ꓞꓲ ꓠꓲꓹ 2021 ꓘꓳꓼ 8 ꓦ ꓗꓪ ꓠꓬ꓾ ꓟꓲꓢꓢꓲꓳꓠꓮꓣꓬ ꓟꓳꓣꓢꓰ ꓕꓲ ꓦꓲ ꓠꓬ ꓴꓢꓮ ꓗꓪ ꓐꓰ ꓐꓶꓽ ꓟꓵꓽ ꓗꓪ ꓪꓴ-ꓢ ꓐꓯ ꓘꓶꓽ ꓐꓯ ꓟꓸ ꓢꓴ ꓬꓰ ꓠꓹ ꓟ ꓞꓽ ꓒꓳꓽ ꓜꓶ ꓢꓲꓸ ꓓꓳ ꓡ ꓗꓷ ꓟ ꓞꓲ ꓠꓲꓹ 2021 ꓘꓳꓼ ꓠꓬ꓾ 100 ꓘꓳꓼ ꓐꓲˍ ꓟ ꓕꓲ ꓘꓳꓼ ꓥ ꓡꓳ= ꓠꓯꓸ ꓘꓪ ꓗꓪ ꓟ ꓠꓬ꓾ 1974 ꓘꓳꓼ ꓕꓯ ꓟꓸ ꓒ ꓟꓳꓽ ꓬꓳ-ꓫꓴ ꓡꓰ ꓐꓳ ꓔꓸ ꓟ “Hidden Valley” ꓗꓪ ꓐꓰ ꓣꓴ ꓡꓶꓸ ꓔꓸ ꓟ ꓥ ꓡꓳ= ꓟꓲꓢꓢꓲꓠꓮꓣꓬ ꓟꓳꓣꓢꓰ ꓕꓲ ꓦꓲ ꓗꓪꓹ-ꓜꓴ ꓟꓵꓽ꓾ ꓧꓶꓽ ꓟꓵꓽ꓾ ꓟꓬ-ꓟ ꓟꓵꓽ꓾ ꓐꓰ ꓕꓮꓲ ꓟꓵꓽ ꓗꓪ ꓮ ꓡꓲ ꓟꓬꓱꓽ ꓬꓰ ꓗꓷ ꓟ ꓬꓲꓸ ꓟꓳ ꓡꓱꓽ ꓔꓯ ꓬꓲꓸ ꓘꓳꓼ ꓡꓳ ꓚ ꓓꓴꓸ ꓓꓴꓸ ꓤꓼ ꓕꓱ ꓡꓱ ꓢꓳ ꓟꓶ ꓓ ꓡꓳ=ꓮ ꓟꓶ ꓗꓪ ꓛꓲ ꓥ ꓟꓲ ꓬꓲꓸ ꓤ ꓬꓲꓸ ꓠꓱ ꓐꓴ ꓥ ꓟꓲ ꓪꓴ-ꓢ ꓟꓬꓱꓽ ꓬꓰ ꓢꓯꓼ ꓕꓵꓼ ꓔꓬ ꓢꓰ ꓡꓳ= ꓟꓳꓽ ꓟꓸ ꓒ ꓐꓴ ꓕꓲ ꓦꓲ ꓪꓴ-ꓢ ꓟꓬꓱꓽ ꓬꓰ ꓡ ꓟ 100 ꓘꓳꓼ ꓐꓲ ꓡꓰ ꓟ꓾ ꓞꓳ ꓤ ꓤꓶ 3 ꓤꓶ ꓗꓪ ꓛꓲ ꓡ ꓟ (1921-2021) ꓔꓯ ꓚꓲꓸ ꓟꓶ ꓓꓴ ꓕꓳ ꓶ ꓕꓱ ꓟ ꓡꓶꓸ ꓐꓳ ꓔꓸ ꓟ ꓥ ꓡꓳ= ꓛ ꓡꓰ ꓓꓴ ꓙꓳ ꓠꓬ ꓖ ꓖꓶ ꓡꓯ= ꓢꓳ ꓣꓴ ꓓꓴ ꓙꓳ ꓠꓬ ꓗꓹ ꓛꓲ ꓡꓳ=)
=======1921 – 8 ꓦ 13 ꓠꓬꓲ ꓕꓯ ꓟꓳꓽ ꓟꓸ ꓒ ꓓꓽ ꓟ ꓐꓰ꓾ ꓟꓸ ꓟ ꓓꓽ ꓟ (J. Russell and Gertrude Morse) ꓠꓬ꓾ ꓦ ꓐ 4 ꓟ ꓙꓳ ꓟ ꓞꓳ ꓫꓵꓼ ꓤꓼ ꓤꓽ ꓪꓴꓽ ꓮ-ꓒꓴ ꓬꓳ-ꓫꓴ (Eugene) ꓔꓯ ꓧꓳꓽ ꓔꓸ ꓢꓲ꓾ ꓬꓲꓸ ꓪ ꓢ ꓑꓸ ꓡꓼ ꓠꓬ ꓴꓢꓮ ꓗꓪ ꓐꓰ ꓗꓪꓹ-ꓜꓴ ꓟꓵꓽ ꓪꓴ-ꓢ ꓟꓬꓱꓽ ꓬꓰ ꓔꓶꓸ ꓙꓳ ꓟ ꓗꓪ ꓓꓵꓽ ꓓꓳ ꓡ ꓡꓳ= 1923 – 4 ꓦ 8 ꓠꓬꓲ ꓕꓯ ꓮ-ꓓꓶꓸ ꓬꓳ-ꓐꓰ (Robert) ꓔꓯ ꓦꓵ ꓡꓳ= 1926 – ꓐ-ꓕ ꓗꓪ ꓪꓴ-ꓢ ꓟꓬꓱꓽ ꓬꓰ ꓜꓴ ꓗꓪ ꓐꓰ ꓓꓳ ꓡ ꓢꓲ꓾ ꓪꓴ-ꓢ ꓔꓯ ꓦ ꓡꓱ ꓐꓳ ꓐꓳ ꓧꓶꓽ ꓒꓽ ꓟꓵꓽ ꓐꓶꓽ ꓓꓵꓽ ꓕꓲ ꓒꓳꓹ ꓬꓴ-ꓠ ꓗꓪ ꓪꓴ-ꓢ ꓐꓯ ꓘꓶꓽ ꓬꓲꓸ ꓪꓴꓸ ꓕꓴꓸ ꓟꓸ ꓖꓶ ꓙꓰ ꓡꓳ=1927- ꓗꓴꓷꓼ ꓫꓵꓽ ꓪꓴ ꓢꓴꓺ ꓡ ꓟ ꓑꓶꓸ ꓓꓴ꓾ ꓴꓢꓮ ꓗꓴꓷꓼ ꓝꓲꓺ ꓓꓴ ꓡꓰ ꓧꓶꓽ ꓒꓽ ꓟꓵꓽ ꓗꓪ ꓐꓰ ꓠꓲꓹ ꓞ ꓓꓳ ꓙꓰ ꓠꓹ ꓟ ꓕꓵꓼ ꓪ ꓛꓲ ꓡ ꓡꓳ= ꓖꓳ ꓟ ꓑꓶꓸ ꓓꓴ ꓪꓽ ꓚꓲ ꓪꓽ ꓐ ꓘꓱ ꓢꓲ꓾ ꓟꓬ-ꓟ ꓗꓴꓷꓼ ꓕꓲ ꓒꓳꓹ ꓗꓪ ꓛꓲ ꓙ ꓖꓴ ꓫꓱꓽ ꓟ 70 ꓠꓬꓲ꓾ ꓝꓮꓲ ꓴꓢꓮ ꓗꓪ ꓡꓽ ꓙꓰꓳ= 1929- ꓬꓴ-ꓠ ꓟꓵꓽ ꓗꓪ ꓝꓮꓲ ꓕꓲ ꓧꓪꓹ ꓡꓽ ꓡ ꓢꓲ꓾ ꓬ-ꓛꓲꓽ ꓗꓪ ꓪꓴ-ꓢ ꓟꓬꓱꓽ ꓬꓰ ꓔꓶꓸ ꓬꓲ ꓚꓰꓺ ꓬꓰ ꓡꓳ=1930 – ꓡꓲ-ꓢꓴ ꓫꓵꓽ ꓐꓴ ꓔꓯ ꓪꓴ-ꓢ ꓐꓯ ꓘꓶꓽ ꓟꓸ ꓖꓶ ꓪꓴꓸ ꓔꓴ ꓡꓳ=1931- ꓤꓽ ꓛꓵꓽ ꓤꓼ ꓗꓷ ꓡꓰ ꓟ ꓗꓪꓹ-ꓜꓴ ꓤ ꓟꓶꓼ ꓠꓬꓲꓽ ꓣꓳ (ꓮꓸ-ꓜꓲꓸ ꓣꓴ-ꓕꓱ ꓠꓬ 9 ꓘꓳꓼ꓾ ꓓ-ꓬꓯ-ꓟ ꓰ-ꓢꓲ-ꓕꓱ ꓠꓬ 4 ꓘꓳꓼ) ꓔꓯ ꓟꓯꓸ ꓫꓳ ꓙ ꓡꓳ= ꓬꓲꓸ ꓪ ꓠꓬ ꓟꓳꓽ ꓟꓸ ꓒ ꓐꓴ ꓕꓲ ꓦꓲ ꓗꓪ ꓪꓴꓽ ꓡ ꓢꓲ꓾ ꓗꓸ ꓠꓯꓸ ꓠꓬ ꓪꓴ-ꓢ ꓟꓬꓱꓽ ꓬꓰ ꓣꓱꓽ ꓙ ꓢꓴ ꓒꓬꓱꓼ ꓡ ꓡꓳ= (ꓮ-ꓜꓲꓸ ꓣꓴ-ꓕꓱ ꓠꓬ ꓟꓸ ꓟ ꓓꓳ-ꓣꓳ-ꓔꓲ ꓢꓲ-ꓔ-ꓡꓲ ꓐꓰ ꓕꓲ ꓛꓳ ꓥꓳꓽ ꓡꓶꓸ ꓟꓬꓱꓽ ꓬꓰ ꓔꓬ ꓟ ꓗꓪ 1949 ꓘꓳꓼ ꓕꓯ ꓥꓽ ꓐꓰ ꓦꓰꓼ ꓟ ꓠꓻ ꓢꓲꓸ ꓑꓴ-ꓔ-ꓳ ꓟꓵꓽ ꓗꓪ ꓫꓵꓻꓳ= ꓓ-ꓬꓯ-ꓟ ꓰ-ꓢꓲ-ꓕꓱ ꓟꓬ 1963 ꓘꓳꓼ ꓕꓯ ꓬ-ꓟꓲꓽ ꓙꓬ-ꓢꓰ ꓔꓯ ꓡꓯ ꓒꓯꓹ ꓦꓲ ꓕꓴꓽ ꓗꓪ ꓔꓲ ꓡꓳ=)1939 – ꓙꓲ-ꓢꓴ ꓢꓲ ꓤ ꓵꓺ ꓟꓬꓱꓺ 200 ꓣꓳ꓾ ꓪ ꓘꓴ ꓦꓲ 30 ꓟ ꓙꓳ ꓡ ꓡꓳ=1940 – 10 ꓦ 23 ꓠꓬꓲ ꓗꓪ꓾ ꓕꓳ-ꓐ-ꓡꓳ ꓬꓲ ꓙꓬ ꓙꓵꓽ ꓡ ꓢꓲ꓾ ꓖꓳ ꓗꓪ ꓫꓬꓹ ꓔꓸ ꓟ ꓦꓲ ꓐꓰ ꓖꓴꓽ ꓙꓴꓽ ꓮ ꓙꓵꓽ ꓐꓬ ꓡꓰꓳ= ꓖꓳ ꓕꓲ ꓘꓳꓼ 12 ꓦ ꓕꓯ ꓠꓳꓸ ꓟꓲꓽ ꓡꓳ ꓗꓪ ꓚꓲꓸ ꓡ ꓢꓲ꓾ 2 ꓧꓪꓹ ꓕꓲ ꓧꓪꓹ ꓟꓵ ꓗꓳ ꓓꓵ ꓓꓵ ꓟꓯꓼ ꓢꓰꓼ ꓡꓯ ꓘꓳ ꓟ ꓦꓬꓼ ꓠꓬꓲ ꓚ ꓫꓵ ꓫꓵꓺ 6 ꓘꓳꓼ ꓖꓳ ꓗꓪ ꓔꓬ ꓗꓷꓳ= 1942 – 45 2 ꓧꓪꓹ ꓕꓲ ꓧꓪꓹ ꓟꓵ ꓗꓳ ꓓꓵ ꓓꓵ ꓟꓯꓼ ꓢꓰꓼ ꓡꓯ ꓘꓳ ꓟ ꓦꓬꓼ ꓠꓬꓲ ꓥ ꓡꓳ= ꓟꓳꓽ ꓟꓸ ꓒ ꓐꓴ ꓕꓲ ꓦꓲ ꓠꓬ ꓬꓲꓸ ꓐꓽ ꓢꓲ ꓟ ꓡ ꓞꓳ ꓐꓴ ꓐꓰ ꓙ ꓡꓯ ꓘꓳ ꓚꓱꓹ ꓬꓰ ꓟꓽ ꓠ ꓬꓰꓳ= ꓟꓸ ꓒ ꓬꓳ-ꓫꓴ ꓐꓰ ꓬꓳ-ꓐꓰ ꓠꓬꓲꓽ ꓫꓵꓸ ꓢꓴ ꓠꓬ꓾ ꓧꓪ ꓒꓴ ꓟꓯꓼ ꓙꓱ ꓦꓲ ꓞꓰ ꓡ ꓟ ꓔꓯ ꓚꓬꓴꓹ ꓙ ꓟꓬꓱꓽ ꓬꓰ ꓠꓹ ꓟ ꓕꓲ ꓟꓵꓽ ꓕꓲ ꓟꓵꓽ ꓚꓳ ꓙꓰ ꓡꓳ= ꓬꓲꓸ ꓪ ꓙꓰ ꓛꓲ ꓬꓰ ꓟ ꓟꓵꓽ ꓗꓪ ꓪꓴ-ꓢ ꓐꓯ ꓘꓶꓽ ꓟꓸ ꓖꓶ ꓗꓷ ꓠꓬꓲ ꓙꓲ-ꓢꓴ ꓢꓲ ꓤ 6000 ꓣꓳ ꓛꓲ ꓟꓬꓽ ꓡ ꓡꓳ=1946 – ꓟꓬꓱꓽ ꓚ ꓫꓵ ꓫꓵ ꓬꓰ ꓡ ꓟ 9 ꓘꓳꓼ ꓡꓳꓼ ꓡꓰ ꓠꓬ꓾ ꓦꓲ ꓗꓪ ꓪꓴꓽ ꓧꓶ ꓠꓽ ꓠꓹ ꓟ ꓴꓢꓮ ꓗꓪ ꓡꓽ ꓙꓰ ꓡꓳ= 1948- ꓟꓸ ꓒ ꓬꓳ-ꓫꓴ ꓐꓰ ꓬꓳ-ꓐꓰ ꓠꓬꓲꓽ ꓣꓳ ꓡꓱꓸꓼ ꓦꓲ ꓢꓲ ꓟ ꓧꓪ ꓡꓳ= ꓬꓲꓸ ꓪ ꓦꓲ ꓢꓲ ꓟ ꓐꓴ ꓔꓯ ꓧꓳꓽ ꓔꓸ ꓢꓲꓸ ꓪꓴ-ꓢ ꓟꓬꓱꓽ ꓬꓰ ꓔꓶꓸ ꓗꓪ ꓡꓽ ꓡ ꓡꓳ=1949- ꓧꓶꓽ ꓒ ꓟꓵꓽ ꓗꓪ ꓗꓳ-ꓟꓴ-ꓠꓰꓼ ꓟꓯꓼ ꓐꓴ ꓗꓪꓼ ꓡ ꓕꓯ ꓠꓱꓸ ꓐꓯꓼ ꓕꓲ ꓦꓲ ꓢꓴ ꓮ ꓙꓵꓽ ꓠꓬ ꓛꓰꓹ ꓡꓲꓹ ꓙꓰ ꓪ ꓥ ꓟꓲ꓾ ꓟꓳꓽ ꓟꓸ ꓒ ꓓꓽ ꓟ ꓠꓬ ꓕꓲ ꓣꓳ ꓔꓵꓸꓼ ꓖꓳ ꓗꓪ ꓔꓬ ꓒꓰꓹ ꓠ ꓗꓷ ꓡꓰꓳ= ꓗꓸ ꓠꓯꓸ ꓘꓱ-ꓟꓲꓽ ꓡꓳ ꓒꓱ ꓔꓯ ꓗꓳ-ꓟꓴ-ꓠꓰꓼ ꓐꓴ ꓡꓰ ꓓꓶꓽ ꓧꓪꓸ ꓡꓰ ꓕꓯ ꓟꓯꓼ ꓐꓴ ꓡꓰ ꓟꓳꓽ ꓟꓸ ꓒ ꓓꓽ ꓟ ꓔꓯ ꓣꓴ ꓪ ꓡꓰꓳ= ꓠꓱꓸ ꓐꓯꓼ ꓕꓲ ꓦꓲ ꓢꓴ ꓮ ꓙꓵꓽ ꓠꓬ ꓛꓰꓹ ꓡꓲꓹ ꓙꓰ ꓡꓳ= 1950-52 -ꓗꓳ-ꓟꓴ-ꓠꓰꓼ ꓙꓵꓽˍ ꓟ ꓟꓵꓽ ꓗꓪ ꓜꓰ ꓒꓰꓹ ꓟ ꓟꓳꓽ ꓟꓸ ꓒ ꓓꓽ ꓟ ꓔꓯ 1951 ꓘꓳꓼ ꓕꓯ ꓟꓯꓼ ꓡꓰ ꓣꓴ ꓡꓴꓽ ꓔꓸ ꓡꓳ= ꓬꓲꓸ ꓓꓳꓽ ꓮ ꓫꓵꓽ ꓥ ꓟꓲ ꓟꓽ ꓑ ꓙ ꓡꓻꓳ= 1952 ꓘꓳꓼ 6 ꓦ ꓟ ꓘꓴꓽ ꓗꓪ ꓟꓳꓽ ꓟꓸ ꓟ ꓓꓽ ꓟ ꓐꓰ ꓬꓲꓸ ꓤꓽ ꓮ-ꓘꓰ ꓬꓳ-ꓢꓷ ꓐꓴ ꓴꓢꓮ ꓗꓪ ꓡꓽ ꓙꓰ ꓙ ꓖꓴ ꓗꓪ꓾ ꓧꓳ-ꓗꓳ (ꓧꓳꓠꓖ ꓗꓳꓠꓖ) ꓡꓳ ꓒꓱ ꓗꓪ ꓕꓲ ꓕꓳꓸ ꓠꓽ ꓔꓬ ꓕꓯ ꓟꓳꓽ ꓟꓸ ꓒ ꓠꓬ ꓗꓳ-ꓟꓴ-ꓠꓰꓼ ꓕꓳ ꓦꓲ ꓗꓪ ꓐꓰ ꓡꓲꓹ ꓡ ꓢꓲ꓾ ꓜꓲ ꓡꓯ ꓘꓳ ꓟꓶ ꓡꓳ= 1953 ꓘꓳꓼ ꓗꓪ ꓠꓬ ꓟꓳꓽ ꓟꓸ ꓒ ꓓꓽ ꓟ ꓐꓰ ꓟꓸ ꓟ ꓓꓽ ꓟ ꓠꓬ ꓟꓬ-ꓟ ꓗꓴꓷꓼ ꓗꓪ ꓪꓴ-ꓢ ꓐꓯ ꓘꓶꓽ ꓟꓸ ꓖꓶ ꓠꓹ ꓟ ꓡ ꓗꓷꓳ=1950-64 ꓪꓴ-ꓢ ꓟꓬꓱꓽ ꓬꓰ ꓚꓱꓹ ꓦꓲ ꓚꓰꓺ ꓔꓯ ꓟꓬ-ꓟ ꓗꓴꓷꓼ꓾ ꓑꓴ-ꓔ-ꓳ ꓗꓪ ꓚꓲꓸ ꓡ ꓡꓳ= ꓗꓳ ꓟꓵꓽ ꓗꓪ ꓔꓬ ꓟ ꓡꓲ-ꓢꓴ꓾ ꓣ-ꓪ 20000 ꓣꓳ ꓛꓲ ꓔꓯ ꓓꓰꓺ ꓟꓵꓽ ꓑꓴ-ꓔ-ꓳ ꓗꓪ ꓚꓲꓸ ꓛꓲ ꓡ ꓠꓹ ꓟ ꓢꓯꓼ ꓖꓶ ꓢꓲꓸ ꓔꓶ ꓜꓽ ꓔꓶ ꓓꓳ ꓚꓱꓹ ꓟꓸ ꓖꓶ ꓡꓳ= ꓑꓴ-ꓔ-ꓳ ꓓꓰꓺ ꓟꓵꓽ ꓗꓪ ꓘꓴ ꓜꓲꓼ ꓞꓳ 30 ꓟꓽ ꓞꓲ ꓔꓶ ꓗꓷ ꓡꓳ= ꓖꓳ ꓕꓲ ꓟꓵꓽ ꓠꓬ ꓟꓬ-ꓟ ꓗꓴꓷꓼ ꓗꓪ ꓐꓰ ꓪꓴꓽ ꓟꓴ ꓡꓳꓹ ꓬꓰ ꓟ ꓘꓹ ꓒꓱ ꓐꓴ ꓗꓪ ꓐꓰ ꓕꓲ ꓟ ꓒꓬꓱꓼ ꓡ ꓡꓳ=1965 – 12 ꓦ ꓕꓯ ꓟꓯꓼ ꓜꓲꓽ ꓗꓽ ꓠꓯ-ꓪꓰꓸ ꓡꓰ ꓧꓳꓽ ꓪꓴꓸ ꓟꓴ ꓟ ꓢꓴ-ꓫꓬ-ꓡꓲꓼ ꓗꓴꓷꓼ ꓙꓵꓽ ꓜꓴ ꓡꓰ꓾ ꓟꓳꓽ ꓟꓸ ꓒ ꓐꓴ ꓕꓲ ꓦꓲ ꓔꓯ ꓟꓬ-ꓟ ꓗꓴꓷꓼ ꓗꓪ ꓐꓰ ꓓꓳ ꓙꓰ ꓠꓹ ꓟ ꓕꓵꓼ ꓪ ꓓꓳ ꓩꓴ ꓡ ꓡꓳ= ꓦꓲ ꓘꓴ ꓡ ꓞꓳ ꓐꓴ ꓗꓪ ꓠꓻ ꓓꓱꓽ ꓠꓻ ꓢꓴ ꓙꓳ ꓟ꓾ ꓐꓬꓱ ꓦꓲ ꓜꓶꓽ ꓟꓽ ꓐ ꓡ ꓢꓴ ꓙꓳ ꓟ ꓑꓶꓸ ꓓꓴ꓾ ꓐꓬꓱ ꓦꓲ ꓚꓱꓹ ꓗꓪ ꓐꓰ ꓟꓽ ꓥ ꓥ꓾ ꓢꓲꓹ ꓠꓯ ꓟꓵꓽ ꓗꓪ ꓐꓰ ꓲ-ꓓꓲ-ꓬ ꓟꓵꓽ ꓗꓪ ꓓꓵꓽ ꓙꓰ ꓠꓹ ꓟ ꓓꓵꓽ ꓙ ꓞꓷꓹ ꓗꓷꓳ= ꓖꓳ ꓟ ꓗꓪ ꓐꓰ 4000 ꓣꓳ ꓟꓽ ꓞꓲ ꓟ ꓡꓲ-ꓢꓴ ꓙꓲ-ꓢꓴ ꓢꓲ ꓤ ꓐꓴ ꓐꓰ ꓕꓲ ꓛꓳ ꓲ-ꓓꓲ-ꓬ ꓟꓵꓽ ꓘꓶꓽ ꓗꓪ ꓓꓳ ꓙꓰ ꓡꓳ= ꓲ-ꓓꓲ-ꓬ ꓟꓵꓽ ꓗꓪ ꓓꓵꓽ ꓙꓵꓽ ꓪ ꓦꓲꓢꓮ ꓟꓽ ꓖꓶ ꓡ ꓠꓬꓲ꓾ ꓡ ꓞꓳ ꓟꓽ ꓔꓬ ꓟ ꓟꓵꓽ ꓖꓳ ꓕꓲ ꓟꓵꓽ ꓗꓪ ꓞꓳ ꓘꓹ ꓔꓶ ꓢꓲꓸ 6 ꓘꓳꓼ ꓔꓬ ꓗꓷꓳ= ꓘꓴ ꓜꓲꓼ ꓞꓳ 20 ꓟꓽ ꓞꓲ ꓔꓶ ꓪ ꓡꓰꓳ=1972 – ꓟꓬ-ꓟ ꓗꓴꓷꓼ ꓐꓰ ꓲ-ꓓꓲ-ꓬ ꓗꓴꓷꓼ ꓟꓵꓽ ꓫꓸ ꓗ ꓙꓺ ꓡ ꓡꓳ= ꓖꓳ ꓕꓯ ꓟꓳꓽ ꓟꓸ ꓒ ꓐꓴ ꓔꓬ ꓟ ꓕꓲ ꓟꓵꓽ ꓠꓬ ꓟꓬ-ꓟ ꓗꓴꓷꓼ ꓘꓴꓽ ꓠꓯꓸꓼ ꓗꓪ ꓗꓷ ꓡꓰꓳ= ꓖꓳ ꓟ ꓑꓶꓸ ꓓꓴ ꓟꓬ-ꓟ ꓗꓴꓷꓼ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓖꓳ ꓕꓲ ꓟꓵꓽ ꓗꓪ ꓐꓰ ꓓꓳ ꓙꓰ ꓠꓹ ꓟ ꓕꓵꓼ ꓪ ꓖꓶ ꓡ ꓡꓳ= ꓗꓴꓷꓼ ꓙꓵꓽ ꓪ ꓙꓳ ꓢꓴ ꓐꓴ ꓚꓱꓹ ꓧꓳꓽ ꓖꓶ ꓟ ꓡꓳ ꓚꓺ ꓑꓲ-ꓠꓳ-ꓜꓳꓼ ꓗꓪ ꓐꓰ ꓕꓲ ꓝꓸ ꓟ-ꓓꓲ-ꓡꓲ꓾ ꓬꓥ-ꓖꓳꓥ꓾ ꓕꓮꓲ ꓗꓴꓷꓼ ꓐ-ꓗꓳꓼ꓾ ꓝꓮꓲ ꓴꓢꓮ ꓗꓪ ꓡꓽ ꓛꓲ ꓬꓰ ꓡꓳ= 1973- ꓟꓸ ꓒ ꓬꓳ-ꓫꓴ ꓐꓰ꓾ ꓬꓳ-ꓐꓰ ꓐꓴ ꓠꓬ꓾ ꓬꓲꓸ ꓪ ꓤꓽ ꓐꓴ ꓐꓰ ꓕꓲ ꓛꓳ ꓕꓮꓲ ꓗꓴꓷꓼ ꓗꓪ ꓪꓴ-ꓢ ꓐꓯ ꓘꓶꓽ ꓟꓸ ꓪꓴꓸ ꓔꓴ ꓡ ꓡꓳ= ꓕꓮꓲ ꓟꓵꓽ ꓡꓳ ꓪꓴꓸ ꓕꓲ ꓒꓳꓹ ꓗꓪ ꓔꓬ ꓟ ꓡꓲ-ꓢꓴ 20000 ꓣꓳ ꓐꓴ ꓔꓯ ꓪꓴ-ꓢ ꓐꓯ ꓘꓶꓽ ꓟꓸ ꓖꓶ ꓠꓹ ꓟ꓾ ꓛꓰꓹ-ꓟꓮꓲꓽ ꓡꓳ ꓒꓱ ꓪꓴ-ꓢ ꓟꓬꓱꓽ ꓬꓰ ꓚꓱꓹ ꓗꓪ ꓦꓲ ꓚꓰꓺ ꓔꓶ ꓔꓸ ꓡꓳ=1985- 12 ꓘꓳꓼ ꓗꓳꓸ ꓗꓷ ꓠꓬ꓾ ꓡꓲ-ꓢꓴ ꓞꓳ ꓘꓹ 70 ꓘꓹ꓾ ꓞꓳ ꓣꓳ 3000 ꓣꓳ ꓠꓬ ꓙꓲ-ꓢꓴ ꓢꓲ ꓤ ꓒꓬꓱꓼ ꓡ ꓡꓳ= ꓟꓳꓽ ꓟꓸ ꓒ ꓐꓴ ꓦꓲ ꓘꓴ ꓡ ꓞꓳ ꓥ ꓟꓲ ꓪꓴꓽ ꓟꓬꓽ ꓡ ꓡꓳ= ꓟꓸ ꓒ ꓬꓳ-ꓫꓴ ꓐꓰ ꓬꓳ-ꓐꓰ ꓤ ꓠꓱ 12 ꓣꓳ ꓗꓪ ꓐꓰ 8 ꓣꓳ ꓠꓬ ꓪꓴ-ꓢ ꓟꓬꓱꓽ ꓗꓪ ꓟꓬꓱꓽ ꓬꓰ ꓔꓬ ꓡꓳ= ꓕꓲ ꓐꓱ ꓠꓬ ꓕꓳ ꓶ ꓢꓳ ꓔꓬ ꓢꓰꓽ ꓳ= ꓪꓴ-ꓢ ꓟꓬꓱꓽ ꓬꓰ ꓔꓶꓸ ꓗꓪ꓾ ꓪꓴ-ꓢ ꓐꓯ ꓘꓶꓽ ꓶꓼ ꓓꓳ ꓫꓱꓹ ꓓꓳ ꓚꓺ ꓟꓸ ꓖꓶ ꓟ꓾ ꓕꓳ ꓶ ꓫꓬꓹ ꓟꓬꓱꓽ꓾ ꓧꓳꓽ ꓪꓴꓸ ꓟꓴ ꓚꓱꓹ ꓢꓳ ꓜꓲꓼ ꓓꓴ꓾ ꓘꓴ ꓜꓲꓼ ꓞꓳ ꓔꓶ ꓚꓱꓹ꓾ ꓘꓹ ꓤ ꓡꓳ ꓒꓱ ꓪꓴꓽ ꓟꓴ ꓡ ꓚꓱꓹ ꓟꓬꓱꓽ ꓬꓰ ꓔꓬ ꓡꓳ= ꓟꓬ-ꓟ ꓗꓴꓷꓼ ꓡꓳꓸ ꓪꓴꓸ ꓕꓲ ꓟꓵꓽ ꓗꓪ ꓔꓬ ꓟ ꓙꓲ-ꓢꓴ ꓢꓲ ꓤ ꓐꓴ ꓐꓰ ꓥ ꓟꓲ ꓐ ꓡ ꓕ ꓑꓳꓸ ꓙ ꓡꓯ ꓘꓳ ꓢꓲ꓾ ꓢꓯꓼ ꓖꓶ ꓖꓴ ꓟꓳꓸ ꓙ ꓟ ꓟꓬꓱꓽ ꓬꓰ ꓔꓬ ꓡꓳ= =======Ref: Exodus to a Hidden Valley