ꓬꓥ-ꓖꓳꓥ ꓟꓵꓽ ꓗꓪ ꓢꓱꓽ ꓡꓱ ꓕꓲꓽ ꓢꓶꓽ ꓠꓬ 7,000 ꓒꓯꓼ ꓪꓴꓽ ꓔꓬ ꓠꓬꓲ꓾ ꓧꓶꓸ ꓕꓯꓽ ꓣꓳ ꓟꓵꓽ ꓣꓳ ꓡꓳ ꓑꓴ-ꓔ-ꓳ ꓗꓪ ꓜꓽ ꓠꓬꓲ ꓗꓷ ꓟ ꓢꓱꓽ ꓡꓱꓽ ꓢꓳꓺ ꓢꓯꓼ ꓔꓯ ꓢꓲꓼ ꓙꓬ ꓗꓹ ꓓꓴ ꓐꓯ ꓢꓲꓸ ꓪꓴꓻ ꓜꓽ ꓠ ꓗꓷ ꓡꓰꓳ꓿
ꓢꓱꓽ ꓡꓱ ꓕꓱ ꓟ ꓠꓬ ꓧꓶꓽ ꓒꓽ ꓟꓵꓽ ꓗꓪ ꓐꓰ ꓔꓱꓽ ꓩꓴ ꓡˍ ꓟ ꓥ ꓡꓳ꓿
ꓡꓲ-ꓢꓴ ꓔꓬ ꓟꓵꓽ ꓑꓴ-ꓔ-ꓳ ꓗꓪ ꓠꓬ ꓟꓲ-ꓫꓲ-ꓠ-ꓬꓲ ꓟꓳꓽ ꓟꓸ ꓒ ꓕꓲ ꓦꓲ ꓡꓰ ꓢꓲꓹ ꓢꓶ ꓡꓳ ꓢꓶ ꓮ ꓟꓬꓹ ꓔꓶ ꓜꓽ ꓔꓶ ꓓꓳ ꓚꓱꓹ ꓟꓸ ꓖꓶ ꓢꓲ꓾ ꓐꓶꓽ ꓗꓴꓷꓼ ꓗꓪ ꓐꓰ ꓔꓯꓹ ꓓꓵꓽ ꓡ ꓟ ꓢꓲꓽ ꓛꓲ꓾ ꓢꓱꓽ ꓡꓱ꓾ ꓞꓳ ꓠꓻ ꓧꓪꓽ ꓗꓳ꓾ ꓟꓳꓽ ꓪꓹ꓾ ꓪ-ꓫꓲ-ꓔ꓾ ꓡꓲꓺ ꓝꓲ꓾ ꓕꓱ ꓡꓱꓳ ꓫꓵꓽ ꓮ ꓟꓬꓹ ꓔꓶ ꓜꓽ ꓔꓶ ꓓꓳ ꓠꓬꓲˍ ꓡꓳ꓿
ꓖꓳ ꓡꓱ ꓥ ꓟꓲ 2000 ꓘꓳꓼ ꓕ ꓑꓳꓸ ꓠꓬ “ꓢꓲꓽ ꓛꓲꓸ ꓜꓽ ꓠꓬ꓾ ꓟꓳꓽ ꓪꓹ ꓜꓽ ꓠꓬ ꓛꓱ ꓧꓶꓺ ꓛꓱ ꓡ ꓥ” ꓐꓯ ꓚꓳ ꓢꓲ꓾ ꓓꓵꓽ ꓙ ꓚꓱꓹ ꓧꓶꓸ ꓡꓰ ꓟ ꓑꓶꓸ ꓓꓴ ꓮ ꓙꓵꓽ ꓘꓶꓹ ꓐꓱꓽ ꓩꓴꓳ꓿
ꓚꓵ ꓚꓵ ꓕꓱ ꓡꓱꓳ ꓫꓵꓽ ꓢꓲꓹ ꓢꓶ ꓡꓳ ꓢꓶ ꓠꓬ ꓞꓳ ꓤ ꓧꓪꓽ ꓖꓳ ꓓꓱ ꓢꓯꓼ ꓔꓬ ꓢ ꓙꓳ ꓢ ꓚꓱꓹ ꓐꓱ ꓶ ꓮ ꓘꓶꓸ ꓙꓲ ꓖꓴ ꓙꓳˍ ꓟ ꓥ ꓡꓳ꓾ ꓐꓰ ꓠꓯ ꓞꓲꓼ ꓟꓸ ꓒ ꓐꓴ ꓡꓰ ꓐꓯ ꓖꓶ ꓡ ꓟ ꓢꓷꓸ ꓡ ꓕꓯꓽ꓾ ꓢꓴ ꓟꓵꓽ ꓢꓴ ꓡꓳ ꓗꓪ ꓐꓰ ꓓꓳ ꓡ ꓟ ꓢꓲꓹ ꓢꓶꓽ ꓡꓳ ꓢꓶ ꓔꓯ ꓟꓶ ꓠꓯꓸ ꓟꓶ ꓠꓯꓸ ꓪꓴꓻ ꓜꓽ ꓔꓬ ꓠ ꓗꓷ ꓡꓰꓳ꓿
ꓟꓶ-ꓡ-ꓫꓵ-ꓓꓰ ꓘꓹ ꓗꓪ ꓞꓽ ꓒꓳꓽ ꓢꓶ ꓜꓽ ꓟꓽ ꓖꓰꓼ ꓠꓰ ꓮ ꓪꓯꓼ ꓜꓻ ꓚꓸ꓾ ꓢꓲꓽ ꓛꓲꓸ ꓕꓲꓽ ꓢꓶ ꓕꓲ ꓪꓴ ꓮ ꓡꓲ ꓟ ꓜꓽ ꓟꓽ ꓧꓪꓸ ꓠꓰ ꓮꓸ ꓠꓬꓲꓽ ꓜꓻ ꓚꓸ ꓗꓷ ꓟ ꓦꓬꓼ ꓠꓬꓲ ꓠꓬ ꓙꓳ ꓗꓷꓳ꓿
ꓣꓳ ꓠꓬ ꓬꓲꓸ ꓒꓵꓽ ꓟꓽ ꓢꓷꓸ ꓠꓬꓲ ꓙꓳˍ ꓟ ꓢꓲꓹ ꓢꓶꓽ ꓜꓲ ꓮ ꓙꓵꓽ ꓘꓶꓹ ꓩꓴ ꓢꓲ꓾ ꓢꓴ ꓡꓰ ꓪꓴꓽ ꓖꓶ ꓡ ꓟ ꓔꓯ ꓟꓶ ꓠꓯꓸ ꓟꓶ ꓟꓯꓸ ꓪꓴꓻ ꓜꓽ ꓔꓬ ꓠ ꓗꓷ ꓡꓰꓳ꓿
“ꓟꓽ ꓢꓷꓸ ꓢꓴ ꓟꓽ ꓫꓵꓻ ꓕꓲꓽ ꓡꓰꓹ꓾ ꓢꓴ ꓘꓶꓽ ꓠꓻ ꓠꓹ ꓢꓴ ꓚꓳ ꓑꓸ” ꓟꓶ ꓤ ꓟꓽ ꓗꓷ ꓡꓰ ꓠꓹ ꓟ ꓧꓪꓸ ꓛꓲꓽ ꓢꓲ꓾ ꓣꓳ ꓘꓹ ꓣꓳ ꓟꓵꓽ ꓗꓪ ꓢꓲꓹ ꓢꓶ ꓡꓳ ꓢꓶ ꓔꓯ ꓫꓺ ꓒꓵꓽ ꓫꓬꓹ ꓦꓵ ꓔꓶ ꓜꓽ ꓔꓶ ꓓꓳ ꓙꓰ ꓡꓯ꓿
“ꓬꓰ ꓜꓽ ꓢꓴ ꓠꓬ ꓚꓳ ꓪꓴꓸ꓾ ꓪꓴꓻ ꓜꓽ ꓢꓴ ꓠꓬ ꓚꓳ ꓑ.” ꓐꓯˍ ꓟ ꓡꓲ-ꓢꓴ ꓒꓵꓽ ꓒ ꓥꓳ ꓙꓱ ꓔꓯ ꓟꓲ ꓕꓽ ꓟꓲ ꓡꓰ ꓡꓯ꓿
ꓣꓳ ꓘꓹ ꓣꓳ ꓟꓵꓽ ꓗꓪ ꓔꓶ ꓜ ꓔꓶ ꓓꓳ ꓢꓲ꓾ ꓐꓳ ꓢꓴ꓾ ꓢꓷꓸ ꓢꓴ꓾ ꓖꓳ ꓓꓱꓽ ꓔꓬ ꓢ ꓢꓴ꓾ ꓚꓳ ꓪꓸ ꓙꓵꓽ ꓪ ꓟꓶ ꓢꓴ ꓡꓰ ꓐꓰ ꓢꓯꓸ ꓔꓬ ꓓꓴ ꓬꓰ ꓡꓯ ꓐꓰ꓾ ꓡꓔ ꓗꓪ ꓐꓰ ꓢꓯꓼ ꓖꓶ ꓩꓴ ꓡ ꓥꓳ꓿
[ꓰꓓꓲꓔꓳꓣꓲꓮꓡ ꓮꓣꓔꓲꓚꓡꓰ]