ꓞꓳ ꓐꓳ ꓬꓳ-ꓢꓷ ꓔꓯ ꓟꓳꓸ ꓬꓲꓸ ꓤ ꓟꓶꓼ ꓙꓴꓡꓲꓮ ꓢꓰꓔꓔ ꓡꓰ ꓫꓸ ꓕꓱ ꓔꓸ ꓟ ꓬꓲꓸ ꓫꓵꓽ ꓬꓲ ꓙꓰ ꓠꓬ ꓟꓽ ꓚꓽ꓾ ꓖꓳ ꓟ ꓑꓶꓸ ꓓꓴ ꓙꓴꓡꓲꓮ ꓢꓰꓔꓔ ꓐꓰ ꓝꓮꓲ ꓞꓳ ꓐꓳ ꓬꓳ-ꓢꓷ ꓟꓬꓱ ꓓꓳꓽ ꓒꓰꓼ ꓡꓰ ꓥꓳꓽ ꓫꓸ ꓕꓱ꓾ ꓐꓳ ꓔꓬ ꓢꓴ ꓔꓯ ꓙꓵꓽ ꓗ ꓡꓳ ꓚ ꓫꓵꓽ ꓬꓰ ꓓꓴ ꓥꓳ꓾ ꓐꓰ ꓞꓳ ꓐꓳ ꓬꓳ-ꓢꓷ ꓝꓲꓺ ꓘꓶꓽ ꓡꓳ ꓚ ꓫꓵꓽ ꓕꓱ ꓢꓴ ꓜꓲꓽ ꓟꓴꓽ ꓐꓴ ꓡꓰ ꓗꓴꓷꓼ ꓫꓵꓽ ꓓꓳꓽ ꓕꓳ ꓶ ꓗꓪ ꓠꓬꓲꓸ ꓠꓬꓲ ꓢꓷ ꓙ ꓟꓴ ꓙ ꓔꓸ ꓡꓳ꓿
ꓙꓴꓡꓲꓮ ꓢꓰꓔꓔ ꓡꓰ ꓬꓲꓸ ꓪ ꓢ ꓟꓸ ꓡꓼ ꓔꓯ ꓬꓲꓸ ꓐꓹ ꓐ ꓞꓳ ꓐꓳ ꓬꓳ-ꓢꓷ ꓡꓰ ꓫꓸ ꓟꓴ ꓫꓸ ꓚꓬ ꓬꓰ ꓔꓬ ꓟ ꓗꓪ ꓐꓰ “ꓡꓲꓹ ꓖꓶ ꓩꓴ ꓡꓯ” ꓐꓰ ꓕꓳ ꓶ ꓗꓪ ꓐꓰ ꓥ ꓟꓲ꓾ ꓢꓯꓸ ꓐꓬꓱ ꓗꓪ ꓐꓰ ꓥ ꓟꓲ ꓓꓰꓽ ꓔꓸ ꓟ ꓙꓳˍ ꓡꓳ꓿ Julia Sett (Find your colors) page ꓗꓪ ꓡꓳꓸ ꓟꓳ ꓓ ꓡꓳ꓿
ꓟꓲꓸ ꓟꓲ ꓠꓬ ꓢꓯꓸ ꓐꓬꓱꓽ ꓗꓪ ꓞꓳ ꓐꓳ ꓬꓳ-ꓢꓷ ꓡꓰ꓾ “ꓟꓽ ꓚꓽ꓾ ꓟꓽ ꓥꓻꓳ ꓫꓵꓽ ꓔꓯ ꓮ ꓔꓳ ꓔꓳ ꓐꓯ ꓒꓬꓱ ꓩꓴ ꓡ ꓟ ꓑꓶꓸ ꓓꓴ ꓥꓪ ꓠꓲꓹ ꓟ ꓜꓲꓽ ꓫꓸ ꓡꓰꓳ꓾ ꓬꓲꓸ ꓬꓲꓼ ꓡ ꓩꓽ ꓡ ꓟ ꓜꓽ ꓫꓵꓽ ꓣꓱꓽˍ ꓠꓬꓲ ꓕꓲꓽ ꓧꓪꓸ ꓠꓬ ꓓꓶꓽ ꓗꓷꓳ꓿ ꓟꓽ ꓓꓶꓽ ꓐꓯ꓿ ꓥꓪ ꓤ ꓟꓶꓼ ꓔꓯ ꓠꓲꓹ ꓲꓼ ꓡ ꓝꓲ ꓟꓴ ꓢꓱˍ ꓠꓬꓲ ꓥꓳ꓿ ꓬꓲꓸ ꓖꓳ ꓓꓱꓽ ꓗꓪ ꓬꓲꓸ ꓐꓬꓱꓽ ꓜꓸ ꓐꓳ ꓔꓸ ꓟ ꓔꓯ ꓖꓶ ꓥꓪ ꓟꓽ ꓠꓵꓻ꓿ ꓥꓪ ꓠꓴ ꓡꓲ-ꓢꓴ ꓗꓪ ꓕꓱ ꓡꓱꓳ ꓫꓵꓽ ꓟꓽ ꓙꓳ꓿ ꓡꓲꓽ ꓒꓰꓼ ꓡꓳ ꓚ ꓐꓯˍ ꓟ ꓥꓳ꓿ ꓬꓲꓸ ꓟꓹ ꓟ ꓠꓬ ꓡꓴ ꓟꓲꓽ ꓥ ꓟ ꓑꓶꓸ ꓓꓴ ꓖꓪ ꓓꓴ ꓥ ꓟꓲ ꓓꓼ ꓖꓸ ꓐꓵ ꓞꓲꓽ ꓥ ꓟꓲ ꓡꓴ ꓟꓲꓽ ꓡꓲꓽ ꓒꓰꓼ ꓡꓳ ꓚ ꓙꓲ ꓙꓲ ꓖꓪꓽ ꓝꓲ ꓠꓲꓹ ꓫꓵ ꓟ ꓥꓳ꓿ ꓮ ꓟꓶ ꓙꓴꓡꓲꓮ ꓢꓰꓔꓔ ꓡꓰ ꓬꓰ ꓓꓳ ꓡ ꓟ ꓠꓬ ꓡꓲꓽ ꓒꓰꓼ ꓚꓱꓹˍ ꓟꓲ ꓟꓶꓽ ꓡꓰꓳ” ꓐꓯˍ ꓡꓳ꓿ ꓕꓱ ꓟ ꓔꓯ ꓠꓬ Ye Zaw Tun Account ꓗꓪ ꓟꓳꓸ ꓖꓶ ꓔꓸ ꓡꓳ꓿
ꓳ-ꓡꓮꓲꓹ ꓗꓪ ꓠꓽ ꓬꓲꓸ ꓒꓽ ꓜꓳꓽ ꓥ꓾ ꓬꓲꓸ ꓤ ꓟꓶꓼ ꓜꓳꓽ ꓐꓰ ꓐꓯ ꓧꓳꓺ ꓡꓯ ꓘꓳ ꓢꓴ ꓮ ꓟꓬꓹ ꓙꓳˍ ꓡꓳ꓿
ꓖꓳ ꓟ ꓗꓪ ꓞꓳ ꓐꓳ ꓬꓳ-ꓢꓷ ꓔꓯ ꓢꓷꓸ ꓢꓴ ꓐꓴ ꓡꓰ ꓬꓲꓸ ꓠꓬ ꓠꓲꓹ ꓟ ꓙꓲ ꓢꓴ꓾ ꓬꓲꓸ ꓤ ꓠꓱ ꓔꓯ ꓠꓲꓹ ꓠꓵ ꓢꓴ ꓐꓹ ꓐ ꓕꓲꓽ ꓣꓳ ꓥꓳ ꓐꓰ ꓢꓷ ꓙ ꓟꓴ ꓙ ꓢꓴ ꓮ ꓟꓬꓹ ꓙꓳˍ ꓡꓳ꓿