ꓑ ꓫꓬ ꓡꓰ ꓢꓲꓻ ꓔꓸ ꓢꓴ ꓟꓽ ꓥ ꓟ ꓟꓯꓼ ꓜꓲꓽ ꓟꓰꓹ-ꓮꓳ-ꓡꓮꓲꓽ ꓔꓯ ꓟꓬ-ꓟ ꓗꓴꓷꓼ ꓟꓬꓱꓽ ꓢꓲꓺ ꓓꓽ ꓟ (Prime Minister) ꓘꓴ ꓥꓳꓽ ꓡꓰꓳ ꓐꓯ ꓢꓲꓸ Amnesty International ꓡꓰ ꓟꓬ-ꓟ ꓑ ꓫꓬ ꓔꓯ ꓖꓶ ꓬꓲꓽ ꓩꓴ ꓡ ꓡꓳ꓿
2022 ꓘꓳꓼ 8 ꓦ 12 ꓠꓬꓲ ꓗꓪ Human Rights Watch ꓜꓴ ꓐꓰ ꓠꓱꓸ ꓐꓯꓼ ꓜꓴ ꓮ ꓙꓵꓽ 12 ꓜꓴ ꓔꓺ ꓧꓳꓽ ꓕꓳ ꓶ ꓕꓲ ꓚꓴꓸ ꓔꓯ ꓟꓯꓼ ꓜꓲꓽ ꓟꓰꓹ-ꓮꓳ-ꓡꓮꓲꓽ ꓔꓯ ꓐꓳ ꓩꓴ ꓗꓷ ꓟ ꓗꓪ꓾ “ꓒꓵꓽˍ ꓟ ꓗꓴꓷꓼ ꓟꓬꓱꓽ ꓢꓲꓺ ꓓꓽ ꓟ” ꓐꓰ ꓣꓱꓽ ꓗꓷ ꓟ ꓠꓬ ꓟꓽ ꓜꓳꓽ ꓡꓰꓳ꓾ ꓬꓲꓸ ꓠꓬ ꓟꓬ-ꓟ ꓗꓴꓷꓼ ꓙꓵꓽ ꓢꓴ ꓧꓳꓽ ꓢꓴ ꓥꓻꓳ ꓐꓰ ꓥꓪ ꓠꓴ ꓘꓳ ꓣꓴ ꓟꓽ ꓐ ꓡ ꓐꓰ Amnesty International ꓜꓴ ꓡꓰ ꓖꓶ ꓬꓲꓽ ꓡꓽ ꓩꓴ ꓡ ꓟ ꓥ ꓡꓳ꓿
ꓟꓯꓼ ꓜꓲ ꓟꓰꓹ-ꓮꓳ-ꓡꓮꓲꓽ ꓔꓯ 12 ꓜꓴ ꓡꓰ ꓕꓳ ꓶ ꓐꓳˍ ꓟ ꓙ ꓖꓴ ꓠꓬ꓾ ꓗꓴꓷꓼ ꓗꓪ ꓟ ꓤ ꓠꓱ ꓐꓴ ꓢꓷꓸ ꓠꓲꓹ ꓢꓳ ꓚꓱꓹ ꓔꓯ ꓟꓳꓸ ꓖꓪ ꓙꓱ ꓘꓶꓽ ꓐꓰ꓾ ꓜꓲꓼ ꓓꓴ ꓘꓴ ꓕꓳ ꓶ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓟꓰꓹ-ꓮꓳꓽ-ꓡꓮꓲꓽ ꓔꓯ ꓖꓴ ꓔꓸ ꓟ ꓐꓯ ꓘꓶꓽ ꓠꓬ ꓬꓲꓸ ꓖꓻ ꓟꓽ ꓙꓳ ꓐꓯ ꓢꓲꓸ ꓠꓖꓳ 156 ꓜꓴ ꓡꓰ ꓕꓼ ꓕꓳ ꓶ ꓡꓽ ꓩꓴ ꓡ ꓡꓳ꓿ ꓟꓽ ꓞꓲ ꓟꓲꓸ ꓟꓲ ꓠꓬ ꓠꓴꓖ ꓗꓪ ꓐꓰ ꓥ ꓟꓲ ꓕꓳ ꓶ ꓕꓱ ꓡꓱ ꓐꓳ ꓢꓴ 12 ꓜꓴ ꓔꓯ ꓕꓼ ꓕꓳ ꓶ ꓐꓳ ꓩꓴ ꓡ ꓡꓳ꓿
ꓟꓯꓼ ꓜꓲ ꓟꓰꓹ-ꓮꓳ-ꓡꓮꓲꓽ ꓔꓯ ꓕꓳ ꓶ ꓐꓳ ꓢꓴ 12 ꓜꓴ ꓗꓪ ꓐꓰ ꓟꓬ-ꓟ ꓑ ꓫꓬ ꓐꓴ ꓔꓯ ꓬꓲꓸ ꓪꓴꓸ ꓖꓶ ꓬꓲꓽ ꓡ ꓢꓴ ꓕꓲ ꓜꓴ ꓠꓬ Amnesty International ꓥ ꓡꓳ꓿
ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓗꓪ ꓗꓴꓷꓼ ꓪꓴꓸ ꓓꓵ꓾ ꓗꓴꓷꓼ ꓟꓬꓱꓽ ꓢꓲꓺ ꓓꓽ ꓟ ꓐꓰ ꓗꓴꓷꓼ ꓚꓱꓹ ꓟꓴ ꓚꓱꓹ ꓗꓪ ꓧꓳꓽ ꓣꓱꓽ ꓢꓴ ꓠꓬ ꓑ ꓫꓬ ꓡꓰ ꓠꓲꓹ ꓒꓴ ꓒꓴ ꓢꓲꓻ ꓪ ꓔꓸ ꓢꓴ ꓥ ꓠꓯˍ ꓡꓳ꓾ ꓐꓰ ꓢꓪꓼ ꓡꓳ꓿