2021 ꓘꓳꓼ 11 ꓦ 23-24 ꓠꓬꓲ ꓗꓪ ꓣꓱꓽ ꓬꓰ ꓙꓰ ꓓꓴ 3 ꓧꓪꓹ ꓕꓲ ꓧꓪꓹ ꓟ ꓮ-ꓢꓰ-ꓬ ꓗꓴꓷꓼ ꓜꓴ ꓟꓵꓼ ꓪꓴꓽ ꓟꓲ ꓠꓯ ꓚꓱꓹ ꓖꓪ ꓙꓱ ꓜꓲꓼ ꓓꓴ (Climate Smart and Disaster Resilient ASEAN International Conference) ꓗꓪ ꓠꓴꓖ ꓗꓪ ꓟ ꓢꓲꓽ ꓒ ꓕꓲ ꓣꓳ ꓥ ꓟ Dr. Tu Hkawng ꓔꓯ ꓘꓴ ꓡ ꓠꓬꓲ꓾ ꓬꓲꓸ ꓓꓯ ꓢꓲꓸ ꓖꓪ ꓙꓰ ꓔꓺ ꓙꓰ ꓓꓴ ꓥꓳ ꓐꓰ ꓐꓯ ꓡꓳ=
“ꓟꓬ-ꓟ ꓗꓴꓷꓼ ꓠꓬ ꓮ-ꓢꓰ-ꓬ ꓗꓴꓷꓼ ꓮ ꓙꓵꓽ ꓗꓪ ꓐꓰ ꓪꓽ ꓔꓲꓺ ꓟ ꓗꓳ ꓙꓳ_ ꓟ ꓟꓵꓽ ꓥꓳ= ꓠꓱꓸ ꓐꓯꓼ ꓗꓪ ꓕꓱ ꓡꓱꓳ ꓫꓵꓽ ꓟꓽ ꓙꓳ= ꓖꓳ ꓟ ꓑꓶꓸ ꓓꓴ ꓮ-ꓢꓰ-ꓬ ꓠꓲꓸ ꓫꓬꓸ ꓓꓽ ꓟ (ASEAN Heritage) ꓥ ꓠꓬꓲ꓾ ꓕꓱ ꓟ ꓔꓯ ꓒꓵꓽ ꓠꓹ ꓟ ꓐꓰ꓾ ꓡꓳꓸ ꓙ ꓠꓹ ꓟ ꓚꓱꓹ ꓔꓯ ꓖꓪ ꓙꓱ ꓙꓰ ꓓꓴ ꓥꓳ” ꓐꓰ Dr. Tu Hkawng ꓡꓰ ꓐꓯ ꓡꓳ=
ꓜꓲꓼ ꓓꓴ ꓬꓲꓸ ꓪꓴꓸ ꓕꓲ ꓠꓬꓲ ꓗꓪ ꓗꓴꓷꓼ ꓙꓵꓽ ꓜꓴ ꓐꓴ ꓓꓵꓽ ꓙ ꓚꓱꓹ ꓐꓰ꓾ ꓣꓱꓽ ꓬꓰ ꓙꓰ ꓠꓹ ꓟ ꓚꓱꓹ ꓔꓯ ꓟꓳꓸ ꓖꓪ ꓙꓱ ꓓꓴ ꓥ ꓢꓲꓸ ꓠꓴꓖ ꓗꓪ ꓟ Dr. Tu Hkawng ꓔꓯ ꓖꓳ ꓗꓪ ꓖꓪ ꓙꓱ ꓡ ꓠꓹ ꓟ ꓘꓴ ꓔꓸ ꓟ ꓥ ꓡꓳ=
“ꓜꓲ ꓜꓲ ꓑꓰꓹ ꓑꓰꓹ ꓙꓵꓽ ꓪ ꓣꓱꓽ ꓢꓴ ꓐꓴ ꓡꓰ ꓕꓱ ꓟꓴꓽ ꓪꓴꓽ ꓟꓲ ꓠꓯ ꓔꓯ ꓫꓺ ꓒꓵꓽ ꓟꓽ ꓗꓴꓸ= ꓕꓱ ꓟ ꓠꓬ ꓖꓳ ꓕꓲ ꓟꓵꓽ ꓗꓪ ꓟ ꓠꓬꓹ ꓡꓵꓺ ꓠꓬꓹ ꓔꓲꓺ ꓐꓴ ꓡꓰ ꓬꓰ ꓐ ꓡ ꓟ ꓟꓬꓱꓽ ꓥ ꓡꓳ” ꓐꓰ Dr. Tu Hkawng ꓡꓰ Facebook ꓗꓪ ꓐꓳ ꓔ ꓡꓳ=
ꓜꓲꓼ ꓓꓴ ꓖꓳ ꓟ ꓗꓪ ꓮ-ꓢꓰ-ꓬ ꓟꓵꓽ ꓗꓪ ꓟ ꓗꓴꓷꓼ ꓟꓬꓱꓽ ꓢꓲꓺ ꓓꓽ ꓟ ꓐꓴ꓾ ꓗꓴꓷꓼ ꓚꓱꓹ ꓟꓬꓱꓽ ꓬꓰ ꓢꓴ ꓐꓴ꓾ ꓟꓴ ꓕꓲꓸ ꓢꓷꓸ ꓠꓲꓹ ꓙꓳꓥꓽ ꓦꓲ ꓗꓪ ꓐꓰ ꓡ ꓟ ꓟꓸ ꓒ ꓟꓸ ꓟ ꓐꓰ꓾ ꓢꓳ ꓤ ꓐꓴ ꓜꓲꓼ ꓡ ꓥꓳ ꓐꓯ ꓡꓳ=