ꓟꓲ ꓠꓯ ꓗꓴꓷꓼ ꓜꓴ ꓦꓲ ꓧꓶꓸ ꓕꓯꓽ ꓟꓬ-ꓟ ꓐꓴ ꓠꓲꓹ ꓡꓶꓽ ꓟꓳꓸ ꓖꓶꓽ ꓜꓲꓼ ꓓꓴ

2022 ꓘꓳꓼ 2 ꓦ 19 ꓠꓬꓲ ꓕꓯꓽ ꓠꓰ-ꓬꓴ-ꓬꓳꓼ ꓡꓳ ꓒꓱ ꓗꓪ ꓙꓳˍ ꓟ ꓟꓲ ꓠꓯ ꓗꓴꓷꓼ ꓜꓴ ꓦꓲ ꓟꓲꓸ ꓕꓯꓽ ꓗꓪ ꓟꓬ-ꓟ ꓑ ꓫꓬ ꓐꓴ ꓠꓲꓹ ꓡꓶꓽ ꓟꓳꓸ ꓖꓶꓽ ꓜꓲꓼ ꓓꓴ ꓕꓲ ꓟ ꓬꓰ ꓗꓷꓳ꓿

ꓟꓬ-ꓟ ꓗꓴꓷꓼ ꓗꓪ ꓫꓵꓻ ꓢꓴ꓾ ꓐꓱ ꓓꓴꓽ ꓗꓪ ꓡꓴꓽ ꓟꓶ ꓡꓰ ꓢꓴ ꓐꓯ ꓖꓴ ꓟꓽ ꓓ ꓙꓳ ꓡ ꓟ 1 ꓘꓳꓼ ꓐꓲ ꓡꓰ ꓗꓪ ꓛꓲ “ꓙꓽ ꓫꓸ ꓙ ꓔꓬ ꓡꓳ” ꓐꓯ ꓟ ꓕꓳ ꓶˍ ꓡꓰꓽ ꓐꓳ ꓗꓴꓸ ꓟ ꓟꓲ ꓠꓯ ꓗꓴꓷꓼ ꓜꓴ ꓔꓯ “ꓫꓵꓻ ꓟꓳ ꓮ ꓟꓬ ꓟꓳꓻ ꓛꓻ ꓔꓬ ꓢꓰꓽ ꓡ?” ꓐꓰ ꓟꓬ-ꓟ ꓑ ꓫꓬ ꓐꓴ ꓡꓰꓽ ꓠꓻ ꓠꓬꓲ ꓘꓶꓽ ꓢꓷꓸ ꓙ ꓟꓴ ꓙ ꓩꓴ ꓡˍ ꓡꓳ꓿

ꓝꓮꓲ ꓟꓬ-ꓟ ꓗꓴꓷꓼ ꓗꓪ ꓟꓯꓼ ꓡꓰ ꓙꓵꓽ ꓪ ꓦꓴ ꓡ ꓟ ꓑꓶꓸ ꓓꓴ ꓫꓵꓻ ꓢꓴ꓾ ꓫꓸ ꓡꓰ ꓢꓴ꓾ ꓐꓱ ꓓꓴꓽ ꓗꓪ ꓡꓴꓽ ꓟꓶ ꓡꓰ ꓢꓴ ꓐꓴ ꓐꓱ ꓶ ꓪ ꓘꓴ ꓙ ꓟ ꓐꓰ꓾ ꓓꓵꓽ ꓙ ꓛꓲ ꓡ ꓓꓴ ꓢꓲꓹ ꓪꓰ ꓔꓲꓺ ꓖꓶˍ ꓟ ꓬꓰ ꓗꓷꓳ꓿

ꓟꓲ ꓠꓯ ꓗꓴꓷꓼ ꓜꓴ ꓗꓪ ꓣ-ꓫꓸ ꓐꓰ ꓧꓶꓽ ꓒꓽ ꓐꓴ ꓕꓲ ꓛꓱꓽ꓾ ꓴꓢꓮ ꓐꓰ ꓬꓲ ꓛꓳ ꓒꓯꓹ ꓐꓴ ꓕꓲ ꓛꓱꓽ ꓦꓰꓼ ꓔꓬ ꓢꓲꓸ ꓗꓴꓷꓼ ꓮ ꓟꓬꓹ ꓐꓱ ꓶ ꓫꓵꓽ ꓪꓴꓻ ꓫꓬ ꓡꓰ ꓚꓱꓹ ꓧꓪ ꓪ ꓟꓽ ꓓ ꓗꓷ ꓡꓰ ꓔꓬ ꓡꓳ꓿

“ꓟꓯꓼ ꓔꓯ ꓬꓰ ꓙ ꓢꓴ ꓗꓴꓷꓼ ꓐꓴ ꓠꓬ ꓜꓲꓽ ꓜꓲꓽ ꓑꓶꓸ ꓑꓶꓸ ꓬꓰ ꓙ ꓔꓬ ꓕꓯꓽ ꓑ ꓫꓬ ꓔꓯ ꓬꓰ ꓙ ꓢꓴ ꓐꓴ ꓠꓬ ꓙꓽ ꓫꓸ ꓢꓴˍ ꓡꓰꓽ ꓗꓷ ꓡꓰ ꓖꓴꓳ” ꓐꓰ ꓖꓳ ꓗꓪ ꓜꓲꓼ ꓛꓲ ꓡ ꓢꓴ ꓕꓲ ꓣꓳ ꓡꓰ ꓐꓯˍ ꓡꓳ꓿

ꓗꓴꓷꓼ ꓮ ꓟꓬꓹ ꓠꓬ ꓟꓲ ꓠꓯ ꓗꓴꓷꓼ ꓜꓴ ꓔꓯ “ꓙ ꓫꓸ ꓜꓴ” ꓐꓰ ꓫꓸ ꓝꓲꓸ ꓢꓲ꓾ ꓦ ꓡꓱ ꓐꓳ ꓠꓲꓹ ꓒꓰꓼ ꓡꓰ ꓔꓬ ꓟ ꓦꓬꓼ ꓠꓬꓲ ꓥ ꓡꓳ꓿

ꓐꓬꓱꓽ꓾ ꓔꓯ-ꓣꓲ-ꓪꓲꓸ