ꓕꓳ ꓶ ꓕꓱ ꓟ ꓠꓬ ꓡꓲ-ꓢꓴ ꓤ ꓐꓴ ꓐꓰ꓾ ꓡꓲ-ꓢꓴ ꓕꓳ ꓶ ꓵ ꓐ ꓡ ꓢꓴ ꓐꓴ ꓟꓲ ꓠꓯ ꓗꓴꓷꓼ ꓙꓵꓽ ꓚꓱꓹ ꓬꓲꓸ ꓟꓳ ꓡꓱꓽ ꓢꓷꓸ ꓡꓰ ꓠꓹ ꓟ ꓐꓳ ꓔꓸ ꓡꓳ= ꓚꓲ ꓛꓬ ꓔꓬ ꓟ ꓗꓴꓷꓼ ꓫꓵꓽ ꓪꓴ ꓔꓯ ꓢꓷꓸ ꓢꓴ꓾ ꓙꓲ ꓟ ꓧꓳꓽ ꓢꓴ ꓟꓴ ꓢꓴ ꓐꓰ ꓑ ꓫꓬ ꓒꓬꓱꓼ ꓡ ꓠꓹ ꓟ ꓥꓳ ꓡꓳꓸ ꓡꓳ= ꓡꓲ-ꓢꓴ ꓐꓴ ꓢꓷꓸ ꓟ ꓡꓲꓽ ꓒꓰꓼ ꓐꓰ ꓓꓵꓽ ꓙ ꓚꓱꓹ ꓡꓳ ꓚ ꓔꓯꓺ ꓐꓳ ꓔ ꓡꓳ=
ꓡꓲ-ꓢꓴ ꓐꓴ ꓠꓬ ꓔꓬ ꓟꓵꓽ ꓗꓴꓷꓼ ꓓꓽ ꓟ 4 ꓗꓴꓷꓼ ꓗꓪ ꓬꓲ ꓚꓰꓺ ꓔꓶ ꓢꓲꓸ ꓢꓯꓸ ꓔꓬ ꓞꓳ ꓙꓳ ꓔꓬ ꓡꓳ= ꓧꓶꓽ ꓒ ꓗꓴꓷꓼ (China)꓾ ꓲ-ꓓꓲ-ꓬ (India) ꓗꓴꓷꓼ꓾ ꓟꓬ-ꓟ (Myanmar) ꓗꓴꓷꓼ ꓐꓰ ꓕꓮꓲ (Thailand) ꓗꓴꓷꓼ ꓥ ꓡꓳ= ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓠꓬ ꓧꓶꓸ ꓕꓯ ꓡꓲ-ꓢꓴ ꓤ ꓐꓴ ꓟꓽ ꓛꓲ ꓠꓬꓲ ꓟ ꓗꓳ ꓟꓵꓽ ꓪ ꓚꓲ ꓟꓽ ꓙꓳ ꓐꓯ ꓟ ꓡꓰ ꓐꓰ꓾ ꓡꓲ-ꓢꓴ ꓤ ꓐꓴ ꓠꓬ ꓗꓴꓷꓼ ꓮ ꓟꓬꓹ ꓗꓪ ꓙꓰ ꓛꓲ꓾ ꓔꓬ ꓛꓲ ꓬꓰ ꓡꓳ= ꓖꓳ ꓡꓱ ꓥ ꓟꓲ꓾ ꓡꓲ-ꓢꓴ ꓮ ꓟꓬꓹ ꓟ ꓒꓵꓽ ꓒ ꓟꓵꓽ ꓠꓬ ꓕꓱ ꓗꓴꓷꓼ ꓓꓽ ꓟ (4) ꓟ ꓗꓪ ꓥ ꓡꓳ=
ꓕꓳ ꓶ ꓕꓱ ꓟ ꓐꓳ ꓟ ꓦꓬꓼ ꓠꓬꓲ ꓗꓪ ꓡꓲ-ꓢꓴ ꓐꓴ ꓔꓬ ꓟ ꓗꓴꓷꓼ ꓐꓴ ꓗꓪ ꓧꓶꓽ ꓗꓴꓷꓼ ꓠꓬ Communism ꓗꓴꓷꓼ ꓙꓵꓽ ꓚꓱꓹ ꓔꓯ ꓣꓱꓽ ꓔꓬ ꓡꓳ= ꓟꓯꓼ ꓠꓬ ꓙꓵꓽ ꓪ ꓬꓲ ꓚꓰꓺ ꓙꓳ ꓥ ꓡꓳ= ꓲ-ꓓꓲ-ꓬ ꓠꓬ Federal Democracy ꓣꓱꓽ ꓔꓬ ꓡꓳ= ꓟꓬ-ꓟ ꓗꓴꓷꓼ ꓠꓬ ꓟꓯꓼ ꓙꓵꓽ ꓚꓱꓹ ꓣꓱꓽ ꓔꓬ ꓡꓳ= 2021 ꓘꓳꓼ 2 ꓦ 1 ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲ ꓟꓯꓼ ꓡꓰ ꓑ ꓫꓬ ꓙꓵꓽ ꓪ ꓦꓴ ꓔ ꓢꓲ꓾ ꓑ ꓫꓬ ꓐꓴ ꓠꓬ Federal Democracy ꓣꓱꓽ ꓠꓹ ꓟ ꓠꓲꓹ ꓡꓱ ꓔꓬ ꓡꓳ= ꓝꓮꓲ ꓕꓮꓲ ꓗꓴꓷꓼ ꓗꓪ ꓠꓬ ꓪ ꓔꓲꓸ ꓙꓵꓽ ꓚꓱꓹ Monarchy ꓐꓰ Democracy ꓙꓵꓽ ꓚꓱꓹ ꓔꓺ ꓫꓳꓹ ꓔꓸ ꓟ ꓙꓵꓽ ꓚꓱꓹ ꓣꓱꓽ ꓔꓬ ꓡꓳ= ꓕꓮꓲ ꓟꓵꓽ ꓗꓪ ꓥ ꓟꓲ ꓪ ꓔꓲꓸ ꓐꓰ꓾ ꓟꓯꓼ ꓡꓰ ꓑ ꓫꓬ ꓙꓵꓽ ꓪ ꓦꓴ ꓔꓸ ꓟ ꓦꓬꓼ ꓠꓬꓲ ꓥ ꓡꓳ= ꓕꓱ ꓟ ꓔꓯ ꓡꓳꓸ ꓠꓬꓲ ꓕꓯꓽ ꓡꓲ-ꓢꓴ ꓐꓴ ꓠꓬ ꓪ ꓔꓲꓸ ꓙꓵꓽ ꓚꓱꓹ꓾ ꓟꓯꓼ ꓙꓵꓽ ꓚꓱꓹ ꓐꓰ Federal Democracy *(ꓝꓯ-ꓓ-ꓬꓯ ꓓꓰ-ꓟꓳ-ꓗꓯ-ꓢꓲ) ꓙꓵꓽ ꓚꓱꓹ ꓔꓯ ꓔꓳꓹ ꓜꓳꓽ ꓔꓬ ꓟ ꓞꓳ ꓫꓵꓽ ꓕꓲ ꓫꓵꓽ ꓥ ꓡꓳ=
ꓗꓴꓷꓼ ꓓꓽ ꓟ (4) ꓗꓴꓷꓼ ꓗꓪ ꓡꓲ-ꓢꓴ ꓐꓴ ꓠꓬ꓾ ꓟꓵꓽ ꓘꓶꓽ ꓟꓵꓽ ꓡꓯꓼ ꓗꓪ ꓔꓬ ꓢꓴ ꓥ ꓡꓳ= ꓡꓳ ꓒꓱ ꓗꓪ ꓔꓬ ꓛꓲ ꓬꓰ ꓢꓴ ꓟꓽ ꓟꓬ= ꓖꓳ ꓟ ꓑꓶꓸ ꓓꓴ ꓗꓴꓷꓼ ꓫꓵꓽ ꓪꓴ ꓐꓰ ꓗꓴꓷꓼ ꓙꓵꓽ ꓚꓱꓹ ꓔꓯ ꓮ ꓘꓶꓸ ꓚꓲꓸ ꓚ ꓢꓷꓸ ꓐ ꓡ ꓢꓴ ꓟꓽ ꓙꓳ ꓐꓯ ꓓ ꓡꓳ= ꓮ ꓡꓲꓳ ꓫꓵꓽ ꓢꓲꓽ ꓒ ꓓꓳ ꓡ ꓥ ꓟꓲ ꓡꓲ-ꓢꓴ ꓐꓴ ꓔꓬ ꓟꓵꓽ ꓗꓪ ꓠꓽ ꓫ ꓟꓳ ꓫ ꓚꓬ ꓬꓰ ꓖꓶ ꓡ ꓟ ꓟꓽ ꓥ ꓠꓬ꓾ ꓙꓲ ꓟ ꓟꓽ ꓙꓳ ꓐꓰ ꓓꓵꓽ ꓙ ꓡꓳ= ꓖꓳ ꓟ ꓑꓶꓸ ꓓꓴ “ꓢꓲꓽ ꓒ ꓶꓽ ꓟ ꓙꓲ꓾ ꓬꓲ ꓙꓬ ꓠꓶꓽ ꓟ ꓙꓲ” ꓐꓯ ꓢꓲꓸ ꓔꓬ ꓗꓳꓸ ꓡ ꓡꓳ= ꓙꓵꓽ ꓢꓴ ꓗꓪꓼ ꓢꓴ ꓐꓰ ꓶꓽ ꓤ ꓗꓪ ꓔꓬ ꓠꓲꓹ ꓫꓵ ꓟ ꓠꓲꓹ ꓟ ꓒ ꓐꓲ ꓙꓳ ꓡꓳ= ꓕꓱ ꓟ ꓔꓯ ꓡꓲ-ꓢꓴ ꓟꓸ ꓟꓲꓽ ꓚꓲꓸ ꓚ ꓢꓲꓸ ꓐꓳ ꓢꓴ Zack Michelle ꓡꓰ Far from the Ruler ꓐꓰ ꓐꓳ ꓔ ꓡꓳ=
ꓖꓳ ꓡꓱ ꓥ ꓟꓲ ꓠꓬꓲꓸ ꓠꓬꓲ 21 ꓦ ꓜꓴ ꓘꓳꓼ ꓗꓪ ꓛꓲ ꓡ ꓠꓬ꓾ ꓡꓲ-ꓢꓴ ꓐꓴ ꓔꓬ ꓟꓵꓽ ꓟꓵꓽ ꓘꓶꓽ ꓟꓵꓽ ꓡꓯꓼ ꓮ ꓙꓵꓽ ꓗꓪ ꓙꓵꓽ ꓢꓴ ꓗꓪꓼ ꓢꓴ ꓛꓲ ꓡ ꓖꓴꓳ= ꓧꓶꓽ ꓒ ꓟꓵꓽ ꓗꓪ ꓠꓬ ꓧꓶꓸ ꓕꓯ 40 ꓘꓳꓼ ꓖꓼ ꓡꓯꓼ ꓖꓼ ꓙꓲ ꓗꓪ ꓐꓰ ꓙꓵꓽ ꓢꓴ ꓗꓪꓼ ꓢꓴ ꓛꓲ ꓡ ꓖꓴ ꓢꓲ꓾ ꓮ ꓟꓶ ꓠꓬ ꓙ ꓖꓴ ꓐꓰ ꓮꓸ ꓔꓳꓸ ꓮ ꓙꓵꓽ ꓘꓳ ꓣꓴ ꓟꓶꓳ= ꓪ ꓚꓲ ꓪ ꓐꓽ ꓗꓪ ꓛꓲ ꓙꓵꓽ ꓚꓱꓹ ꓕꓶ ꓡꓰꓳ= ꓞꓳ ꓙꓳ ꓚꓱꓹ ꓡꓶꓸ ꓑ ꓙꓰꓳ= ꓓꓵꓽ ꓙ ꓚꓱꓹ ꓥ ꓟꓲ ꓡꓶꓸ ꓙꓰꓳ= ꓬꓲꓸ ꓔꓱꓹ ꓕꓲ ꓔꓱꓹ ꓗꓪ ꓚꓲ ꓛꓬ ꓔꓱꓹ ꓚꓲ ꓛꓬ ꓙꓵꓽ ꓔꓬ ꓟ ꓟꓵꓽ ꓫꓴ ꓘꓳ ꓣꓴ ꓟꓶ ꓔ ꓡꓳ= ꓲ-ꓓꓲ-ꓬ ꓟꓵꓽ ꓗꓪ ꓠꓬ ꓫꓵꓸ-ꓓꓰ ꓘꓹ Arunachal Pradesh ꓗꓪ ꓙ ꓖꓴ ꓫꓬꓹ ꓖꓶ ꓠꓹ ꓟ ꓮ ꓟꓶ ꓢꓯꓼ ꓕꓵꓼ ꓡ ꓔꓬ ꓡꓳ= 3 ꓦ ꓟ ꓘꓴꓽ ꓗꓪ ꓑ ꓫꓬ ꓝꓲ ꓓꓴ — ꓖꓳ ꓗꓪ ꓚꓲ ꓛꓲ ꓡ ꓢꓲ꓾ ꓙ ꓖꓴ ꓫꓬꓹ ꓖꓶ ꓠꓹ ꓟ ꓙ ꓟꓳ ꓘꓶꓽ ꓖꓶ ꓡ ꓡꓳ= ꓟꓶ ꓤ ꓟꓽ ꓥ ꓠꓬ꓾ ꓲ-ꓓꓲ-ꓬ ꓗꓴꓷꓼ ꓡꓲ-ꓢꓴ ꓐꓴ ꓥ ꓟꓲ ꓗꓴꓷꓼ ꓙꓵꓽ ꓚꓱꓹ ꓕꓶ ꓟ ꓐꓰ꓾ ꓞꓳ ꓙꓳ ꓶ ꓡꓯꓼ ꓟꓴ ꓚꓱꓹ ꓕꓶ ꓟ ꓗꓪ ꓓꓯ ꓛꓲ ꓬꓰ ꓥꓳ= ꓤ ꓠꓱ ꓕꓳ ꓶ ꓢꓳ ꓢꓴ ꓐꓴ ꓠꓬ ꓪꓰ ꓮꓣꓰ ꓮꓡꓡ ꓲꓠꓓꓲꓮꓠꓢ ꓟꓴ ꓖꓪ ꓖꓪ ꓔꓬ ꓡꓳ= ꓒꓵꓽ ꓒ ꓕꓲ ꓝꓳꓹ ꓟꓶ ꓗꓪ ꓐꓰ ꓡ ꓥ ꓟꓲ꓾ ꓬꓲ ꓪ ꓠꓬ ꓲꓠꓓꓲꓮ ꓙꓵꓽ ꓚꓱꓹ ꓗꓪ ꓞꓳ ꓙꓳ ꓔꓬ ꓠ ꓗꓷ ꓡꓰꓳ= ꓟꓬ-ꓟ ꓗꓴꓷꓼ ꓗꓪ ꓠꓬ ꓡꓲ-ꓢꓴ ꓐꓴ ꓗ-ꓛꓲ ꓟꓵꓽ ꓐꓰ꓾ ꓮ-ꓢ ꓟꓵꓽ꓾ ꓟ-ꓓꓲ-ꓡꓲ ꓟꓵꓽ ꓫꓴ ꓗꓪ ꓟꓬꓽ ꓠꓬꓲ ꓔꓬ ꓡꓳ= ꓖꓳ ꓡꓱ ꓥ ꓟꓲ ꓗ-ꓛꓲ ꓟꓵꓽ ꓠꓬ ꓡꓲ-ꓢꓴ ꓐꓴ ꓟꓵꓽ ꓚꓰ ꓥ ꓡꓳ ꓐꓰ ꓢꓪꓼ ꓔꓸ ꓡꓳ= ꓠꓱꓸ ꓐꓯꓼ ꓟꓵꓽ ꓮ ꓗꓪ ꓥ ꓟꓲ ꓡꓲ-ꓢꓴ ꓔꓯ ꓟꓵꓽ ꓚꓰ ꓡ ꓞꓳ ꓐꓰ ꓟꓽ ꓢꓪꓼ ꓔꓸ= ꓚꓲ ꓛꓬ ꓒꓵꓽ ꓒ ꓟꓵꓽ ꓚꓲ ꓛꓬ ꓬꓲ ꓙꓬ ꓡꓳ ꓗꓸ ꓠꓬ ꓗ-ꓛꓲ ꓟꓵꓽ ꓗꓪ ꓥ ꓡꓳ=
ꓮ ꓟꓶ ꓡꓲ-ꓢꓴ ꓐꓴ ꓔꓬ ꓟ ꓑꓴ-ꓔ-ꓳ ꓐꓰ꓾ ꓘꓳ-ꓡ-ꓒꓶꓸ ꓗꓪ ꓛꓲ ꓙ ꓖꓴ ꓫꓬꓹ ꓛꓲ ꓡ ꓔꓬ ꓡꓳ= ꓕꓱ ꓟ ꓠꓬ ꓟꓬ-ꓟ ꓗꓴꓷꓼ ꓙꓵꓽ ꓚꓱꓹ ꓠꓬ ꓧꓶꓸ ꓕꓯ ꓜꓲ ꓜꓲ ꓟꓴ ꓟꓴ ꓟꓽ ꓛꓲ ꓡ ꓟ ꓟꓵꓽ ꓗꓪ ꓮ ꓟꓶ ꓛꓲ ꓡ ꓔꓬꓳ ꓐꓯ ꓟ ꓥ ꓡꓳ= ꓕꓮꓲ ꓟꓵꓽ ꓗꓪ ꓠꓬ ꓟꓵꓽ ꓘꓶꓽ ꓟꓵꓽ ꓡꓯꓼ ꓗꓪ ꓛꓲ ꓮ ꓔꓳꓸ ꓐꓰ ꓙ ꓖꓴ ꓫꓬꓹ ꓖꓶ ꓔ ꓡꓳ= ꓟꓬꓱꓽ ꓬꓰ ꓜ ꓜꓽ ꓔꓬ ꓟ ꓡꓲ-ꓢꓴ ꓐꓴ ꓠꓬ ꓮ-ꓖ ꓟꓵꓽ ꓞꓳ ꓫꓵꓽ ꓗꓪ ꓕꓱꓹ ꓞ ꓡꓳ= ꓬꓲ ꓪ ꓔꓬ ꓟ ꓮ-ꓖ ꓟꓵꓽ ꓗꓪ ꓔꓶ ꓜ ꓔꓶ ꓓꓳ ꓚꓱꓹ ꓮ ꓙꓵꓽ ꓠꓬ ꓗꓴꓷꓼ ꓙꓵꓽ ꓪ ꓠꓯꓸꓼ ꓗꓪ ꓥꓳ= ꓕꓱ ꓗꓪ ꓧꓶꓸ ꓕꓯ ꓟ ꓦꓬꓼ ꓠꓬꓲ ꓗꓪ ꓡꓲ-ꓢꓴ ꓐꓴ ꓠꓬ ꓢꓲꓽ ꓒ ꓶꓽ ꓟ ꓙꓲ꓾ ꓬꓲ ꓙꓬ ꓠꓶꓽ ꓟ ꓙꓲ ꓐꓯ ꓢꓲ ꓙꓵꓽ ꓢꓴ ꓢꓲꓽ ꓒ ꓐꓰ ꓶꓽ ꓤ ꓔꓬ ꓗꓷ ꓥ ꓟꓲ꓾ ꓮ ꓟꓶ ꓠꓬ ꓡꓲ-ꓢꓴ ꓔꓬ ꓟꓵꓽ ꓗꓪ ꓙꓵꓽ ꓢꓴ ꓢꓲꓽ ꓒꓽ ꓐꓴ ꓐꓰ ꓙꓵꓽ ꓚꓱꓹ ꓮ ꓙꓵꓽ ꓔꓯꓹ ꓛꓲ ꓡꓻꓳ ꓐꓯ ꓟ ꓢꓷꓸ ꓪ ꓓꓴ ꓥ ꓡꓳ= ꓡꓲ-ꓢꓴ ꓐꓴ ꓥ ꓟꓲ ꓙꓵꓽ ꓢꓴ ꓢꓲꓽ ꓒ ꓐꓰ ꓶꓽ ꓤ ꓔꓬ ꓟ ꓦꓬꓼ ꓠꓬꓲ ꓗꓪ ꓐꓰ꓾ ꓮ ꓟꓶ ꓠꓬ ꓗꓴꓷꓼ ꓙꓵꓽ ꓚꓱꓹ ꓙꓵꓽ ꓡꓲꓽ ꓢꓳ ꓢꓲꓸ ꓙꓲ ꓟ ꓙꓵꓽ ꓚꓱꓹ ꓔꓯ ꓫꓬꓹ ꓜꓶ ꓢꓴ꓾ ꓙꓲ ꓟ ꓙꓵꓽ ꓢꓴ ꓢꓲꓽ ꓒ ꓢꓲ ꓟ꓾ ꓙꓲ ꓟ ꓑ ꓫꓬ ꓬꓰ ꓠꓹ ꓟ ꓦꓬꓼ ꓠꓬꓲ ꓛꓲꓳ=
ꓕꓱ ꓕꓲ ꓔꓳꓸ ꓗꓪ ꓡꓲ-ꓢꓴ ꓐꓴ ꓔꓬ ꓟꓵꓽ ꓗꓪ ꓗꓴꓷꓼ ꓙꓵꓽ ꓚꓱꓹ ꓙꓵꓽ ꓡꓲꓽ ꓐꓰ꓾ ꓙꓵꓽ ꓢꓴ ꓐꓴ ꓛꓲ ꓡ ꓖꓴꓳ= ꓧꓶꓸ ꓕꓯ ꓡꓰ ꓐꓰ ꓢꓲꓽ ꓒ ꓶꓽ ꓗꓪ ꓔꓬ ꓟꓽ ꓙꓲꓳ= ꓣꓳ ꓓ ꓣꓳ ꓔꓬ ꓟꓽ ꓙꓲꓳ= ꓧꓶꓸ ꓕꓯ ꓙꓵꓽ ꓚꓰꓹ ꓙꓵꓽ ꓡꓲꓽ ꓔꓯ ꓟꓽ ꓢꓷꓸ ꓔꓬ ꓙꓲ ꓖꓶ ꓮ ꓟꓶ ꓔꓬ ꓟꓽ ꓙꓲꓳ= ꓕꓱ ꓡꓱ ꓥ ꓠꓬ꓾ ꓧꓶꓸ ꓕꓯ ꓢꓰꓸ ꓮ ꓢꓸ ꓟꓽ ꓛꓲ ꓟ꓾ (ꓟꓽ ꓓꓵ ꓙ ꓠꓬꓲ ꓟ) ꓗꓴꓷꓼ ꓙꓵꓽ ꓪ ꓙꓵꓽ ꓚꓱꓹ ꓙꓵꓽ ꓡꓲꓽ ꓐꓰ꓾ ꓢꓲꓽ ꓒ ꓢꓲꓽ ꓟ ꓬꓰ ꓚꓱꓹ꓾ ꓙꓲ ꓟ ꓑ ꓫꓬ ꓬꓰ ꓚꓱꓹ ꓔꓯ ꓠꓬꓲ ꓠꓬꓲ ꓡꓲ-ꓢꓴ ꓐꓴ ꓓꓵꓽ ꓙ ꓠꓹ ꓟ ꓦꓬꓼ ꓠꓬꓲ ꓛꓲꓳ=
(ꓝꓸ ꓢꓲꓸ ꓐꓳ ꓖꓶ ꓓꓴ ꓥꓳ)