ꓕꓳ ꓶ ꓕꓱ ꓕꓲ ꓕꓳꓸ ꓗꓪ ꓠꓬ ꓙꓲ-ꓢꓴ ꓢꓲ ꓤ ꓐꓴ ꓗꓴꓷꓼ ꓟꓬꓱꓽ ꓬꓰ ꓓ ꓡ ꓐꓯ ꓟ ꓔꓯ ꓒꓶ ꓘꓶꓽ ꓐꓰ꓾ ꓪ ꓔꓲꓸ ꓙꓵꓽ ꓚꓱꓹ ꓔꓯ ꓓꓵꓽ ꓙ ꓠꓬꓲ ꓟ ꓟꓸ ꓟꓲꓽ ꓐꓳ ꓔꓸ ꓡꓳ=
ꓟꓲ ꓠꓯ ꓗꓷꓴꓼ ꓙꓵꓽ ꓚꓱꓹ ꓬꓲ ꓟꓳ ꓡꓱꓽ ꓔꓯ ꓐꓳ ꓔꓬ ꓟ ꓤ ꓟꓶ ꓠꓬꓲꓽ ꓗꓪ ꓙꓲ-ꓢꓴ ꓢꓲ ꓤ ꓐꓴ ꓠꓬ ꓗꓴꓷꓼ ꓟꓬꓱꓽ ꓬꓰ ꓓ ꓡ? ꓐꓯ ꓟ ꓠ ꓠꓬꓲ ꓢꓴ ꓙꓳ ꓡ ꓡꓳ= ꓕꓱ ꓟ ꓔꓯ ꓟꓳꓸ ꓠꓬ ꓟ-ꓔꓲ-ꓡꓴ-ꓕꓷ ꓒꓶ ꓘꓶꓽ ꓡꓳ ꓚ ꓓꓵꓽ ꓙ ꓠꓬꓲ ꓠꓲꓹ ꓫꓵ ꓡꓳ= ꓮ ꓡꓲꓳ ꓐꓯ ꓠꓬ ꓙꓲ-ꓢꓴ ꓢꓲ ꓤ ꓐꓯ ꓟ ꓗꓪ꓾ ꓣꓳ-ꓟ ꓗ-ꓔꓳ-ꓡꓲꓼ ꓐꓰ꓾ ꓟ-ꓔꓲ-ꓡꓴ-ꓕꓷ ꓡꓰ ꓒꓳꓹ ꓓꓳ ꓡ ꓟ ꓙꓲ-ꓢꓴ ꓢꓲ ꓤ ꓜꓴ ꓐꓴ ꓐꓯ ꓢꓲꓸ ꓜꓴ ꓓꓽ ꓟ ꓠꓬꓲꓽ ꓜꓴ ꓙꓳ ꓔꓬ ꓟ ꓥ ꓡꓳ= ꓣꓳ-ꓟ ꓗ-ꓔꓳ-ꓡꓲꓼ ꓠꓬ ꓗꓴꓷꓼ ꓙꓵꓽ ꓚꓱꓹ ꓟꓴ ꓚꓱꓹ ꓐꓰ꓾ ꓪꓴꓽ ꓟꓴ ꓡ ꓚꓱꓹ ꓬꓲ ꓫꓵ ꓬꓲ ꓙꓰ ꓗꓪ ꓐ ꓡ ꓟ ꓕꓲ ꓒꓳꓹ ꓗꓪ ꓐꓰ ꓮ ꓘꓶꓸ ꓢꓯꓼ ꓕꓵꓼ ꓔꓬ ꓟ ꓥ ꓡꓳ= ꓟ-ꓔꓲ-ꓡꓴ-ꓕꓷ ꓡꓰ ꓧꓳꓽ ꓓꓳ ꓡ ꓟ ꓙꓲ-ꓢꓴ ꓢꓲ ꓤ ꓜꓴ ꓐꓴ ꓠꓬ ꓗꓴꓷꓼ ꓙꓵꓽ ꓚꓱꓹ ꓟꓴ ꓚꓱꓹ ꓔꓯ ꓟꓳꓸ ꓮ ꓡꓲ ꓓꓵꓽ ꓙ ꓡ? ꓙꓲ-ꓢꓴ ꓢꓲ ꓤ ꓐꓴ ꓠꓬ ꓗꓴꓷꓼ ꓟꓬꓱꓽ ꓬꓰ ꓓ ꓡ? ꓓꓴꓸ ꓓꓴꓸ ꓤꓼ ꓢꓳ ꓠꓬꓲ ꓓꓴ ꓬꓰ ꓡꓯ= ꓮ ꓡꓲꓳ ꓐꓯ ꓠꓬ ꓟꓬ-ꓟ ꓗꓴꓷꓼ ꓗꓪ ꓟ ꓡꓲ-ꓢꓴ ꓐꓴ ꓠꓬ ꓬꓰ-ꓢꓴ ꓔꓯ ꓦ ꓡꓱ ꓢꓴ ꓟꓬꓽ ꓡꓳ= ꓙꓲ-ꓢꓴ ꓢꓲ ꓤ ꓥ ꓟ ꓑꓶꓸ ꓓꓴ ꓣꓳ ꓮ ꓡꓲ ꓞꓳ ꓙꓳ ꓟꓬꓱꓽ ꓬꓰ ꓙꓰ ꓠꓹ ꓟ ꓚꓱꓹ ꓗꓪ꓾ ꓟꓬꓱꓽ ꓟꓽ ꓬꓰ ꓢꓰ ꓕꓯ ꓓꓵꓽ ꓙ ꓟꓬꓱꓽ ꓧꓶꓸ ꓕꓯ ꓬꓰ ꓙꓲꓽ ꓙꓳ ꓡꓳ=
ꓙꓲ-ꓢꓴ ꓢꓲ ꓤ ꓐꓴ ꓠꓬ ꓮ ꓕꓯ ꓕꓯ ꓓꓵꓽ ꓙ ꓟ ꓗꓪ ꓑ ꓫꓬ ꓓꓵꓽ ꓙ ꓚꓱꓹ ꓡꓰ ꓬꓰ ꓟꓽ ꓓ= ꓙꓵꓽ ꓢꓴ ꓗꓪꓼ ꓢꓴ ꓓꓵꓽ ꓙ ꓚꓱꓹ ꓗꓪ ꓛꓲ ꓬꓰ ꓠꓹ ꓟ ꓥ ꓡꓳ= the Christians should actively seek the offies in the state. They are the proper people who shold hold such offices. Christians can very well use the offices of the state to serve their fellowmen. Therefore, Luther writes: “for the sword and authority as a particular service of God, belong more appropriately to Christiasn than to any other men on earth.”(Helmul T. Lehmann, Gen. ed., Luther’s Works Vol. 45 (Philadelphia: Muhlenberg Press, 1962), pp. 94, 100.) ꓗꓴꓷꓼ ꓡ ꓞꓳ ꓐꓴ ꓙꓲ ꓖꓴ ꓔꓯ ꓙꓲ-ꓢꓴ ꓢꓲ ꓤ ꓐꓴ ꓠꓬ ꓮ ꓟꓬꓹ ꓬꓰ ꓐ ꓡ ꓥꓳ= ꓟ-ꓔꓲ-ꓡꓴ-ꓕꓷ ꓡꓰ꓾ “ꓗꓷꓴꓼ ꓙꓵꓽ ꓚꓱꓹ ꓐꓰ ꓙꓵꓽ ꓪ ꓠꓬ ꓪꓴ-ꓢ ꓗꓪ ꓐꓰ ꓡ ꓟ ꓥ ꓢꓲ꓾ ꓙꓵꓽ ꓪ ꓕꓱ ꓟꓬ ꓟ ꓔꓯ ꓡ ꓞꓳ ꓐꓴ ꓙꓲ ꓖꓴ ꓐꓱ ꓶ ꓣꓱꓽ ꓬꓰ ꓙꓲꓽ ꓙꓳ ꓟ ꓡ ꓞꓳ ꓔꓯ ꓟꓳꓸ ꓐꓯ ꓠꓬ꓾ ꓟꓲ ꓠꓯ ꓕꓯ ꓢꓲ ꓗꓪ ꓙꓲ-ꓢꓴ ꓢꓲ ꓤ ꓐꓴ ꓕꓯ ꓢꓲ ꓠꓱꓸ ꓐꓯꓼ ꓢꓴ ꓧꓪ ꓟꓽ ꓙꓳ=” ꓐꓳ ꓔ ꓡꓳ= ꓮ ꓡꓲꓳ ꓐꓯ ꓠꓬ ꓙꓲ-ꓢꓴ ꓢꓲ ꓤ ꓠꓬ ꓙꓵꓽ ꓪ ꓠꓬ ꓪꓴ-ꓢ ꓗꓪ ꓐꓰ ꓡ ꓟ ꓥ ꓢꓲ꓾ ꓥꓶꓸ ꓟ ꓬꓰ ꓢꓴ ꓔꓯ ꓟꓸ ꓙꓽ ꓠꓹ ꓟ ꓐꓰ꓾ ꓙꓲ ꓟ ꓬꓰ ꓢꓴ ꓔꓯ ꓬꓰ ꓙ ꓔ ꓙ ꓠꓹ ꓟ ꓥ ꓡꓳ= ꓢꓴ ꓔꓯ ꓣꓱꓽ ꓙ ꓠꓹ ꓟ ꓥ ꓡꓳ꓾ ꓐꓰ ꓢꓷꓸ ꓢꓴ ꓥ ꓡꓳ= (Power is Service)
ꓟ-ꓔꓲ-ꓡꓴ-ꓕꓷ ꓜꓴ ꓗꓪ ꓐꓰ ꓕꓱ ꓡꓱ ꓖꓪ ꓙꓱ ꓪꓽ ꓔ ꓡꓳ= Christians may without sin occupy civil offices or serve as princes and judges, render decisions and pass sentence according to imperial and other existing laws, punish evildoers with the sword, engage in just wars, serve as soldiers … (Tappert, the Book of Concord, p. 81:4; 82:10-11). “ꓙꓲ-ꓢꓴ ꓢꓲ ꓤ ꓐꓴ ꓠꓬ ꓝꓴꓲ ꓟꓽ ꓬꓰ ꓬꓰ ꓾ ꓙꓵꓽ ꓢꓴ ꓟꓴ ꓢꓴ ꓐꓰ꓾ ꓐꓯ ꓟꓴ ꓘꓶꓽ ꓢꓴ ꓬꓰ ꓓ ꓡꓳ= ꓔꓱꓹ ꓜꓳ ꓟ ꓟꓯꓼ ꓘꓶꓽ ꓗꓪ ꓢꓰꓼ ꓡꓯ ꓘꓳ ꓢꓴ ꓟꓯꓼ ꓤ ꓐꓴ ꓬꓰ ꓓ ꓡꓳ” ꓐꓰ ꓟ-ꓔꓲ-ꓡꓴ-ꓕꓷ ꓜꓴ ꓗꓪ ꓐꓰ ꓒꓶ ꓓꓳ ꓡ ꓡꓳ= ꓛꓳ ꓢꓴ ꓑ ꓫꓬ ꓡꓰ ꓟꓽ ꓥ꓾ ꓙꓵꓽ ꓢꓴ ꓟꓴ ꓢꓴ ꓬꓰ ꓠꓯ ꓟ꓾ ꓐꓯ ꓟꓴ ꓘꓶꓽ ꓡ ꓟ ꓔꓯ ꓘꓳ ꓣꓴ ꓢꓴˍ ꓡꓰ ꓟꓽ ꓥ꓾ ꓐꓯ ꓟꓴ ꓘꓶꓽ ꓢꓴ ꓬꓰ ꓠꓹ ꓟ꓾ ꓓꓵꓽ ꓙ ꓞꓷꓹ ꓟꓬꓱꓽ ꓗꓪ ꓣꓱꓽ ꓠꓹ ꓟ ꓢꓯꓼ ꓖꓶ ꓔ ꓡꓳ=
ꓙꓵꓽ ꓢꓴ ꓟꓴ ꓢꓴ ꓔꓯ ꓛꓳ ꓠꓯ ꓡꓳ ꓐꓰ (ꓣꓳ-ꓟ 13) ꓗꓪ ꓟ ꓝꓲ ꓓꓴ ꓒꓳ-ꓡꓳ ꓟꓸ ꓘꓶꓽ ꓠꓬ ꓝꓴꓲꓸ ꓬꓰ ꓠꓹ ꓟ ꓚꓱꓹ ꓗꓪ ꓥ ꓟꓲ ꓛꓳ ꓠ ꓗꓹ ꓡꓳ ꓐꓰ ꓐꓯ ꓟ ꓟꓽ ꓥ= ꓝꓴꓲꓸ ꓟꓽ ꓙꓳ ꓙꓳ ꓛꓳ ꓫꓱꓽ ꓙꓲ ꓟ ꓙꓵꓽ ꓗ ꓮ ꓙꓵꓽ ꓔꓯ ꓛꓳ ꓠꓯ ꓡꓳ ꓐꓯ ꓟ ꓥ ꓡꓳ= ꓟ-ꓕꓲ 22ꓽ21 ꓗꓪ꓾ ꓢꓲ ꓒ ꓬꓰ-ꓢꓴ ꓡꓰ ꓮ ꓙꓵꓽ ꓟ ꓪꓴ-ꓢ ꓔꓯ ꓖꓶꓽ ꓐꓰ ꓟꓽ ꓐꓯ ꓟ ꓡꓰ ꓐꓰ꓾ ꓙꓳ ꓟ ꓮ ꓙꓵꓽ ꓟ ꓢꓲ-ꓢ ꓔꓯ ꓖꓶꓽ ꓥ ꓟꓲ ꓟꓽ ꓐꓯ= ꓪꓴ-ꓢ ꓶꓽ ꓠꓬ ꓪꓴ-ꓢ ꓔꓯ ꓖꓶ= ꓢꓲ-ꓢ ꓶꓽ ꓠꓬ ꓢꓲ-ꓢ ꓔꓯ ꓖꓶꓽ ꓐꓰ ꓐꓯ ꓔꓸ ꓡꓳ= ꓙꓲ-ꓢꓴ ꓢꓲ ꓤ ꓐꓴ ꓠꓬ ꓪ ꓚꓲ ꓕꓯ ꓢꓲ ꓗꓪ ꓲ ꓔꓸ ꓟ ꓮ ꓔꓳꓸ ꓡꓰ ꓐꓰ꓾ ꓙꓲ ꓖꓴ ꓙꓳ ꓟ ꓠꓬꓲ ꓟꓳ ꓓꓴ ꓐꓰ ꓞꓼ ꓐꓳ ꓡꓰ ꓐꓰ ꓡ ꓞꓳ ꓐꓴ ꓠꓱꓸꓼ ꓗꓪ ꓒꓬꓱꓼ ꓡ ꓠꓯ ꓡꓳ꓾ ꓐꓰ ꓟꓸ ꓖꓶ ꓔꓸ ꓡꓳ= ꓕꓱ ꓟ ꓠꓬ ꓙꓲ_ ꓟ ꓬꓰ ꓟꓳꓸ ꓖꓶ ꓠꓯ ꓟ ꓔꓯ ꓥꓳꓽ ꓥ ꓡꓳ= ꓥꓶꓸ ꓟ ꓙꓵꓽ ꓢꓴ ꓡꓰ ꓕꓵꓼ ꓪ ꓖꓶꓽ ꓡ ꓟ ꓮ ꓙꓵꓽ ꓔꓯ ꓛꓳ ꓠꓹ ꓟ ꓟꓽ ꓐꓯ ꓔꓸ= ꓟꓽ ꓔꓱꓹ ꓟꓽ ꓜꓳ ꓟ ꓐꓰ꓾ ꓥꓶꓸ ꓟ ꓚꓱꓹ ꓗꓪ ꓚ ꓠꓹ ꓟ ꓕꓵꓼ ꓪ ꓛꓲ ꓡ ꓠꓬ꓾ ꓣꓳ-ꓟ 13 ꓔꓯ ꓓꓵꓽ ꓙ ꓫꓵꓽ ꓠꓬꓲ ꓙꓵꓹ ꓥꓳ= ꓙꓲ-ꓢꓴ ꓢꓲ ꓤ ꓐꓴ ꓠꓬ ꓟꓽ ꓙꓲ ꓟ ꓚꓱꓹ ꓗꓪ ꓚꓺ ꓙꓰ ꓠꓹ ꓟ ꓟꓽ ꓥ꓾ ꓙꓲ ꓟ ꓡꓰ ꓟꓽ ꓙꓲ ꓟ ꓔꓯ ꓧꓪꓸ ꓡꓰ ꓝꓲ ꓠꓹ ꓟ ꓥ ꓡꓳ (ꓣꓳ 12ꓽ12)= ꓟꓲ ꓠꓯ ꓗꓪ ꓢ-ꓓꓯꓼ ꓬꓲꓸ ꓡꓯꓼ ꓗꓸ ꓬꓰ ꓠꓹ ꓟ ꓟꓽ ꓥ= ꓙꓲ-ꓢꓴ ꓡꓯꓼ ꓗꓸ ꓬꓰ ꓠꓹ ꓟ ꓥ ꓡꓳ= ꓟꓲ ꓠꓯ ꓗꓪ ꓫꓱꓹ ꓐꓬ ꓡꓰ ꓟ ꓐꓰ꓾ ꓥꓶꓸ ꓟ ꓔꓯ ꓟꓽ ꓔꓳꓹ ꓠꓬ꓾ ꓞꓳ ꓙꓳ ꓚꓱꓹ ꓗꓪ ꓡꓲ ꓒꓲꓼ ꓡꓰ ꓐꓰ ꓒꓬꓱꓼ ꓡ ꓥꓳ= ꓕꓱ ꓡꓱ ꓗꓷ ꓡꓰ ꓝꓲ ꓟꓽ ꓓ=
ꓢꓲ ꓫꓬ ꓕꓳ ꓶ ꓗꓪ ꓗꓴꓷꓼ ꓙꓵꓽ ꓗ ꓐꓰ꓾ ꓙꓵꓽ ꓪ ꓙꓳ ꓢꓴ ꓮ ꓕꓯ ꓕꓯ ꓒꓵꓽ ꓛꓳ ꓗꓷ ꓟ ꓟꓽ ꓥ= ꓥꓶꓸ ꓟ ꓥ ꓕꓯ ꓠꓽ ꓒꓳꓹ ꓔꓳꓹ ꓗꓷ ꓟ ꓮ ꓟꓬꓹ ꓐꓳ ꓔꓸ ꓡꓳ= ꓓꓳ-ꓙꓰ ꓕꓳ ꓶ 1ꓽ15-2ꓽ2 ꓗꓪ꓾ ꓬꓲ-ꓙꓲ ꓩ-ꓣꓳ ꓪ ꓔꓲꓸ ꓕꓵꓼ ꓪ ꓔꓯ ꓒꓳꓹ ꓔꓳꓹ ꓢꓴ ꓤ ꓠꓱ ꓫꓳ ꓖꓶꓽ ꓢꓴ ꓠꓬꓲꓽ ꓣꓳ ꓟꓸ ꓟꓲꓽ ꓐꓳ ꓔ ꓡꓳ= ꓪ ꓔꓲ ꓕꓵꓼ ꓪ ꓡꓳ ꓚ ꓐꓯ ꓠꓬ ꓦꓵ ꓡ ꓟ ꓬꓲ-ꓢꓷ-ꓡꓰ ꓞꓳ ꓑꓸ ꓤꓼ ꓮ ꓙꓵꓽ ꓔꓯ ꓢꓰꓼ ꓠꓹ ꓟ ꓥ ꓡꓳ= ꓥꓶꓸ ꓟ ꓟꓬꓱꓽ ꓕꓱ ꓟ ꓔꓯ ꓪ ꓔꓲꓸ ꓕꓵꓼ ꓪ ꓥ ꓡꓳ ꓐꓯ ꓢꓲ ꓟꓽ ꓘꓳ ꓣꓴ= ꓓ-ꓠꓲ-ꓡꓰ 3-6 ꓕꓱ ꓗꓪ ꓪ ꓔꓲꓸ ꓫꓵꓺ ꓐꓬꓱꓽ ꓔꓯ ꓪꓴꓸ ꓓꓵ ꓟꓽ ꓕꓱꓼ ꓢꓴ꓾ ꓪ ꓔꓲꓸ ꓙꓵꓽ ꓪ ꓔꓯ ꓒꓳꓹ ꓔꓳꓹ ꓢꓴ ꓐꓴ ꓟꓸ ꓟꓲꓽ ꓢꓳ ꓟꓶ ꓓ ꓡꓳ= ꓪꓴ-ꓢ ꓔꓯ ꓡꓰ ꓪꓴꓸ ꓓꓵ ꓕꓱꓼ ꓠꓹ ꓟ ꓬꓲꓸ ꓪ ꓢꓳ ꓟꓶ ꓔꓸ ꓠꓬꓲ꓾ ꓪꓴ-ꓢ ꓶꓽ ꓠꓬ ꓢꓲ-ꓢ ꓔꓯ ꓟꓽ ꓡꓯꓼ ꓙꓱ= ꓶꓼ ꓓꓳ ꓫꓱꓸ ꓓꓳ 4 ꓑꓷꓠ ꓗꓪ ꓥ ꓟꓲ ꓢꓲ ꓒ ꓬꓰ-ꓢꓴ ꓦꓵ ꓡ ꓟ ꓟꓸ ꓟꓲꓽ ꓚꓱꓹ ꓗꓪ ꓟ-ꓖꓳ ꓢꓷꓸ ꓠꓲꓹ ꓙꓳ ꓢꓴ ꓐꓴ ꓠꓬ ꓪ ꓔꓲꓸ ꓕꓵꓼ ꓪ ꓔꓯ ꓒꓳꓹ ꓔꓳꓹ ꓢꓲꓸ ꓠꓱꓸ ꓐꓯꓼ ꓕꓲ ꓚꓱꓹ ꓗꓪ ꓐꓰ ꓬꓲꓸ ꓪ ꓟꓵꓽ ꓗꓪ ꓬꓲꓼ ꓙꓰꓳ= ꓪ ꓔꓲꓸ ꓠꓬ ꓞꓳ ꓫꓵꓼ ꓤ ꓢꓲ ꓒ ꓬꓰ-ꓢꓴ ꓔꓯ ꓢꓰꓼ ꓠꓲꓹ ꓫꓵ ꓟ ꓥꓶꓸ ꓟ ꓚꓴ ꓬꓲꓹ ꓟꓽ ꓬꓰ ꓓꓳ ꓡ ꓠꓹ ꓟ ꓥ ꓡꓳ= ꓝꓲ-ꓓꓴ ꓕꓳ ꓶ 13-20 ꓗꓪ ꓙꓵꓽ ꓢꓴ ꓧꓳꓽ ꓢꓴ ꓐꓴ ꓡꓰ ꓬꓰ-ꓢꓴ ꓟꓸ ꓟꓲꓽ ꓝꓮꓲ ꓟꓽ ꓚ ꓠꓹ ꓟ ꓕꓵꓼ ꓪ ꓖꓶ ꓡ ꓥ ꓟ꓾ ꓝꓲ-ꓓꓴ ꓒꓲ-ꓕꓱ ꓐꓰ ꓬꓳ-ꓦ ꓠꓬ ꓟꓽ ꓠ ꓠꓹ= ꓥꓪ ꓠꓴ ꓑ ꓙ ꓗꓷ꓾ ꓟꓳ ꓗꓷ ꓟ ꓔꓯ ꓟꓽ ꓫꓸ ꓕꓱ ꓠꓬ ꓟꓽ ꓓ ꓐꓰ ꓒꓳꓹ ꓖꓶ ꓗꓷꓳ= ꓝꓮꓲ ꓝꓲ-ꓓꓴ ꓒꓳ-ꓡꓳ ꓔꓯ ꓟꓯꓼ ꓡꓰ ꓣꓴ ꓠꓹ ꓟ ꓐꓯ ꓒꓬꓱ ꓩꓴ ꓗꓷ ꓠꓬ ꓝꓲ-ꓓꓴ ꓒꓳ-ꓡꓳ ꓛꓰꓹ ꓑꓬ ꓙꓰꓳ (2 ꓘꓳ-ꓡꓱ-ꓕꓴ 11ꓽ32-33)= ꓕꓱ ꓗꓪ ꓙꓲ-ꓢꓴ ꓢꓲ ꓤ ꓐꓴ ꓠꓬ꓾ ꓥꓶꓸ ꓟ ꓚꓴ ꓬꓲꓹ ꓐꓰ꓾ ꓥꓶꓸ ꓟ ꓟꓬꓱꓽ ꓬꓰ ꓢꓴ ꓐꓴ ꓟꓬꓱꓽ ꓬꓰ ꓟꓽ ꓑꓰ ꓡꓰ ꓠꓹ ꓟ ꓙꓲ ꓟ ꓕꓲ ꓒꓳꓹ ꓗꓪ ꓐꓰ ꓢꓯꓼ ꓕꓵꓼ ꓠꓯ ꓟ ꓟꓳꓸ ꓖꓶ ꓓꓳ ꓡ ꓡꓳ= ꓪ ꓔꓲ ꓕꓵꓼ ꓪ ꓥꓳ ꓐꓯ ꓢꓲ꓾ ꓥꓶꓸ ꓟ ꓟꓬꓱꓽ ꓬꓰ ꓓꓴ ꓟꓽ ꓥ=
ꓕꓱ ꓗꓪ ꓣꓳ ꓚꓲ ꓛꓬ ꓫꓬꓽ ꓫꓬꓽ ꓡꓰ ꓓꓵꓽ ꓙ ꓒꓯꓽ ꓗꓴꓸ ꓠꓹ ꓟ ꓠꓬ꓾ ꓘꓴ ꓜꓲꓼ ꓞꓳ ꓕꓲ ꓟ ꓡꓱꓸꓼ ꓠꓬ ꓗꓴꓷꓼ ꓙꓵ ꓚꓱꓹ ꓟꓴ ꓚꓱꓹ ꓫꓵꓽ ꓪꓴ ꓗꓪ ꓓꓵꓽ ꓙꓰ ꓟꓽ ꓓ= ꓟꓲ ꓠꓯ ꓗꓪ ꓗꓴꓷꓼ ꓠꓬ ꓮ ꓟꓬꓹ ꓙꓳ ꓥ ꓟꓲ꓾ ꓘꓴ ꓜꓲꓼ ꓞꓳ ꓠꓽ ꓕꓲ ꓟ ꓡꓰ ꓥ ꓡꓳ= ꓘꓴ ꓜꓲꓼ ꓞꓳ ꓠꓬ ꓗꓴꓷꓼ ꓕꓲ ꓟ ꓟꓯꓼ ꓜꓴ ꓟꓽ ꓥ꓾ ꓗꓴꓷꓼ ꓕꓲ ꓟ ꓠꓯꓸꓼ ꓗꓪ ꓔꓬ ꓢꓴ ꓐꓴ ꓡꓰ ꓜꓯ ꓔꓸ ꓟ ꓬꓲꓸ ꓜꓴ ꓟꓽ ꓥ= ꓘꓴ ꓜꓲꓼ ꓞꓳ ꓠꓬ ꓕꓲ ꓟꓲ ꓠꓯ ꓡꓱꓸꓼ ꓗꓪ ꓐꓰ ꓘꓴ ꓜꓲꓼ ꓔꓸ ꓟ ꓪꓴ-ꓢ ꓤ ꓠꓱ ꓐꓴ ꓥ ꓡꓳ= ꓖꓳ ꓟ ꓑꓶꓸ ꓓꓴ ꓕꓲ ꓗꓴꓷꓼ꓾ ꓟꓵꓽ ꓫꓴ ꓕꓲ ꓫꓴ ꓗꓪ ꓘꓴ ꓜꓲꓼ ꓞꓳ ꓕꓲ ꓟ ꓡꓱꓸꓼ ꓔꓺ ꓟꓽ ꓙꓲ= ꓖꓳ ꓡꓱ ꓥ ꓟꓲ ꓙꓲ-ꓢꓴ ꓢꓲ ꓤ ꓐꓴ ꓠꓬ ꓟꓵꓽ ꓕꓲ ꓟꓵꓽ꓾ ꓗꓴꓷꓼ ꓫꓴ ꓕꓲ ꓫꓴ ꓗꓪ ꓔꓬ ꓢꓴ ꓥ ꓠꓬꓲ꓾ ꓬꓲꓸ ꓪ ꓚꓲ ꓛꓬ ꓓꓵ ꓙ ꓞꓷꓹ ꓢꓲꓸ ꓗꓴꓷꓼ ꓟꓬꓱꓽ ꓗꓪ ꓔꓺ ꓓ ꓡꓳ= ꓘꓴ ꓜꓲꓼ ꓞꓳ ꓠꓬ ꓗꓴꓷꓼ ꓟꓬꓱꓽ ꓗꓪ ꓔꓺ ꓟ ꓟꓽ ꓥ= ꓙꓲ-ꓢꓴ ꓢꓲ ꓤ ꓕꓲ ꓣꓳ ꓠꓬ ꓬꓲꓸ ꓚꓲ ꓛꓬ ꓢꓯꓸ ꓔꓬ ꓟ ꓗꓴꓷꓼ ꓟꓬꓱꓽ ꓗꓪ ꓔꓺ ꓟ ꓥ ꓡꓳ= ꓕꓱ ꓟ ꓔꓯ ꓙ ꓜꓲꓼ ꓠ ꓗ ꓡꓳ= ꓘꓴ ꓜꓲꓼ ꓞꓳ ꓕꓲ ꓟ ꓡꓱꓸꓼ ꓔꓺ ꓔꓬ ꓟ ꓟꓽ ꓥ꓾ ꓘꓴ ꓜꓲꓼ ꓞꓳ ꓗꓪ ꓔꓺ ꓔꓬ ꓟ ꓗꓴꓷꓼ ꓟꓬꓱꓽ ꓠꓲꓹ ꓡꓱ ꓢꓴ ꓙꓲ-ꓢꓴ ꓢꓲ ꓤ ꓐꓴ ꓠꓬ ꓗꓴꓷꓼ ꓟꓬꓱꓽ ꓗꓪ ꓣꓱꓽ ꓬꓰ ꓓ ꓡꓳ꓾ ꓐꓯ ꓟ ꓥ ꓡꓳ= ꓝꓮꓲ ꓙꓲ-ꓢꓴ ꓢꓲ ꓤ ꓐꓴ ꓠꓬ ꓶ ꓡꓯꓼ ꓟꓬꓱꓽ ꓗꓪ ꓥ ꓟꓲ꓾ ꓠꓯ ꓞꓲꓼ ꓚꓱꓹ ꓗꓪ꓾ ꓟꓴ ꓖꓪ ꓖꓪ ꓚꓱꓹ ꓗꓪ꓾ ꓠꓱꓸ ꓐꓯꓼ ꓕꓲ ꓫꓵ ꓫꓵ ꓢꓷꓸ ꓠꓲꓹ ꓢꓳ ꓚꓱꓹ ꓗꓪ ꓥ ꓟꓲ ꓚꓲ ꓛꓬ ꓠꓲꓹ ꓡꓱ ꓟ ꓔꓯ (ꓪꓴ-ꓢ ꓡꓰ ꓖꓶ ꓔꓸ ꓟ ꓡꓯꓼ ꓫꓴ) ꓛꓳ ꓢꓲ ꓟꓬꓱꓽ ꓬꓰ ꓓ ꓡꓳ= ꓢꓷꓸ ꓟ ꓮ ꓙꓵꓽ ꓐꓰ꓾ ꓟꓬꓱꓽ ꓬꓰ ꓓꓳ ꓡ ꓟ ꓮ ꓙꓵꓽ ꓠꓬ ꓟꓲ ꓠꓯ ꓡ ꓞꓳ ꓐꓴ ꓔꓯ ꓣꓱꓽ ꓙ ꓬꓰ ꓙ ꓓꓴ꓾ ꓙꓲˍ ꓟ ꓟꓳꓸ ꓖꓶ ꓓꓴ ꓥ ꓡꓳ= ꓑꓳꓪꓰꓣ ꓲꓢ ꓢꓰꓣꓦꓲꓚꓰꓸ ꓙꓵꓽ ꓪ ꓠꓬ ꓣꓱꓽ ꓙ ꓓꓴ ꓥ ꓡꓳ ꓐꓰ ꓙꓲ-ꓢꓴ ꓢꓲ ꓤ ꓐꓴ ꓢꓷꓸ ꓡꓳ= ꓢꓲ ꓒ ꓬꓰ-ꓢꓴ ꓡꓰ ꓙꓵꓽ ꓪ ꓙꓳ ꓢꓴ ꓠꓬ ꓢꓴ ꓔꓯ ꓣꓱꓽ ꓙ ꓢꓴ ꓥꓳ ꓐꓯ ꓡꓳ= ꓢꓷꓸ ꓠꓲꓹ ꓗꓪ ꓐꓰ꓾ ꓙꓲ ꓟ ꓕꓲ ꓒꓳꓹ ꓗꓪ ꓐꓰ ꓟꓽ ꓢꓷꓸ ꓢꓴ꓾ ꓟꓽ ꓙꓳ ꓢꓴ ꓑ ꓫꓬ ꓐꓴ ꓔꓯ ꓣꓱꓽ ꓙ ꓠꓹ ꓟ ꓠꓲꓹ ꓟ ꓙꓳ ꓢꓴ ꓠꓬ꓾ ꓗꓴꓷꓼ ꓙꓵꓽ ꓪ ꓟꓶ ꓙꓲꓽ ꓙꓳ ꓢꓴ ꓥ ꓡꓳ=
ꓪ ꓔꓲꓸ ꓙꓵꓽ ꓚꓱꓹ (Monarchy)
ꓡ ꓞꓳ ꓬꓲꓸ ꓜꓴ ꓬꓲꓸ ꓟꓯꓼ ꓐꓴ ꓠꓯꓸꓼ ꓗꓪ ꓐꓰ ꓪ ꓔꓲꓸ ꓓꓳ ꓡ ꓡꓳ= ꓪ ꓔꓲꓸ ꓙꓵꓽ ꓚꓱꓹ ꓠꓬ ꓪ ꓔꓲꓸ ꓬꓲꓸ ꓠꓲꓹ ꓘꓪ ꓫꓵ ꓡꓰ ꓗꓪ ꓛꓲ ꓙꓵꓽ ꓚꓱꓹ ꓚꓰꓼ ꓢꓲꓸ ꓙꓵꓽ ꓟ ꓥ ꓡꓳ= ꓑ ꓫꓬ ꓐꓴ ꓕꓲ ꓒꓳꓹ ꓗꓪ ꓐꓰ ꓮ ꓫꓵꓽ ꓐꓯ ꓙꓵꓽ ꓪ ꓟꓽ ꓙꓳ= ꓪ ꓔꓲꓸ ꓠꓬ ꓙꓵꓽ ꓪ ꓐꓳ ꓢꓴ꓾ ꓪ ꓔꓲꓸ ꓠꓬ ꓙꓵꓽ ꓢꓴ꓾ ꓪ ꓔꓲꓸ ꓠꓬ ꓐꓯ ꓟꓴ ꓐꓯ ꓞꓷꓹ ꓢꓴ ꓒꓬꓱꓼ ꓡ ꓡꓳ= (ꓑ ꓫꓬꓼ ꓙꓵꓽ ꓚꓱꓹ ꓗꓪ ꓠꓬ ꓕꓱ ꓟꓬꓱꓽ ꓓꓽ ꓟ ꓢ ꓩꓴꓸ ꓔꓯ ꓬꓲ ꓜꓴ ꓢ ꓜꓴ ꓡꓰ ꓧꓳꓽ ꓣꓱꓽ ꓝꓲ ꓡꓳ=) ꓖꓳ ꓟ ꓑꓶꓸ ꓓꓴ ꓢꓷꓸ ꓠꓲꓹ ꓙꓳ ꓟ ꓪ ꓔꓲꓸ꓾ ꓔꓱꓹ ꓚꓵ ꓟ ꓔꓯ ꓠꓲꓹ ꓠꓵ ꓟ ꓪ ꓔꓲꓸ꓾ ꓠꓲꓹ ꓟ ꓙꓲ ꓟ ꓪ ꓔꓲꓸ ꓦꓬꓼ ꓠꓬꓲ ꓗꓪ ꓠꓬ ꓑ ꓫꓬ ꓐꓴ ꓔꓬ ꓢ ꓙꓳ ꓢ ꓥ ꓟꓲ꓾ ꓙ ꓗꓴ ꓠꓲꓹ ꓟꓽ ꓡꓳꓼ ꓟ ꓪ ꓔꓲ ꓐꓰ꓾ ꓥꓶꓸ ꓟ ꓪ ꓔꓲꓸ ꓦꓬꓼ ꓠꓬꓲ ꓗꓪ ꓠꓽ ꓑ ꓫꓬ ꓐꓴ ꓔꓬ ꓫꓸ ꓙꓳ ꓫꓸ ꓡꓳ=
ꓪ ꓔꓲꓸ ꓫꓵꓽ ꓚ ꓠꓬ꓾ ꓬꓲꓸ ꓒꓽ ꓬꓲꓸ ꓤ ꓡꓳ ꓚ ꓚ ꓙꓵꓽ ꓢꓴ ꓒꓬꓱꓼ ꓡ ꓚꓰꓼ ꓡꓳ= ꓪ ꓔꓲꓸ ꓡꓰ ꓝꓮꓲ ꓡ ꓠꓹ ꓟ ꓪ ꓔꓲꓸ ꓝꓸ ꓢꓴ ꓢꓲꓻ ꓖꓶ ꓚꓰꓼ ꓡꓳ= ꓖꓳ ꓡꓱ ꓥ ꓟꓲ ꓪ ꓔꓲꓸ ꓕꓲ ꓣꓳ ꓔꓯ ꓒꓳꓹ ꓔꓳꓹ ꓧꓪꓸ ꓡꓰ ꓠꓬ ꓝꓮꓲ ꓪ ꓔꓲꓸ ꓫꓵꓽ ꓚ ꓕꓲ ꓟ ꓙꓳ ꓡ ꓡꓳ= ꓟꓲ ꓠꓯ ꓟ ꓗꓴꓷꓼ ꓮ ꓟꓬꓹ ꓠꓬ ꓪ ꓔꓲꓸ ꓙꓳ ꓠꓬꓲ ꓟ꓾ ꓪ ꓔꓲꓸ ꓙꓵꓽ ꓚꓱꓹ ꓔꓯ ꓢꓳꓽ ꓠꓬꓲ ꓗꓷ ꓟ ꓗꓴꓷꓼ ꓐꓴ ꓥ ꓡꓳ=
ꓚ ꓟꓲꓽ ꓗꓪ ꓟꓬ-ꓟ ꓗꓴꓷꓼ ꓠꓯꓸꓼ ꓗꓪ ꓪ ꓔꓲꓸ ꓙꓳ ꓗꓷ ꓟ ꓞꓳ ꓫꓵꓽ ꓓꓽ ꓟ 3 ꓫꓵꓽ ꓙꓳ ꓡꓳ= ꓣ-ꓘꓮꓲ꓾ ꓟꓳꓠ ꓐꓰ꓾ ꓐ-ꓟ ꓥ ꓡꓳ= ꓬꓲꓸ ꓪ ꓠꓬ ꓙꓵꓽ ꓢꓴ ꓪ ꓔꓲꓸ ꓙꓳ ꓢꓲ꓾ ꓬꓲꓸ ꓟꓶꓽ ꓗꓪ ꓠꓬ ꓐ-ꓟ ꓪ ꓔꓲꓸ ꓡꓰ ꓣ-ꓘꓮꓲ ꓐꓰ꓾ ꓟꓳꓠ ꓪ ꓔꓲꓸ ꓐꓴ ꓙꓵꓽ ꓪ ꓦꓴ ꓔꓯꓹ ꓙꓰ ꓟ ꓥꓳ= 1885 ꓘꓳꓼ ꓗꓪ ꓠꓬ ꓐꓣꓲꓔꓲꓢꓧ ꓐꓴ ꓡꓰ ꓟꓬ-ꓟ ꓗꓴꓷꓼ ꓕꓲ ꓟꓵꓽ ꓡꓱꓸꓼ ꓙꓵꓽ ꓪ ꓦꓴ ꓔꓯꓹ ꓙꓰꓳ= 1948 ꓘꓳꓼ 1 ꓦ 4 ꓠꓬꓲ ꓗꓪ ꓠꓬ ꓐ-ꓟ ꓗꓴꓷꓼ ꓙꓵꓽ ꓪ ꓡꓲꓸ ꓟꓶ ꓡꓰꓳ= ꓖꓳ ꓡꓱ ꓥ ꓟꓲ ꓧꓶꓸ ꓕꓯ ꓙꓳ ꓗꓷ ꓟ ꓞꓳ ꓫꓵꓽ ꓐꓴ ꓚ ꓟꓲꓽ ꓔꓯ ꓠꓬꓲ ꓟꓽ ꓟꓵ ꓢꓲ꓾ ꓐ-ꓟ ꓕꓲ ꓫꓵꓽ ꓡꓰ ꓪꓴꓸ ꓓꓵ ꓣꓱꓽ ꓢꓴ ꓬꓰ ꓠꓹ ꓟ ꓚꓱꓹ ꓟꓳꓸ ꓓꓳ ꓡ ꓡꓳ= ꓕꓳ ꓶ ꓐꓰ ꓥꓳꓽ ꓫꓵ꓾ ꓞꓳ ꓫꓵ꓾ ꓦ ꓡꓱ ꓚꓱꓹ ꓮ ꓙꓵꓽ ꓠꓬ ꓐ-ꓟ ꓚꓱꓹ ꓐ-ꓟ ꓡꓲꓽ ꓔꓯ ꓡꓰ ꓟꓽ ꓓ ꓟꓽ ꓢ ꓛꓳ ꓝꓲ ꓡꓳ= ꓗꓴꓷꓼ ꓙꓵꓽ ꓚꓱꓹ ꓗꓪ ꓞꓳ ꓫꓵꓽ ꓒꓯꓽ ꓟ ꓐꓰ꓾ ꓦ ꓡꓱ ꓚꓱꓹ ꓒꓯꓽ ꓟ ꓙꓳ ꓡ ꓡꓳ= ꓖꓳ ꓟ ꓑꓶꓸ ꓓꓴ ꓮ ꓟꓶ ꓗꓪ ꓛꓲ ꓢꓴ ꓓꓴ ꓙꓴꓽ ꓓꓴ꓾ ꓠꓲꓹ ꓘꓪ ꓟꓽ ꓫꓵ ꓓꓴ ꓙꓳ ꓔꓬ ꓟ ꓥ ꓡꓳ= ꓞꓳ ꓫꓵꓽ ꓮ ꓙꓵꓽ꓾ ꓦ ꓡꓱ ꓚꓱꓹ ꓮ ꓙꓵꓽ ꓔꓯ ꓢꓯꓼ ꓖꓶ ꓟ ꓐꓰ꓾ ꓙꓵꓽ ꓚꓱꓹ ꓡꓰ ꓙ ꓟꓳ ꓘꓶꓽ ꓖꓶ ꓟ ꓙꓳ ꓡ ꓠꓹ ꓟ ꓮ ꓙꓵꓽ ꓢꓴ ꓥꓳ ꓡꓳꓸ ꓔꓬ ꓟ ꓥ ꓡꓳ= ꓮ ꓟꓶ 2021 ꓘꓳꓼ ꓗꓪ ꓠꓬ ꓝꓯ-ꓓ-ꓬꓯ ꓓꓰ-ꓟꓳ-ꓗꓯ-ꓢꓰ (Federal Democracy) ꓙꓵꓽ ꓚꓱꓹ ꓔꓯꓸ ꓟꓳꓸ ꓡ ꓞꓳ ꓐꓴ ꓠꓲꓹ ꓟ ꓡꓱ ꓔꓬ ꓡꓳ= ꓙꓵꓽ ꓚꓱꓹ ꓖꓳ ꓟ ꓗꓪ ꓠꓬ꓾ ꓞꓳ ꓫꓵꓽ ꓕꓲ ꓫꓵ ꓡꓰ ꓝꓮꓲ ꓕꓲ ꓫꓵꓽ ꓔꓯ ꓧꓪꓸ ꓜ ꓟ ꓟꓽ ꓙꓳ ꓙꓳ꓾ ꓮ ꓙꓵꓽ ꓢꓴ ꓚꓲ ꓛꓬ ꓠꓬꓲ ꓖꓴ ꓐꓰ꓾ ꓚꓲ ꓛꓬ ꓶꓽ ꓗꓪ ꓦꓰꓼ ꓕꓶ ꓡꓰ ꓝꓲ ꓐ ꓡ ꓥꓳ ꓐꓰ ꓥꓳ ꓡꓳꓸ ꓔꓬ ꓡꓳ= ꓡ ꓠꓹ ꓟ ꓕꓲ ꓕꓳꓸ ꓗꓪ ꓠꓬ ꓝꓯ-ꓓ-ꓬꓯ ꓟꓸ ꓟꓲꓽ ꓐꓳ ꓙꓰ ꓓꓴ ꓥꓳ=
ꓪ ꓔꓲꓸ ꓙꓵꓽ ꓚꓱꓹ ꓐꓰ꓾ ꓡꓲ-ꓢꓴ ꓐꓴ
ꓡꓲ-ꓢꓴ ꓐꓴ ꓒꓵꓽ ꓒ ꓚ ꓟꓲꓽ ꓗꓪ ꓡꓲ-ꓢꓴ ꓪ ꓔꓲꓸ ꓙꓳ ꓡꓳ= ꓧꓶ ꓒꓽ ꓥ ꓟꓲ ꓧꓶ ꓪ ꓔꓲꓸ ꓙꓳ ꓡꓳ ꓐꓯ ꓡꓳ= ꓡꓲ-ꓢꓴ ꓪ ꓔꓲꓸ ꓠꓬ ꓟꓶ-ꓡꓯꓼ-ꓩꓴ꓾ ꓧꓶꓽ ꓒ ꓪ ꓔꓲꓸ ꓠꓬ ꓬ-ꓚꓳ-ꓩꓴ ꓥ ꓡꓳ ꓐꓯ ꓡꓳ= ꓬꓲꓸ ꓪ ꓠꓬꓲꓽ ꓗꓴꓸ ꓚꓸ ꓗꓪ ꓚꓴ ꓬꓲꓹ ꓓꓶꓽ ꓡꓯ ꓘꓳ ꓟ ꓟꓸ ꓟꓲꓽ ꓐꓰ꓾ ꓟꓯꓼ ꓢꓰꓼ ꓡꓯ ꓘꓳ ꓟ ꓟꓸ ꓟꓲꓽ ꓮ ꓟꓬꓹ ꓙꓳ ꓡꓳ= ꓖꓳ ꓡꓱ ꓥ ꓟꓲ ꓚ ꓟꓲꓽ ꓕꓳ ꓶ ꓕꓶ ꓕꓶ ꓐꓳ ꓔꓸ ꓟ ꓟꓽ ꓥ= ꓮ ꓠꓱ ꓥꓳꓽ ꓡꓰ ꓐꓰ ꓚ ꓩꓴ ꓡ ꓟ ꓥ ꓡꓳ= “ꓗꓶꓸ ꓗꓶꓸ ꓧꓶꓽ ꓒ ꓧꓪꓸ꓾ ꓢꓰꓼ ꓢꓰꓼ ꓡꓲ-ꓢꓴ ꓧꓪꓸ” ꓐꓯ ꓜꓱ ꓔꓯ ꓡꓳꓸ ꓠꓬꓲ ꓠꓬ꓾ ꓢꓰꓼ ꓡꓯ ꓘꓳ ꓟꓬꓱꓽ ꓗꓪ ꓠꓬ ꓡꓲ-ꓢꓴ ꓐꓴ ꓓ ꓢꓲ꓾ ꓗꓶꓸ ꓡꓯ ꓘꓳ ꓟꓬꓱꓽ ꓗꓪ ꓠꓬ ꓧꓶꓽ ꓒ ꓧꓪꓸ ꓟ ꓢꓷ ꓡꓰ ꓝꓲ ꓡꓳ= ꓠꓬꓲꓸ ꓠꓬꓲ ꓗꓪ ꓛꓲ ꓡꓲ-ꓢꓴ ꓠꓬ ꓕꓱ ꓕꓲ ꓑꓹ ꓗꓪ ꓢꓰꓼ ꓡꓯ ꓘꓳ ꓟꓬꓱꓽ ꓬꓰ ꓙꓰ ꓡꓯ ꓐꓯ ꓕꓯ꓾ ꓠꓲꓹ ꓟ ꓠꓬꓱꓸ ꓢꓴ꓾ ꓢꓯꓼ ꓟꓬ ꓖꓶ ꓑꓶꓸ ꓓꓴ ꓟꓬꓽ ꓡꓳ= ꓖꓳ ꓡꓱ ꓥ ꓟꓲ ꓮ ꓤ ꓤ ꓚꓴ ꓬꓲꓹ ꓓꓶꓽ ꓢꓴ꓾ ꓢꓷꓸ ꓠꓲꓹ ꓗꓪ ꓐꓰ ꓟꓬꓱꓽ ꓬꓰ ꓢꓴ ꓟꓽ ꓙꓳ ꓢꓰ= ꓡꓲ-ꓢꓴ ꓐꓰ ꓧꓶꓽ ꓒ ꓪ ꓔꓲꓸ ꓐꓴ ꓚ ꓟꓲꓽ ꓠꓬ ꓧꓶꓸ ꓕꓯ ꓟ ꓦꓬꓼ ꓠꓬꓲ ꓗꓪ ꓟꓵꓽ ꓕꓲ ꓟꓵꓽ ꓕꓲ ꓡꓳ ꓗꓽ ꓢꓴ꓾ ꓗꓪꓼ ꓢꓴ ꓟꓯꓼ ꓜꓲꓽ ꓐꓴ ꓙꓵꓽ ꓟ ꓦꓬꓼ ꓠꓬꓲ ꓥ ꓠꓬꓲ꓾ ꓚꓵ ꓚꓵ ꓙꓳ ꓗꓷ ꓒꓬꓱꓼ ꓗꓷ ꓟ ꓔꓯ ꓖꓴ ꓟꓳꓸ ꓔꓬ ꓟ ꓚ ꓟꓲꓽ ꓥꓳ ꓐꓰ ꓢꓪꓼ ꓟꓶ ꓓ ꓡꓳ= ꓚ ꓟꓲꓽ ꓗꓪ ꓡꓲ-ꓢꓴ ꓪ ꓔꓲꓸ ꓙꓳ ꓡꓳ ꓐꓰ ꓐꓯ ꓟ ꓗꓪ ꓐꓰ ꓡꓲ-ꓢꓴ ꓠꓬ ꓮ ꓕꓯ ꓕꓯ ꓑ ꓫꓬ ꓬꓰ ꓔꓬ ꓢꓴ꓾ ꓟꓯꓼ ꓘꓰꓹ ꓔꓬ ꓢꓴ ꓟꓽ ꓥ= ꓮ ꓠꓱ ꓕꓯ ꓡꓲ-ꓢꓴ ꓠꓬ ꓙꓵꓽ ꓪ ꓣꓱꓽ ꓢꓴ꓾ ꓑꓶꓸ ꓒꓽ ꓥꓳꓹ ꓒꓽ꓾ ꓟꓯꓼ ꓢꓰꓼ ꓓ ꓒꓽ꓾ ꓧꓪꓸ ꓒꓽ ꓬꓰ ꓠꓬꓲ ꓢꓴ ꓥ ꓡꓳ ꓐꓰ ꓢꓳ ꓣꓴ ꓟꓶ ꓢꓲꓸ ꓠꓬꓲꓸ ꓠꓬꓲ ꓟ ꓡꓲ-ꓢꓴ ꓐꓴ ꓥ ꓟꓲ꓾ ꓧꓪꓸ ꓒꓽ ꓑꓶꓸ ꓒ ꓠꓲꓹ ꓟ꓾ ꓙꓵꓽ ꓪ ꓣꓱꓽ ꓢꓴ ꓠꓲꓹ ꓟ ꓙꓳ ꓡ ꓠꓹ ꓟ ꓬꓰ ꓙ ꓓꓴ ꓙꓳ ꓡꓳ=