ꓟꓵ ꓗꓳ ꓓꓵ ꓓꓵ ꓓꓰ-ꓟꓳ-ꓗꓯ-ꓢꓰ ꓦꓬꓼ ꓠꓬꓲ

ꓟꓲ ꓠꓯ ꓗꓴꓷꓼ ꓜꓴ ꓖꓪ ꓙꓱ ꓜꓲꓼ ꓓꓴ ꓓꓽ ꓟ ꓗꓪ ꓐꓰ ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓔꓯ ꓫꓺ ꓒꓵꓽ ꓟ ꓐꓰ꓾ ꓤꓶ ꓟꓴ ꓡ ꓝꓲ ꓠꓹ ꓟ ꓐꓱ ꓶ 2007 ꓘꓳꓼ ꓗꓪ ꓐꓰ ꓪꓴꓸ ꓔꓴ ꓢꓲ 9 ꓦ 15 ꓠꓬꓲ ꓔꓯ “ꓟꓵꓽ ꓗꓳꓹ ꓓꓵ ꓓꓵ ꓓꓰ-ꓟꓳ-ꓗꓯ-ꓢꓰ ꓦꓬꓼ ꓠꓬꓲ” ꓐꓯ ꓢꓲ ꓬꓰ ꓩꓴ ꓡ ꓟ ꓥ ꓡꓳ꓿

ꓓꓰ-ꓟꓳ-ꓗꓯ-ꓢꓰ ꓠꓬ ꓑ ꓫꓬ ꓡꓰ ꓙꓵꓽ ꓟ ꓙꓵꓽ ꓚꓱꓹ꓾ ꓑ ꓫꓬ ꓠꓲꓹ ꓡꓶꓽ ꓔꓯ ꓒꓵꓽ ꓟ ꓐꓰ꓾ ꓑ ꓫꓬ ꓡꓰ ꓙꓵꓽ ꓪ ꓖꓶ ꓔꓸ ꓢꓴ ꓐꓴ ꓡꓰ ꓳ ꓫꓬ ꓙꓲ ꓖꓴ ꓐꓱ ꓶ ꓙꓵꓽ ꓚꓱꓹ ꓥ ꓡꓳ꓿

ꓟꓲ ꓠꓯ ꓗꓪ ꓙꓵꓽ ꓚꓱ, ꓮ ꓟꓬꓹ ꓙꓳ ꓟ ꓗꓪ꓾ ꓪ ꓔꓲꓸ ꓙꓵꓽ ꓚꓱꓹ꓾ ꓟꓯꓼ ꓙꓵꓽ ꓚꓱꓹ꓾ ꓕꓲ ꓜꓴ ꓕꓲꓽ ꓑ ꓔꓲ ꓙꓵꓽ ꓚꓱꓹ꓾ ꓗꓳ-ꓟꓴ-ꓠꓰꓼ ꓙꓵꓽ ꓚꓱꓹ ꓕꓱ ꓡꓱꓳ ꓫꓵꓽ ꓙꓵꓽ ꓚꓱꓹ ꓙꓳ ꓟ ꓗꓪ ꓐꓰ ꓑ ꓫꓬ ꓐꓴ ꓠꓲꓹ ꓟ ꓢˍ ꓟ ꓐꓰ꓾ ꓡꓲꓹ ꓗꓷ ꓟ ꓚꓳ ꓪꓴꓸ ꓙꓵꓽ ꓪ ꓙꓳ ꓟ ꓠꓬ꓾ “ꓓꓰ-ꓟꓳ-ꓗꓯ-ꓢꓰ” ꓙꓵꓽ ꓚꓱꓹ ꓥ ꓡꓳ ꓐꓰ ꓢꓪꓼ ꓓꓳ ꓡ ꓢꓲ꓾ ꓟꓲ ꓠꓯ ꓗꓴꓷꓼ ꓑ ꓫꓬ ꓐꓴ ꓠꓲꓹ ꓫꓵ ꓔꓬ ꓟ ꓙꓵꓽ ꓚꓱꓹ ꓥ ꓡꓳ꓿

100% ꓐꓲ ꓜꓲꓼ ꓟ ꓙꓵꓽ ꓚꓱꓹ ꓟꓽ ꓙꓳ ꓥ ꓟꓲ꓾ ꓡ ꓞꓳ ꓔꓯ ꓒꓵꓽ ꓟ꓾ ꓟꓽ ꓘꓳꓼ ꓟꓽ ꓒꓳꓹ ꓔꓱꓹ ꓜꓳ ꓟ ꓚꓱꓹ ꓔꓯ ꓢꓯꓼ ꓖꓶ ꓟ꓾ ꓞꓳ ꓫꓵꓽ ꓟꓽ ꓒꓯꓽ ꓟ꓾ ꓮ ꓙꓵꓽ ꓢꓴ ꓠꓬ ꓙꓵꓽ ꓗ ꓡꓳ ꓚ ꓪ ꓙꓲꓽ ꓙꓳ ꓟ ꓪ ꓓ ꓟ ꓙꓵꓽ ꓗ ꓥ ꓡꓳ꓿