ꓠꓴꓖ ꓗꓴꓷꓼ ꓙꓵꓽ ꓜꓴ ꓡꓯꓼ ꓛꓲ ꓗꓪ ꓟ ꓢꓲꓼ-ꓗꓮꓲꓹ ꓟꓵꓽ ꓫꓴ ꓢꓷꓸ ꓠꓲꓹ ꓢꓳ ꓦꓲ ꓐꓴ ꓜꓲꓼ ꓡꓯ ꓘꓳ ꓢꓲꓸ ꓢꓳ ꓒ ꓢꓳ ꓟ ꓐꓴ ꓡꓳ ꓖꓪ ꓑꓮꓲ ꓔꓯ 2022 ꓘꓳꓼ 6 ꓦ 14 ꓠꓬꓲ ꓕꓯꓽ ꓬꓰˍ ꓡꓳ꓿
ꓢꓳ ꓒ ꓢꓳ ꓟ ꓐꓴ ꓠꓬ ꓓꓰ-ꓟꓳ-ꓗꓯ-ꓢꓰ ꓚꓱꓹ ꓟꓴ ꓖꓪ ꓖꓪ ꓠꓬꓲ꓾ ꓛꓲ ꓡꓵ ꓡꓯꓼ ꓡꓵ ꓬꓰ ꓔꓬ ꓟ ꓢꓯꓸ ꓐꓬꓱꓽ ꓓꓳ ꓡ ꓡꓳ꓿
“ꓢꓲꓼ-ꓗꓮꓲꓹ ꓟꓵꓽ ꓫꓴ ꓔꓯ ꓟꓬ-ꓟ ꓟꓯꓼ ꓐꓴ ꓙꓵꓽ ꓗꓪꓼ ꓠꓹ ꓟ ꓠꓬ ꓬꓲꓼ ꓟꓬ ꓡꓲꓸ ꓘꓳ ꓟꓽ ꓓ” ꓐꓰ ꓑꓓꓝ ꓟꓯꓼ ꓧꓳꓽ ꓢꓴ ꓐꓳ-ꓠ-ꓖꓹ ꓡꓰ ꓐꓯˍ ꓡꓳ꓿
ꓢꓲꓼ-ꓗꓮꓲꓹ ꓟꓵꓽ ꓗꓪ ꓠꓬ ꓟꓬ-ꓟ ꓞꓳ ꓫꓵꓽ ꓐꓴ ꓟꓬꓽ ꓠꓬꓲ ꓔꓬꓹ ꓟ ꓥ ꓢꓲ꓾ ꓞꓳ ꓘꓹ ꓮ ꓟꓬꓹ ꓥ ꓟꓲ ꓟꓬ-ꓟ ꓟꓯꓼ ꓡꓰ ꓛꓴ ꓖꓪꓽ ꓡꓰ ꓝꓲꓳ꓿
“ꓮ ꓡꓲ ꓗ ꓡꓲꓸ ꓗ ꓬꓰ ꓝꓲ꓾ ꓐꓯ ꓡ ꓕꓯꓽ ꓕꓲ ꓫꓵꓽ ꓠꓽ ꓛꓱꓼ ꓡ ꓥꓳ” ꓐꓰ ꓠꓴꓚꓚ ꓗꓪ ꓔꓺ ꓔꓬ ꓢꓴ ꓟꓰꓹ-ꓗꓳ-ꓠꓮꓲꓽ ꓡꓰ ꓐꓯˍ ꓡꓳ꓿
ꓦꓲꓽ ꓙꓳ ꓡꓰ ꓢꓴ ꓞꓳ ꓟꓳꓽ ꓤ ꓠꓱ ꓮ ꓙꓵꓽ ꓟꓬ-ꓟ ꓟꓯꓼ ꓔꓯ ꓔꓳꓹ ꓠꓹ ꓟ ꓠꓲꓹ ꓟ ꓒ ꓐꓲ ꓗꓷ ꓡꓰ ꓢꓲ꓾ ꓠꓸ ꓑꓳ ꓜꓰ ꓡꓰ꓾ ꓒꓴ ꓫꓵꓺ ꓮ ꓙꓵꓽ ꓔꓲꓺ ꓖꓶ ꓢꓲꓸ ꓢꓯꓼ ꓕꓵꓼ ꓒꓳꓹ ꓔꓳꓹ ꓡ ꓔꓬ ꓡꓳ꓿
“ꓑꓶꓸ ꓗꓹ ꓓꓴ ꓟ꓾ ꓚꓲꓺ ꓪꓴꓽ ꓗꓹ ꓓꓴ ꓟ ꓠꓽ ꓮ ꓡꓲ ꓟ ꓡꓲꓸ ꓖꓼ ꓟꓶ ꓟꓽ ꓓꓻꓳ꓿ ꓚ ꓟꓲꓽ ꓗꓪ ꓑ ꓫꓬ ꓡꓲꓹ ꓙꓰ ꓚꓱꓹ ꓔꓯ ꓕꓱ ꓕꓲ ꓧꓪꓹ ꓠꓬ ꓛꓲ ꓟꓬ-ꓟ ꓫꓵꓽ ꓐꓴ ꓢꓯꓼ ꓕꓵꓼ ꓩꓴ ꓡ ꓟ ꓟꓽ ꓟꓳꓻ ꓠꓬꓲ꓾ ꓟꓽ ꓙꓳ ꓠꓬꓲ” ꓐꓰ ꓚ ꓟꓲꓽ ꓢꓪꓼ ꓢꓴ ꓐꓴ ꓗꓰ ꓐꓯˍ ꓡꓳ꓿
“ꓑꓓꓝ ꓔꓯ ꓟꓬ-ꓟ ꓟꓯꓼ ꓠꓬ ꓢꓰꓼ ꓧꓪꓸ ꓟꓽ ꓖꓰꓼ ꓠ ꓔꓸ” ꓐꓰ ꓴꓢꓮ ꓐꓶꓽ ꓗꓴꓷꓼ ꓝꓲ ꓓꓴ ꓫꓳ-ꓡꓯꓼ ꓡꓰ ꓢꓰ-ꓖ-ꓑꓳ ꓗꓪ ꓛꓲ ꓡ ꓕꓯꓽ ꓫꓸ ꓕꓱ ꓔꓸ ꓟ ꓙꓳˍ ꓡꓳ꓿
ꓕꓱ ꓕꓲꓽ ꓧꓪꓹ ꓠꓬ ꓡꓳꓽ-ꓟꓲꓽ (ꓟꓬ-ꓟ) ꓫꓵꓽ ꓐꓴ ꓮ ꓘꓶꓸ ꓢꓯꓼ ꓩꓴ ꓡ ꓔꓬ꓾ ꓫꓵꓻ ꓘꓴ ꓑꓵꓺ ꓔꓬ ꓠꓬꓲ꓾ ꓟꓬ-ꓟ ꓟꓯꓼ ꓡꓯ ꓒꓯꓹ ꓗꓪ ꓐꓰ ꓑ ꓫꓬ ꓐꓴ ꓡꓲꓹ ꓙꓰ ꓚꓱꓹ ꓟꓬꓽ ꓠꓬꓲ ꓦ ꓡꓱ ꓐꓳ ꓓꓴ ꓙꓳ ꓡ ꓡꓳ꓾ ꓐꓰ ꓢꓪꓼ ꓔꓬ ꓡꓳ꓿