Audio News
ꓕꓮꓲꓹ ꓗꓴꓷꓼ꓾ ꓐ-ꓗꓳꓼ ꓟꓬ-ꓟ ꓗꓴꓷꓼ ꓝꓲ ꓓꓴ ꓦꓲ ꓟꓲꓸ ꓙꓬꓽ ꓗꓪ ꓟꓬ-ꓟ ꓐꓴ ꓘꓴ ꓔꓴ ꓔꓬ
2022 ꓘꓳꓼ 7 ꓦ 26 ꓠꓬꓲ꓾ ꓟꓳꓼ ꓡꓳ 1 ꓙꓵꓹ ꓗꓪ ꓐꓰ ꓪꓴꓸ ꓔꓴ ꓢꓲ꓾ ꓕꓮꓲꓹ ꓗꓴꓷꓼ꓾ ꓐ-ꓗꓳꓼ ꓡꓳ ꓒꓱ ꓗꓪ ꓙꓳˍ ꓟ ꓟꓬ-ꓟ ꓗꓴꓷꓼ ꓝꓲ ꓓꓴ ꓦꓲ ꓟꓲꓸ ꓙꓬꓽ ꓗꓪ ꓟꓬ-ꓟ ꓐꓴ ꓘꓴ ꓔꓴ ꓔꓬ ꓡꓳ꓿
ꓗꓴꓷꓼ ꓮ ꓙꓵꓽ ꓗꓪ ꓐꓰ ꓗꓽ ꓔꓬ ꓟ ꓗꓪ ꓓꓰ-ꓟꓳ-ꓗꓯ-ꓢꓰ ꓚꓱꓹ ꓐꓱ ꓶ ꓢꓯꓼ ꓕꓵꓼ ꓢꓴ ꓐꓴ ꓔꓯ ꓢꓰꓼ ꓩꓴ ꓡ ꓠꓬꓲ꓾ ꓕꓮꓲꓹ ꓗꓴꓷꓼ ꓗꓪ ꓛꓲ ꓔꓬ ꓟ ꓟꓬ-ꓟ ꓑ ꓫꓬ ꓐꓴ ꓠꓲꓹ ꓥꓴ ꓟꓬ ꓥꓴ ꓠꓲꓹ ꓢꓲꓼ ꓔꓬ ꓡ ꓢꓲꓸ ꓕꓱ ꓡꓱ ꓘꓴ ꓔꓴ ꓩꓴ ꓡ ꓔꓬ ꓟ ꓥ ꓡꓳ꓿
“ꓥꓪ ꓠꓴ ꓠꓬ ꓟꓯꓼ ꓗꓳ-ꓢꓰ ꓐꓰ ꓬꓲꓸ ꓔꓯ ꓔꓺ ꓢꓴ ꓮ ꓙꓵꓽ ꓔꓯ ꓒꓳꓹ ꓔꓳꓹ ꓡꓳ꓿ ꓬꓲꓸ ꓪ ꓠꓬ ꓠꓲꓹ ꓒꓳꓹ ꓠꓲꓹ ꓙꓬ ꓟ ꓞꓳ ꓤꓽ ꓐꓴ ꓥꓳ꓿ ꓕꓮꓲꓹ ꓗꓴꓷꓼ ꓙꓵꓽ ꓢꓴ ꓐꓴ ꓔꓯˍ ꓟꓲ ꓕꓱ ꓡꓱꓳ ꓫꓵꓽ ꓡ ꓞꓳ ꓔꓯ ꓕꓽ ꓙ ꓡꓯ ꓘꓳ꓾ ꓕꓽ ꓔꓳꓹ ꓙ ꓐꓰ ꓐꓯ ꓔꓬ ꓟ ꓥꓳ” ꓐꓰ ꓘꓴ ꓔꓴ ꓑꓮꓲ ꓗꓪ ꓜꓲꓼ ꓡ ꓢꓴ ꓕꓲ ꓣꓳ ꓡꓰꓽ ꓐꓯ ꓡꓳ꓿
ꓓꓰ-ꓟꓳ-ꓗꓯ-ꓢꓰ ꓚꓱꓹ ꓐꓱ ꓶ꓾ ꓑ ꓫꓬ ꓙꓵꓽ ꓪ ꓡꓲꓸ ꓟꓶ ꓠꓹ ꓟ ꓐꓱ ꓶ ꓢꓯꓼ ꓕꓵꓼ ꓢꓴ ꓐꓴ ꓔꓯ ꓟꓬ-ꓟ ꓟꓯꓼ ꓗꓳ-ꓢꓰ ꓠꓬ ꓫꓵꓽ ꓘꓶꓽ ꓚꓱꓹ ꓗꓪ ꓗꓪꓽ ꓫꓵꓽ ꓢꓲꓸ ꓫꓵꓻ ꓝꓴꓲꓸ ꓖꓶꓽ ꓔꓸ ꓢꓴ 100 ꓟꓽ ꓞꓲ ꓙꓳˍ ꓟ ꓗꓪ ꓐꓰ ꓞꓳ ꓤ ꓮ ꓘꓶꓸ ꓢꓷꓸ ꓢꓴ 4 ꓣꓳ ꓔꓯ ꓗꓳꓸ ꓗꓷ ꓟ ꓠꓽ ꓛꓳꓼ ꓠꓬꓲ ꓠꓯꓼ ꓗꓪ ꓢꓰꓼ ꓩꓴꓳ ꓐꓰ ꓢꓷ ꓙ ꓟꓴ ꓙ ꓔ ꓡꓳ꓿
ꓢꓰꓼ ꓝꓴꓲꓸ ꓖꓶꓽ ꓢꓴ ꓟꓬ-ꓟ ꓟꓯꓼ ꓗꓳ-ꓢꓰ ꓔꓯ ꓮ-ꓢꓰ-ꓬ ꓢꓽ ꓡ ꓙꓵꓽ ꓠꓲꓹ ꓟ ꓙꓬ ꓬꓰꓳ
ꓓꓰ-ꓟꓳ-ꓗꓯ-ꓢꓰ ꓚꓱꓹ ꓐꓱ ꓶ ꓢꓯꓼ ꓕꓵꓼ ꓢꓴ ꓐꓴ ꓔꓯ ꓢꓰꓼ ꓝꓴꓲꓸ ꓖꓶꓽ ꓩꓴ ꓡ ꓟ ꓑꓶꓸ ꓓꓴ ꓟꓬ-ꓟ ꓟꓯꓼ ꓗꓳ-ꓢꓰ ꓔꓯ ꓮ ꓘꓶꓸ ꓠꓲꓹ ꓟ ꓙꓬ ꓬꓰꓳ꓾ ꓐꓰ 2022 ꓘꓳꓼ 7 ꓦ 26 ꓠꓬꓲ ꓕꓯꓽ ꓮ-ꓢꓰ-ꓬ ꓢꓽ ꓡ ꓙꓵꓽ ꓢꓴ ꓡꓰꓽ ꓢꓷ ꓙ ꓟꓴ ꓙ ꓩꓴ ꓡ ꓡꓳ꓿
“ꓠꓲꓹ ꓧꓳꓹ ꓡꓯ ꓘꓳ ꓠꓹ ꓟ ꓢꓯꓼ ꓕꓵꓼ ꓔꓬ ꓟ ꓔꓯ ꓒꓬꓹ (ꓛꓬꓹ) ꓩꓴ ꓡ ꓟ ꓥꓳ꓿ 55 ꓧꓪꓹ ꓟ ꓮ-ꓢꓰ-ꓬ ꓢꓲꓽ ꓒꓽ ꓐꓴ ꓜꓲꓼ ꓓꓴ ꓬꓰ ꓔꓳꓼ ꓟ ꓧꓶꓸ ꓕꓯꓽ ꓕꓲꓽ ꓫꓵꓽ ꓠꓽ ꓗꓪ ꓕꓱ ꓡꓱ ꓬꓰ ꓩꓴ ꓡ ꓟ ꓠꓬ꓾ ꓗꓴꓷꓼ ꓜꓴ ꓡꓰ ꓢꓯꓼ ꓖꓶ ꓔꓬ ꓟ꓾ ꓮ-ꓢꓰ-ꓬ ꓗꓪ ꓐꓰ ꓕꓲꓽ ꓝꓸ ꓖꓪ ꓙꓱ ꓖꓶꓽ ꓙ ꓔꓬ ꓟ ꓔꓯ ꓛꓳ ꓠꓲꓹ ꓟꓽ ꓫꓵ ꓐꓰ ꓒꓴ ꓒꓴ ꓡꓯꓽ ꓡꓯꓽ ꓟꓳꓸ ꓖꓶꓽ ꓩꓴ ꓡ ꓟ ꓥ ꓡꓳ= ꓕꓱ ꓟ ꓔꓯ ꓡꓲꓽ ꓡꓲꓽ ꓕꓼ ꓥꓳ” ꓐꓰ ꓮ-ꓢꓰ-ꓬ ꓢꓽ ꓡ ꓙꓵꓽ ꓧꓴ-ꓢꓯ (Hu Sent) ꓡꓰ ꓐꓯˍ ꓡꓳ꓿
“ꓐꓶꓽ ꓗꓴꓷꓼ ꓧꓳꓽ ꓪꓴꓸ ꓢꓴ ꓟꓴ ꓢꓴ ꓟꓬꓽ ꓠꓬꓲ ꓓꓵꓽ ꓙ ꓚꓱꓹ ꓗꓪ ꓟꓬ-ꓟ ꓟꓯꓼ ꓔꓯ ꓖꓪ ꓙꓱ ꓖꓪ ꓟꓴ ꓙꓲ ꓥꓳ ꓐꓰ ꓓꓵꓽ ꓙ ꓔꓬ ꓢꓰꓽ ꓡꓳ꓿ ꓖꓳ ꓡꓱ ꓥ ꓟꓲ ꓟꓯꓼ ꓠꓬ ꓢꓴ ꓔꓯ ꓢꓰꓼ ꓠꓹ ꓟ ꓬꓲꓸ ꓜꓴ ꓬꓲꓸ ꓒꓳ ꓬꓰ ꓢꓲ꓾ ꓢꓰꓼ ꓓꓴ ꓒꓬꓹ ꓓꓴˍ ꓡꓰ ꓢꓷꓸ ꓠꓲꓹ ꓢꓳ ꓔꓸ ꓠꓬꓲ꓾ ꓗꓴꓷꓼ ꓐꓱ ꓶ꓾ ꓑ ꓫꓬ ꓐꓱ ꓶ ꓫꓬꓹ ꓜꓶ ꓠꓹ ꓟ ꓮ ꓡꓲ ꓥ ꓟꓲ ꓬꓰ ꓟꓽ ꓐ ꓡˍ ꓟꓽ ꓢꓷꓸ ꓓꓰꓼ ꓡꓰ ꓢꓰꓽ꓿ ꓟꓬ-ꓟ ꓟꓯꓼ ꓫꓶꓹ ꓟꓯꓼ ꓡꓲꓽ ꓔꓯ ꓬꓲꓸ ꓪ ꓟꓯ ꓢꓷꓸ” ꓐꓰ ꓡꓲ-ꓢꓴ ꓒꓽ ꓗꓴꓷꓼ ꓚꓱꓹ ꓢꓷꓸ ꓠꓲꓹ ꓢꓳ ꓔꓬ ꓢꓴ ꓕꓲꓽ ꓣꓳ ꓡꓰ ꓓꓵꓽ ꓙ ꓕꓱ ꓓꓳ ꓡ ꓡꓳ꓿
Video News