ꓜꓲꓽ ꓜꓲꓽ ꓑꓰꓹ ꓑꓰꓹ ꓙꓵꓽ ꓪ ꓣꓱꓽ ꓚꓱꓹ
ꓕꓱ ꓟ ꓠꓬ ꓙꓵꓽ ꓪ ꓠꓬ ꓙꓵꓽ ꓪ ꓣꓱꓽ ꓢꓴ ꓐꓴ ꓗꓪ ꓐꓰ ꓡ ꓡꓳ ꓐꓰ ꓘꓳ ꓣꓴ ꓢꓲꓸ ꓜꓲꓽ ꓜꓲꓽ ꓑꓰꓹ ꓑꓰꓹ ꓙꓵꓽ ꓪ ꓣꓱꓽ ꓢꓴ ꓔꓯ ꓖꓴ ꓡꓳ= ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓐꓰ ꓡꓯ ꓟꓰꓹ ꓥ ꓡꓳ= ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓗꓪ ꓠꓬ ꓙꓵꓽ ꓪ ꓮ ꓙꓵꓽ ꓟ ꓬꓲ ꓚꓰꓺ ꓠꓬ ꓑ ꓫꓬ ꓐꓴ ꓗꓪ ꓐꓰ ꓡ ꓡꓳ= ꓮ ꓟꓶ ꓕꓱ ꓕꓲ ꓚꓱꓹ ꓗꓪ ꓠꓬ꓾ ꓒꓴ ꓗꓪ ꓐꓰ ꓥ ꓟꓲ꓾ ꓑꓳꓺ ꓗꓪ ꓐꓰ ꓥ ꓟꓲ ꓑ ꓫꓬ ꓐꓴ ꓔꓯ ꓙꓳꓺ ꓡꓰ ꓠ ꓬꓰ ꓢꓲ꓾ ꓜꓲꓽ ꓜꓲꓽ ꓑꓰꓹ ꓑꓰꓹ ꓙꓵꓽ ꓪ ꓣꓱꓽ ꓡꓳ= ꓙꓵꓽ ꓪ ꓮ ꓙꓵꓽ ꓠꓬ ꓙꓵꓽ ꓢꓴ ꓗꓪ ꓐꓰ ꓡ ꓡꓳ ꓐꓰ ꓘꓳ ꓣꓴ ꓡꓳ=
ꓙꓵꓽ ꓚꓱꓹ ꓕꓱ ꓟ ꓡꓳ ꓚ ꓠꓬ꓾ ꓙꓵꓽ ꓢꓴ ꓐꓴ ꓟꓽ ꓬꓰ ꓑꓶꓸ ꓟ ꓮ ꓫꓵ ꓟꓲ ꓟꓽ ꓙꓳ= ꓬꓲ ꓪ ꓠꓬ ꓠꓬꓲꓸ ꓤꓲ ꓟ ꓐꓰ꓾ ꓟꓽ ꓥ ꓟ ꓫꓸ ꓕꓱ ꓟ ꓐꓰ꓾ ꓡ ꓞꓳ ꓢꓰꓼ ꓟ ꓮ ꓙꓵꓽ ꓬꓰ ꓡꓳ= ꓗꓴꓷꓼ ꓙꓵꓽ ꓪ ꓠꓬ ꓬꓲꓸ ꓪ ꓪꓴꓽ ꓟꓴ ꓡ ꓚꓱꓹ ꓐꓰ꓾ ꓒꓴ ꓫꓵ ꓧꓪ ꓚꓱꓹ ꓒꓬꓱꓼ ꓡ ꓡꓳ= ꓗꓴꓷꓼ ꓑ ꓫꓬ ꓔꓯ ꓮ ꓫꓵꓽ ꓟꓽ ꓒꓵ ꓟ ꓚꓬ= ꓚꓲ ꓛꓬ ꓢꓯꓼ ꓟꓬ ꓔꓯ ꓠꓬ ꓮ ꓙꓵꓽ ꓟ ꓕꓯ ꓢꓲ ꓒꓵꓽ ꓟ ꓐꓰ꓾ ꓚꓲ ꓛꓬ ꓖꓴꓽ ꓙꓴ ꓔꓯ ꓠꓬ ꓮ ꓙꓵꓽ ꓟ ꓪꓴꓸ ꓗꓪ ꓗꓶ ꓔ ꓡꓳ= ꓗꓴꓷꓼ ꓔꓯ ꓙꓵꓽ ꓠꓲꓹ ꓫꓵ ꓟ ꓠꓬ ꓶ ꓡꓯꓼ ꓬꓰ ꓠꓹ ꓟ ꓐꓱ ꓶ ꓥ ꓢꓲ꓾ ꓗꓴꓷꓼ ꓔꓯ ꓠꓲꓹ ꓠꓵ ꓠꓬꓲ ꓟꓽ ꓥ=
ꓕꓱ ꓡꓱꓳ ꓫꓵꓽ ꓙꓵꓽ ꓚꓱꓹ ꓗꓪ ꓓꓵꓽ ꓡꓰ ꓢꓴ ꓠꓬ꓾ ꓗꓹ ꓛꓲ ꓓꓴ ꓟꓽ ꓙꓳ= ꓠꓲꓹ ꓘꓪ ꓫꓵ ꓓꓴ ꓟꓽ ꓙꓳ= ꓙꓳꓺ ꓠꓲꓹ ꓐꓰ ꓪꓴ ꓧꓶ ꓓꓴ ꓟꓬꓽ ꓡ ꓡꓳ= ꓚꓲ ꓛꓬ ꓡ ꓞꓳ ꓕꓲ ꓣꓳ ꓢꓯꓸ ꓔꓬ ꓟ ꓙ ꓖꓴ ꓔꓶ ꓙꓱꓼ ꓥ ꓟꓲ ꓬꓰ ꓐꓲ ꓡꓰ ꓟꓽ ꓐ ꓡ= ꓜꓲ ꓜꓲ ꓑꓰꓹ ꓑꓰꓹ ꓙꓵꓽ ꓪ ꓣꓱꓽ ꓢꓴ ꓐꓴ ꓐꓱ ꓶ ꓚꓳ ꓑꓸ ꓡꓰ ꓐꓰ ꓢꓯꓸ ꓔꓬ ꓠ ꓗꓷ ꓡꓰ ꓡ ꓥꓳ= ꓙꓵꓽ ꓚꓱꓹ ꓮ ꓙꓵꓽ ꓟ ꓠꓯꓸꓼ ꓗꓪ ꓥꓶꓸ ꓟ ꓙꓵꓽ ꓚꓱꓹ ꓟꓴ ꓚꓱꓹ ꓠꓬ ꓜꓲꓽ ꓜꓲꓽ ꓑꓰꓹ ꓑꓰꓹ ꓙꓵꓽ ꓪ ꓣꓱꓽ ꓟ ꓙꓵꓽ ꓚꓱꓹ ꓥꓳ ꓐꓰ ꓢꓪꓼ ꓟꓶ ꓓ ꓡꓳ=
ꓢꓷꓸ ꓢꓴ ꓔꓱꓹ ꓢꓴ ꓔꓳꓹ ꓡ ꓚꓰꓼ
ꓮ ꓡꓲ ꓕꓲ ꓟꓵꓽ꓾ ꓮ ꓡꓲ ꓕꓲ ꓗꓴꓷꓼ ꓗꓪ ꓥ ꓟꓲ ꓢꓷꓸ ꓢꓴ ꓟꓳ ꓢꓴ꓾ꓟꓽ ꓙꓲ ꓟꓽ ꓜꓳ ꓟ ꓔꓯ ꓠꓲꓹ ꓜꓳ ꓢꓴ ꓠꓬ ꓜꓲꓽ ꓜꓲ ꓑꓰꓹ ꓑꓰꓹ ꓙꓵꓽ ꓪ ꓣꓱꓽ ꓡ ꓟ ꓔꓯ ꓔꓳꓹ ꓡ ꓚꓰꓼ ꓥ= ꓟꓽ ꓢꓷꓸ ꓟꓬ ꓠꓬꓲ ꓕꓲ ꓐꓱ ꓢꓴ ꓠꓬ ꓗꓴꓷꓼ ꓚꓱꓹ ꓗꓪ ꓕꓲ ꓜꓴ ꓜꓴ ꓔꓯ ꓢꓯꓼ ꓖꓶ ꓚꓱꓹ (ꓥ ꓠꓬ) ꓔꓳꓹ ꓢꓴ ꓬꓰ ꓟꓽ ꓗꓴꓸ= ꓬꓲꓸ ꓪꓴꓸ ꓧꓳꓽ ꓢꓴ ꓬꓰ ꓟꓽ ꓐ ꓡ= ꓗꓴꓷꓼ ꓟꓬꓱꓽ ꓬꓰ ꓚꓱꓹ ꓟꓽ ꓜꓳ ꓟ ꓔꓯ ꓟꓳꓻ ꓟꓽ ꓐ ꓡ= ꓢꓴ ꓮ ꓡꓲ ꓐꓯ ꓠꓬ ꓖꓳ ꓡꓱ ꓛꓳ ꓢꓴ ꓡꓰ ꓬꓰ ꓐ ꓡ ꓡꓳ= ꓬꓲꓸ ꓪ ꓦ ꓡꓱ ꓐꓳ ꓟ ꓡ ꓞꓳ ꓡꓰ ꓖꓪ ꓙꓱ ꓡ ꓠꓬ ꓛꓳ ꓡ ꓚꓰꓼ ꓡꓳ= ꓖꓳ ꓡꓱ ꓥ ꓟꓲ ꓢꓷꓸ ꓢꓴ ꓐꓰ꓾ ꓟꓳ ꓐ ꓡ ꓢꓴ ꓐꓴ ꓠꓬ ꓙꓲ ꓟ ꓬꓰ ꓟ ꓗꓪ ꓔꓳꓹ ꓙ ꓢꓴ ꓒꓬꓱꓼ ꓡ ꓢꓲ꓾ ꓗꓴꓷꓼ ꓟꓬꓱꓽ ꓬꓰ ꓢꓴ ꓐꓴ ꓡꓰ ꓟꓽ ꓙꓲ ꓟꓽ ꓜꓳ ꓟ ꓬꓰ ꓡ ꓕꓯ ꓔꓳꓹ ꓢꓴ ꓒꓬꓱꓼ ꓡ ꓡꓳ= ꓮ ꓡꓲꓳ ꓐꓯ ꓠꓬ ꓬꓲꓸ ꓪ ꓠꓬ ꓢꓷꓸ ꓟ꓾ ꓟꓳꓻ ꓐ ꓡ ꓟ ꓑꓶꓸ ꓓꓴ ꓮ ꓟ ꓡꓰ ꓧꓳꓽ ꓟꓽ ꓛꓲ= ꓬꓲꓸ ꓪ ꓡꓰ ꓪꓴꓸ ꓔꓴ ꓢꓲꓸ ꓫꓸ ꓕꓱ ꓩꓴ ꓡ ꓟ꓾ ꓝꓮꓲ ꓔꓺ ꓙ ꓟ (ꓥ ꓠꓬ) ꓒꓳꓹ ꓔꓳꓹ ꓟ ꓬꓰ ꓪꓴꓸ ꓔꓴ ꓡ ꓚꓰꓼ ꓡꓳ=
ꓠꓬꓲꓸ ꓠꓬꓲ ꓟꓬ-ꓟ ꓗꓴꓷꓼ ꓗꓪ ꓜꓲꓽ ꓜꓲ ꓑꓰꓹ ꓑꓰꓹ ꓗꓴꓷꓼ ꓙꓵꓽ ꓪ ꓦꓴ ꓡ ꓟ ꓗꓪ ꓬꓲꓸ ꓪꓴꓸ ꓔꓳꓹ ꓡ ꓢꓴ ꓠꓬ ꓠꓯ ꓞꓲꓼ ꓟꓸ ꓒ ꓟꓸ ꓟ ꓐꓴ ꓕꓲ ꓜꓴ ꓥ ꓡꓳ= ꓮ ꓡꓲꓳ ꓐꓯ ꓠꓬ ꓬꓲꓸ ꓪ ꓠꓬ ꓢꓷꓸ ꓢꓴ ꓟꓳꓻ ꓘꓴ ꓢꓴ ꓥ ꓡꓳ= ꓟꓽ ꓙꓲ ꓟꓽ ꓜꓳ ꓟ ꓔꓯ ꓢꓷꓸ ꓢꓴ꓾ ꓔꓱꓹ ꓟ ꓔꓯ ꓠꓲꓹ ꓠꓵ ꓢꓴ ꓥ ꓠꓬꓲ ꓔꓳꓹ ꓡ ꓟ ꓥ ꓡꓳ= ꓝꓮꓲ ꓕꓲ ꓜꓴ ꓠꓬ ꓓꓰ-ꓟꓳ-ꓗꓯ-ꓢꓰ ꓔꓯ ꓢꓳꓽ ꓠꓬꓲ ꓟꓶ ꓢꓴ ꓐꓴ 15-30 ꓘꓳꓼ ꓕꓲ ꓙꓶ ꓟ ꓞꓳ ꓡꓱ ꓤꓼ ꓐꓴ ꓥ ꓡꓳ= Generation Z ꓐꓯ ꓡꓳ=
ꓢꓷꓸ ꓢꓴ ꓮ ꓙꓵꓽ ꓠꓬ ꓔꓱꓹ ꓢꓴ ꓟꓽ ꓥ= ꓔꓱꓹ ꓢꓴ ꓮ ꓙꓵꓽ ꓥ ꓟꓲ ꓢꓷꓸ ꓢꓴ ꓟꓽ ꓥ= ꓕꓲ ꓐꓱ ꓠꓽ ꓜꓳ ꓟ ꓔꓯ ꓔꓺ ꓢꓴ ꓬꓰ ꓟ ꓢꓷꓸ ꓟꓽ ꓞꓲ ꓧꓪꓸ ꓡ ꓠ ꓔꓸ ꓢꓴ ꓔꓯ ꓔꓺ ꓢꓴ ꓬꓰ ꓠꓲꓹ ꓫꓵ ꓡꓳ= ꓔꓱꓹ ꓟ ꓫꓸ ꓕꓱ ꓟ ꓕꓯ ꓢꓲ꓾ ꓪ ꓢˍ ꓟ ꓗꓪ ꓔꓺ ꓙꓰ ꓗꓴꓸ ꓢꓴ ꓟꓬꓽ ꓡꓳ= ꓖꓳ ꓟ ꓑꓶꓸ ꓓꓴ ꓢꓷꓸ ꓢꓴ ꓮ ꓙꓵꓽ ꓠꓬ ꓔꓱꓹ ꓢꓴ ꓟꓽ ꓥ ꓐꓯ ꓟ ꓥ ꓡꓳ= ꓟꓽ ꓔꓱꓹ ꓟꓽ ꓜꓳ ꓟ ꓢꓷꓸ ꓢꓷꓸ ꓚꓲ ꓛꓬ ꓪ ꓠꓹ ꓟ ꓙꓵꓽ ꓪ ꓐꓰ꓾ ꓒꓴ ꓫꓵ ꓐꓱ ꓶ ꓥꓶꓸ ꓟ ꓡ ꓞꓳ ꓐꓰ꓾ ꓜꓲꓽ ꓜꓲꓽ ꓑꓰꓹ ꓑꓰꓹ ꓬꓰ ꓢꓴ ꓐꓴ ꓐꓰ ꓔꓺ ꓙꓰ ꓢꓴ ꓮ ꓟꓬꓹ ꓙꓳ ꓡꓳ=
(ꓮ ꓟꓶ ꓕꓲ ꓧꓪꓹ ꓠꓬ ꓟꓵꓽ ꓗꓳ ꓓꓵ ꓓꓵ ꓗꓪ ꓜꓲꓽ ꓜꓲꓽ ꓑꓰꓹ ꓑꓰꓹ ꓙꓵꓽ ꓪ ꓣꓱꓽ ꓢꓴ ꓐꓴ ꓕꓲ ꓐꓱ ꓐꓰ꓾ ꓟꓬ-ꓟ ꓗꓴꓷꓼ ꓗꓪ ꓜꓲꓽ ꓜꓲꓽ ꓑꓰꓹ ꓑꓰꓹ ꓙꓵꓽ ꓪ ꓣꓱꓽ ꓢꓴ 1962ꓹ 1990ꓹ 2021 ꓘꓳꓼ ꓗꓪ ꓮ ꓡꓲ ꓓꓳ ꓡ ꓟ ꓚ ꓟꓲꓽ ꓐꓳ ꓓꓴ ꓥꓳ)