ꓡꓲ-ꓢꓴ ꓕꓳ ꓶ ꓐꓰ ꓗꓴ. ꓙꓲꓽ ꓙꓳꓻ ꓢꓲ. ꓓꓱꓽ ꓢꓯꓼ ꓖꓶˍ ꓟ

#1. ꓡꓲ-ꓢꓴ ꓕꓳ: ꓶ ꓮ ꓟꓬ ꓙꓰꓽ ꓙꓳˍ ꓡꓺꓽꓧꓪ ꓠꓬꓲ ꓟꓰꓹ ꓠꓬꓲ ꓔ ꓟ ꓔꓯ ꓛꓳ ꓢꓲ ꓐꓯ ꓠꓬ꓾ ꓡꓲ˗ꓢꓴ ꓕꓳ ꓶ ꓮ ꓙꓵꓽ (7) ꓙꓰꓽ ꓙꓳˍ ꓡꓳ꓿(1) ꓑꓳ-ꓡ ꓝꓳꓹ (Pollard script)(2) ꓩꓴ-ꓫꓲꓥ-ꓢꓰꓥ ꓝꓳꓹ (Fraser script)(3) ꓧꓶꓽ ꓒꓽ ꓝꓳꓹ ꓔꓯꓸ ꓬꓲ ꓚꓰ ꓣꓴ ꓔ ꓟ ꓝꓳꓹ (Chinese character-based script)(4) ꓧꓶꓽ ꓒꓽ ꓒꓲꓥ-ꓬꓲꓥ ꓔꓯ ꓬꓲ ꓚꓰ ꓣꓴ ꓔ ꓟ ꓝꓳꓹ (Chinese pinyin-based script)(5) ꓩꓴ-ꓫꓲꓥ-ꓢꓰꓥ ꓝꓳꓹ ꓔꓯ ꓫꓬꓹ ꓜꓯ ꓔ ꓟ ꓝꓳꓹ (Modified Fraser script)(6) ꓕꓮꓲ ꓕꓳ ꓶ ꓝꓳꓹ ꓔꓯ ꓬꓲ ꓚꓰ ꓣꓴ ꓔ ꓟ ꓝꓳꓹ (Thai Alphabet based script)(7) ꓟꓴ-ꓖꓴ ꓡꓳ ꓒꓬꓱ ꓗꓪ ꓫꓬꓹ ꓔ ꓟ ꓡꓳ-ꓟꓲ ꓕꓳ ꓶ ꓝꓳꓹ ꓔꓯ ꓬꓲ ꓚꓰ ꓣꓴ ꓔ ꓟ ꓝꓳꓹ (Burmese alphabet based script developed in Mogok Township) ꓐꓴ ꓥ ꓡꓳ꓿ ꓡꓲ-ꓢꓴ ꓕꓳ ꓶ ꓝꓳꓹ (6) ꓙꓱꓽ ꓔꓯ ꓪꓳꓼ ꓑꓳ ꓗꓪ ꓟ ꓐꓬꓱꓽ ꓗꓪ ꓡꓳ ꓟꓳ ꓓ ꓡꓳ꓿

Bradley ꓡꓰ 2003 ꓘꓳꓼ ꓕꓳ ꓶ ꓒꓳꓹ 4 ꓗꓪ꓾ ꓑꓳ-ꓡ ꓝꓳꓹ ꓠꓬ ꓠꓯꓼ ꓓꓰ ꓡꓰˍ ꓟ ꓡꓲ˗ꓢꓴ ꓕꓳ ꓶ ꓝꓳꓹ ꓥ ꓡꓳ ꓐꓰ ꓐꓳ ꓔ ꓡꓳ꓿ ꓕꓳ ꓶ ꓝꓳꓹ ꓕꓱ ꓟ ꓠꓬ꓾ ꓧꓶꓽ ꓗꓴꓷ꓾ ꓬꓴ-ꓠ ꓟꓵꓽ ꓖꓴ ꓪꓴꓸ ꓔꓱ ꓦꓲ ꓐꓰ ꓢꓲ˗ꓛꓪꓥ ꓟꓵꓽ ꓖꓴ ꓟꓶꓸ ꓬꓲ ꓑꓶꓸ ꓗꓪ ꓔꓬˍ ꓟ ꓡꓲ-ꓒꓳ ꓥ ꓠꓬ ꓐꓶ-ꓓꓳ-ꓡꓲ-ꓢꓴ ꓐꓴ ꓔꓯ ꓫꓬꓹ ꓚꓰꓼ ꓔ ꓖꓶˍ ꓟ ꓝꓳꓹ ꓥ ꓡꓳ꓿ ꓝꓳꓹ ꓕꓱ ꓟ ꓠꓬ ꓢ-ꓟꓴ-ꓬꓰ ꓑꓳ-ꓡ ꓡꓰ 1904 ꓘꓳꓼ ꓕꓯ ꓖꓪꓰ-ꓜꓳ ꓗꓪ ꓔꓬ ꓟ “ꓟꓲꓽ˗ꓮꓳ” ꓞꓳ ꓫꓵ ꓔꓯ ꓚꓰꓼ ꓔ ꓖꓶˍ ꓟ ꓝꓳꓹ ꓔꓯ ꓡꓯ ꓫꓵ ꓫꓬꓹ ꓚꓰꓼ ꓔ ꓟ ꓥ ꓡꓳ꓿ꓡꓲ-ꓢꓴ ꓕꓳ ꓶ ꓝꓳꓹ (2) ꓫꓵꓽ ꓕꓲꓽ ꓫꓵꓽ ꓔꓯ ꓠꓬ꓾ ꓬꓲꓥ-ꓗꓴꓷ ꓶ ꓓꓳ ꓫꓱ ꓓꓳ ꓟ ꓒꓽ ꓩꓴ-ꓫꓲꓥ-ꓢꓰꓥ꓾ ꓗ˗ꓬꓲꓥ ꓶ ꓓꓳ ꓫꓱꓹ ꓓꓳ ꓟ ꓒ ꓐ-ꓔꓳ꓾ ꓐꓰ ꓟꓰ-ꓗꓴꓷ ꓶ ꓓꓳ ꓫꓱꓹ ꓓꓳ ꓟ ꓒ ꓙꓬꓳ-ꓙꓰ-ꓖꓯ-ꓢꓶ ꓐꓴ ꓡꓰ 1910 ꓘꓳꓼ ꓖ ꓡꓯ ꓖ ꓙꓲ ꓗꓪ ꓫꓬꓹ ꓔ ꓟ ꓥ ꓡꓳ꓿ ꓣꓳ-ꓟ ꓝꓳꓹ ꓔꓯ ꓔꓱꓹ ꓔꓱꓹ꓾ ꓡꓯꓼ ꓟꓰꓹ ꓫꓵ꓾ ꓪꓴ ꓔꓲ ꓪꓴ ꓑ ꓐꓳ ꓢꓲ ꓫꓬꓹ ꓚꓰꓼ ꓔ ꓟ ꓥ ꓡꓳ꓿ ꓑꓸ ꓝꓳꓹ ꓟ ꓝꓳꓹ ꓙꓳ ꓢꓲ꓾ ꓢꓯꓼ ꓔꓳꓹ ꓓꓴˍ ꓟꓲ ꓙꓳˍ ꓡꓳ꓿ꓡꓲ-ꓢꓴ ꓕꓳ ꓶ ꓝꓳꓹ (3) ꓫꓵꓽ ꓕꓲ ꓫꓵꓽ ꓔꓯ ꓠꓬ꓾ ꓧꓶꓽ ꓗꓴꓷ꓾ ꓕꓰꓥ-ꓛꓳꓥ ꓟꓵꓽ꓾ ꓪꓰ-ꓫꓲ ꓗꓪ 1925 ꓘꓳꓼ ꓕꓯ ꓪ-ꓣꓰ-ꓐꓳ ꓐꓯ ꓟ ꓡꓲ˗ꓢꓴ ꓢꓲꓽ ꓒ ꓕꓲ ꓣꓳ ꓡꓰ ꓧꓳꓽ ꓫꓬꓹ ꓔ ꓟ ꓥ ꓡꓳ꓿ ꓕꓳ ꓶ ꓝꓳꓹ ꓕꓱ ꓟ ꓠꓬ ꓧꓶꓽ ꓒꓽ ꓝꓳꓹ ꓒꓬꓱꓽ ꓔꓯ ꓫꓱꓸ ꓡꓳ꓿ꓡꓲ-ꓢꓴ ꓕꓳ ꓶ ꓝꓳꓹ (4) ꓫꓵꓽ ꓕꓲ ꓫꓵꓽ ꓔꓯ ꓠꓬ꓾ ꓧꓶꓽ ꓒ ꓐꓰ ꓣꓹ-ꓫꓬ ꓥꓳꓽ ꓢꓷꓸ ꓠꓲꓹ ꓙꓳ ꓒ ꓐꓴ ꓡꓰ ꓫꓬꓹ ꓟ ꓥ ꓡꓳ꓿ ꓕꓳ ꓶ ꓝꓳꓹ ꓕꓱ ꓟ ꓔꓯ ꓠꓬ꓾ ꓣꓳ-ꓟ ꓕꓳ ꓶ ꓐꓰ ꓢꓮꓲ-ꓣꓲ-ꓡꓲ ꓕꓳ ꓶ ꓝꓳꓹ ꓔꓯ ꓬꓲ ꓚꓰ ꓣꓴ ꓢꓲ ꓫꓬꓹ ꓔ ꓟ ꓥ ꓡꓳ꓿ ꓣꓹ-ꓫꓬ ꓥꓳꓽ ꓢꓷꓸ ꓠꓲꓹ ꓙꓳ ꓒꓽ ꓐꓴ ꓬꓲꓼ ꓙꓰ ꓗꓷ ꓗ ꓠꓯ꓾ ꓝꓳꓹ ꓕꓱ ꓟ ꓔꓯ ꓧꓶꓽ ꓒ ꓒꓲꓥ-ꓬꓲꓥ ꓡꓰ ꓑꓺ ꓐꓳ ꓗꓷ ꓡꓳ꓿ ꓢꓯꓼ ꓔꓯ ꓠꓬ 1234 ꓔꓯ ꓝꓳꓹ ꓣꓳ ꓣꓳ ꓡꓰ꓾ ꓕꓳ ꓶ ꓝꓳꓹ ꓕꓯ ꓢꓲ ꓗꓪ ꓐꓳ ꓧꓳꓽ ꓢꓲ꓾ ꓝꓳꓹ ꓢꓯꓼ ꓔꓳꓹ ꓡꓳ꓿ ꓕꓳ ꓶ ꓝꓳꓹ ꓕꓱ ꓟ ꓔꓯ ꓡꓳ-ꓪꓴ ꓡꓲ-ꓢꓴ ꓕꓳ ꓶ ꓝꓳꓹ ꓐꓰˍ ꓟꓲ ꓐꓯˍ ꓡꓳ꓿ꓡꓲ˗ꓢꓴ ꓕꓳ ꓶ ꓝꓳꓹ (5) ꓫꓵꓽ ꓕꓲ ꓫꓵꓽ ꓠꓬ ꓟ ꓒꓽ ꓟꓳꓼ˗ꓓ˗ꓪꓵ ꓐꓰ ꓔꓳ-ꓕꓲ-ꓧꓯ ꓐꓴ ꓡꓰ 2000 ꓘꓳꓼ ꓔꓯ ꓫꓬꓹ ꓔ ꓟ ꓥ ꓡꓳ꓿ ꓝꓳꓹ ꓕꓱ ꓟ ꓠꓬ ꓩꓴ-ꓫꓲꓥ˗ꓢꓰꓥ ꓕꓳ ꓶ ꓝꓳꓹ ꓔꓯ ꓡꓯꓼ ꓟꓰꓹ ꓫꓵꓺ꓾ ꓪꓴ ꓔꓲ ꓪꓴ ꓑ ꓟꓽ ꓬꓰ ꓬꓰ꓾ ꓔꓱ ꓔꓱˍ ꓡꓰ ꓐꓳ ꓙꓲ ꓠ ꓫꓬꓹ ꓚꓰꓼ ꓔ ꓠꓬꓲ꓾ ꓮ ꓡꓲ ꓫꓵ ꓮ ꓙꓬꓼ ꓗꓪ ꓥˍ ꓟꓲ ꓕꓳꓹ ꓙꓲˍ ꓟ ꓥꓳ꓿ꓡꓲ-ꓢꓴ ꓕꓳ ꓶ (6) ꓫꓵꓽ ꓕꓲ ꓫꓵꓽ ꓔꓯ ꓠꓬ 1980 ꓘꓳꓼ ꓖ ꓡꓯ ꓖ ꓙꓲꓻ ꓕꓯ ꓟꓴ˗ꓖꓴ ꓟꓵꓽ ꓗꓪ ꓩꓴꓹ ꓦ ꓡꓱꓻ ꓢꓴ ꓡꓲ-ꓢꓴ ꓧꓳꓽ ꓪꓴ ꓟꓴ ꓢꓴ ꓐꓴ ꓡꓰ ꓡꓳ-ꓟꓲ ꓕꓳ ꓶ ꓝꓳꓹ ꓔꓯ ꓬꓲ ꓚꓰ ꓣꓴ ꓔ ꓢꓲ ꓫꓬꓹ ꓚꓰꓼ ꓔ ꓟ ꓥ ꓡꓳ꓿ꓡꓲ-ꓢꓴ ꓕꓳ ꓶ (7) ꓫꓵꓽ ꓕꓲ ꓫꓵꓽ ꓔꓯ ꓠꓬ ꓕꓮꓲ ꓕꓳ ꓶ ꓝꓳꓹ ꓔꓯ ꓬꓲ ꓚꓰ ꓣꓴ ꓔ ꓢꓲ ꓫꓬꓹ ꓚꓰꓼ ꓔ ꓟ ꓥ ꓡꓳ꓿ 1970 ꓘꓳꓼ ꓖ ꓡꓯ ꓖ ꓙꓲ ꓕꓯ ꓕꓮꓲ ꓕꓳ ꓶ ꓝꓳꓹ ꓔꓯ ꓬꓲ ꓚꓰ ꓣꓴ ꓔ ꓢꓲ ꓡꓲ˗ꓢꓴ ꓕꓳ ꓶ ꓔꓯ ꓫꓬꓹ ꓚꓰꓼ ꓠˍ ꓟ ꓙꓽ ꓖꓶ ꓗꓷ ꓥˍ ꓟꓲ꓾ ꓣꓱꓽ ꓬꓰ ꓟ ꓧꓪ ꓡꓰ (Bradley 2006: xxxviii) ꓿#2. ꓡꓲ‐ꓢꓴ ꓕꓳ ꓶ ꓔꓯ. ꓪ ꓜꓲ ꓣꓱꓽ ꓪ ꓡꓰ ꓠˍ ꓟ ꓢꓯꓼ ꓖꓶꓽ ꓘꓶꓽꓮ ꓟꓶ ꓣꓳꓽ ꓣꓱꓽ ꓔꓬ, ꓟ ꓕꓳ ꓶ ꓕꓱ ꓟ ꓔꓯ. ꓠꓬ꓾ ꓟꓵꓽ ꓗꓳ ꓓꓵ ꓓꓵ ꓗꓪ ꓘꓳ ꓣꓴ ꓔ. ꓟ ꓡꓲ‐ꓢꓴ ꓕꓳ ꓶ ꓥ ꓡꓳ꓿ ꓠꓬꓲ. ꓠꓬꓲ ꓟ ꓦꓬꓼ ꓠꓬꓲ ꓗꓪ ꓗꓳꓥ ꓑꓬꓴ ꓔ (computer) ꓬꓲ. ꓫꓵꓼ ꓕꓲ ꓟ ꓪꓴꓻ ꓗꓷ ꓟꓶꓽ ꓕꓯꓽ꓾ ꓮ ꓠꓱ ꓟ ꓦꓬꓼ ꓠꓬꓲ ꓡꓰꓐꓰ ꓡꓲ‐ꓢꓴ ꓕꓳ ꓶ ꓩꓳꓥ.; (font) ꓔꓯ. ꓬꓲ. ꓔꓱ ꓬꓲ. ꓗꓶꓺ ꓔꓬ, ꓟꓽ ꓛꓵꓺꓳ꓿ ꓕꓲꓽ ꓧꓪ, ꓐꓰ ꓣꓳꓽ ꓪꓴ ꓔ. ꓟ ꓗꓳꓥ ꓑꓬꓴ ꓔ (computer) ꓠꓯ.ꓼ ꓗꓪ ꓣꓳꓽ ꓡꓲ‐ꓢꓴ ꓩꓳꓥ.; (font) ꓓꓯ, ꓟ ꓥ ꓡꓳ꓿ ꓖꓳ ꓡꓱ ꓥˍ ꓟꓲ꓾ ꓣꓳꓽ ꓡꓲ‐ꓢꓴ ꓐꓴ ꓥ ꓕ ꓑꓳ. ꓠꓬ꓾ ꓗꓳꓥ‐ꓑꓬꓴ‐ꓔ (computer) ꓣꓱꓽ ꓢꓴ ꓟꓽ ꓥ꓿ꓠꓬꓲ. ꓠꓬꓲ ꓟ ꓦꓬꓼ ꓠꓬꓲ ꓗꓪ꓾ ꓞꓳ ꓤ ꓐꓴ ꓟꓬꓽ ꓐꓱꓻ ꓠꓬ ꓫ. ꓕꓱ ꓓꓴ (phone) ꓔꓯ. ꓟꓬꓽ ꓟꓬꓽ ꓣꓱꓽ ꓡ ꓔꓬ ꓡꓳ꓿ ꓮ ꓡꓲ ꓕꓲ ꓟꓵꓽ ꓗꓪ ꓥˍ ꓟꓲ꓾ ꓫ. ꓕꓱ ꓓꓴ (phone) ꓕꓱ ꓟ ꓔꓯ. ꓮꓽ ꓘꓶ. ꓣꓱꓽ ꓡ ꓔꓬ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓡꓲ‐ꓢꓴ ꓐꓴ ꓠꓬ ꓣꓳꓽ ꓚꓲ. ꓛꓬ ꓞꓳ ꓫꓵꓽ ꓐꓴ ꓐꓰ ꓙ ꓡꓯꓼ ꓘꓳˍ ꓕꓯ꓾ ꓡꓲ‐ꓢꓴ ꓕꓳ ꓶ ꓗꓪ ꓐꓰ ꓗ. ꓘꓪꓽ ꓘꓪꓽ ꓡꓰ ꓙ ꓡꓯ ꓘꓳ ꓙꓲˍ ꓟ ꓦꓬꓼ ꓠꓬꓲ ꓥ ꓡꓳ꓿ ꓖꓳ ꓡꓱ ꓥˍ ꓟꓲ꓾ ꓫ. ꓕꓱ ꓓꓴ (phone) ꓥ ꓕ ꓑꓳꓸꓼ ꓗꓪ ꓡꓲ‐ꓢꓴ ꓕꓳ ꓶ ꓔꓯ. ꓐꓳꓺ ꓟꓽ ꓙꓲ꓿ ꓫ. ꓕꓱ ꓓꓴ (phone) ꓗꓪ ꓗꓶ ꓓꓴ ꓡꓲ‐ꓢꓴ ꓩꓳꓥ.; (font) ꓙꓳˍ ꓥ ꓟꓲ꓾ ꓫ. ꓕꓱ ꓓꓴ (phone) ꓥ ꓕ ꓑꓳ.ꓼ ꓗꓪ ꓗꓶ ꓟꓽ ꓙꓲ꓾ ꓫ. ꓕꓱ ꓓꓴ (phone) ꓕꓲ ꓐꓱꓻ ꓗꓪ ꓡꓰ ꓗꓶ ꓙꓲˍ ꓡꓳ꓿ ꓣꓳꓽ ꓡꓲ‐ꓢꓴ ꓕꓳ ꓶ꓾ “ꓯ”꓾ “ꓱ”꓾ “ꓵ”꓾ “ꓶ”꓾ “ꓷ”꓾ “ꓭ”꓾ “ꓕ”꓾ “ꓘ”꓾ “ꓛ”꓾ “ꓞ”꓾ “ꓤ”꓾ “ꓥ”꓾ “ꓨ”꓾ “ꓩ” ꓕꓱ ꓟꓬ ꓝꓳ, ꓔꓯ. ꓠꓬ ꓡꓲ‐ꓢꓴ ꓩꓳꓥ.; (font) ꓟꓽ ꓙꓳ ꓙꓳ ꓐꓳ ꓟꓽ ꓠ꓿ꓖꓳ ꓡꓱ ꓥˍ ꓟꓲ꓾ ꓧꓪ‐ꓒꓴ ꓕꓳ ꓶ ꓠꓬ ꓮꓺ ꓡꓲ ꓫꓵꓽ ꓫ. ꓔꓱ ꓓꓴ (phone) ꓗꓪˍ ꓟꓲ ꓙꓳ ꓟ ꓥ ꓡꓳ꓿ ꓕꓯꓽ ꓢꓲ ꓗꓪ ꓟ ꓝꓳ, ꓖꓳ ꓟꓬ ꓔꓯ.꓾ ꓧꓪ‐ꓒꓴ ꓕꓳ ꓶ ꓗꓪ ꓐꓰ ꓫꓬ, ꓐꓳ ꓗꓷ ꓠꓬ꓾ ꓣꓳ ꓡꓲ‐ꓢꓴ ꓕꓳ ꓶ ꓔꓯ. ꓮ ꓡꓲ ꓫꓵꓽ ꓮꓽ ꓙꓬꓼ ꓗꓪˍ ꓟꓲ ꓣꓱꓽꓗ. ꓘꓪˍ ꓟ ꓥꓳ꓿ ꓥꓪ ꓚꓲ. ꓛꓬ ꓟ. ꓒ ꓓꓣ. ꓫꓱ‐ꓔ ꓐꓰ ꓛꓲꓥ‐ꓟꓮꓲ ꓗꓪ ꓟꓳꓻ ꓡꓯꓼ ꓘꓳ ꓕꓯ꓾ ꓬꓲ. ꓡꓰ ꓚꓴꓽ ꓬꓲ. ꓖꓶꓽ ꓡˍ ꓟ ꓡꓲ‐ꓢꓴ ꓕꓳ ꓶ ꓙ ꓖꓴ ꓔꓯ. ꓐꓯ ꓟ. ꓖꓶꓽ ꓠꓲ, ꓫꓵˍ ꓡꓳ꓿ ꓬꓲ. ꓞꓳ ꓟꓳꓽ ꓡꓰ ꓐꓳ ꓔ. ꓟ ꓕꓳꓽ ꓶ ꓒꓬꓽ ꓔꓯˍ ꓟꓲ. ꓟ. ꓖꓶꓽ ꓠꓲ, ꓫꓵ ꓡꓳ꓿ꓬꓲ. ꓞꓳ ꓟꓳꓽ ꓡꓰ ꓚꓴ. ꓬꓲ. ꓖꓶꓽ ꓡˍ ꓟ ꓗꓪ꓾“ꓯ”꓾ “ꓱ”꓾ “ꓵ”꓾ “ꓶ”꓾ “ꓷ”꓾ “ꓭ”꓾ “ꓕ”꓾ “ꓘ”꓾ “ꓛ”꓾ “ꓞ”꓾ “ꓤ”꓾ “ꓥ”꓾ “ꓨ”꓾ “ꓩ” ꓕꓱ ꓟꓬ ꓝꓳ, ꓔꓯ. ꓠꓬ ꓧꓪ‐ꓒꓴ ꓝꓳ, ꓤꓽ ꓗꓪ ꓐꓰ꓾ “ae”, “ew”, “ue”, “ie”, “oe”, “gh”, “th”, “kh”, “ch”, “tsh”, “rz”, “ng”, “q”, “f” ꓐꓰ ꓐꓳ ꓙꓲˍ ꓡꓳ꓿ ꓧꓪ‐ꓒꓴ ꓝꓳ, ꓤꓽ ꓗꓪ ꓐꓰ ꓣꓳꓽ ꓡꓲ‐ꓢꓴ ꓕꓳ ꓶ ꓔꓯ. ꓐꓳꓺ ꓗꓷ ꓠꓬ꓾ ꓮ ꓡꓲ ꓫꓵꓽ ꓮ ꓙꓬꓼ ꓗꓪ ꓥˍ ꓟꓲ ꓐꓳ ꓙꓲ ꓟ ꓔꓯ. ꓢꓷ. ꓪ ꓡꓳ꓿ ꓖꓳ ꓡꓱ ꓥˍ ꓟꓲ꓾ ꓓꓣ. ꓫꓱ‐ꓔ ꓡꓰ ꓚꓴꓽ ꓬꓲ. ꓖꓶ ꓡˍ ꓟ ꓡꓲ‐ꓢꓴ ꓕꓳ ꓶ ꓐꓳ ꓫꓷ, ꓔꓯ. ꓡꓰꓽ ꓣꓱꓽ ꓢꓲ꓾ ꓡꓲ‐ꓢꓴ ꓕꓳ ꓶ “ꓐ ꓑ ꓒ” ꓔꓯ. ꓠꓬ ꓡꓳꓺ ꓒꓰ ꓗꓷ ꓡꓯ ꓐꓰ ꓐꓯ ꓔꓬ, ꓟ ꓠꓽ ꓟ ꓥ꓿ ꓙꓳˍ ꓟ ꓮ ꓙꓬꓼ ꓥ ꓕ ꓑꓳ.ꓼ ꓗꓪ ꓣꓱꓽ ꓗ. ꓘꓪ ꓠ, ꓟ ꓬꓲ. ꓡꓰ ꓚꓴꓽ ꓬꓲ. ꓖꓶꓽ ꓔ. ꓟ ꓡꓲ‐ꓢꓴ ꓕꓳ ꓶ ꓔꓯ. ꓣꓱꓽˍ ꓠꓬ ꓟꓽ ꓙꓲ ꓡꓺꓽ ꓐꓰ ꓮꓽ ꓙꓵꓽ ꓢꓴ ꓔꓯ. ꓢꓯꓼ ꓖꓶꓽ ꓠꓲ, ꓫꓵ ꓟ ꓡꓰ ꓥ ꓡꓳ꓿ ꓕꓳ ꓶ ꓕꓱ ꓟ ꓗꓪ ꓐꓰ ꓣꓳꓽ ꓡꓲ‐ꓢꓴ ꓐꓴ ꓠꓬ꓾ ꓡꓲ‐ꓢꓴ ꓕꓳ ꓶ ꓔꓯ. ꓝꓳ, ꓤꓽ ꓗꓪ ꓐꓰ ꓥˍ ꓟꓲ ꓐꓳ ꓗ. ꓘꓪˍ ꓟ ꓥ ꓡꓳ꓿ ꓔꓯ ꓥꓳꓽ꓾ “ꓙꓵ ꓗꓪ ꓙꓱ ꓤ ꓟꓽ ꓟꓳ꓾ ꓯ, ꓡꓰ ꓟꓳˍ ꓡꓳ” ꓐꓯ ꓟ ꓡꓲ‐ꓢꓴ ꓕꓳ ꓶ ꓔꓯ. ꓝꓳ, ꓤꓽ ꓗꓪ ꓐꓰ “jue kwa jew rza ma: mo‐. ae, le mo_ lo” ꓐꓰ ꓐꓳ ꓙꓲˍ ꓥꓳ꓿ꓡꓶ. ꓙꓰ ꓑ ꓙꓰ ꓔꓬ, ꓟ ꓠꓬꓲ ꓠꓬꓲ ꓟ ꓦꓬꓼ ꓠꓬꓲ ꓗꓪ꓾ ꓣꓳꓽ ꓡꓲ‐ꓢꓴ ꓐꓴ ꓠꓬ ꓪ ꓜꓲ ꓙꓲˍ ꓟ꓾ ꓪ ꓜꓲ ꓪꓴꓽ ꓟꓴ ꓐꓲ ꓜꓲꓼ ꓡˍ ꓟ ꓚꓱ, ꓔꓯ. ꓧꓪ ꓓꓴ ꓥ ꓡꓳ꓿ ꓣꓳꓽ ꓣꓱꓽ ꓗꓳ ꓡ ꓟ ꓔꓯ.ˍ ꓡꓰꓽ ꓟꓽ ꓓ ꓟꓽ ꓞꓽ ꓣꓴꓻ ꓕꓶ ꓔ. ꓟ ꓟꓽ ꓥ ꓥ꓾ ꓙꓲˍ ꓟ ꓜꓳˍ ꓟ ꓔꓯ. ꓠꓬ ꓘꓳ ꓣꓴ ꓒꓰ. ꓠꓬ ꓘꓳ ꓣꓴ ꓙꓲꓽ ꓙꓳˍ ꓡꓳ꓿

ꓣꓳꓽ ꓟꓽ ꓣꓷꓠ ꓟꓽ ꓓ ꓟ ꓠꓬ꓾ ꓡꓲ‐ꓢꓴ ꓕꓳ ꓶ “ꓐ ꓑ ꓒ” ꓠꓬ ꓮ ꓙꓬꓼ ꓥ ꓕ ꓑꓳ.ꓼ ꓗꓪ ꓐꓳ ꓟꓽ ꓙꓲ꓿ ꓖꓳ ꓡꓱ ꓠꓬꓲ꓾ ꓡꓲ‐ ꓢꓴ ꓕꓲ ꓐꓱ ꓠꓬ ꓡꓲ‐ꓢꓴ ꓕꓳ ꓶ ꓔꓯ. ꓣꓱꓽ ꓠꓲ, ꓫꓵ. ꓥˍ ꓟꓲ꓾ ꓡꓲ‐ꓢꓴ ꓕꓳ ꓶ ꓗꓪ ꓐꓰ ꓡꓲ‐ꓢꓴ ꓛꓳꓽ ꓡꓲ‐ꓢꓴ ꓙ ꓡꓯꓼ ꓘꓳ ꓠꓲ, ꓫꓵ. ꓥˍ ꓟꓲ꓾ ꓡꓲ‐ꓢꓴ ꓕꓳ ꓶ ꓕꓳ, ꓟꓽ ꓙꓲ꓾ ꓐꓳ ꓟꓽ ꓙꓲ ꓟ ꓑꓶ. ꓓꓴ ꓡꓲ‐ꓢꓴ ꓛꓳ ꓡꓲ‐ꓢꓴ꓾ ꓚꓲ. ꓛꓬꓽ ꓥꓳ ꓗꓪ ꓐꓰ ꓙ ꓡꓯꓼ ꓘꓳ ꓟꓽ ꓪ ꓗꓷ ꓡꓰˍ ꓡꓳ꓿ ꓖꓳ ꓡꓱ ꓥˍ ꓟꓲ꓾ ꓓꓣ. ꓫꓱ‐ꓔ ꓡꓰ ꓚꓴ. ꓬꓲ. ꓖꓶꓽ ꓡˍ ꓟ ꓕꓳ ꓶ ꓠꓬ꓾ ꓮ ꓡꓲ ꓫꓵꓽ ꓮ ꓙꓬꓼ ꓗꓪˍ ꓟꓲ ꓐꓳ ꓙꓲ ꓟ ꓥ ꓡꓳ꓿ ꓕꓳ ꓶ ꓕꓱ ꓟ ꓔꓯ. ꓣꓱꓽ ꓐꓭ ꓠꓬ꓾ ꓣꓳꓽ ꓡꓲ‐ꓢꓴ ꓛꓳ ꓡꓲ‐ꓢꓴ ꓮ. ꓫꓵꓽ ꓗꓽ ꓔ. ꓓꓴ ꓟꓽ ꓙꓳ ꓙꓳ ꓙ ꓡꓯ ꓘꓳ ꓙꓲ ꓟ ꓥꓳ꓿ꓡꓽ ꓟ‐ꓕꓲ2021 ꓘꓳꓼ 9 ꓦ 6 ꓠꓬꓲ