ꓡꓳꓲ-ꓗꓳ ꓑꓓꓝ 1 ꓘꓳꓼ ꓐꓲ ꓡꓰ ꓟ ꓚꓲꓸ ꓟꓶ ꓓꓴ ꓐꓯ ꓢꓲ꓾ ꓑꓓꓝ ꓟꓯꓼ ꓬꓰ ꓔꓬ ꓢꓴ ꓐꓴ ꓔꓯ ꓚꓲꓸ ꓛꓬ ꓘꓹ꓾ ꓚꓲ ꓛꓬ ꓦꓲ ꓘꓴꓽ ꓗꓪ ꓐꓹ ꓐ ꓟꓹ ꓟ ꓐꓰ꓾ ꓕꓲꓽ ꓠꓱ ꓕꓲ ꓫꓵꓽ ꓐꓴ ꓔꓯ ꓜꓲ ꓡꓯ ꓘꓳ ꓝꓲˍ ꓟ ꓟꓬꓱꓽ ꓑꓶꓸ ꓕꓲꓽ ꓟ ꓬꓰ ꓓꓳ ꓡꓰꓳ꓾ ꓐꓰ ꓡꓳꓲ-ꓗꓳ ꓑꓓꓝ ꓡꓰ ꓠꓬꓲꓸ ꓠꓬꓲ 2022 ꓘꓳꓼ 7 ꓦ 5 ꓠꓬꓲ ꓗꓪ ꓢꓷ ꓙ ꓟꓴ ꓙ ꓩꓴ ꓡ ꓡꓳ꓿
ꓑꓓꓝ ꓟꓯꓼ ꓕꓲ ꓣꓳ ꓔꓯ ꓜꓻ ꓒꓴ 1 ꓟꓳ ꓠꓳ꓾ ꓗ-ꓟꓯꓹ 1 ꓗ-ꓓꓳꓸ꓾ ꓧꓪꓽ ꓞꓶ 1 ꓐꓳ ꓖꓶꓽ ꓢꓲꓸ ꓕꓲ ꓦꓲ ꓡ ꓞꓳ ꓐꓴ ꓔꓯ ꓡꓯꓼ ꓫꓴ ꓖꓶꓽ ꓬꓰ ꓝꓲ꓾ ꓜꓲ ꓡꓯ ꓘꓳ ꓬꓰ ꓝꓲ ꓟ ꓥ ꓡꓳ꓾ ꓐꓯ ꓡꓳ꓿
ꓟꓽ ꓜꓲ ꓟꓽ ꓟꓳꓻ ꓡꓯ ꓘꓳ ꓟ 1 ꓘꓳꓼ ꓙꓳ ꓡꓰ ꓠꓬꓲ꓾ ꓐꓹ ꓐ ꓟꓹ ꓟ ꓐꓴ ꓠꓬ ꓬꓲꓸ ꓪ ꓠꓲꓹ ꓠꓵˍ ꓟ ꓤꓽ ꓐꓴ ꓔꓯ ꓮ ꓘꓶꓸ ꓢꓲꓼ ꓙꓬ ꓠꓲꓹ ꓥꓳꓺ ꓔꓬ ꓟ ꓥ ꓡꓳ꓿
ꓕꓲ ꓐꓱ ꓡꓽ ꓛꓲ ꓟꓽ ꓓ ꓢꓴ ꓐꓴ ꓠꓬ꓾ ꓳ-ꓡꓮꓲꓹ ꓗꓪ ꓐꓰ ꓕꓲ ꓦꓲ ꓡ ꓞꓳ ꓐꓴ ꓔꓯ ꓫꓸ ꓕꓱ ꓡꓯ ꓘꓳ ꓝꓲˍ ꓡꓳ꓾ ꓐꓰ ꓐꓯ ꓔꓸ ꓡꓳ꓿
ꓑꓓꓝ ꓐꓴ ꓠꓽ ꓢꓷꓸ ꓠꓲꓹ ꓢꓷꓸ ꓢꓴ ꓞꓳ ꓡꓯꓸ ꓐꓴ ꓙꓳꓸ ꓙꓳꓽ ꓥ ꓡꓳ꓿ ꓬꓲꓸ ꓪ ꓠꓬ ꓟꓬ-ꓟ ꓗꓴꓷꓼ ꓗꓪ ꓟꓯꓼ ꓠꓰ ꓑ ꓫꓬꓽ ꓙꓵꓽ ꓪ ꓦꓴ ꓙꓰˍ ꓟ ꓔꓯ ꓜꓲꓽ ꓟꓽ ꓘꓴ ꓠꓰ ꓢꓯꓼ ꓟ ꓑꓺ ꓢꓲꓸ ꓓꓶꓽ ꓔꓳꓹ ꓡꓯ ꓘꓳ ꓔꓬ ꓟ ꓥ ꓡꓳ꓿
ꓡꓳꓲ-ꓗꓳ ꓑꓓꓝ ꓠꓬ 5 ꓦ 18 ꓠꓬꓲ ꓕꓯꓽ 1 ꓘꓳꓼ ꓐꓲ ꓡꓰˍ ꓟ ꓥ ꓡꓳ꓿
ꓧꓶꓽ ꓗꓴꓷꓼ ꓐꓶ ꓗꓴꓷꓼ ꓔꓯ ꓟꓳꓸ ꓝꓲ ꓓꓴ ꓪ-ꓬꓲꓼ ꓡꓰꓽ ꓟꓬ-ꓟ ꓟꓯꓼ ꓐꓰ ꓬꓲꓸ ꓜꓴ ꓬꓲ ꓒꓳ ꓮ ꓙꓵꓽ ꓠꓲꓹ ꓞ ꓜꓲ ꓡꓯ ꓘꓳ ꓢꓲꓸ ꓑ ꓫꓬ ꓙꓵꓽ ꓪ ꓑ ꓫꓬ ꓔꓯ ꓡꓲꓸ ꓖꓶ ꓚꓱꓹ ꓖꓪ ꓙꓱ ꓡꓯ ꓘꓳ ꓓꓴ ꓬꓰ꓾ ꓐꓰ ꓐꓯ ꓔꓬ ꓡꓳ꓿