ꓠꓬꓲꓽ ꓛꓱꓽ ꓗꓴ ꓗꓴ ꓢꓲ ꓖꓪ ꓙꓱ ꓔꓸ ꓟ ꓙꓳˍ ꓡ?

ꓗ-ꓬꓲ ꓞꓳ ꓫꓵꓽ ꓐꓴ ꓔꓯ ꓢꓰꓼ ꓚꓳꓹ ꓠꓹ ꓟ ꓐꓱ ꓶ ꓕꓮꓲꓹ ꓐꓰ ꓟꓬ-ꓟ ꓗꓴꓷꓼ ꓙꓵꓽ ꓪ ꓙꓳ ꓢꓴ ꓠꓬꓲꓽ ꓛꓱꓽ ꓗꓴ ꓗꓴ ꓢꓲ ꓖꓪ ꓙꓱ ꓢꓲ꓾ ꓟꓬ-ꓟ ꓐꓳꓽ ꓞꓰ ꓙꓱ ꓦꓲ ꓔꓯ ꓕꓮꓲꓹ ꓟꓵꓽ ꓫꓸ ꓗ ꓫꓵꓸ ꓘꓱꓻ ꓝꓲˍ ꓟ ꓥ/ ꓟꓽ ꓥ ꓚꓲꓸ ꓚ ꓖꓶꓽ ꓡꓯ ꓐꓰ꓾ The Democracy Group ꓐꓰ꓾ ꓠꓴ-ꓔ-ꓐꓴ-ꓬꓲ ꓜꓴ ꓡꓰ ꓕꓮꓲꓹ ꓑ ꓫꓬ ꓜꓲꓼ ꓓꓴ ꓗꓪ ꓠꓻ ꓠꓬꓲ ꓓꓰꓽ ꓩꓴ ꓡ ꓡꓳ꓾ ꓐꓰ ꓐ-ꓗꓳꓼ ꓫꓵꓽ ꓓꓳꓽ ꓗꓪ 2022 ꓘꓳꓼ 7 ꓦ 7 ꓠꓬꓲ ꓕꓯꓽ ꓐꓳ ꓔꓸ ꓡꓳ꓿

2022 ꓘꓳꓼ 6 ꓦ 30 ꓠꓬꓲ ꓕꓯꓽ ꓟꓬ-ꓟ ꓐꓳꓽ ꓐꓶ ꓙꓱ ꓦꓲ ꓟꓲ-29 ꓠꓬ ꓟꓬ-ꓟ~ꓕꓮꓲꓹ ꓟꓵꓽ ꓫꓸ ꓙ ꓫꓵꓸ ꓘꓱꓻ ꓙꓰ ꓢꓲꓸ ꓗ-ꓬꓲ ꓫꓵꓽ ꓟꓯꓼ ꓘꓰꓹ ꓢꓴ ꓐꓴ ꓔꓬ ꓟ ꓔꓼ ꓟꓵꓽ ꓫꓴ꓾ ꓑꓳꓼ-ꓒꓼ-ꓬꓼ ꓡꓳ ꓒꓱ ꓗꓪ ꓛꓲ ꓬꓰˍ ꓟ ꓥꓳ꓿ ꓖꓳ ꓗꓪ ꓡ ꓛꓴꓸ ꓐꓶ ꓡ ꓠꓬꓲ꓾ ꓕꓮꓲꓹ ꓕꓲ ꓒꓳꓹ ꓗꓪ ꓦꓲ ꓐꓬ ꓬꓰ꓾ ꓠꓻ ꓓꓴ ꓢꓴ ꓙꓳ ꓡꓰˍ ꓟ ꓥ ꓡꓳ꓿

ꓖꓳ ꓕꓲ ꓠꓬꓲ ꓧꓶꓸ ꓕꓯꓽ ꓗꓪ ꓕꓮꓲꓹ ꓟꓯꓼ ꓢꓽ ꓡ ꓙꓵꓽ ꓠꓬꓲꓽ ꓣꓳ ꓕꓲꓽ ꓣꓳ Apichet Suesat ꓠꓬ ꓟꓬ-ꓟ ꓗꓴꓷ꓾ ꓠꓯ-ꓑꓲ-ꓓꓳ ꓗꓪ ꓛꓲ ꓔꓬ ꓟ ꓔꓯ ꓖꓴ ꓢꓲꓸ ꓗꓴ ꓗꓴ ꓢꓲ ꓖꓪ ꓙꓱ ꓡꓯ ꓘꓳˍ ꓟ ꓙꓳ/ ꓟꓽ ꓙꓳ ꓚꓲꓸ ꓚ ꓖꓶ ꓡꓯ ꓐꓰ ꓐꓯˍ ꓟ ꓥ ꓡꓳ꓿

The Democracy Group ꓧꓳꓽ ꓢꓴ Somyot Pruksakasemsuk ꓡꓰ꓾ “ꓟꓵꓽ ꓘꓶꓽ ꓗꓪ ꓟꓯꓼ ꓘꓰꓹ ꓔꓬ ꓢꓴ ꓗ-ꓬꓲ ꓞꓳ ꓫꓵꓽ ꓐꓴ ꓔꓯ ꓛꓴ ꓞꓰꓹ ꓡꓰ ꓠ ꓢꓰꓼ ꓠꓹ ꓟ ꓢꓯꓼ ꓕꓵꓼ ꓡˍ ꓟ ꓥ ꓡꓲꓸ ꓟꓽ ꓢꓷꓸ꓿ ꓕꓱ ꓡꓱ ꓥ ꓐꓷˍ ꓠꓬ ꓫꓵꓽ ꓕꓲ ꓫꓵꓽ ꓔꓯ ꓛꓴ ꓞꓰꓹ ꓡꓰ ꓠꓹ ꓟ ꓟꓯꓼ ꓢꓰꓼ ꓡꓯ ꓘꓳ ꓝꓴꓲꓸ ꓓꓽ ꓟ ꓬꓰ ꓓꓳ ꓩꓴ ꓡ ꓟ ꓥꓳ꓿

ꓕꓮꓲꓹ ꓗꓴꓷꓼ Move Forward Party ꓑ ꓫꓬ ꓝꓲ ꓓꓴ Rangsiman Rome ꓡꓰ꓾ “ꓟꓬ-ꓟ ꓫꓵꓽ ꓪꓴꓻ ꓠꓬ ꓮ-ꓢꓰ-ꓬ ꓗꓴꓷꓼ ꓐꓴ ꓐꓱ ꓶ ꓘꓶ ꓡꓶꓽ ꓓꓴ ꓙꓳ ꓡ ꓔꓬꓳ” ꓐꓯ ꓡꓳ꓿

ꓟꓬꓟ~ꓲ-ꓓꓲ-ꓬ ꓟꓵꓽ ꓘꓶꓽ ꓔ-ꓟꓴꓹ ꓡꓳ ꓒꓱ ꓗꓪ ꓥ ꓟꓲ ꓟꓳꓹ-ꓬꓯꓹ ꓗꓪ ꓐꓰ ꓡˍ ꓟ ꓲ-ꓓꓲ-ꓬ ꓡ ꓞꓳ 2 ꓣꓳ ꓢꓰꓼ ꓩꓴ ꓢꓲꓸ ꓫꓵꓻ ꓟꓳ ꓟꓽ ꓡꓲꓸ ꓖꓶ ꓑꓶꓸ ꓓꓴ ꓢꓴꓺ ꓓꓴ ꓙꓴꓽ ꓓꓴ ꓙꓳ ꓔꓬ ꓡꓳ꓿

ꓕꓮꓲꓹ ꓐꓰ ꓲ-ꓓꓲ-ꓬ ꓗꓴꓷꓼ ꓙꓵꓽ ꓢꓴ ꓐꓴ ꓠꓬ ꓟꓬ-ꓟ ꓟꓯꓼ ꓜꓲꓽ ꓐꓴ ꓬꓰˍ ꓟ ꓚꓱꓹ ꓔꓯ ꓗꓴ ꓗꓴ ꓢꓲ ꓔꓳꓹ ꓙ ꓔꓬ ꓡꓳ꓾ ꓐꓰ ꓟꓬ-ꓟ ꓑ ꓫꓬ ꓐꓴ ꓟꓳꓻ ꓔꓬ ꓡꓳ꓿ ꓟꓬ-ꓟ ꓗꓴꓷꓼ ꓫꓵꓽ ꓪꓴ ꓠꓬ ꓬꓲꓸ ꓪ ꓗꓴꓷꓼ ꓫꓵꓽ ꓪꓴ ꓒꓬꓱꓼ ꓡ ꓓꓴ ꓬꓲꓸ ꓚꓱꓹ ꓝꓰꓸ ꓡ ꓔꓬ ꓟ ꓥ ꓡꓳ꓿