ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓠꓬ ꓮ ꓫꓵꓽ ꓥ ꓡ? ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓠꓬ ꓑ ꓫꓬꓼ ꓡꓰ ꓙꓵꓽ ꓟ ꓚꓱꓹ ꓥ ꓡꓳ= ꓮ ꓠꓱ ꓠꓱ ꓟ ꓖꓣꓰꓰꓗ ꓞꓳ ꓫꓵꓽ ꓐꓴ ꓠꓬ ꓜꓲꓼ ꓡꓯ ꓘꓳ ꓖꓴ ꓗꓪ ꓑ ꓫꓬ ꓐꓴ ꓮ ꓙꓵꓽ ꓜꓲꓼ ꓡ ꓢꓲ꓾ ꓖꓳ ꓗꓪ ꓐꓯ ꓟꓳꓸ ꓖꓶ ꓠꓯ ꓟ ꓮ ꓙꓵꓽ ꓐꓯ ꓟꓳꓸ ꓖꓶ ꓓꓳ ꓡꓰ ꓠꓬ꓾ ꓜꓲꓼ ꓛꓲ ꓡ ꓢꓴ ꓑ ꓫꓬ ꓐꓴ ꓠꓲꓹ ꓫꓵ ꓟ ꓚꓱꓹ ꓔꓯ ꓣꓱꓽ ꓬꓰ ꓡꓳ= ꓐꓯ ꓟꓳꓸ ꓖꓶ ꓢꓴ ꓠꓬ ꓐꓯ ꓟꓳꓸ ꓖꓶ ꓓꓳ ꓡꓰ ꓕꓯ ꓓꓵꓽ ꓙ ꓞꓷꓹ ꓢꓴ ꓠꓬ ꓑ ꓫꓬ ꓐꓴ ꓥ ꓡꓳ= ꓑ ꓫꓬ ꓐꓴ ꓮ ꓟꓬꓹ ꓪꓽ ꓟ ꓔꓯ ꓣꓱꓽ ꓬꓰ ꓙꓰ ꓓꓴ ꓥ ꓡꓳ= ꓕꓱ ꓡꓱꓳ ꓫꓵꓽ ꓓꓵꓽ ꓙ ꓚꓱꓹ ꓐꓰ꓾ ꓣꓱꓽ ꓬꓰ ꓚꓱꓹ ꓔꓯ ꓑ ꓫꓬ ꓙꓵꓽ ꓪ ꓙꓳ ꓟ ꓙꓵꓽ ꓚꓱꓹ (ꓓꓰ-ꓟꓳ-ꓗꓯ-ꓢꓰ) ꓐꓯ ꓡꓳ=
ꓖꓣꓰꓰꓗ ꓥꓳꓽ ꓗꓪ ꓓꓰꓟꓳꓢ ꓗꓣꓮꓔꓳꓢ ꓥ ꓢꓲ꓾ ꓑ ꓫꓬ ꓡꓰ ꓙꓵꓽˍ ꓟ ꓐꓯ ꓡꓳ= ꓗꓴꓷꓼ ꓟꓬꓱꓽ ꓬꓰ ꓢꓴ ꓠꓬ ꓑ ꓫꓬ ꓠꓲꓹ ꓫꓵ ꓟ ꓔꓯ ꓡꓯꓼ ꓕꓲ ꓟꓬꓱꓽ ꓬꓰ ꓖꓶ ꓠꓹ ꓟ ꓥ ꓡꓳ= ꓑ ꓫꓬ ꓠꓬ ꓙꓵꓽ ꓪ ꓮ ꓙꓵꓽ ꓟ ꓬꓲꓸ ꓚꓰ ꓥ ꓡꓳ= ꓗꓴꓷꓼ ꓟꓬꓱꓽ ꓬꓰ ꓢꓴ ꓮ ꓙꓵꓽ ꓠꓬ ꓑ ꓫꓬ ꓝꓲ ꓓꓴ ꓒꓬꓱꓼ ꓡ ꓡꓳ= ꓑ ꓫꓬ ꓮ ꓟꓬꓹ ꓠꓲꓹ ꓧꓳꓹ ꓟ ꓚꓱꓹ ꓔꓯ ꓬꓰ ꓒꓬꓱꓼ ꓡ ꓠꓹ ꓟ ꓢꓯꓼ ꓕꓵꓼ ꓓꓴ ꓐꓱ ꓶ ꓟꓬꓱꓽ ꓶ ꓚꓰꓹ ꓔꓸ ꓡꓳ= ꓑ ꓫꓬ ꓐꓴ ꓡꓰ ꓒꓴ ꓖꓶ ꓟ ꓔꓯ ꓜꓽ ꓢꓲꓸ ꓟꓬꓱꓽ ꓬꓰ ꓡꓳ= ꓕꓲ ꓔꓱꓹ ꓐꓯ ꓠꓬ ꓑ ꓫꓬ ꓪꓽ ꓤ ꓥ ꓡꓳ=
ꓠꓬꓲꓸ ꓠꓬꓲ ꓟ ꓦꓬꓼ ꓠꓬꓲ ꓗꓪ ꓑ ꓫꓬ ꓙꓵꓽ ꓪ ꓡꓰ ꓐꓯ ꓞꓷꓹ ꓠꓹ ꓟ ꓐꓱ ꓶ ꓮ ꓠꓱ ꓠꓱ ꓟ ꓖꓣꓰꓰꓗ ꓡ ꓞꓳ ꓡꓰ ꓐꓰ ꓟꓽ ꓬꓰꓳ= ꓟꓬꓱꓽ ꓑꓶꓸ ꓙꓳ ꓡ ꓕ ꓑꓳꓸ ꓑ ꓫꓬ ꓔꓯ ꓘꓴ ꓜꓲꓼ ꓢꓲꓸ ꓐꓯ ꓟꓸ ꓖꓶ ꓠꓹ ꓟ ꓟꓽ ꓗꓸ ꓘꓳ ꓬꓰꓳ= ꓡ ꓞꓳ ꓮ ꓟꓬꓹ ꓟꓬꓽ ꓡ ꓠꓬꓲ ꓕꓱ ꓡꓱ ꓬꓰ ꓟꓽ ꓙꓲꓳ= ꓖꓳ ꓟ ꓑꓶꓸ ꓓꓴ ꓑ ꓫꓬ ꓮ ꓟꓬꓹ ꓬꓲ ꓛꓲ ꓑ ꓫꓬ ꓝꓲ ꓓꓴ ꓢꓲꓻ ꓡꓳ= ꓕꓱ ꓟ ꓠꓬ ꓢꓲꓻ ꓒꓬꓸ ꓧꓳꓽ ꓡꓯ ꓘꓳ ꓟ (ꓰꓡꓰꓚꓔꓲꓳꓠꓮꓡ ꓦꓳꓔꓲꓠꓖ) ꓥ ꓡꓳ= ꓗꓴꓷꓼ ꓫꓴ ꓐꓴ ꓗꓪ ꓐꓰ ꓑ ꓫꓬ ꓝꓲ ꓓꓴ ꓐꓴ ꓓꓯ ꓡ ꓢꓲ꓾ ꓬꓲꓸ ꓪ ꓠꓬ ꓑ ꓫꓬ ꓐꓴ ꓐꓱ ꓶ ꓙꓲ ꓖꓴ ꓙꓳ ꓟ ꓙꓵꓽ ꓗ ꓫꓬꓹ ꓕꓶ ꓟꓬꓱꓽ꓾ ꓑ ꓫꓬ ꓐꓴ ꓔꓯ ꓙꓵꓽ ꓚꓱꓹ ꓟꓴ ꓚꓱꓹ ꓐꓰ꓾ ꓑ ꓫꓬ ꓐꓴ ꓗꓳ ꓡꓳ ꓗꓪ ꓫꓵꓽ ꓪꓴ ꓓꓳ ꓡ ꓠꓬ ꓐꓯ ꓟꓴ ꓘꓶꓽ ꓖꓶˍ ꓟ ꓟꓬꓱꓽ ꓬꓰ ꓡ ꓡꓳ= ꓕꓱ ꓟꓬꓱꓽ ꓓꓽ ꓟ 3 ꓩꓴꓸ ꓠꓬ ꓗꓴꓷꓼ ꓢꓲꓽ ꓒ ꓙꓵꓽ ꓢꓴ ꓐꓴ ꓟꓬꓱꓽ ꓒꓬꓱꓼ ꓡ ꓢꓲꓸ ꓑ ꓫꓬ ꓐꓴ ꓬꓲꓸ ꓛꓲ ꓢꓲꓻ ꓣꓴ ꓔꓸ ꓢꓴ ꓡꓰ ꓧꓳꓽ ꓣꓱꓽ ꓔꓬ ꓟ ꓥ ꓡꓳ=
ꓑ ꓫꓬ ꓐꓴ ꓠꓬ ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓡꓳ ꓚ 5 ꓘꓳꓼ ꓕꓲ ꓧꓪꓹ ꓑ ꓫꓬꓽ ꓝꓲ ꓓꓴ ꓐꓴ ꓐꓰ꓾ ꓙꓵꓽ ꓢꓴ ꓟꓴ ꓢꓴ ꓔꓯ ꓢꓲꓻ ꓣꓴ ꓡꓳ= ꓕꓱ ꓟ ꓗꓪ ꓐꓰ ꓑ ꓫꓬ ꓔꓯ ꓟꓽ ꓠꓲꓹ ꓠꓵ ꓟ ꓐꓰ꓾ ꓥꓶꓸ ꓟ ꓗꓴꓷꓼ ꓟꓬꓱꓽ ꓬꓰ ꓢꓴ ꓐꓴ ꓔꓯ ꓢꓲꓻ ꓞꓰ ꓩꓴ ꓗꓷ ꓓ ꓡꓳ= ꓕꓱ ꓟ ꓠꓬ ꓑ ꓫꓬ ꓙꓵꓽ ꓪ ꓙꓳ ꓟ ꓢꓷꓸ ꓡꓰ ꓓꓴ ꓥꓳ= ꓰꓡꓰꓚꓔꓲꓳꓠ ꓢꓲꓻ ꓟꓯꓹ ꓗꓶ ꓡꓯ ꓘꓳ ꓑꓮꓲ ꓠꓬ ꓑ ꓫꓬ ꓙꓵꓽ ꓪ ꓔꓯ ꓡꓯꓼ ꓕꓲ ꓣꓱꓽ ꓬꓰ ꓟ ꓕꓲ ꓠꓬꓲ ꓥ ꓡꓳ= ꓖꓳ ꓗꓪ ꓑ ꓫꓬ ꓠꓲꓹ ꓠꓵ ꓓ ꓡꓳ ꓫꓵꓽ ꓡ ꓞꓳ ꓠꓬ ꓢꓲꓻ ꓓꓯ ꓡ ꓢꓲ ꓑ ꓫꓬ ꓮ ꓟꓬꓹ ꓟ ꓬꓲꓸ ꓛꓲ ꓙꓵꓽ ꓪ ꓣꓱꓽ ꓢꓴ ꓒꓬꓱꓼ ꓡ ꓡꓳ= ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓗꓪ ꓡ ꓞꓳ ꓕꓲ ꓣꓳ ꓡꓲ ꓕꓲ ꓣꓳ꓾ ꓞꓳ ꓫꓵꓽ ꓕꓲ ꓫꓵ ꓡꓲ ꓕꓲ ꓫꓵꓽ꓾ ꓦ ꓡꓱ ꓚꓱꓹ ꓕꓲ ꓟ ꓡꓲꓸ ꓕꓲ ꓟ꓾ ꓶ ꓤ ꓶ ꓟꓲ ꓙꓳ ꓙꓵꓽ ꓪ꓾ ꓚꓰꓼ ꓙꓵꓽ ꓪ꓾ ꓫꓸ ꓕꓱ ꓙꓵꓽ ꓪ ꓕꓱ ꓡꓱꓳ ꓫꓵꓽ – ꓪ ꓙꓵꓽ ꓙꓳ ꓟ꓾ꓟꓽ ꓒꓯꓽ ꓟ꓾ ꓔꓱꓹ ꓜꓳ ꓟ ꓐꓰ꓾ ꓡꓲꓹ ꓗꓷ ꓟꓶˍ ꓟ (Rights, Equality, Justice and freedom) ꓖꓶ ꓔ ꓡꓳ= ꓗꓴꓷꓼ ꓙꓵꓽ ꓗ ꓬꓲꓸ ꓚꓰ ꓕꓳ ꓶ ꓓꓽ ꓟ ꓗꓪ ꓘꓽ ꓟꓳꓽ ꓖꓶ ꓔꓸ ꓡꓳ= ꓕꓱ ꓟ ꓠꓬ ꓑ ꓫꓬ ꓙꓵꓽ ꓪ ꓙꓳ ꓟ ꓙꓵꓽ ꓚꓱꓹ (ꓥ ꓠꓬ) ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓬꓲꓸ ꓟꓳ ꓡꓱꓽ ꓥ ꓡꓳ= ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓐꓰ ꓓꓵꓽ ꓙ ꓚꓱꓹ ꓗꓪ ꓙꓵꓽ ꓪ ꓠꓬ ꓑ ꓫꓬ ꓐꓴ ꓗꓪ ꓐꓰ ꓡ ꓟ ꓥ ꓢꓲ꓾ ꓗꓴꓷꓼ ꓙꓵꓽ ꓢꓴ ꓐꓴ ꓠꓬ ꓑ ꓫꓬ ꓐꓴ ꓐꓱ ꓶ ꓙꓲ ꓖꓴ ꓙꓳ ꓟ ꓬꓰ ꓖꓶ ꓠꓹ ꓟ ꓒꓴ ꓖꓶ ꓢꓲꓸ ꓥꓪꓸ ꓔꓸ ꓟ ꓪꓽ ꓤ ꓡꓰ ꓐꓰ ꓥ ꓡꓳ= ꓓꓰ-ꓟꓳ-ꓗꓯ-ꓢꓰ ꓓꓵꓽ ꓙ ꓚꓱꓹ ꓮ ꓙꓵꓽ ꓟ ꓬꓲꓸ ꓚꓰꓺ ꓠꓬ Rights, Equality, Justice and freedom ꓗꓪ ꓠꓬꓳꓽ ꓞ ꓡꓳ=
(ꓡꓯ ꓫꓵ ꓐꓳ ꓓꓴ ꓥꓳ)