ꓟꓬ-ꓟ ꓗꓴꓷꓼ ꓶ ꓡꓯꓼ ꓚꓱꓹ ꓠꓬ ꓮ ꓫꓵꓽ ꓡꓲꓸ ꓚꓹ ꓟꓽ ꓙꓲ ꓬꓰ ꓠꓰ ꓡ ꓠꓹ ꓟ ꓦꓬꓼ ꓠꓬꓲ ꓗꓪ ꓮ ꓡꓲ ꓒꓬꓱꓼ ꓡ ꓥꓳ ꓐꓯˍ ꓟ ꓔꓯ ꓚꓹ ꓟꓽ ꓙꓲ ꓬꓰꓳ꓾ ꓐꓰ ꓲꓟꓝ- ꓟꓲ ꓠꓯ ꓒꓴ ꓞꓳꓽ ꓦꓲ ꓚꓰꓺ ꓓꓽ ꓟ ꓗꓪ ꓐꓰ ꓢꓷ ꓙ ꓟꓴ ꓙ ꓩꓴ ꓡ ꓡꓳ꓿
ꓟꓬ-ꓟ ꓠꓬ 2010 ꓗꓪ ꓐꓰ ꓶ ꓡꓯꓼ ꓚꓱꓹ ꓗꓪ ꓮ ꓤ ꓤ ꓓꓯꓻ ꓡ ꓟ ꓠꓬ 2021 ꓘꓳꓼ ꓗꓪ ꓡꓯꓽ ꓟꓰꓹ -18 ꓛꓲ ꓬꓰ ꓡꓳ꓿ ꓖꓳ ꓗꓸ ꓠꓯꓸ ꓠꓬ ꓮ ꓫꓵꓽ ꓥ ꓟꓲ ꓥꓳ ꓡꓳꓸ ꓓꓴ ꓟꓽ ꓙꓳ꓾ ꓢꓪꓼ ꓟꓽ ꓙꓲ ꓬꓰ ꓟ ꓑꓶꓸ ꓓꓴ꓾ ꓟꓽ ꓢꓪꓼ ꓢꓪꓼ ꓛꓹ ꓔꓸ ꓟ ꓕꓳ ꓶ ꓓꓳ ꓡ ꓟ ꓥ ꓡꓳ꓿
ꓙꓼ ꓞꓶ꓾ ꓣꓱꓽ ꓫꓵꓽ ꓣꓱꓽ ꓙꓰ ꓒꓵꓽ ꓓꓯꓻ ꓡ ꓟ ꓡꓰ ꓐꓰ ꓪꓴꓻ ꓠꓲꓹ ꓫꓵ ꓡꓲ ꓪꓴꓻ ꓪ ꓟꓽ ꓓ ꓟ ꓦꓬꓼ ꓠꓬꓲ ꓗꓪ ꓓꓵꓽ ꓡ ꓔꓬ ꓡꓳ꓿ “ꓠꓯ ꓞꓲꓼ ꓠꓯ ꓟꓲ꓾ ꓙ ꓞꓶ ꓞꓰꓹ ꓬꓰ ꓡ ꓔꓳꓼ ꓥꓳ” ꓐꓰ ꓟꓬ-ꓟ ꓡꓳ ꓑ ꓐꓴ ꓡꓰ ꓐꓯ ꓔꓬ ꓡꓳ꓿
ꓖꓳ ꓡꓱ ꓥ ꓟꓲ ꓟꓯꓼ ꓙꓵꓽ ꓢꓴ ꓐꓱ ꓶ ꓫꓸ ꓕꓱ ꓢꓴ ꓜꓳ-ꓟꓰꓹ ꓕꓴꓸ ꓡꓰ “ꓙꓼ ꓞꓶ ꓮ ꓫꓵꓽ ꓐꓯ ꓖꓴ ꓟꓽ ꓓ ꓙꓳˍ ꓥ꓿ ꓟꓽ ꓚ ꓐꓯ ꓧꓳꓽ ꓟꓸ ꓓꓴ ꓥꓳ” ꓐꓰ ꓓꓳꓽ ꓐꓯ ꓒꓬꓱꓻ ꓙꓵꓹ ꓗꓪ ꓐꓯ ꓔꓸ ꓡꓳ꓿
ꓝꓮꓲ ꓟꓬ-ꓟ ꓟꓯꓼ ꓜꓲꓽ ꓟꓰꓹ-ꓮꓳꓽ-ꓡꓮꓲꓽ ꓫꓸ ꓕꓱ ꓘꓶꓽ ꓔꓯ ꓟꓲꓸ ꓟꓲ ꓓꓳˍ ꓟ ꓓꓳꓽ ꓕꓳ ꓶ ꓐꓴ ꓗꓪ꓾ “ꓗꓴꓷꓼ ꓕꓲꓽ ꓗꓴꓷꓼ ꓗꓪ ꓗꓴꓷꓼ ꓚꓱꓹ ꓢꓯꓼ ꓪ꓾ ꓟꓯꓼ ꓚꓱꓹ ꓢꓯꓼ ꓪ꓾ ꓶ ꓡꓯꓼ ꓢꓯꓼ ꓪ ꓐꓯ ꓢꓲꓸ 3 ꓫꓵꓽ ꓙꓳˍ ꓟ ꓗꓪ ꓐꓰ ꓶ ꓡꓯꓼ ꓢꓯꓼ ꓪ ꓠꓬ ꓬꓲꓸ ꓚꓰꓺ ꓥ ꓡꓳ꓿ ꓖꓳ ꓟ ꓑꓶꓸ ꓓꓴ ꓶ ꓡꓯꓼ ꓚꓱꓹ ꓪꓴꓽ ꓟꓴ ꓡ ꓠꓹ ꓟ ꓬꓰ ꓠꓯˍ ꓡꓳ” ꓐꓯ ꓔꓸ ꓡꓳ꓿