ꓢꓲ-ꓣꓲ-ꓡ-ꓖ ꓗꓴꓷꓼ ꓙꓵꓽ ꓜꓴ ꓟꓬꓱꓽ ꓠꓽ ꓬꓰ ꓖꓴꓳ

ꓢꓲ-ꓣꓲ-ꓡꓲ-ꓖ ꓗꓴꓷꓼ ꓗꓪ ꓑ ꓫꓬ ꓐꓴ ꓢꓴ ꓔꓴ ꓔꓬ ꓟ ꓟꓬꓽ ꓠꓬꓲ ꓪꓴꓽ ꓡ ꓠꓬꓲ꓾ ꓗꓴꓷꓼ ꓙꓵꓽ ꓜꓴ ꓢꓽ ꓡ ꓙꓵꓽ Gotabaya Rajapaksa ꓐꓰ꓾ ꓬꓲꓸ ꓮ ꓬꓲꓼ ꓟꓬꓱꓽ ꓢꓲꓽ ꓒꓽ Mahinda Rajapaksa ꓐꓴ ꓠꓬꓲ ꓫꓵꓸ ꓟꓽ ꓥ ꓠꓬ꓾ ꓠꓱꓸ ꓐꓯꓼ ꓗꓴꓷꓼ ꓙꓵꓽ ꓜꓴ ꓗꓪ ꓟ ꓟꓬꓱꓽ ꓢꓲꓽ ꓒꓽ 26 ꓣꓳ ꓮ ꓙꓵꓽ ꓟꓬꓱꓽ ꓠꓽ ꓬꓰꓳ꓿

ꓗꓴꓷꓼ ꓗꓪ ꓜꓽ ꓓꓴ ꓓꓳ ꓓꓴ ꓐꓰ ꓙ ꓞꓶ ꓫꓸ ꓓꓰꓼ ꓡ ꓬꓰ ꓔꓬ ꓠꓬꓲ ꓑ ꓫꓬ ꓐꓴ ꓠꓲꓹ ꓢꓲꓼ ꓢꓴꓺ ꓔꓴ ꓡ ꓟ ꓥ ꓡꓳ꓿

ꓖꓳ ꓡꓱ ꓢꓲꓸ 4 ꓦ 1 ꓠꓬꓲ ꓕꓯꓽ ꓗꓴꓷꓼ ꓙꓵꓽ ꓜꓴ ꓒ ꓕꓲ ꓗꓪ ꓟꓳ ꓓꓳ ꓮ ꓔꓳꓸ ꓛꓴ ꓠꓰ ꓬꓰ ꓗꓷꓳ꓿ ꓖꓳ ꓟ ꓑꓶꓸ ꓓꓴ 4 ꓦ 2 ꓠꓬꓲ ( ꓠꓽ ꓛꓳꓼ ꓠꓬꓲ) ꓟꓶ ꓘꓶꓼ 6 ꓙꓵꓹ ꓗꓪ ꓐꓰ ꓖꓳ ꓑꓳꓸ 36 ꓙꓵꓹ ꓦꓲ ꓪ ꓐꓰ ꓓꓳ ꓚꓳ ꓟꓽ ꓓ ꓟ ꓕꓵꓼ ꓪ ꓓꓳ ꓩꓴ ꓔꓸ ꓡꓳ꓿

ꓖꓳ ꓡꓱ ꓥ ꓟꓲ ꓗꓴꓷꓼ ꓙꓵꓽ ꓜꓴ ꓠꓬ ꓑ ꓫꓬ ꓐꓴ ꓐꓱ ꓶ ꓫꓸ ꓓꓴ ꓕꓱ ꓡꓱꓳ ꓫꓵꓽ ꓔꓯ ꓒꓶꓻ ꓫꓬꓽ ꓟꓽ ꓐ ꓡ ꓠꓬꓲ ꓢꓴ ꓔꓴ ꓓꓴ ꓪꓽ ꓠꓬꓲ ꓡ ꓔꓬ ꓡꓳ꓿

“ꓙꓵꓽ ꓪ ꓙꓳꓸ ꓙꓳꓽ ꓠꓰ ꓗꓴꓷꓼ ꓫꓵꓽ ꓪꓴ ꓒꓶꓻ ꓫꓬꓽ ꓟꓽ ꓓ꓿ ꓑ ꓫꓬ ꓐꓴ ꓠ ꓠꓹ ꓡ ꓓꓴ ꓟꓽ ꓥꓻꓳ ꓐꓯ ꓓꓴ ꓟ ꓗꓴꓷꓼ ꓙꓵꓽ ꓜꓴ ꓧꓳꓽ ꓢꓴ Rajapaksa ꓢꓷꓸ ꓠ ꓔꓸꓳ” ꓐꓰ ꓢꓙꓐ ꓑ-ꓔꓲ ꓗꓪ ꓟ Harsh de Silva ꓡꓰ ꓐꓯˍ ꓡꓳ꓿

ꓢꓲ-ꓣꓲ-ꓡꓲ-ꓖ ꓗꓴꓷꓼ ꓠꓬ 1948 ꓘꓳꓼ ꓐ-ꓣꓲ-ꓔꓲ-ꓫꓼ ꓡꓯ ꓒꓯꓹ ꓗꓪ ꓐꓰ ꓗꓴꓷꓼ ꓡꓲꓸ ꓟꓶ ꓕ ꓑꓳꓸ ꓶ ꓡꓯꓼ ꓚꓱꓹ ꓗꓪ ꓫꓸ ꓡꓳꓹ ꓬꓰˍ ꓟ ꓦꓬꓼ ꓠꓬꓲ ꓗꓳꓸ ꓪ ꓔꓬ ꓡꓳ꓿