2022 ꓘꓳꓼ 12 ꓦ 21 ꓠꓬꓲ ꓕꓯꓽ ꓬꓴ-ꓗ-ꓣꓲ ꓗꓴꓷꓼ ꓪꓴꓸ ꓓꓵ ꓜ-ꓡꓯ-ꓢꓲ-ꓗꓲ ꓐꓰ ꓴꓢꓮ ꓗꓴꓷꓼ ꓪꓴꓸ ꓓꓵ ꓙꓳꓹ-ꓐ-ꓓꓲ ꓐꓴ ꓠꓬ ꓪ-ꓫꓲ-ꓔ ꓡꓳ ꓒꓱ ꓗꓪ ꓜꓲ ꓡꓯ ꓘꓳ ꓡꓳ꓿
ꓜꓲ ꓡꓯ ꓘꓳˍ ꓟ ꓗꓪ ꓜ-ꓡꓯ-ꓢꓲ-ꓗꓲ ꓠꓬ ꓐꓯ ꓞꓲꓽ ꓙꓲ ꓙꓲ ꓟꓽ ꓖꓪ ꓔꓸ꓿ ꓟꓯꓼ ꓘꓶꓽ ꓗꓪ ꓐꓰ ꓡ ꓟ ꓢꓷꓸ ꓡꓰ ꓓꓴ ꓟꓯꓼ ꓐꓵ ꓞꓲꓽ ꓒꓬꓱꓽ ꓙꓳˍ ꓟ ꓠꓲꓹ ꓛꓵꓼ ꓛꓵꓼ ꓕꓲꓽ ꓘꓱꓹ ꓖꓪꓽ ꓔꓸ ꓡꓳ꓿
ꓝꓮꓲ ꓬꓲꓸ ꓠꓬ ꓮꓽ ꓟꓲ ꓕꓯꓽ ꓐ-ꓟꓴꓼ Bakhmut ꓡꓳ ꓒꓱ ꓗꓪ ꓚꓳ ꓙꓰ ꓗꓷ ꓢꓲ꓾ ꓖꓳ ꓗꓪ ꓔꓬ ꓟ ꓬꓴ-ꓗ-ꓣꓲꓸ ꓟꓯꓼ ꓜꓲꓽ ꓕꓲ ꓣꓳ ꓡꓰ ꓙꓳꓹ-ꓐ-ꓓꓲ ꓐꓱ ꓶ ꓖꓶꓽ ꓩꓴ ꓡ ꓡꓳ ꓐꓯ ꓢꓲꓸ ꓬꓴ-ꓗ-ꓣꓲꓸ ꓟꓯꓼ ꓔꓳꓹ ꓠꓷꓼ ꓒꓬꓸ ꓕꓲꓽ ꓟ ꓡꓯꓼ ꓙꓱ ꓡꓳ꓿ ꓙꓳꓹ-ꓐ-ꓓꓲ ꓡꓰ ꓥ ꓟꓲ ꓟꓯꓼ ꓜꓲꓽ ꓐꓱ ꓶ ꓴꓢꓮ ꓟꓯꓼ ꓔꓳꓹ ꓠꓷꓼ ꓓꓴ ꓖꓶꓽ ꓡ ꓩꓴ ꓠꓲꓹ ꓫꓵ ꓡꓳ꓾ ꓐꓯ ꓡꓳ꓿
ꓕꓱ ꓟ ꓠꓬ ꓣ-ꓫꓸ ꓟꓯꓼ ꓘꓶꓽ ꓔꓯ ꓔꓳꓹ ꓡꓯ ꓘꓳ ꓔꓬ ꓟ ꓬꓴ-ꓗ-ꓣꓲꓸ ꓟꓯꓼ ꓐꓰ ꓴꓢꓮ ꓐꓴ ꓗꓪꓺ ꓛꓳꓽ ꓑꓺ ꓡꓯ ꓘꓳ ꓔꓬ ꓟ ꓢꓷꓸ ꓡꓰ ꓓꓴ ꓥ ꓡꓳ꓿
ꓴꓢꓮ ꓠꓬ ꓬꓴ-ꓗ-ꓣꓲꓸ ꓔꓯ ꓓꓳ-ꓡ 51000 ꓪꓹ (51 billions) ꓬꓰ ꓙ ꓠꓹ ꓟ꓾ ꓪꓽ ꓠꓬꓲˍ ꓟ Patriotic ꓑꓳꓺ ꓡꓳꓺ ꓐꓳꓽ ꓬꓰ ꓙ ꓠꓹ ꓟ ꓟꓳꓸ ꓙ ꓔꓸ ꓡꓳ꓿
ꓜ-ꓡꓯ-ꓢꓲ-ꓗꓲ ꓠꓬ ꓴꓢꓮ ꓑ ꓫꓬ ꓝꓲ ꓓꓴ ꓖꓪ ꓙꓱ ꓜꓲꓼ ꓓꓴ ꓐꓰ꓾ ꓠꓱꓸ ꓐꓯꓼ ꓜꓴ ꓜꓲꓼ ꓓꓴ ꓮ ꓟꓬꓹ ꓔꓯˍ ꓟꓲ ꓫꓸ ꓕꓱ ꓠꓹ ꓟ ꓥ ꓡꓳ꓿
ꓜ-ꓡꓯ-ꓢꓲ-ꓗꓲ ꓔꓯ ꓴꓢꓮ ꓡꓰ ꓘꓳ ꓣꓴ ꓟ ꓠꓬ ꓢꓲ ꓡꓲꓹ ꓡ ꓚꓱꓹ ꓐꓱ ꓶ ꓗꓽ ꓔꓸ ꓓꓴ ꓒꓬꓱꓼ ꓡ ꓝꓲ ꓡꓳ꓾ ꓐꓰ ꓣ-ꓫꓸ ꓡꓰ ꓙꓽ ꓘꓶꓽ ꓩꓴ ꓡ ꓡꓳ꓿
ꓴꓢꓮ ꓠꓬ ꓣ-ꓫꓸ ꓡꓰ ꓬꓴ-ꓗ-ꓣꓲꓸ ꓟꓵꓽ ꓦꓴ ꓔꓬ ꓕ ꓑꓳꓸ ꓬꓴ-ꓗ-ꓣꓲꓸ ꓗꓸ ꓠꓯꓸ ꓢꓲꓺ ꓗꓪ ꓦꓰꓼ ꓔꓺ ꓙ ꓔꓬ ꓓꓴ ꓥꓳ ꓐꓰ ꓢꓷꓸ ꓙ ꓟꓴ ꓙ ꓔꓬ ꓟ ꓥ ꓡꓳ꓿