2026 ꓘꓳꓼ 1 ꓦ 15 ꓠꓬꓲ ꓕꓯꓽ꓾ ꓟꓶ-ꓡ-ꓫ ꓗꓪ ꓡꓣꓚ ꓡꓰ ꓧꓳꓽ ꓣꓱꓽ ꓢꓲꓸ 109 ꓧꓪꓹ ꓟ ꓡꓲ-ꓢꓴ ꓫꓵꓽ ꓦꓬꓼ ꓠꓬꓲ ꓑꓮꓲ ꓬꓰˍ ꓡꓳ꓿
ꓑꓮꓲ ꓠꓬ ꓡꓲ-ꓢꓴ ꓕꓳ ꓶ ꓝꓳꓹ ꓫꓬꓹ ꓚꓰꓼ ꓓꓳ ꓡꓰ ꓟ ꓔꓯ ꓬꓲꓸ ꓚꓰꓺ ꓣꓴ ꓔꓸ ꓢꓲ꓾ ꓞꓲꓼ ꓤ ꓡꓯꓹ ꓤ ꓐꓱ ꓶ ꓓꓵꓽ ꓙ ꓩꓴ ꓡ ꓟ ꓑꓮꓲ ꓕꓲꓽ ꓟ ꓥ ꓡꓳ ꓐꓯˍ ꓡꓳ꓿
“ꓞꓳ ꓫꓵꓽ ꓙꓳ ꓠꓬ ꓫꓵꓽ ꓦꓬꓼ ꓠꓬꓲ ꓥ ꓟꓲ ꓙꓳ ꓠ ꓔꓸ ꓥꓳ꓿ ꓫꓵꓽ ꓦꓬꓼ ꓠꓬꓲ ꓠꓬ ꓢꓴ ꓔꓯ ꓔꓳꓹ ꓓꓴ ꓐꓯˍ ꓟ ꓟꓽ ꓥ꓾ ꓗꓸ ꓠꓯꓸ ꓢꓲ ꓡꓽ ꓙꓰ ꓡꓯ ꓐꓯˍ ꓟˍ ꓟꓲ ꓟꓽ ꓥ꓿ ꓗꓴꓷꓼ ꓟꓬꓱꓽ ꓟꓽ ꓥ꓿ ꓣꓳ ꓤ ꓠꓱ꓾ ꓣꓳ ꓞꓲꓼ ꓤ ꓡꓯꓹ ꓤ ꓔꓯ ꓡꓲ-ꓢꓴ ꓡꓲꓽ ꓡꓲ-ꓢꓴ ꓫꓱꓹ꓾ ꓡꓲ-ꓢꓴ ꓠꓲꓹ ꓟ꓾ꓡꓲ-ꓢꓴ ꓙ ꓖꓴ ꓟꓳꓸ ꓖꓶ ꓡꓯꓼ ꓙꓱ ꓓꓴ ꓐꓱ ꓶ ꓥ ꓡꓳ (ꓬꓲꓸ ꓘꓶꓽ ꓒꓴ ꓘꓶꓽ ꓕꓱˍ ꓟ ꓗꓪ ꓐꓰ ꓐꓯ ꓠꓲꓹ ꓫꓵ ꓟ ꓟꓸ ꓟꓲꓽ ꓖꓳꓻ ꓐꓳ ꓔꓸ ꓡꓳ)” ꓐꓰ ꓐꓰ ꓡꓣꓚ ꓢꓽ ꓡ ꓙꓵꓽ Dr ꓔꓳꓥ ꓬꓳ-ꓢꓷ ꓡꓰ ꓐꓯ ꓡꓳ꓿
ꓡꓲ-ꓢꓴ ꓕꓳ ꓶ ꓝꓳꓹ ꓕꓱ ꓟ ꓠꓬ ꓟꓵ ꓗꓳ ꓓꓵ ꓓꓵ ꓗꓪ ꓔꓬ ꓟ ꓡꓲ-ꓢꓴ ꓮ ꓙꓵꓽ ꓔꓺ ꓡꓯ ꓘꓳ ꓙꓲˍ ꓟ꓾ ꓕꓲ ꓧꓶꓹ ꓕꓲ ꓚ ꓒꓬꓱꓼ ꓡ ꓝꓲˍ ꓟ ꓐꓰ꓾ ꓣꓳ ꓙꓳ ꓣꓳ ꓡꓲꓽ ꓒꓰꓼ ꓔꓯ ꓟꓳꓸ ꓖꓶ ꓔꓬ ꓟ꓾ ꓣꓳ ꓢꓷꓸ ꓠꓲꓹ ꓟꓬ ꓢꓶ ꓒꓴ ꓡ ꓟ ꓔꓯ ꓟꓳꓸ ꓖꓶ ꓔꓬ ꓡꓳ꓿ ꓡꓲ-ꓢꓴ ꓘꓵꓽ ꓗꓪ ꓕꓱ ꓟ ꓕꓯ ꓢꓲ ꓪꓴꓽˍ ꓟ ꓠꓱꓸ ꓐꓯꓼ ꓕꓲ ꓫꓵꓽ ꓫꓵꓽ ꓟꓽ ꓡꓳꓸ ꓓꓳ ꓡ ꓠꓬꓲ꓾ ꓕꓱ ꓟ ꓔꓯ ꓬꓲꓸ ꓚꓰꓺ ꓣꓴ ꓢꓲꓸ ꓡꓲ-ꓢꓴ ꓫꓵꓽ ꓦꓬꓼ ꓠꓬꓲ ꓑꓮꓲ ꓬꓰ ꓩꓴ ꓡ ꓟ ꓥ ꓡꓳ꓿ 2017 ꓘꓳꓼ ꓗꓪ ꓠꓬ ꓡꓲ-ꓢꓴ ꓕꓳ ꓶ ꓚꓰꓼ ꓓꓳ ꓡꓰ ꓟ 100 ꓘꓳꓼ ꓐꓲ ꓡꓰꓳ ꓐꓯ ꓢꓲꓸ ꓚꓲꓸ ꓟꓶ ꓓꓴ ꓑꓮꓲ ꓬꓰ ꓗꓷ ꓟ ꓔꓯ ꓝꓸ ꓩꓴ ꓡ ꓢꓲꓸ ꓮ ꓟꓶ ꓠꓬ 109 ꓘꓳꓼ ꓥ ꓡꓳ꓾ ꓐꓰ ꓢꓪꓼ ꓩꓴ ꓡ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ꓿
“ꓟꓲꓸ ꓟꓲ ꓡꓲ-ꓢꓴ ꓐꓱ ꓶ ꓟꓽ ꓬꓰ ꓟꓽ ꓓ ꓟ ꓟꓬꓱꓽ ꓓꓽ ꓟ ꓕꓲ ꓟ ꓬꓰ ꓪ ꓠꓬꓲ ꓮ ꓘꓶꓸ ꓠꓲꓹ ꓘꓪ ꓫꓵ ꓬꓰꓳ꓿ ꓮ ꓙꓵꓽ ꓢꓴ ꓐꓱ ꓶ ꓥ ꓟꓲ ꓓꓵꓽ ꓙ ꓠꓬꓲ ꓓꓴ ꓕꓲ ꓟ ꓒꓬꓱꓼ ꓬꓰꓳ ꓐꓰ ꓙꓵꓻ ꓡꓳ꓿” ꓐꓰ ꓮ-ꓒꓴ ꓕꓲ-ꓟꓳ-ꓕꓲ-ꓪꓴ-ꓙꓬ ꓡꓰ ꓐꓯ ꓡꓳ꓿
ꓑꓮꓲ ꓗꓪ ꓡꓲ-ꓢꓴ ꓟꓴ ꓖꓪ ꓖꓪ ꓟ꓾ ꓟꓸ ꓟꓲꓽ ꓠ ꓠꓹ ꓢꓲꓸ ꓪꓽ ꓘꓴ ꓟ꓾ ꓚꓺ ꓟꓲꓽ ꓢꓳˍ ꓟ ꓐꓰ ꓢꓯꓼ ꓖꓶ ꓡꓯ ꓘꓳ ꓟ꓾ ꓜꓽ ꓓꓴ ꓑꓯꓹ ꓜꓽ ꓟ ꓬꓰˍ ꓡꓳ꓿ ꓑꓮꓲ ꓗꓪ ꓜꓲꓼ ꓛꓲ ꓡ ꓢꓴ ꓮ ꓡꓻ 200 ꓣꓳ ꓛꓲ ꓙꓳˍ ꓡꓳ꓿