ꓟꓬ-ꓟ ꓒꓵꓽ ꓡꓳ ꓔꓶꓺ ꓲ-ꓓꓲ-ꓬ ꓗꓪ ꓚꓳꓸ ꓥꓻꓳ ꓐꓯ ꓢꓲ ꓴꓢꓮ ꓗꓪ ꓪꓴꓽ ꓔꓬ

ꓟꓬ-ꓟ ꓗꓴꓷꓼ ꓗꓪ ꓐꓰ ꓓꓳ_ ꓟ ꓑꓳꓽ ꓢꓲꓽ꓾ ꓪꓰꓸ ꓒꓵꓽ ꓡꓳ ꓬꓲ ꓫꓵ ꓬꓲ ꓙꓰ ꓔꓯ ꓲ-ꓓꓲ-ꓬ ꓶ ꓡꓯꓼ ꓜꓴ ꓦꓖꓡ (Vaibhav Global Limited) ꓡꓰ ꓲ-ꓓꓲ-ꓬ ꓟꓵꓽ ꓗꓪ ꓐꓰ ꓓꓳ_ ꓟ ꓒꓵꓽ ꓡꓳ ꓡꓰ ꓐꓰ ꓗꓶꓸ ꓢꓲꓸ ꓴꓢꓮ ꓟꓵꓽ ꓗꓪ ꓪꓴꓽ ꓔꓬ ꓟ ꓔꓯ ꓟꓬ-ꓟ ꓐꓱ ꓶ ꓔꓱꓹ ꓜꓳ ꓟ ꓧꓪ ꓜꓴ (Justice for Myanmar) ꓡꓰ ꓠꓬꓲꓸ ꓠꓬꓲ 2021 ꓘꓳꓼ 11 ꓦ 24 ꓠꓬꓲ ꓕꓯꓽ ꓐꓯ ꓒꓴ ꓒꓳꓹ ꓔꓳꓹ ꓩꓴ ꓡ ꓡꓳ=

ꓟꓬ-ꓟ ꓗꓴꓷꓼ ꓗꓪ ꓟꓯꓼ ꓡꓰ 2021 ꓘꓳꓼ 2 ꓦ 1 ꓠꓬꓲ ꓕꓯꓽ ꓙꓵꓽ ꓪ ꓣꓴ ꓢꓲꓸ ꓑ ꓫꓬ ꓔꓯ ꓠꓬꓲꓸ ꓤꓲ ꓔꓬ꓾ ꓢꓰꓼ ꓔꓬ ꓟ ꓗꓪ VGL ꓶ ꓡꓯꓼ ꓜꓴ ꓠꓬ ꓡ ꓟꓶꓽ ꓗꓺ_ ꓡꓰꓽ (ꓮ ꓫꓵꓽ ꓟꓽ ꓚ) ꓕꓱ ꓡꓱ ꓬꓰ ꓔꓬ ꓟ ꓠꓬ ꓟꓽ ꓜꓳ꓾ ꓕꓱ ꓟ ꓔꓯ ꓠꓲꓹ ꓞ ꓑꓲꓸ ꓩꓴ ꓠ ꓔꓸ ꓥ꓾ ꓐꓰ Justice for Myanmar ꓜꓴ ꓡꓰ ꓐꓯ ꓩꓴ ꓡ ꓡꓳ=“ꓟꓬ-ꓟ ꓶ ꓡꓯꓼ ꓜꓴ ꓔꓯ ꓶ ꓡꓯꓼ ꓚꓱꓹ ꓑꓲꓸ ꓩꓴ ꓡ ꓓꓴ ꓟ ꓦ ꓐ 6 ꓟ ꓗꓪ ꓛꓲ ꓟꓬ-ꓟ ꓒꓵꓽ ꓡꓳ ꓬꓲ ꓫꓵ ꓬꓲ ꓙꓰ ꓔꓯ ꓴꓢꓮ ꓗꓴꓷꓼ ꓗꓪ ꓒꓴ ꓒꓴ ꓡꓯꓽ ꓡꓯꓽ ꓕꓱ ꓡꓱ ꓪꓴꓽ ꓝꓲ ꓔꓬ ꓟ ꓠꓬ ꓬꓲꓸ ꓥꓳꓽ ꓟꓽ ꓙꓳ” ꓐꓰ Justice for Myanmar ꓗꓪ ꓟ ꓫꓸ ꓕꓱ ꓢꓴ ꓬ-ꓓ-ꓠ-ꓟꓮꓳ ꓡꓰ ꓐꓯ ꓩꓴ ꓡ ꓡꓳ=

ꓴꓢꓮ ꓗꓪ ꓟ ꓗꓴꓷꓼ ꓙꓵꓽ ꓜꓴ ꓐꓰ꓾ ꓑ ꓫꓬ ꓝꓲ ꓓꓴ ꓐꓴ ꓥ ꓟꓲ ꓕꓱ ꓟ ꓔꓯ ꓠꓲꓹ ꓞ ꓟꓬꓱꓽ ꓬꓰ ꓩꓴ ꓡ ꓠꓹ ꓟ Justice Myanmar ꓡꓰ ꓓꓰꓽ ꓔꓸ ꓡꓳ= ꓟꓬ-ꓟ ꓗꓴꓷꓼ ꓗꓪ ꓐꓰ ꓓꓳ_ ꓟ ꓑꓳꓽ ꓢꓲꓽ꓾ ꓪꓰꓸ ꓐꓰ ꓠꓱꓸ ꓐꓯꓼ ꓒꓵꓽ ꓡꓳ ꓬꓲ ꓫꓵ ꓬꓲ ꓙꓰ ꓮ ꓟꓬꓹ ꓔꓯ Amazon, Overstock, Walmart ꓡꓰꓳ ꓫꓵꓽ ꓗꓪ ꓪꓴꓽ ꓔꓬ ꓢꓲ꓾ ꓒꓵꓽ ꓡꓳ ꓚꓴꓸ ꓓꓳ ꓡ ꓟ ꓬꓲꓸ ꓚꓰꓺ ꓗꓴꓷꓼ ꓔꓯ ꓲ-ꓓꓲ-ꓬ ꓥ ꓡꓳ ꓐꓰ ꓗꓶꓸ ꓔꓸ ꓡꓳ꓾ ꓐꓯ ꓡꓳ= ꓦꓖꓮ ꓶ ꓡꓯꓼ ꓜꓴ ꓠꓬ ꓞꓲ ꓠꓲꓹ ꓕꓲ ꓘꓳꓼ ꓗꓪ ꓶ ꓡꓯꓼ ꓚꓱꓹ ꓗꓪ ꓐꓰ ꓪ ꓠꓹ ꓟ ꓟꓳꓸ ꓙ ꓔꓸ ꓟ US$234.9 (ꓓꓳ-ꓡ 234 ꓪꓹ ꓕꓯꓽ ꓢꓲ) ꓙꓳ ꓡꓳ=