓸ ꓮꓻ ꓠꓯꓺ ꓤ ꓠꓱ ꓟ ꓠꓻ ꓗꓹ ꓓꓴ ꓟ ꓠꓽ ꓬꓲꓸꓖꓳ ꓓꓱꓽ ꓟ (ꓮꓸꓔꓳꓸꓕꓲꓽꓐꓲꓼˍꓡꓰ) ꓞꓻˍꓟ=29ꓸ ꓮꓽ ꓟꓲ ꓟꓶꓽ ꓘꓶꓼˍꓡꓯ ꓒꓯꓹ ꓝꓸ ꓐꓳꓸˍ ꓛ ꓛ ꓗꓼ ꓗꓹ ꓓꓴ ꓟ ꓠꓽ (ꓟꓵꓽ ꓒ ꓡ) ꓔꓲꓸˍ ꓟ꓿30ꓸ ꓖꓳꓻꓕꓲꓽ ꓠꓱꓻ ꓟ ꓢꓯꓼꓡꓯꓽꓘꓳˍ ꓗꓹ ꓓꓴ ꓟ (ꓮ-ꓔꓳꓸꓐꓰ ꓬꓲꓻ-ꓙꓬ) ꓡꓰ ꓥꓳ꓿31ꓸ ꓥꓻꓠꓴꓽ ꓘ ꓢꓴ ꓠꓽ꓾ꓟꓬꓱꓽ ꓑꓶꓸ ꓙꓳ_ ꓕ ꓾ꓪꓽ ꓗꓴꓸ ꓓꓴ ꓟ ꓠꓽ (ꓐꓳꓼ-ꓡꓳ ꓡꓰˍ) ꓟꓽ=32ꓸ ꓮꓸ-ꓓꓶꓸˍ ꓠꓴ꓾(ꓫꓵ ꓟ ꓖꓳˍ ꓐꓯ ꓠꓰ) ꓮ ꓫꓵꓽ ꓢꓯꓼ ꓖꓶ ꓟꓽ ꓙꓳ ꓬꓰ ꓪ ꓡꓰ ꓔꓸ ꓡꓲꓸ=33ꓸ ꓮꓸ ꓫꓵ ꓬꓰ ꓖꓶ ꓜꓶꓸ ꓜꓶꓸ ꓔꓳꓼ꓾ ꓒꓲ ꓒꓲˍ ꓬꓰ꓾(ꓠꓻ ꓫꓵ ꓠ ꓐꓲˍ ꓡꓰ) ꓕ ꓬꓰ ꓥ꓿34ꓸ ꓮꓸ-ꓠ꓾ꓠꓴ ꓖꓶ ꓘꓪꓽ ꓠꓬꓽ ꓜꓲꓻ ꓓꓴ ꓟ ꓠꓲ (ꓔꓹ-ꓞꓰꓽ ꓐꓳˍ ꓡꓰ) ꓗꓷ ꓬꓰ ꓔꓳꓼ ꓬꓰꓳ ꓟ꓿35ꓸ ꓮ-ꓛꓻ ꓫ ꓪꓻ ꓕꓱ ꓗꓹ ꓓꓴ ꓟ (ꓳꓽ ꓫꓻꓑꓶꓼˍ ꓡꓰ) ꓔꓸ_ ꓟꓽ=36ꓸ ꓗꓸ ꓡꓸ ꓟꓵꓽ ꓗꓪ ꓚꓳꓸ ꓟꓸ ꓒꓽ ꓮ-ꓐꓲ-ꓬ ꓠꓽ꓾ꓧꓪꓽꓒꓴ ꓥꓳꓽ ꓟ (ꓬꓲ ꓫꓬˍꓡꓰ) ꓕꓱꓻꓗꓴ ꓔˍ ꓟ=37ꓸ ꓮ-ꓓꓴꓸ ꓜꓻꓔꓶ ꓕꓶꓸ ꓗꓹ ꓓꓴ ꓟ ꓠꓽ (ꓬꓯꓼ ꓕꓳꓹ ꓙꓼ ꓡꓰ/ ꓮ ꓭꓸ ꓜꓻ ꓕꓳꓹ ꓔꓸ ꓪ ꓡꓰ) ꓡꓰ ꓔꓲꓸ ꓔꓸ ꓟ= 38ꓸ ꓕꓲꓻꓼ ꓝꓲꓸ ꓟ ꓠꓽ ꓟꓶꓽ-ꓡꓽ ꓡꓳ ꓙꓼ ꓓꓲ ꓗꓪ ꓡꓸ ꓛꓲꓸ ꓥꓸ ꓢꓴ (ꓙꓬ ꓐꓶˍ ꓡꓰ ) ꓥꓳ ꓟ꓿39ꓸ ꓠꓴ ꓐꓯ ꓞꓲꓽ ꓟ ꓖꓶ (ꓮꓸ ꓡꓴꓽ ꓓꓳ_ ꓡꓰ) ꓠꓯ ꓓꓶꓼ ꓧꓶꓸ ꓬꓰ ꓐꓶ ꓖꓯꓽ=40ꓸ ꓤꓼ ꓠꓱ ꓕꓲ ꓜꓴ ꓟ ꓔꓯ (ꓙꓼ ꓙꓼ) ꓟꓽ ꓟꓸ ꓐꓯ ꓠꓽ ꓠꓲꓹ ꓟꓽ ꓲꓼˍꓟ꓿41ꓸ ꓮꓸ-ꓛ ꓠꓽ ꓬꓲ ꓛꓱꓽ ꓟ ꓐꓲˍꓖꓶ ꓬꓲ ꓫꓷꓹ ꓟ ꓠꓽ (ꓮꓸ ꓟꓳꓽ ꓕꓲꓽ ꓚꓰꓹ) ꓔꓲꓸˍꓟꓽ꓿42ꓸ ꓮ ꓫꓵꓽ ꓡꓰꓸ ꓬꓰ ꓖꓴ ꓟꓽ ꓓ ꓮ ꓘꓶꓸ ꓙꓳ_ ꓓꓴ ꓟ ꓔꓯ (ꓲꓸ ꓑꓽ ꓫꓵꓽ) ꓐꓯ ꓚꓰꓼ=43ꓸ ꓬꓽ ꓗꓹ ꓟꓻ ꓦꓲ-ꓘꓴꓽ ꓗꓪ ꓙꓳꓸ ꓙꓳꓽ (ꓮ ꓪꓯꓼ ꓡꓰ) ꓗꓻ ꓬꓳꓹ ꓠꓴꓻ=44ꓸ ꓮ-ꓒꓴ ꓖꓶ꓾ꓟꓳꓻꓓꓳ ꓢꓯ-ꓗꓯꓻ ꓟ ꓔꓯꓸ (ꓶꓹꓠꓶꓼꓜꓳꓼˍꓡꓰ) ꓗ ꓬꓰꓳ ꓟꓽ= ꓛꓲ ꓒꓯꓹ ꓟ ꓠꓰ ꓕꓲ ꓕꓳꓼ ꓡꓰꓸ ꓕꓳꓼ ꓓꓴ ꓥꓳ ꓐꓯꓸ ꓟꓽ ꓚꓰꓼ=45ꓸ ꓞꓳ ꓟꓳꓽ ꓟ ꓟꓯꓼ ꓖꓳ ꓕꓲꓽꓜꓴꓻ ꓟ ꓜꓲꓻꓡꓯꓽꓘꓳ ꓡꓰ ꓕꓽ(ꓠꓬꓹ-ꓗꓳꓽ-ꓧ) ꓜꓴꓻˍꓡꓰ ꓪ ꓢꓯ ꓚꓳꓹ ꓚꓰꓼꓮꓼ=46ꓸ ꓐꓲꓼ ꓡꓯꓼ ꓪꓵꓼ ꓫꓴꓹ ꓟ꓾ꓥꓪꓸ ꓙꓴꓺ ꓟ꓾ ꓟꓶꓽ ꓞꓶꓸ ꓚꓶꓺ ꓟ ꓪꓽ ꓗꓹ ꓓꓴ ꓟ(ꓡꓯꓼ ꓥꓰ ꓡꓯꓼ ꓟ ꓡꓶꓼ ꓠꓰ/ ꓡ-ꓛꓶ ꓠꓬꓲꓽ ꓕꓱꓻ) ꓢꓳ_ ꓟꓽ= 47ꓸ ꓞꓳ ꓟꓳꓽ ꓟꓽ ꓠꓬꓹ ꓕꓽ ꓤ ꓠꓱ ꓕꓲꓽꓜꓴ ꓟ꓾(ꓐꓶ ꓼ ꓙꓶꓼ ꓐꓶꓼ ꓙꓸ) ꓢꓴꓻ ꓠꓬ ꓐꓶ=48ꓸ ꓙꓲꓻ ꓙꓲꓻ ꓟꓽ ꓢꓪꓼ ꓬꓰ ꓗꓹꓕꓽ ꓠꓽ ꓠꓴꓻ ꓒꓴ ꓮ ꓠꓬ ꓙꓳˍꓡꓲꓸ (ꓗ ꓐꓲꓼ ꓗꓴ ꓗꓪ ꓮꓸ ꓙꓬ ꓕꓰꓽ ꓟ ꓡꓰ) ꓞꓳꓸꓬꓰ ꓡ ꓥ=49ꓸ ꓮ ꓤ ꓬꓰ ꓟꓽ= ꓥꓪ ꓧꓪ ꓞꓶ ꓡꓰ ꓞꓶ ꓠ ꓔꓸ ꓟ= 50ꓸ ꓬꓲꓸ ꓠꓽ ꓕꓳ ꓶ ꓟ ꓔꓯ ꓠꓽ (ꓜꓻ ꓜꓽ ꓡꓰ ꓜꓽ) ꓔꓲꓸ ꓛꓳ ꓖꓰꓼ ꓟ=