ꓗꓴꓷꓼ ꓙꓵꓽ ꓪ ꓣꓴ ꓔꓸ ꓟ ꓟꓬ-ꓟ ꓟꓯꓼ ꓡꓰ ꓟꓬ-ꓟ ꓒꓴ 4 ꓢꓯꓹ ꓪꓹ (400 ꓐꓲ-ꓡꓲ-ꓬ) ꓠꓬꓲꓸ ꓓꓳ ꓩꓴꓳ ꓐꓰ ꓟꓯꓼ ꓗꓳ-ꓢꓰ ꓡꓰ ꓢꓷ ꓙ ꓟꓴ ꓙ ꓡꓳ꓿
4 ꓢꓯꓹ ꓪꓹ (400 ꓐꓲ-ꓡꓲ-ꓬ) ꓠꓬꓲꓸ ꓓꓳ ꓩꓴ ꓡ ꓟ ꓗꓪ ꓐꓰ 3.3 ꓢꓯꓹ ꓪꓹ (330 ꓐꓲ-ꓡꓲ-ꓬ) ꓔꓯ ꓗꓴꓷꓼ ꓙꓵꓽ ꓜꓴ ꓟꓬꓱꓽ ꓚꓱꓹ ꓗꓪ ꓣꓱꓽ ꓠꓹ ꓟ 2022 ꓘꓳꓼ 8 ꓦ 12 ꓠꓬꓲ ꓕꓯꓽ ꓜꓲꓼ ꓓꓴ ꓬꓰ ꓢꓲꓸ ꓡꓯꓼ ꓙꓱ ꓗꓷ ꓡꓳ꓿
ꓕꓱ ꓟ ꓗꓪ ꓐꓰ ꓠꓡꓓ ꓗꓴꓷꓼ ꓙꓵꓽ ꓜꓴ ꓦꓬꓼ ꓠꓬꓲ ꓗꓪ ꓒꓴ 1 ꓓꓳ ꓡ 1300 ꓠꓬ ꓮ ꓟꓶ 1 ꓓꓳ ꓡ 3000 ꓒꓯꓼ ꓕꓯꓽ ꓢꓲ ꓙꓻ ꓙꓰꓳ꓿ ꓕꓱ ꓟ ꓠꓬ ꓚꓺ ꓟꓲ ꓕꓲ ꓙ ꓖꓴ ꓡꓱꓸꓼ ꓗꓪ ꓟꓬ-ꓟ ꓒꓴ ꓒꓵꓽ ꓬꓲꓸ ꓥꓳꓽ ꓟꓽ ꓜꓯꓼ ꓞꓰ ꓡꓰˍ ꓟ ꓦꓬꓼ ꓠꓬꓲ ꓥ ꓡꓳ꓿
ꓟꓬ-ꓟ ꓗꓴꓷꓼ ꓗꓪ ꓟ ꓒꓴ ꓙꓳ ꓢꓴ ꓠꓬ ꓫꓵꓺ꓾ ꓟꓳ-ꓓꓳ꓾ ꓐꓱ ꓘꓴꓽ ꓐꓰ ꓶ ꓤ ꓶ ꓟꓲ ꓪꓴꓻ ꓢꓲꓸ ꓒꓴ ꓒꓵꓽ ꓞꓰ ꓡꓰˍ ꓟ ꓔꓯ ꓗꓽ ꓓ ꓡꓰ ꓞꓲꓼ ꓬꓰ ꓔꓬ ꓡꓳ꓿
ꓶ ꓡꓯꓼ ꓬꓰ ꓜꓴ ꓟꓬꓽ ꓠꓬꓲ ꓠꓬ꓾ ꓞꓳꓸ ꓓꓰꓼ ꓡꓰꓳ ꓐꓰ ꓐꓯ ꓢꓲꓸ ꓠꓽ ꓡꓰ ꓚꓱꓹ ꓧꓪ ꓓꓰꓽ ꓔꓬ ꓡꓳ꓿
ꓖꓳ ꓡꓱ ꓥ ꓟꓲ ꓟꓯꓼ ꓜꓲ ꓟꓰꓹ-ꓮꓳ-ꓡꓮꓲꓽ ꓡꓰ ꓐꓯˍ ꓟ ꓠꓬ꓾ ꓟꓬ-ꓟ ꓶ ꓡꓯꓼ ꓚꓱꓹ ꓪꓴꓸ ꓓꓵ ꓛꓵꓽ ꓥꓸ ꓡ ꓠꓹ ꓟ ꓚꓱꓹ ꓙ ꓖꓶ ꓔꓬ ꓡꓳ꓾ ꓐꓯ ꓡꓳ꓿
ꓟꓲ ꓠꓯ ꓗꓪ ꓟ ꓶ ꓡꓯꓼ ꓢꓷꓸ ꓠꓲꓹ ꓙꓳ ꓢꓴ ꓐꓴ ꓡꓰ ꓢꓪꓼ ꓟ ꓠꓬ꓾ ꓟꓽ ꓢꓪꓼ ꓢꓪꓼ ꓒꓴ ꓒꓬꓽ ꓮ ꓟꓬꓹ ꓥꓰꓸ ꓓꓳ ꓡ ꓠꓬꓲ꓾ ꓒꓴ ꓒꓵꓽ ꓞꓰ ꓡꓰ ꓟ ꓔꓯ ꓗꓽ ꓔꓸ ꓟꓽ ꓐ ꓡ꓾ ꓐꓯ ꓡꓳ꓿