ꓮꓳ-ꓢ-ꓢꓴ-ꓚꓰꓽ ꓔꓺ ꓔꓲ ꓔꓬꓹ ꓢꓴ 8 ꓣꓳ ꓐꓰ꓾ ꓮꓸ ꓠꓽ 1 ꓘꓹ ꓬꓥ-ꓖꓳꓥ ꓗꓪ ꓚꓲꓸ ꓡꓽ ꓛꓲ ꓡ

ꓮꓳꓽ-ꓢ-ꓢꓴ-ꓚꓰꓽ ꓔꓯ ꓟꓯꓼ ꓗꓳ-ꓢꓰ ꓡꓰꓽ ꓠꓯ-ꓑꓲ-ꓓꓳ ꓐꓱ ꓓꓴꓽ ꓗꓪ ꓦꓲ ꓬꓲꓸ ꓫꓳꓽ ꓫꓬꓹ ꓢꓲꓸ ꓡꓴꓽ ꓩꓴ ꓗꓷ ꓗꓸ ꓠꓯꓸ ꓧꓶꓸ ꓕꓯꓽ ꓬꓲꓸ ꓔꓺ ꓔꓲ ꓔꓬꓹ ꓢꓴ 8 ꓣꓳ ꓐꓰ꓾ ꓮꓸ ꓠꓽ 1 ꓘꓹ ꓠꓬ 2022 ꓘꓳꓼ 7 ꓦ 4 ꓠꓬꓲ ꓕꓯꓽ ꓬꓥ-ꓖꓳꓥ ꓦꓲ ꓗꓪ ꓚꓲꓸ ꓛꓲ ꓡꓻꓳ꓿ 

ꓮꓳ-ꓢ-ꓢꓴ-ꓚꓰꓽ ꓔꓯ ꓠꓬ ꓬꓲꓸ ꓕꓲꓽ ꓣꓳ ꓔꓵꓸꓼ ꓬꓲꓸ ꓫꓳꓽ ꓡꓴꓽ ꓔꓸ ꓙꓰˍ ꓟ ꓥ ꓢꓲ꓾ ꓧꓶꓸ ꓕꓯꓽ ꓬꓲ ꓔꓺ ꓔꓲ ꓔꓬ ꓢꓴ ꓐꓴˍ ꓐꓰ꓾ ꓬꓲꓸ ꓠꓲꓹ ꓠꓵˍ ꓟ ꓔꓮꓲ-ꓛꓰ-ꓓꓳ ꓟꓬꓱꓺ ꓔꓸ ꓟ ꓮꓸ ꓠꓽ ꓥ ꓟꓲ ꓬꓥ-ꓖꓳꓥ ꓗꓪ ꓧꓳꓽ ꓡꓽ ꓡˍ ꓟ ꓥ ꓡꓳ꓿

ꓧꓶꓽ ꓗꓴꓷꓼ ꓐꓶꓽ ꓗꓴꓷꓼ ꓔꓯ ꓟꓳꓸ ꓢꓲꓽ ꓒꓽ ꓪ-ꓬꓲꓼ ꓠꓬ ꓗꓴꓷꓼ ꓢꓲ ꓡꓲꓹ ꓡ ꓠꓹ ꓟ ꓖꓪ ꓙꓱ ꓠ ꓔꓸ ꓢꓴ ꓮ ꓙꓵꓽ ꓖꓪ ꓙꓱ ꓡꓯ ꓘꓳ ꓐꓯˍ ꓡꓳ꓿

ꓝꓮꓲ ꓟꓬ-ꓟ ꓐꓱ ꓶ ꓮ-ꓢꓰ-ꓬ ꓝꓲ ꓓꓴ ꓢꓳꓼ-ꓘꓳꓸ ꓠꓬ ꓮꓳ-ꓢ-ꓢꓴ-ꓚꓰꓽ ꓔꓯ ꓜꓲ ꓠꓲꓹ ꓫꓵˍ ꓡꓳ꓾ ꓐꓰ ꓓꓰꓽ ꓔꓸ ꓥ ꓟꓲ ꓟꓯꓼ ꓗꓳ-ꓢꓰ ꓡꓰ ꓟꓽ ꓜꓲ ꓝꓲ ꓢꓰꓽ꓿

Suzuki Myanmar ꓟꓳ ꓓꓳ ꓫꓬꓹ ꓜꓯꓻ ꓕꓵꓼ ꓪ ꓟꓽ ꓪ ꓠꓰ ꓠꓽ ꓔꓸ

ꓟꓬ-ꓟ ꓗꓴꓷꓼ ꓘꓴꓽ ꓗꓪ ꓟꓳ ꓓꓳ ꓜꓯꓻ ꓢꓲꓸ ꓪꓴꓽ ꓔꓬ ꓟ Suzuki Myanmar ꓠꓬ ꓐꓶꓽ ꓟꓵꓽ ꓗꓪ ꓐꓰ ꓟꓳ ꓓꓳ ꓶ ꓤ ꓚꓰꓹ ꓓꓵꓽ ꓠꓹ ꓟ ꓐꓰ꓾ ꓕꓱ ꓗꓪ ꓜꓯꓻ ꓢꓲꓸ ꓪꓴꓽ ꓠꓹ ꓟ ꓟꓯꓼ ꓗꓳ-ꓢꓰ ꓡꓰ ꓕꓵꓼ ꓪ ꓟꓽ ꓖꓶꓽ ꓡ ꓠꓬꓲ ꓗꓳ-ꓑꓶ-ꓠꓰ ꓟꓬꓱꓽ ꓬꓰ ꓚꓱꓹ ꓕꓲꓽ ꓑꓹ ꓠꓽ ꓔꓸ ꓠ ꓗꓷ ꓡꓰꓳ꓿

“ꓟꓳ ꓓꓳ ꓶ ꓤ ꓚꓰꓹ ꓓꓵꓽ ꓟꓽ ꓙꓲ ꓠꓰ ꓕꓱ ꓗꓪ ꓖꓶ ꓜꓯꓻ ꓓꓴ ꓶ ꓤ ꓶ ꓟꓲ ꓟꓽ ꓙꓳ ꓬꓰ꓾ ꓕꓵꓼ ꓪ ꓖꓶ ꓓꓰꓽ ꓟꓽ ꓪ ꓠꓰ ꓕꓲ ꓑꓹ ꓑꓲꓸ ꓠ ꓗꓷ ꓡꓰˍ ꓟ ꓥꓳ” Suzuki Myanmar ꓡꓰ ꓐꓯˍ ꓡꓳ꓿

ꓐꓶꓽ ꓟꓵꓽ ꓗꓪ ꓐꓰ ꓟꓳ ꓓꓳ ꓬꓲꓸ ꓢꓶꓽ ꓚꓰꓹ ꓓꓵꓽ ꓡˍ ꓟ ꓟꓽ ꓥ ꓥ꓾ ꓶ ꓤ ꓶ ꓟꓲ ꓚꓰꓹ ꓓꓵꓽ ꓡ ꓢꓲꓸ ꓟꓬ-ꓟ ꓗꓴꓷꓼ ꓘꓴꓽ ꓗꓪ ꓜꓯꓻ ꓓꓳ ꓡ ꓟ ꓟꓳ ꓓꓳ ꓔꓯ ꓢꓗꓓ (ꓢemi Knocked Down cars) ꓐꓯˍ ꓡꓳ꓿

2019 ꓘꓳꓼ ꓗꓪ ꓐꓰ ꓪꓴꓸ ꓔꓴ ꓢꓲꓸ Suzuki Myanmar ꓠꓬ ꓢꓗꓓ ꓟꓬꓱꓽ ꓔꓯ ꓔꓲ-ꓡ-ꓪ ꓗꓪ ꓟꓬꓱꓽ ꓬꓰ ꓪꓴꓸ ꓔꓴ ꓡ ꓟ ꓥ ꓡꓳ꓿

Suzuki Myanmar ꓟꓳ ꓓꓳ ꓗꓳ-ꓑꓶ-ꓠꓰ ꓗꓪ ꓐꓰ Ertiga꓾ Swift꓾ Ciaz ꓐꓰ꓾ Carry Truck ꓕꓱ ꓟꓬ ꓫꓵꓽ ꓔꓯ ꓟꓬ-ꓟ ꓗꓴꓷꓼ ꓘꓴꓽ ꓗꓪ ꓜꓯꓻ ꓢꓲꓸ ꓪꓴꓽ ꓔꓬ ꓟ ꓥ ꓡꓳ꓿ 

“ꓧꓪ ꓒꓴ ꓒꓴ ꓟ ꓕꓲꓽ ꓢꓯꓸ ꓡꓲꓸ ꓓꓳ ꓝꓲ ꓠꓲꓹ ꓟꓽ ꓫꓵ ꓠꓰ ꓬꓰˍ ꓥ ꓐꓰ ꓢꓪꓼ ꓔꓬ ꓡꓳ꓿ ꓟꓳ ꓓꓳ ꓶ ꓤ ꓫꓸ ꓡ ꓥꓳ꓿ ꓧꓶꓸ ꓕꓯꓽˍ ꓡꓰ ꓐꓰ ꓬꓲꓸ ꓐꓰꓽ ꓬꓲꓸ ꓛꓲꓽ ꓑꓱꓺ ꓢꓲꓸ ꓙꓳꓸ ꓙꓳꓽ ꓜꓱꓽ ꓠ ꓗ ꓡ ꓥꓳ꓿ Permit ꓖꓶ ꓡ ꓥꓳ ꓐꓯ ꓖꓶ ꓧꓶꓸ ꓕꓯꓽ ꓡꓰ ꓠꓽ ꓟꓽ ꓗ ꓡ꓿ ꓙꓵꓽ ꓪ ꓙꓳ ꓢꓴ ꓐꓴ ꓔꓯ ꓒꓴ ꓧꓪ ꓚꓸ ꓠ ꓔꓲꓸ ꓗ ꓡ ꓥꓳ” ꓐꓰ ꓬꓥ-ꓖꓳꓥ ꓗꓪ ꓟꓳ ꓓꓳ ꓪꓴꓽ/ꓪꓴꓻ ꓢꓴ ꓕꓲꓽ ꓣꓳ ꓡꓰ ꓐꓯ ꓡꓳ꓿ 

ꓮ ꓟꓶ ꓠꓬ ꓟꓳ ꓓꓳ ꓬꓲꓸ ꓫꓵꓼ ꓟꓽ ꓚꓰꓹ ꓓꓵꓽ ꓝꓲˍ ꓟ ꓐꓰ꓾ ꓟꓬ-ꓟ ꓗꓴꓷꓼ ꓘꓴꓽ ꓗꓪ ꓟꓳ-ꓓꓳ ꓟꓽ ꓜꓯꓻ ꓝꓲˍ ꓟ ꓑꓶꓸ ꓓꓴ ꓟꓳ ꓓꓳ ꓬꓲꓸ ꓐꓲꓽ ꓬꓲꓸ ꓒꓵꓽ ꓠꓯꓸ ꓡ ꓔꓬ ꓡꓳ꓿