(59) ꓡ ꓟꓽ ꓗ = ꓮ ꓫꓵꓽ ꓟꓽ ꓚ ꓔꓬ ꓟ/ uncare/ carefree
ꓮ ꓠꓯ ꓬꓲꓸ ꓒ ꓬꓲꓸ ꓟ ꓠꓽ ꓜꓻ ꓓꓶꓽ ꓜꓻ ꓫ ꓠꓰ ꓟꓽ ꓖꓰꓼ ꓫꓵ_ ꓟ ꓗꓪ ꓮ-ꓓꓴꓸ ꓠꓽ ꓡ ꓟꓶ ꓗ ꓡꓰ ꓠꓬꓹ ꓢꓲꓸ ꓐꓲ ꓬ ꓠꓬꓹꓮ ꓙꓳꓽ ꓐꓳ=
(60) ꓡꓲ ꓪ ꓚ = ꓢꓴ ꓓꓳꓽ ꓢꓴ ꓘꓽ ꓚ ꓚꓳ ꓟ/ gossip
ꓮ ꓠꓯ! ꓲꓸ ꓛꓱꓽ ꓟ ꓠꓽ ꓐꓲ ꓫꓵ_ ꓖꓶ ꓬꓲꓸ ꓫꓶꓹ ꓟ ꓬꓼ ꓠꓬꓽ ꓜꓲ_ ꓙꓳꓽ ꓐꓳ ꓠꓴ ꓪ ꓜꓴ_ ꓡꓰ= ꓯ! ꓠꓴ ꓖꓶ ꓢꓴ ꓡꓲ ꓪ ꓚ ꓓꓴ ꓟ ꓠꓽ ꓩꓴ ꓐꓳ= ꓟꓽ ꓥ ꓟꓼ ꓢꓴ ꓓꓳꓽ ꓢꓴ ꓘꓽ ꓡꓲ ꓪ ꓚ ꓗꓹ ꓕꓽ ꓢꓲꓸ ꓕꓲ ꓠꓬꓲ ꓖꓶ ꓕꓲ ꓑꓹ ꓤꓼ ꓡꓰ ꓠꓬꓹ ꓓ_ ꓟꓼ=
(61) ꓟꓽ ꓟꓳ ꓕꓯꓹ = ꓙꓲ ꓙꓲ ꓔꓲꓺ ꓢꓲꓽ ꓢꓲꓽ ꓟꓽ ꓟꓳꓻ/-not clear/ blur
ꓣꓳ ꓠꓽ 60 ꓘꓳꓼ ꓛꓲ ꓡ ꓕꓽ ꓟꓽ ꓟꓳꓻ ꓕꓯꓹ ꓡ ꓓꓴ ꓟ꓾ ꓮꓸ ꓬꓽ ꓠꓽ 90 ꓘꓳꓼ ꓙꓳ ꓡꓹꓳ ꓫꓵꓽ ꓖꓯ꓾ ꓪꓳꓼ ꓠ ꓗ ꓢꓶ ꓗꓪ ꓛꓲ ꓬꓲꓸ ꓠꓬ ꓢꓶꓽ ꓟ ꓙꓲ_ ꓟꓽ=
ꓯ! ꓠꓴ ꓪ ꓖꓶ ꓮ ꓬꓽ ꓐꓴ ꓠꓽ ꓜꓽ ꓫꓵꓽ ꓡꓲꓸ ꓙꓲ꓾ ꓩꓴꓸ ꓡꓲꓸ ꓟꓽ ꓛꓳꓽ ꓥꓳ ꓢꓯꓸ= ꓮ ꓟꓶ ꓕꓲ ꓤꓶ ꓠꓽ ꓪꓴꓽ ꓪꓴꓽ ꓣꓳ ꓣꓳ ꓕꓲ ꓠꓬꓲ ꓕꓲ ꓠꓬꓲ ꓔꓹ ꓫꓵ ꓛꓳꓽ꓾ ꓩꓴꓸ ꓗꓪ ꓡꓳ ꓖꓪ ꓓꓴ ꓟ ꓠꓰ ꓠꓬ ꓢꓶꓽ ꓟꓽ ꓟꓳꓻ ꓕꓯꓹ ꓡ ꓠꓯꓸ=
(62) ꓞꓰꓹ ꓥꓳ ꓞꓰꓹ ꓥꓳ = ꓮ ꓡ ꓮ ꓡ ꓢꓯꓼ ꓟ ꓞꓰꓹ ꓬꓰ ꓟ/ ꓫꓸ ꓙꓵ ꓔꓬ ꓟ/ close to death
ꓡꓳ-ꓟꓲ ꓟꓵꓽ ꓗꓪ ꓫꓸ ꓢꓴ ꓮ ꓟꓬꓹ ꓠꓽ ꓕꓱ ꓕꓲ ꓝꓲꓸ ꓟ ꓠꓽ ꓬꓲꓸ ꓪꓴꓻ ꓟ ꓧꓳꓹ ꓟꓽ ꓛꓲ꓾ ꓞꓰꓹ ꓥꓳ ꓞꓰꓹ ꓥꓳ ꓔꓸꓳ ꓟꓽ=
ꓢꓯꓼ ꓙꓳ ꓟ ꓕꓲ ꓝꓲꓸ ꓢꓴ ꓔꓯ ꓠꓲꓹ ꓖꓳꓼ ꓢꓴ ꓠꓽ ꓫꓵꓻ ꓘꓶꓽ ꓗꓪ ꓠꓲꓹ ꓟ ꓠꓻ ꓠꓰ꓾ ꓫꓵ ꓟꓽ ꓓ ꓠꓬꓲ ꓞꓰꓹ ꓥꓳ ꓞꓰꓹ ꓥꓳ ꓗ ꓡ ꓚꓰꓼ ꓥ ꓙꓳꓽ=
(63) ꓛꓽ ꓡꓽ ꓦꓲ = ꓪꓹ ꓚꓴ꓾ ꓓꓰꓽ ꓙꓰ꓾ ꓟ ꓘꓪꓽ ꓛꓬꓽ ꓡꓰ ꓪꓵ ꓔꓸ ꓟ ꓦꓲ/ bamboo leaves roof
ꓮ ꓠꓲꓹ ꓫꓲ ꓠꓲꓹ ꓑꓲ-ꓠꓳ-ꓜꓳꓼ ꓟꓵꓽ ꓗꓪ ꓠꓽ ꓛꓽ ꓡꓽ ꓦꓲ ꓙꓳꓸ ꓙꓳ ꓫꓹ ꓗꓹ ꓔꓸ ꓥꓳ ꓓꓯꓽ=
ꓣꓳ ꓟꓵꓽ ꓗꓪ ꓠꓽ ꓛꓽ ꓡ ꓦꓲ꓾ ꓫꓵꓸ ꓦꓲ꓾ ꓠ ꓖꓳ ꓛꓬꓽ ꓦꓲ꓾ ꓢꓲꓽ ꓡꓯ ꓘꓳ ꓦꓲ꓾ ꓢꓲꓹ ꓒꓲꓽ ꓦꓲ ꓔꓶ ꓟꓽ ꓟꓳꓻ ꓪ ꓓꓻ ꓬꓰꓳ ꓟꓽ= ꓮ ꓟꓶ ꓠꓽ ꓡꓯꓹ ꓒꓲꓽ ꓦꓲ ꓙꓳꓸ ꓙꓳ ꓫꓹ ꓔꓯꓺ ꓡꓻꓳ ꓟꓽ=
ꓧꓶꓸ ꓕꓯ ꓠꓟ-ꓢꓲꓽ-ꓐꓳ ꓘꓹ ꓖꓳ ꓑꓳꓸ ꓠꓟ-ꓕꓲ ꓙ ꓬꓰ ꓟ ꓗꓪ ꓫꓹ ꓦꓹ ꓓꓴ ꓟ ꓢꓲꓽ-ꓡꓯ-ꓘꓳ ꓓꓸ ꓦꓲ ꓟ ꓠꓽ ꓟꓬꓱ ꓓꓳꓽ ꓙꓳ_ ꓥꓳ ꓓꓯꓽ=
ꓮ ꓟꓶ ꓠꓽ ꓟꓬꓱꓽ ꓬꓰ ꓦ ꓟꓲ ꓦꓲ ꓙꓱ ꓡꓲꓸ ꓡꓯꓹ ꓒꓲꓽ ꓪꓴꓻ ꓡ ꓓꓴ ꓟ=
(64) ꓔꓳꓹ ꓦꓲ = ꓭꓸ ꓡꓳ ꓓꓲ ꓕꓯ ꓢꓲ ꓗꓪ ꓜꓲ ꓘꓴ ꓔꓳꓹ ꓢꓲꓸ ꓫꓬꓹ ꓔꓸ ꓟ ꓦꓲ/ built a house pillar or pole on stone
ꓔꓳꓹ ꓦꓲ ꓔꓯ ꓮ ꓘꓶꓸ ꓠꓵ_ ꓔꓯꓺ ꓟ ꓦꓬꓼ ꓠꓬꓲ ꓖꓶ ꓙꓳ ꓚꓰꓼ= ꓮ ꓟꓶ ꓠꓽ ꓠꓰ ꓭꓸ ꓦꓲ ꓠꓬꓽ ꓠꓰ ꓫꓹ ꓤꓼ ꓡꓻꓳ ꓟꓽ=
(64) ꓢꓲꓹ ꓫꓰꓼ ꓡꓰꓼ = ꓮ ꓔꓳꓸ ꓛꓴ ꓐꓴ ꓐꓱ ꓶ ꓢꓲꓹ ꓡꓯꓼ ꓗꓸ ꓤꓹ ꓤꓼ/ small branches to be used for firewood
ꓕꓲ ꓡꓲ ꓟꓴ ꓞꓴꓽ ꓒꓳꓹ ꓡ ꓕꓽ ꓘꓶꓽ ꓢꓲꓹ ꓧꓪ ꓟꓽ ꓖꓰꓼ ꓢꓴ ꓟꓶ ꓛꓲ ꓟ ꓐꓴ ꓠꓽ ꓢꓲꓹ ꓫꓰꓼ ꓡꓰꓼ ꓙꓳꓸ ꓙꓳꓽ ꓧꓪ ꓜꓲꓼ ꓤꓼ ꓥꓳ ꓓꓯꓽ=
ꓮ ꓟꓶ ꓠꓽ ꓜ ꓚꓸ ꓡꓲꓸ ꓮ ꓔꓳꓸ ꓙꓼ ꓗꓪ ꓙꓳꓸ ꓙꓳꓽ ꓚꓸ ꓖꓰ ꓠꓰ꓾ ꓢꓲꓹ ꓫꓰꓼ ꓡꓰꓼ ꓧꓪ ꓢꓴ ꓡꓲꓸ ꓟꓽ ꓙꓳ ꓬꓰꓳ ꓡꓯꓸꓽ=
(65) ꓢꓲꓹ ꓡꓯꓼ ꓟꓶꓸ ꓕꓱ = ꓮ ꓔꓳꓸ ꓓꓳꓼ ꓛꓴ ꓔꓸ ꓟ ꓢꓲꓹ ꓚꓳꓸ ꓕꓱ/ firewood set on fire
ꓠꓴ ꓬ ꓟꓴ ꓟꓽ= ꓳꓸ ꓟ ꓠꓲꓹ ꓢꓲꓼ ꓡ ꓕꓽ ꓠꓽ ꓢꓲꓹ ꓡꓯꓼ ꓟꓶꓸ ꓕꓱ ꓟ ꓠꓰ ꓡꓳꓺ ꓡꓹꓳ ꓫꓵꓽꓺ ꓚꓰꓼꓼ=
ꓦꓯꓹ ꓓꓳꓽ ꓗꓽ ꓬꓰꓳ ꓢꓯꓸ ꓡꓼ ꓟ ꓟ ꓠꓰ ꓚꓳꓹ ꓚꓳꓹ ꓠꓰ ꓟꓽ ꓓ ꓢꓲꓸ ꓢꓲꓹ ꓡꓯꓼ ꓟꓶꓸ ꓕꓱ ꓡꓳ ꓠꓰ꓾ ꓛꓬ ꓐꓶ ꓠꓰ ꓕꓲ ꓢ ꓘꓪ ꓬꓲꓸ ꓟꓶ ꓟꓽ ꓙ ꓬꓰꓳ ꓟꓽ=
(66) ꓢꓲꓹ ꓟꓶꓸ ꓓꓴꓽ ꓡꓰ = ꓫꓸ ꓪ ꓟꓽ ꓕꓱ꓾ ꓮ ꓫꓵꓽ ꓟꓽ ꓡꓯꓽ ꓔꓯꓽ ꓔꓯꓽ ꓔꓬ ꓟ like a dead tree
ꓳꓸ ꓟ ꓠꓽ ꓬꓲꓸ ꓙꓲ ꓙꓳ ꓬꓰ ꓥꓳ ꓐꓯ ꓠꓽ ꓢꓲꓸ ꓟꓶꓸ ꓓꓴꓽ_ ꓡꓰ ꓠꓬꓹ ꓗꓴꓸ ꓔꓸꓳ ꓫꓵꓽꓮ ꓟꓽ=
(67) ꓮ ꓖ ꓟꓶꓼ ꓙꓴꓸ = ꓶꓽ ꓤ ꓗꓪ ꓟ ꓮ ꓖ ꓟꓲ/ ꓡꓲ ꓛꓲ ꓟꓵꓽ ꓗꓪ ꓟ ꓮ ꓖ ꓟꓲ = slash and burn farm away from home/ deep forest
ꓮ ꓠꓯ꓾ ꓠꓴ ꓪ ꓮ ꓖ ꓟꓲ ꓟ ꓖꓶ ꓮ ꓖ ꓟꓶꓼ ꓙꓴꓸ ꓶꓽ ꓥꓳꓽ ꓶꓽ ꓚꓱꓹ ꓟꓽ ꓜꓯꓼ ꓔꓲꓸ ꓥꓳ ꓟꓽ=
ꓮ ꓟꓶ ꓠꓽ ꓦꓯꓹ ꓢꓰꓼ ꓥꓪꓸ ꓢꓰꓼ ꓠꓬꓹ ꓢꓰꓼ ꓗꓹ ꓥꓳ ꓐꓯ ꓖꓶ ꓮ ꓖ ꓟꓶꓼ ꓙꓴꓸ ꓗꓪ ꓟꓽ ꓥ ꓐꓯ ꓠꓽ ꓪ ꓟꓽ ꓓ_ ꓟꓽ= ꓞꓳ ꓘꓹ ꓒ ꓕꓲ ꓒ ꓠꓶꓽ ꓗꓪ ꓠꓽ ꓲꓸ ꓛꓴ ꓞꓰꓹ ꓗꓪ ꓛꓲ ꓢꓰꓼ ꓖꓽ ꓬꓰ ꓥꓳ ꓐꓴ ꓢꓯꓸ=
(68) ꓪꓰꓸ ꓢꓲꓹ ꓗꓶꓸ = ꓜ ꓕꓱꓹ ꓢꓲꓹ ꓛꓬꓽ jade plate (leave to wrap food or used as fod container
ꓟꓵꓽ ꓚꓳ ꓙꓰ ꓕꓽ ꓮ ꓗꓪ ꓛꓲ ꓖꓶ ꓪꓰꓸ ꓢꓲꓹ ꓗꓶꓸ ꓗꓪ ꓜꓻ ꓗꓶ ꓢꓲꓸ ꓜꓻ ꓠ ꓔꓸ ꓥ= ꓳꓸ ꓟ ꓠꓽ ꓮ ꓘꓶꓸ ꓗꓹ ꓛꓲ ꓠꓲꓹ ꓢ ꓓꓴ ꓙꓳ ꓥ= ꓢꓲꓹ ꓗꓶꓸ ꓞꓲꓽ ꓟꓽ ꓛꓲ ꓓꓴ ꓟ ꓠꓯꓸ=
(69) ꓠꓳꓸ ꓙꓴꓽ = ꓬꓲꓸ ꓐꓶꓽ ꓬꓲꓸ ꓚꓶꓸ ꓗꓪ ꓕꓯꓼ ꓧꓽ ꓓꓴ ꓶ ꓤ/ ꓢꓴ ꓧꓹ ꓡꓯ ꓘꓳ ꓡ ꓠꓹ ꓟ ꓢꓯꓼ ꓖꓶ ꓢꓴ/ wedge/divider
ꓠꓴ ꓠꓽ ꓠꓳꓸ ꓙꓴꓽ ꓕꓯꓼ ꓒꓽ ꓕꓽ ꓬꓰ ꓥ= ꓫꓵꓽ ꓪꓴ ꓓꓳ ꓡ ꓠ ꓜꓳ ꓜꓳ ꓧꓪ꓾ ꓮ ꓔꓳꓸ ꓝꓲꓺ꓾ ꓠꓳꓸ ꓙꓴꓽ ꓕꓯꓼ ꓓꓴ ꓟ ꓠꓽ ꓩꓴ=
ꓧꓪ ꓜꓲꓼ ꓙ ꓢꓴ ꓐꓴ꓾ Ahphu Dwet, Gualisar, Ngwa Zet Ahkhi