ꓕꓲ ꓗꓴꓷꓼ ꓡꓱꓸꓼ ꓡ ꓛꓴꓸ ꓟꓽ ꓐꓶ ꓡꓯ ꓘꓳ ꓓꓴ ꓓꓴ ꓙ ꓟꓳ ꓘꓶꓽ (Nationwide Ceasefire Agreement) ꓠꓬ ꓮ ꓟꓶ ꓟꓽ ꓙꓳ ꓬꓰꓳ ꓐꓰ ꓥꓪ ꓠꓴ ꓘꓳ ꓣꓴ ꓡꓳ ꓐꓰ꓾ ꓗ-ꓣꓲ ꓞꓳ ꓫꓵꓽ ꓠꓲꓹ ꓗꓳ ꓜꓴ (KNU Concerned Group) ꓡꓰ ꓠꓬꓲꓸ ꓠꓬꓲ 2021 ꓘꓳꓼ 9 ꓦ 2 ꓠꓬꓲ ꓕꓯ ꓢꓷꓸ ꓙ ꓟꓴ ꓙ ꓩꓴ ꓡ ꓡꓳ꓿
ꓠꓚꓮ ꓔꓯ 2015 ꓘꓳꓼ 10 ꓦ 15 ꓠꓬꓲ ꓕꓯ ꓚꓲꓸ ꓛꓬ ꓞꓳ ꓫꓵꓽ ꓐꓰ ꓟꓵꓽ ꓐꓱ ꓶ ꓟꓯꓼ ꓬꓰ ꓔꓬ ꓟ 8 ꓜꓴ ꓡꓯꓼ ꓓꓴ ꓜꓸ ꓗꓷ ꓟ ꓥ ꓡꓳ꓿ ꓝꓮꓲ 2018 ꓘꓳꓼ 2 ꓦ 13 ꓠꓬꓲ ꓗꓪ 2 ꓜꓴ ꓓꓵꓽ ꓡ ꓠꓬꓲ ꓠꓚꓮ ꓙ ꓟꓳ ꓘꓶꓽ ꓡꓯꓼ ꓓꓴ ꓜꓸ ꓔꓸ ꓟ 10 ꓜꓴ ꓙꓳ ꓡꓳ꓿
ꓖꓳ ꓡꓱ ꓥ ꓟꓲ ꓠꓚꓮ ꓠꓬ ꓟꓵꓽ ꓚꓰ ꓞꓳ ꓫꓵꓽ ꓐꓴ ꓡꓽ ꓛꓴꓸ ꓔꓯꓹ ꓠꓽ ꓡꓰ ꓢꓲ ꓟꓯꓼ ꓡꓰ ꓙ ꓖꓶ ꓔꓸ ꓟ 2008 ꓗꓴꓷꓼ ꓙꓵꓽ ꓗ ꓗꓪ ꓧꓳꓽ ꓓꓵꓽ ꓙꓰ ꓟ ꓚꓱꓹ ꓥ ꓡꓳ ꓐꓰ KNU Concerned Group ꓡꓰ ꓐꓯ ꓡꓳ꓿
ꓖꓳ ꓡꓱ ꓥ ꓟꓲ ꓟꓬ-ꓟ ꓟꓯꓼ ꓠꓬ ꓑ ꓫꓬ ꓙꓵ ꓪ ꓔꓯ 2021 ꓘꓳꓼ 2 ꓦ 1 ꓠꓬꓲ ꓗꓪ ꓦꓴ ꓡ ꓢꓲ꓾ ꓑ ꓫꓬ ꓔꓯ ꓠꓬꓲꓸ ꓤꓲ ꓟ ꓐꓰ ꓞꓳ ꓢꓰꓼ ꓪ ꓢꓰꓼ꓾ ꓗꓴꓷꓼ ꓚꓰ ꓡ ꓞꓳ ꓐꓴ ꓔꓬ ꓟ ꓟꓵꓽ ꓗꓪ ꓟꓯꓼ ꓘꓶꓽ ꓩꓴ ꓡ ꓔꓬ ꓡꓳ꓿
ꓑ ꓫꓬ ꓡꓰ ꓢꓲꓻ ꓔ ꓟ CRPH ꓠꓬ ꓗꓠꓴ ꓓꓵꓽ ꓙ ꓚꓱꓹ ꓐꓰ ꓫꓱꓸ ꓡꓯ ꓘꓳ ꓠꓬꓲ꓾ ꓠꓲꓹ ꓒꓴ ꓒꓴ ꓘꓳ ꓣꓴ ꓢꓲ꓾ꓜꓲꓽ ꓜꓲꓽ ꓳꓰꓹ ꓑꓰꓹ ꓟꓯꓼ ꓡꓰ ꓙꓵˍ ꓟ ꓚꓱꓹ ꓬꓲꓸ ꓟꓶ ꓢꓰꓼ ꓡꓰ ꓝꓲ ꓠꓹ ꓟ ꓐꓰ꓾ ꓝꓯ-ꓓ-ꓬꓯ ꓓꓰ-ꓟꓳ-ꓗꓯ-ꓢꓰ ꓒꓬꓱꓼ ꓡ ꓠꓹ ꓟ ꓬꓰ ꓐ ꓡ ꓟ ꓮ ꓙꓵꓽ ꓔꓳꓹ ꓙ ꓬꓰ ꓙ ꓙꓰ ꓓꓴ ꓥꓳ ꓐꓰ ꓢꓷ ꓙ ꓟꓴ ꓙ ꓕꓳ ꓶ ꓗꓪ ꓐꓳ ꓔ ꓡꓳ꓿