ꓠꓬꓲꓸ ꓠꓬꓲ 2022 ꓘꓳꓼ 3 ꓦ 20 ꓠꓬꓲ ꓕꓯꓽ꓾ ꓟꓯꓼ ꓗꓪ ꓐꓰ ꓓꓳ ꓡꓯ꓾ ꓐꓶꓽ ꓗꓴꓷꓼ ꓗꓪ ꓔꓬ ꓙꓰ ꓐꓰ꓾ ꓑ ꓫꓬ ꓳ ꓟꓶꓽ (ပြည်သူ့ရင်ခွင်) ꓜꓴ ꓗꓪ ꓐꓰ ꓚꓱꓹ ꓟꓳꓸ ꓖꓶ ꓩꓴ ꓡ ꓡꓳ꓿
ꓢꓷ ꓙ ꓟꓴ ꓙ ꓕꓳ ꓶ ꓗꓪ꓾ ꓟꓯ; ꓗꓪ ꓐꓰ ꓓꓳ ꓡꓯ꓾ ꓑ ꓫꓬ ꓳ ꓟꓶꓽ ꓜꓴ ꓗꓪ ꓟꓬꓱꓺ ꓐꓳ ꓗꓶ ꓡꓯ꓾ ꓟꓵꓽ ꓘꓶꓽ ꓗꓪ ꓐꓰ ꓠꓱꓸ ꓐꓯꓼ ꓗꓴꓷꓼ ꓗꓪ ꓓꓵꓽ ꓙꓰ꓾ ꓴꓠꓧꓚꓣ ꓗꓪ ꓟꓬꓱꓺ ꓐꓳ ꓗꓶ꓾ ꓟꓯꓼ ꓐꓴ ꓔꓯ ꓘꓳ ꓣꓴˍ ꓟ ꓗꓴꓷꓼ ꓗꓪ ꓛꓰꓹ ꓑꓬ ꓪ ꓠꓹ ꓟ ꓓꓰꓽ ꓕꓳ ꓶ ꓗꓶꓺ ꓐꓰ ꓕꓲ ꓝꓸ ꓕꓲ ꓝꓸ ꓟꓸ ꓖꓶ ꓔꓸ ꓡꓳ꓿
ꓳ-ꓢꓲ-ꓔꓯ-ꓡꓲ-ꓬ ꓗꓪ꓾ (ꓥ ꓠꓬ) ꓠꓱꓸ ꓐꓯꓼ ꓕꓲ ꓗꓴꓷꓼ ꓗꓴꓷꓼ ꓗꓪ ꓙꓰ ꓠꓹ ꓟ ꓙ ꓖꓴ ꓮ ꓡꓲ ꓬꓰ ꓠꓹ ꓟ ꓟꓳꓸ ꓖꓶ ꓓꓴ ꓥꓳ ꓐꓰ꓾ ꓑ ꓫꓬ ꓳ ꓟꓶꓽ (ပြည်သူ့ရင်ခွင်) ꓜꓴ ꓡꓰ ꓢꓷ ꓙ ꓟꓴ ꓙ ꓩꓴ ꓡ ꓟ ꓥ ꓡꓳ꓿
ꓟꓬ-ꓟ ꓟꓯꓼ ꓒꓽ ꓐꓴ ꓟꓯꓼ ꓗꓪ ꓐꓰ ꓓꓳ ꓡ ꓠꓬ ꓑ ꓫꓬ ꓠꓲꓹ ꓫꓵˍ ꓟ ꓓꓰ-ꓟꓳ-ꓗꓯ-ꓢꓰ ꓚꓱꓹ ꓗꓪ ꓡꓽ ꓙꓰ ꓚꓱꓹ ꓗꓪ ꓞꓳ ꓢꓰꓼ ꓪ ꓢꓰꓼ ꓫꓵꓽ ꓓꓳˍ ꓟ ꓠꓲꓸ ꓡꓰ ꓓˍ ꓥꓳ ꓐꓰ ꓓꓵꓽ ꓙ ꓢꓲꓸ ꓕꓱ ꓡꓱ ꓪꓴꓸ ꓔꓬ ꓟ ꓥ ꓡꓳ꓿
ꓝꓮꓲ ꓕꓲ ꓐꓱ ꓑꓓꓝ ꓜꓴ ꓐꓴ ꓡꓰ꓾ ꓟꓬ-ꓟ ꓟꓯꓼ ꓗꓪ ꓐꓰ ꓖꓳ ꓓꓱꓽ ꓖꓳꓽ ꓓꓳ ꓡˍ ꓟ ꓟꓽ ꓥ ꓥ꓾ ꓟꓯꓼ ꓡ ꓛꓴꓸ ꓶ ꓤ ꓔꓯꓹ ꓢꓲꓸ ꓓꓳ ꓡ ꓢꓴ ꓔꓯ ꓠꓬ 30-50 ꓢꓯꓹ ꓡꓯꓼ ꓫꓴ ꓖꓶ ꓔꓬ ꓟˍ ꓟꓲ ꓙꓳˍ ꓡꓳ꓿
ꓠꓬꓲꓸ ꓠꓬꓲ ꓗꓪ ꓛꓲ ꓟꓬ-ꓟ ꓟꓯꓼ ꓗꓪ ꓐꓰ ꓑ ꓫꓬꓽ ꓔꓯ ꓪꓽ ꓡ ꓢꓴ ꓬꓲꓸ ꓔꓴ ꓟꓽ ꓞꓲ ꓙꓳ ꓡꓰꓳ ꓐꓰ ꓢꓷ ꓙ ꓟꓴ ꓙ ꓔꓸ ꓡꓳ꓿
“ꓚꓲ ꓛꓬ ꓘꓹ ꓚꓲ ꓛꓬ ꓟꓵꓽ ꓔꓯ ꓮ ꓔꓳꓸ ꓛꓴ ꓠꓰ꓾ ꓐꓳꓽ ꓞꓰ ꓠꓰ ꓬꓲꓸ ꓧꓶꓽ ꓬꓰ ꓩꓴ ꓡ ꓠꓰ ꓟꓹ ꓟ ꓦꓲ ꓗꓪ ꓡꓲꓸ ꓡꓽ ꓙꓰ ꓟꓽ ꓑꓶꓸꓳ꓿ ꓑ ꓫꓬ ꓠꓰ ꓠꓲꓹ ꓜꓳ ꓓꓴ ꓟ ꓔꓯ ꓖꓶ ꓜꓲꓽ ꓟꓽ ꓘꓴ ꓠꓬꓲ ꓚꓓꓟ ꓬꓰ ꓡꓻꓳ ꓫꓵꓽ ꓥꓳ” ꓐꓰ 2022 ꓘꓳꓼ 3 ꓦ 20 ꓠꓬꓲ ꓕꓯꓽ ꓘꓼ-ꓟꓼ-ꓬ 351 ꓟꓯꓼ ꓓꓼ ꓙꓵꓽ ꓢꓴ ꓟꓯꓼ ꓜꓲꓽ ꓟꓬꓳꓹ-ꓟꓰꓹ-ꓕꓴꓸ ꓡꓰ Khit Thit Media ꓗꓪ ꓒꓳꓹ ꓖꓶ ꓔ ꓡꓳ꓿
ꓕꓲ ꓐꓱ ꓟꓯꓼ ꓐꓴ ꓠꓬ ꓐꓶꓽ ꓟꓵꓽ ꓗꓪ ꓟꓽ ꓙꓰ ꓙꓰ ꓟꓯꓼ ꓢꓰꓼ ꓡꓯ ꓘꓳ ꓓꓴ ꓙ ꓖꓶ ꓔꓬ ꓢꓴ ꓙꓳˍ ꓡꓳ꓿