ꓟꓬ-ꓟ ꓟꓯꓼ ꓬꓰ ꓔꓸ ꓟ ꓝꓴꓲꓸ ꓡꓳ ꓚ ꓟꓸ ꓙꓽ ꓙꓲˍ ꓟ ꓙꓵꓽ ꓗ Burma Act 2021 ꓔꓯ ꓴꓢꓮ ꓑ ꓫꓬ ꓝꓲ ꓓꓴ ꓙꓱ ꓘꓪ ꓕꓲ ꓝꓸ ꓖꓪ ꓙꓱ ꓜꓲꓼ ꓓꓴ ꓓꓽ ꓟ ꓗꓪ 2022 ꓘꓳꓼ 4 ꓦ 6 ꓠꓬꓲ ꓕꓯꓽ ꓪꓽ ꓩꓴꓳ꓿
“2021 ꓘꓳꓼ ꓗꓪ ꓗꓴꓷꓼ ꓙꓵꓽ ꓪ ꓦꓴ ꓢꓲꓸ ꓡ ꓞꓳ 1700 ꓟꓽ ꓞꓲ ꓢꓰꓼ ꓢꓴ ꓟꓬ-ꓟ ꓟꓯꓼ ꓠꓬ ꓚꓲꓸ ꓛꓬ ꓬꓰ ꓔꓸ ꓟ ꓝꓬꓲꓸ ꓚꓲꓸ ꓛꓬ ꓟꓯꓻ ꓠ ꓗ ꓥꓳ ꓐꓯˍ ꓟ ꓒꓴ ꓒꓴ ꓡꓯꓽ ꓡꓯꓽ ꓢꓷꓸ ꓡꓰ ꓝꓲˍ ꓟ ꓥꓳ꓿ ꓝꓮꓲ ꓟꓬ-ꓟ ꓑ ꓫꓬ ꓐꓴ ꓡꓲꓹ ꓙꓰ ꓟꓶ ꓚꓱꓹ ꓢꓯꓼ ꓕꓵꓼ ꓔꓬ ꓟ ꓗꓪ ꓚꓲꓸ ꓛꓬ ꓥ ꓟꓲ ꓔꓺ ꓪ ꓠꓬꓲ ꓟꓬꓱꓺ ꓓꓳ ꓕꓲ ꓘꓶꓽ ꓥꓳ” ꓐꓰ ꓴꓢꓮ ꓙꓱ ꓘꓪ ꓕꓲ ꓕꓲꓸ ꓑ ꓫꓬ ꓝꓲ ꓓꓴ ꓜꓴ ꓧꓳꓽ ꓢꓴ Gregory W. Meeks ꓡꓰ ꓐꓯ ꓡꓳ꓿
“ꓙꓱ ꓘꓪ ꓕꓲ ꓝꓸ ꓑ ꓫꓬ ꓝꓲ ꓓꓴ ꓐꓴ ꓡꓰ Burma Act 2021 ꓔꓯ ꓪꓽ ꓩꓴ ꓡ ꓟ ꓮ ꓘꓶꓸ ꓜꓳꓽ ꓪ꓿ ꓝꓸ ꓢꓲꓸ ꓮ ꓟꓴ ꓕꓲ ꓝꓸ ꓑ ꓫꓬ ꓝꓲ ꓓꓴ ꓐꓴ ꓥ ꓟꓲ ꓙꓵꓽ ꓗ ꓕꓱ ꓟ ꓔꓯ ꓪꓽ ꓠ ꓔꓸ ꓥ” ꓐꓰ Global Witness ꓜꓴ ꓡꓰ ꓥ ꓟꓲ ꓢꓯꓼ ꓖꓶ ꓩꓴ ꓡ ꓡꓳ꓿
ꓴꓢꓮ ꓑ ꓫꓬ ꓝꓲ ꓓꓴ ꓐꓴ ꓗꓪ ꓙꓱ ꓩꓪ ꓕꓲ ꓝꓸ ꓐꓰ꓾ ꓮ ꓟꓴ ꓕꓲ ꓝꓸ ꓐꓯ ꓢꓲꓸ ꓜꓴ ꓓꓽ ꓟ ꓠꓬꓲꓽ ꓜꓴ ꓙꓳˍ ꓟ ꓥ ꓡꓳ꓿ ꓙꓵꓽ ꓗ ꓕꓲ ꓟ ꓔꓶꓺ ꓠꓹ ꓟ ꓕꓱ ꓠꓬꓲꓽ ꓜꓴ ꓕꓲ ꓡꓰ ꓪꓽ ꓬꓰ ꓢꓲꓸ ꓗꓴꓷꓼ ꓙꓵꓽ ꓜꓴ ꓧꓳꓽ ꓢꓴ ꓡꓯꓼ ꓓꓴ ꓢꓽ ꓩꓴ ꓡ ꓠꓬ꓾ ꓙꓵꓽ ꓗ ꓖꓳ ꓟ ꓟꓬꓱꓽ ꓬꓰ ꓪꓴꓸ ꓔꓴ ꓡ ꓓꓴ ꓥ ꓡꓳ꓿
Burma Act 2021 ꓙꓵꓽ ꓗ ꓔꓶ ꓪ ꓡꓰ ꓐꓭˍ ꓠꓬ꓾ ꓴꓢꓮ ꓗꓴꓷꓼ ꓙꓵꓽ ꓜꓴ ꓗꓪ ꓐꓰ ꓟꓬ-ꓟ ꓗꓴꓷꓼ ꓗꓪ ꓓꓰ-ꓟꓳ-ꓗꓯ-ꓢꓰ ꓚꓱꓹ ꓒꓳꓹ ꓡ ꓗꓪ ꓛꓲ ꓢꓯꓼ ꓕꓵꓼ ꓙ ꓠꓹ ꓟ ꓝꓲ ꓓꓴ ꓓꓽ ꓕꓲ ꓣꓳ ꓖꓶꓽ ꓡ ꓥꓳ꓿ ꓝꓮꓲ ꓕꓮꓲꓹ ꓗꓴꓷꓼ ꓐꓰ ꓐꓲ-ꓖ-ꓡ-ꓓꓯ-ꓫꓲ ꓗꓴꓷꓼ ꓐꓴ ꓗꓪ ꓐꓰ ꓕꓲ ꓝꓸ ꓟꓬ-ꓟ ꓑ ꓫꓬ ꓐꓴ ꓔꓯ ꓬꓰ ꓙ ꓔꓳꓹ ꓙ ꓟ ꓬꓰ ꓡ ꓥꓳ꓿ ꓝꓮꓲ ꓣꓳ-ꓦꓲ-ꓙ ꓞꓳ ꓫꓵꓽ ꓐꓴˍ ꓐꓰ ꓟꓬ-ꓟ ꓑ ꓫꓬ ꓐꓴ ꓔꓯ ꓫꓸ ꓟꓴ ꓫꓸ ꓚꓬ ꓬꓰ ꓖꓶꓽ ꓔꓬ ꓟ ꓟꓬ-ꓟ ꓟꓯꓼ ꓔꓯ ꓗꓽ ꓔꓸ ꓡ ꓥꓳ꓿ ꓬꓲꓸ ꓬꓰ ꓗꓷ ꓟ ꓝꓴꓲꓸ ꓡꓳ ꓚ ꓝꓬꓲꓸ ꓪꓽ ꓒꓵꓽ ꓖꓶ ꓓꓴ ꓬꓰ ꓡ ꓥꓳ꓿